កម្តៅ​នយោបាយ​នៅកូរ៉េ​ ជំរុញឱ្យ​មាន​ការ​ប្រៀបធៀប​ភាព​អសកម្ម​របស់​រដ្ឋសភា​នៅ​កម្ពុជា

កម្តៅ​នយោបាយ​នៅកូរ៉េ​ខាងត្បូង​ប៉ុន្មាន​ថ្ងៃនេះ​បាន​ជំរុញ​ឱ្យ​មាន​ការប្រៀបធៀបភាព​អសកម្ម​របស់​រដ្ឋសភា​នៅ​កម្ពុជា​ដែល​អង្គុយ​ចំាតែ​លើកដៃ​បើក​ប្រាក់ខែ​រាស្ត្រម្នាក់ ៥ពាន់ដុល្លារ ពីមួយ​អាណត្តិ​ទៅ​មួយ​អាណត្តិ បើទោះ​បីកម្ពុជា​រងការ​ស្តីបន្ទោស​ពីសហគ​មន៍​អន្តរជាតិ ជុំ​វិញ​កា​រំលោភ​សិទ្ធិ​មនុស្ស​ក្តី។

បញ្ហា​នេះអ្នកឃ្លាំ​មើល​និយាយ​​ថា មូលដ្ឋាន​គ្រឹះ​​ជំរុញ​ឱ្យ​មេដឹកនាំ​ប្រទេស​កូរ៉េ​ខាង​ត្បូង​ដក​ថយ មិន​ប្រើ​ច្បាប់​អាជ្ញាសឹក ដោយ​សារ​សភា​តំណាង​រាស្ត្រ​គេ​ខ្លាំង រួមទាំង​ចំនុច​ពិសេស​មួយចំនួន​ទៀត។

ការ​លើក​ឡើង​នេះ​ក្រោយ​ប្រធានាធិបតី​ លោក យូន សុកយោល ពីថ្ងៃទី៣ ខែធ្នូ បាន​ប្រកាស​ប្រើ​ច្បាប់​អាជ្ញាសឹក ដាក់​ប្រទេស​ក្នុងគ្រា​អាសន្ន​ បាន​ប្រមាណ​តែ​ ៣ម៉ោង ក៏ប្រកាស​លុប​ចោល​វិញ ក្រោម​សម្ពាធ​ពី​ការ​តវ៉ា​របស់​សមាជិក​សភា និង​រលក​តវ៉ា​ពីពលរដ្ឋ។

ជុំវិញ​ព្រឹត្តិការណ៍​នយោបាយ​អន្តរជាតិនេះ ប្រធាន​ក្រុមប្រឹក្សា​ឃ្លាំមើល​កម្ពុជា លោក ម៉ែន ណាត ថ្លែង​កោត​សរសើ​ចំពោះ​ការស្រុះដៃគ្នា​ពី​ពលរដ្ឋ​កូរ៉េ មន្រ្តី​បក្ស​ប្រឆាំង រួមទាំង​សមាជិក​សភា​ពី​បក្ស​កាន់​អំណាច​ផង បាន​ងើប​តាវ៉ា​ទាំង​យប់ ដោយ​តម្តល់​ប្រយោជន៍ជាតិ​ជាធំ​ ការពារ​ប្រជាធិបតេយ្យ​ក្នុង​ប្រទេស​ខ្លួន​ដែល​កម្ពុជា​គួរ​រៀន​សូត្រ​តាម។

ជ្រុង​មួយ​នៃ​ព្រឹត្តិការណ៍​នេះ លោក​កត់​សម្កាល់ថា គ្រាដែល​ប្រធានាធិបតី​កូរ៉េ​បញ្ចេញ​កង​ទ័ព​ឡោមព័ទ្ធ​រដ្ឋសភា​ទាំងកណ្តាលយប់​ តែ​សមាជិក​បក្ស​ប្រឆាំងនៅ​ប្រទេស​កូរ៉េ មិន​រត់​ចោល​រដ្ឋសភា​នោះទេ ពោល​គឺនៅតែអង្កុយ​ប្រជុំ​ដើម្បី​ជំទាស់​លើកា​រ​សម្រេច​របស់មេដឹក​នាំ​ប្រទេសកូរ៉េ ដែល​នេះ​ហាក់ផ្ទុយ​ពីបក្ស​ប្រឆាំង​នៅកម្ពុជាដែល​នៅ​មាន​ភាពទន់​ជ្រាយ​នៅ​ឡើយ។

លោកថា«ការពារ​រដ្ឋធម្មនុញ្ញ​របស់​គេ ការពារ​ភាព​ត្រឹមត្រូវ​នៃច្បាប់ គេអត់​ខ្លាច​ដាក់​អី​ដាក់​ទៅ គឺ​គេ​នៅតែ​ប្រឆាំង​ អាហ្នឹង​ជាទង្វើ​ចាស់ទុំ​របស់​គេ ហើយ បញ្ជាក់​ពីភាព​ត្រឹមត្រូវ​ខាង​ផ្លួវច្បាប់​ក្នុងនាម​គេជា​សមាជិក​សភា តំណាង​រាស្រ្ត​របស់​ប្រទេសជាតិ មាន​ការ​ទទួលខុស​ត្រូវ​ខ្ពស់ណាស់។ ដោយ​ឡែក នៅ​កម្ពុជា​វិញ​ការទទួល​ខុស​ត្រូវ​ បក្សប្រឆាំង​នៅមាន​កំរិត​មិនមែន​គាត់​មិន​ស្រលាញ់​ជាតិ​ទេ​ គាត់ស្រលាញ់​ប៉ុន្តែ​ឱ្យ​តែ​ឃើញ​គេ គំរាម​បន្តិច​បន្តួច​ហ្នឹង អ្នកខ្លះ​ត្រង់កន្ទុយ​បាត់ សុខ​មិន​សុខ​​ចុះចូលជាមួយគេទៀត »

ជាងនេះ​ទៅទៀត លោក ម៉ែន ណាត កត់​សម្គាល់ឃើញថា មន្រ្តីរាជការ​ខ្មែរ រួម​មាន សមាជិក​សភា ព្រឹទ្ធ​សភា​បក្សកាន់​អំណាច រាជការខ្មែរ​វិញ​ក៏​គិត​តែប្រយោជន៍​ផ្ទាល់ខ្លួន​ ជា​ជាងប្រយោជន៍ជាតិ ដែល ផ្ទុយ​ពី​មន្រ្តី​បក្ស​កាន់អំណាច​នៅប្រទេស​កូរ៉េ  ដែល​មាន​ទាំង​មនសិការ​ជាតិខ្ពស់ និងភាពក្លាហាន​​ផងដែរ។

លោកថា៖ «ហើយ​ពួក​តំណាង​រាស្រ្ត ពួកមន្រ្តី​រាជការ​ស្អី​អស់ហ្នឹង គឺរួញ​ក្បាល​ ដូចក្បាលអណ្តើក​ចឹង ឃើញ​ស្ថានភាព​មិនល្អ​លាក់ខ្លួន​ក្នុងស្នូកបាត់។ បញ្ហាវា​ប្រឈម ឃើញ​ទេ​លោក ហ៊ុន សែន បាន​ដៃ​កំទេច​ប្រជាធិបតេយ្យ កំទេច​ស្ថានភាព​សិទ្ធិមនុស្ស រំលោភ​រដ្ឋធម្មនុញ្ញ ហើយ​ពួកមន្រ្តី​សមាជិកសភា  ពួក​ព្រឹទ្ធសភា ពួករដ្ឋាភិបាល​អស់​ហ្នឹងបន្ទរ​តាមលោក ហ៊ុន សែន ម្លោះ​ហើយ​ធ្វើ​ឱ្យ​ប្រទេសជាតិ​វា​ធ្លាក់​ចូល​ក្នុង​វិបត្តិ»

ព្រឹត្តិការណ៍​នយោបាយ​នៅកូរ៉េនេះ សារពត៌មាន BBC ចុះផ្សាយ​ថា ស្ថិត​ក្នុង​ស្ថានភាព​ជ្រួល​ច្របល់​ទាំងយប់ ស្ត្រីម្នាក់​បានឈរ តទល់​នឹង​កាណុង​កាំភ្លើង​របស់កង​ទ័ព ដោយភាព​ក្លាហាន ថែម​ទាំង​បាន​រុញ​ច្រាន​កាំភ្លើង​របស់កងទ័ព​ចេញ ហើយ​និយា​យថា “យើង​ត្រូវ​តែបញ្ឈប់​រឿងនេះ”។

ប្រធានាធិបតី​កូរ៉េខាង​ត្បូង បាន​ប្រកាស​ប្រើច្បាប់​អាជ្ញាសឹក​នេះ ដោយ​លើក​ហេតុផល​ថា ក្រុម​ប្រឆាំង​ដែលមាន​និន្នាការ​គាំទ្រ​កូរ៉េខាងជើង បាន​រៀបចំ​សកម្មភាព​ប្រឆាំង​នឹង​រដ្ឋកូរ៉េ​ខាងត្បូង។

ប៉ុន្តែ​ចំណាត់​ការ​នេះ ត្រូវបាន​ប្រជាពលរដ្ឋ​កូរ៉េ រួមទាំង​គណបក្ស​ប្រឆាំង និង​សមាជិកសភា​មកពី​បក្សកាន់​អំណាចផងដែរ ចាត់ទុក​ថា ជា​ភាព​ផ្តាច់​ការ ប្រាស​ចាក​​រដ្ឋ​ធម្មនុញ្ញ​​កូរ៉េ​ខាងត្បូង​។

ក្រោម​សម្ពាធ​តវ៉ា​ពីពលរដ្ឋ​រាប់​ពាន់​នាក់ ប្រមាណ៣ម៉ោង​ក្រោយ​ មេដឹកនាំ​រូបនេះ​ប្រកាស​លុប​ចោល​ច្បាប់​អាជ្ញា​សឹង​នេះ​វិញ ខណៈ​រដ្ឋម​​ន្រ្តី​ការពារ​ជាតិកូរ៉េ រដ្ឋមន្រ្តី​ក្រសួងអប់រំ រដ្ឋមន្រ្តី​ក្រសួង​យុត្តិធម៌ ជាដើម​បាន​ប្រកាស​លាឈប់​ពី​តំណែង​ផង​ដែរ ដោយ​ពួកគេ​ថា​ មិនអាច​បំរើ​មេដឹក​នាំ​ផ្ដាច់​ការ​បាន​ទេ។

អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់​គំនិត និងការ​ស្រារជ្រាវ លោក សេក សុជាតិ កត់​សម្គាល់​​ឃើញ​ថា ប្រទេស​កូរ៉េ​ខាងត្បូង​មានគ្រឹះ​រឹងមាំ​ខ្លាំង​ ផ្នែក​ប្រជាធិបតេយ្យ ខណៈ​ពលរដ្ឋ​មាន​ចំណេះដឹង​ខ្ពស់ និង​ភាព​ក្លាហាន​ ហ៊ាន​ប្រឆាំង​ទង្វើ​អ្នកនយោបាយ​រូបណា​ដែលដើ​រផ្ទុយ​ពី​គោលការណ៍​ប្រជាធិបតេយ្យ និង​រដ្ឋ​ធម្មនុញ្ញ។

បើតាម​លោកសេក សុជាតិ បាន​គូសបញ្ជាក់​ថា ទាំងពលរដ្ឋ និងអ្នកនយោបាយ​គ្រប់​ភាគី បើ​ចង់​ឱ្យ​កម្ពុជា​ ជា​ប្រទេស​មាន​នីតិរដ្ឋ​រឹងមាំ​ដូច​កូរ៉េ​ខាងត្បូង ត្រូវតែ​ផ្លាស់ប្តូ​ឥរិយាបទ​របស់​ខ្លួន​ធ្វើយ៉ាងណា​យក​គំរូតាម​ជនជាតិ​កូរ៉េ ហើយ​មន្រ្តីរាជការ​ ជាពិសេស​សមាជិក​សភា គួរ​ធ្វើខ្លួន​ឱ្យ​សាកសម​នឹង​ប្រាក់ខែ​ដែល​ទទួល​បាន​ពី​ការ​បង់​ពន្ធ​របស់​ប្រជាពលរដ្ឋ ដូច​ដែល​សមាជិក​សភាកូរ៉េ​បាន​កោះ​ប្រជុំ​បន្ទាន់​ទោះ​មាន​ការ​ពង្រាយ​កង​ទ័ព​ក្តី។

លោកថា៖«មេដឹក​នាំទោះ​បី​ជា​មាន​ឥទ្ធិពល ឬ​ក៏មា​នអំណាច​ធំ​ទី​១​ នៅ​ក្នុងប្រទេស​ក៏ដោយ ក៏ប៉ុន្តែ​ពួកគាត់​មិន​អាច​ធ្វើការ​សម្រេច​ចិត្ត​ដោយ​អន្ត​នោម័ត​ណា​មួយ​ទេ​ នៅពេល​ប្រជាពលរដ្ឋ មាន​ចំណេះដឹង មាន​ការយល់​ដឹងទា​ក់​ទង​ជាមួយ​នឹងច្បាប់​ ហើយ​និង​សិទ្ធិ​របស់​គាត់​ក្នុង​នាម​ជា​ម្ចាស់​អំណាច​ »

លោកបន្ថែមថា៖ «ដូចច្នេះ​នេះ​ជា​បទ​ពិសោធន៍​មួយ​ដ៏​ល្អ ហើយ​អ្នក​នយោបាយ​កម្ពុជា​រួមទាំង​មន្រ្តីរាជការ​គ្រប់​ឋានា​នុក្រម​ទាំង​អស់ គួរ​ពិចារណា តម្កល់​ផល​ប្រយោជន៍​រួម​របស់​សង្គម ហើយ​និង​ប្រទេសជាតិ ជាពិសេស​គឺ​លើក​កម្ពស់ សិទ្ធិ​របស់​ម្ចាស់​អំណាច ដែល​ជា​ប្រជា​ពលរដ្ឋ ដែល​គាំទ្រ​ឱ្យ​ពួក​គាត់​ក្លាយ​ទៅជា​ថ្នាក់​ដឹកនាំ​ប្រទេស ហើយ​និង​ជា​អ្នក​ទទួល​បាន​ប្រាក់បៀវត្ស​ពីពួក​គាត់​តាម​រយៈ​ការ​បង់​ពន្ធ» 

ជាមួយគ្នា​នេះ ប្រធាន​ស្តីទី​គណបក្ស​សង្រ្គោះ​ជាតិ លោក​ សម រង្សី បញ្ចេញ​មតិ​លើហ្វេសប៊ុក​លោក​ថា​ អ្វី​ដែល​​​អាច​​រៀនបាន​​ពី​ប្រទេស​​កូរ៉េ​​ខាង​ត្បូង​​​គឺ​ ពេល​វេលា​​មួយ​ដ៏​​ត្រឹម​ត្រូវ​ ​​ត្រូវ​ក្រោក​ឈរ​ឡើង​ទាំងអស់​គ្នា ​រួម​​គ្នា​​អាច​​បង្ខំ​​មេ​​ដឹក​​នាំ​​​ដក​​ថយ​ដើម្បី​​ស្វែង​រក​​ដំណោះ​ស្រាយ​រួម​​សម្រាប់​​ប្រទេស​​ទាំង​មូល​​រួមគ្នា។ លោក​សង្គត់​ធ្ងន់​ថា ប្រទេសជាតិ​គឺ​ជា​របស់​ប្រជាជន​ទាំង​អស់​គ្នា មិនមែន​ជា​កម្មសិទ្ធ​ផ្តាច់​មុខ​របស់​មេដឹក​នាំ ឬគ្រួសារ​ណាមួយ​ឡើយ ពោល​គឺ​ត្រូវ​​សម្រេច​​អនាគត​​ប្រទេស​​ជាមួយ​គ្នា ​មិន​​​ប្រគល់​​ប្រទេស​ឲ្យ​គ្រួសារ​​ណា​​មួយ​​មក​សម្រេច​​ជំនួស​នោះទេ។

ដោយ៖ លោក សែន សច្ចៈ

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ