លីកាដូ​រកឃើញថា​ ឆ្នាំ២០២៤ មាន​ករណី​ចាប់​ខ្លួន​សកម្មជន​យ៉ាងតិច​ ១០២នាក់

អង្គការ​លីកាដូ​រកឃើញថា អាណត្តិ លោក ហ៊ុន ម៉ាណែតមានករណី​ចាប់ខ្លួន​សកម្ម​ជន​សង្គម​យ៉ាង​គំហុក​ យ៉ាងតិច​១០២នាក់ នៅឆ្នាំ​២០២៤នេះ  ដោយសារ​ពួក​គេ​រិះ​គន់​គោល​នយោបាយ​រដ្ឋាភិបាល។

នេះ​បើ​តាម​ទិន្ន័យ​កត់ត្រា​ត្រួសៗ របស់​អង្គការ​លីកាដូ ចេញ​ផ្សាយ​នៅ​ថ្ងៃ​ទី១១ ខែធ្នូនេះ ក្នុង​អត្ថបទ​មួយ​ដែល​​លីកាដូ ដាក់​ចំណង​ជើងថា «ឆ្នាំ២០២៤ រឿងរ៉ាវ​នៃការ​ចាប់​ខ្លួន​របស់​សកម្មជន​មួយ​ចំនួន​នៅ​កម្ពុជា​»

បើ​តាម​លីកាដូ នៅ​ក្នុង​​ឆ្នាំ​ ​២​០​២​៤​ ​នេះ​ ​មាន​ការ​​ឃាត់​ ​ចាប់​ខ្លួន​ ​និង​ឃុំ​ខ្លួន​​ក្នុង​​ពន្ធ​នាគា​រ​ ​យ៉ាង​​ច្រើន​សន្ធឹក​សន្ធាប់​ ​ទៅ​លើ​​សកម្មជន​​នយោបាយ​ ​សកម្មជន​​សហជីព​ ​សិស្ស​និស្សិត​ ​សកម្មជន​​ការពារ​​បរិស្ថាន​ ​និង​ពលរដ្ឋ​​សាមញ្ញ​​ដទៃទៀត​​។

​ឆ្នាំ២០២៤ នៃអាណត្តិ​លោក ហ៊ុន ម៉ាណែត​នេះ សម្រាប់​លីកាដូ​ ​អាជ្ញាធរ​​កាន់​តែ​​បន្ត​​បំបិទ​​សំឡេង​​អ្នក​ដែល​​តែង​​រិះគន់​​ដល់​​គោល​ន​យោ​យ​បាយ​​របស់​​រាជរដ្ឋាភិបាល​ ​សកម្មជន​​ដែល​​តែងតែ​​ធ្វើការ​​តស៊ូ​មតិ ​ដើម្បី​សិទ្ធិមនុស្ស​ ​និង​ពលរដ្ឋ​​សាមញ្ញ​​ដែល​​តែង​​បញ្ចេញ​មតិ​ ​ឬ​បង្ហាញ​​ពី​ការ​យល់​​ឃើញ​​របស់​​ពួកគេ​​ជាដើម​។​

អង្គការ​នោះ​គូស​បញ្ជាក់​ថា បើទោះ​បីជា​ខ្លួន​​មិន​​អាច​​ចងក្រង​​ចំនួន​ ​និង​​ព័ត៌មាន​​នៃ​ការ​​ឃុំ​ខ្លួន​ទាំង​អស់​ទូទាំង​​ប្រទេស​​ក៏ដោយ​ ​ក៏ ​ ​លី​កា​ដូ ​តាមរយៈ​​គេហទំព័រ​ “​អ្នកជាប់​ឃុំ​ដោយ​​ប្រើ​​សិទិ្ធ” ​បាន​​កត់​ត្រា​​ចំនួន​អ្នក​ជាប់​ឃុំ​​ឃាំង​​មួយ​​ចំនួន​​ដោយ​​គ្រាន់តែ​​អ្នក​ទាំង​នោះ ​ប្រើ​សិទ្ធិ​សេរីភាព​​ជា​មូលដ្ឋាន​​របស់​ខ្លួន​។

​ចំនួន​​អ្នក​ជាប់​ឃុំ​​​ដែល​ ​លី​កា​ដូ ​បាន​​កត់​ត្រា​ គឺ​ចំនួន​ ១០២នាក់ ​នៅ​ក្នុងឆ្នាំនេះ​​។​ ​៤៥នាក់​ ​ត្រូវ​បាន​ដោះលែង​ ​និង​ ​៥៧​នាក់​​ទៀត​ ​បន្ត​​នៅ​ក្នុង​​ពន្ធ​នាគា​រ​​ដើម្បី​​អនុវត្ត​ទោស​ ​ឬ​កំពុង​​ឃុំ​ខ្លួន​​បណ្តោះ​អាសន្ន​។

លីកាដូ​សង្កត់​ធ្ងន់​ថា ក្រៅពី​​ការ​​កើន​​ឡើង ​ដ៏​​គួរ​​ឱ្យ​​ព្រួយ​បារម្ភ​​នៃ​​ចំនួន​​ការ​​ចាប់​ខ្លូ​ន​ សាលា​ដំបូង ​និង​​ស្ថាប័ន​អយ្យការ​​ខេត្ត​ ​បាន​​ចាប់​ផ្តើម​​ប្រើប្រាស់​​មាត្រា​​៨​៨​ ​នៃ​​ក្រម​ព្រហ្ម​ទណ្ឌ​ ​មក​​លើ​​អ្នក​​ទាំងនោះ។

មាត្រា​​នេះ នឹង​​​ធ្វើ​​ឱ្យ​​​​អ្នក​​​ដែល​​​ធ្លាប់​​​ត្រូវ​​​បាន​​​តុលាការ​​​ផ្តន្ទាទោស​​​ពី​​​បទ​​ល្មើស​​មជ្ឈិម ត្រូវ​​ទទួល​​ទោស​​ទ្វេរ​​ដង ប្រសិន​​បើ​​ពួក​គេ​​ត្រូវ​​តុលាការ​​ផ្តន្ទាទោស​​ពី​បទ​មជ្ឈិម​​ម្តង​ទៀត​​ក្នុង​រយៈ​ពេល​ ៥ឆ្នាំ។

សម្រាប់​លីកាដូ នៅ​​ក្នុង​​ឆ្នាំ​​នេះ​​ដែរ​ ​សកម្ម​ជន​​មួយ​​ចំនួន​​ត្រូវ​បាន​​គេ​បង្ខំ​​ឱ្យ​​​​ធ្វើការ​​សុំទោស​​ជា​​សាធារណៈ ដើម្បី​​អាច​​មាន​​សេរីភាព។

ការ​សុំ​ទោស​​ជា​​សាធារណៈ​​នេះ​​ ​ដែល​​ជា​រឿយៗ​​ត្រូវ​​ធ្វើ​​ដោយ​​មាន​​កិច្ច​​សន្យា​ និង​​​ថត​​ជា​វីដេអូ​​សុំទោស ទទួល​​ស្គាល់​​កំហុស​​ យល់​ព្រម​​ទៅ​លើ​​លក្ខខណ្ឌ​​មួយ​​ចំនួន​ ឬ​​ត្រូវ​ធ្វើ​​ការ​ចោទ​ប្រកាន់​ទៅកាន់​​អ្នក​​ផ្សេង​ ​ថែម​ទៀត​​ផង​ ​ ហើយ​វីដេអូ​​សុំទោស​នេះ តែង​​តែ​​ត្រូវ​​បាន​​​ផ្សព្វ​​ផ្សាយ​​ដោយ​​សារព័ត៌មាន​​ក្នុង​​ស្រុក​​ដែល​​ស្និទ​​នឹង​រាជ​រដ្ឋា​ភិបាល ។

បន្ថែមពី​នេះ លីកាដូ​បញ្ជាក់​ថា អ្នក​ជាប់​ក្នុង​​ពន្ធនាគារ​​គិត​​ត្រឹម​​ថ្ងៃទី​១០ ខែ​ធ្នូ ឆ្នាំ២០២៤ មានចំនួន​៧៦ នាក់។ អ្នក​ដែល​​ត្រូវ​បាន​​ចាប់ និង​​ឃុំ​​ខ្លួន ក្នុង​​ឆ្នាំ២០២៤​​ មានចំនួន១០២នាក់។ មានអ្នក​​ដែល​​ត្រូវ​​បាន​ដោះលែង ក្នុងឆ្នាំ​២០២៤ មាន៥៩នាក់។ វីអូឌី មិន​អាច​ទាក់ទង​អ្នកនាំពាក្យ​រដ្ឋាភិបាល លោក ប៉ែន បូណា ដើម្បី​សុំការ​ឆ្លើយតប​វិញ​អំពី​ការ​រក​ឃើញ​របស់​អង្គការ​លីកាដូ​នេះបានទេ ។ ប៉ុន្តែ រដ្ឋាភិបាល​ធ្លាប់បាន​ច្រាន​ចោល របាយការណ៍​នានា ដែល​ជំរុញ​ឱ្យ​រដ្ឋាភិបាល​ដោះលែង​អ្នក​ទោស​មនសិកា  និង​ច្រាន​ចោល​ការ​រក​ឃើញ​ថា ប្រព័ន្ធ​យុត្តិធម៌​នៅ​កម្ពុជា​ជា​ឧបករណ៍​របស់​បក្ស​កាន់​អំណាច។

ដោយ៖ លោក​ ញឹម សុខន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ