អ្នកចាញ់បោកក្រុមហ៊ុនភូមិខ្មែរគ្រុប មួយក្រុមទៀតផ្ទុះការតវ៉ារកដំណោះស្រាយ ដោយអះអាងថា ពួកគេ៥០០គ្រួសារ បានបង់លុយគ្រប់ជិត៣ឆ្នាំ តែក្រុមហ៊ុនគ្មានដីឱ្យ ខណៈ ម្ចាស់ដីឈូសឆាយយកដីអាស្រ័យផលវិញ ក្រោយលោក សោម សុធា អគ្គនាយកក្រុមហ៊ុនដែលកំពុងជាប់ពន្ធនាគារ មិនបានបង់លុយគ្រប់ឱ្យម្ចាស់ដីដើមគ្រប់ចំនួន។
ពលរដ្ឋម្នាក់ប្រាប់ វីអូឌី ក្នុងលក្ខខណ្ឌមិនបញ្ជេញឈ្មោះ ថា លោកទិញដីក្នុងគម្រោងមរតកថ្មសរបស់លោក សោម សុធា ស្ថិតនៅភូមិតាម៉ ឃុំតាសួស ស្រុកស្វាយជ្រំ ខេត្តស្វាយរៀង ចំនួន២ឡូតិ៍ បង់លុយគ្រប់ចំនួន៦ពាន់ដុល្លារ កាលពីឆ្នាំ២០២២ តែមិនបានដីនោះទេជិត៣នេះ។
លោកបន្តថា សម្រាប់គម្រោងមរតកថ្មសរនេះ ពលរដ្ឋរងគ្រោះទើបតែបានប្រមូលផ្តុំគ្នាជាលើកដំបូងនៅថ្ងៃទី១២ ខែធ្នូ នេះ ក្រោយម្ចាស់ដីដើមបានឈូសឆាយដី នៅទីតាំងដែលពួកគេទិញ ខណៈ លោក សោម សុធា អគ្គនាយកក្រុមហ៊ុនភូមិខ្មែរគ្រុបនេះ មិនបន្តបង់លុយឱ្យម្ចាស់ដីគ្រប់ចំនួន។
ប្រភពដដែល ស្នើឱ្យស្ថាប័នពាក់ព័ន្ធជួយរកដំណោះស្រាយដោះដូរដីឱ្យពួកគាត់ដើម្បីបានដីរស់នៅ ដោយបារម្ភថា ពេលលោក សោម សុធា កំពុងជាប់ពន្ធនាគារ អាចនឹងគ្មានការដោះស្រាយឱ្យក្រុមអតិថិជន ដែលរងគ្រោះរាប់រយគ្រួសារនេះ។
លោកថា៖ «ចង់សំណូមពរថា ឱ្យជួយរកដំណោះស្រាយ ខំណាស់ក៏បានចេញសេចក្តីថ្លែងការរកដំណោះស្រាយ(ពី) រដ្ឋបាលខេត្តគាត់ ដឹងឮរឿងហ្នឹង។ នេះអត់មានផង គេនិយាយតែគម្រោង មរតក ក្រោយសាកល មរកតថ្មសរ គេអត់មាននិយាយ អីទាំងអស់ ចឹង ថ្មើរនឹងអត់ ដឹងគេដោះ មិនដោះ។ ពួកខ្ញុំសុទ្ធតែពួកបង់លុយដាច់ អត់មានបង់រំលោះទេ ច្រើនគ្រួសារណាស់»។
បើតាមប្រភពដដែល មានពលរដ្ឋរងគ្រោះប្រមាណ៥០០គ្រួសារ ដែលបានទិញដីក្នុងគម្រោងរបស់ លោក សោម សុធា មិនបានប្លង់ក្នុងគម្រោងមរតកថ្មសរនេះ។
ជុំវិញរឿងនេះ វីអូឌី បានព្យាយាមទាក់ទងអ្នកនាំពាក្យសាលាខេត្តស្វាររៀង លោក រស់ ផារិទ្ធិ តែគ្មានអ្នកទទួលទូរស័ព្ទ។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីការដូ លោក អ៊ំ សំអាត បានជំរុញស្ថាប័នពាក់ព័ន្ធរកយុត្តិធម៌ ជូនក្រុមជនរងគ្រោះថ្មីទៀតនេះ បើពួកគេទាំងនោះមានភស្តុតាងគ្រប់គ្រាន់ ដែលបញ្ជាក់ថា បានចាញ់បោកក្រុមហ៊ុនភូមិខ្មែរគ្រុបពិតមែន។
លោកថា ក្រុមហ៊ុនឆបោកជ្រកក្រោមវិស័យចលនទ្រព្យនេះ កើតមានជាបន្តបន្ទាប់ តែដំណោះស្រាយសម្រាប់ជនរងគ្រោះនៅបន្តអូសបន្លាយ ដែលអាចបង្កជាវិបត្តិសង្គមកាន់តែធ្ងន់ធ្ងរដូចជាការ ចំណាកស្រុក បែបបាក់គ្រួសារ វិបត្តិបំណុល ជាដើម។
លោកថា៖ «វាមិនមែនជារឿងតូច ដែលត្រូវព្រងើយកន្តើយទេ អាជ្ញាធរគូរតែធ្វើការដោះស្រាយឱ្យបានឆាប់ រួមទាំងតុលាការផង។ នីតិវិធីគួរតែមានដំណើរការឱ្យបានលឿន វាត្រូវមានកិច្ចអន្តរាគមន៍ផងដែរពីរដ្ឋាភិបាលទៅលើបញ្ហាទាំងអស់ហ្នឹង ពីព្រោះពលរដ្ឋដែលរងគ្រោះក៏មិនតិចដែរ បើបណ្តែតបណ្តោយ ផលលំបាកគឺពលរដ្ឋគាត់នឹងជួបបញ្ហាច្រើន»។
អគ្គនាយកក្រុមហ៊ុនភូមិខ្មែរគ្រុប លោក សោម សុធា ត្រូវបានសមត្ថកិច្ចចាប់ខ្លួន កាលពីថ្ងៃទី១៧ ខែមិថុនា ឆ្នាំ២០២៤ ក្រោមបទចោទឆបោកពលរដ្ឋ តាមរយៈប្រមូលលុយពីពលរដ្ឋក្រោមរូបភាពវិនិយោគ សន្យាឱ្យការប្រាក់ ៤.៤ភាគរយក្នុងមួយខែ និងពាក់ព័ន្ធលក់ដីខ្យល់ឱ្យអ្នកភូមិរាប់រយគ្រួសារនៅខេត្តស្វាយរៀង។
ក្រុមអ្នករងគ្រោះនិយាយថា ការជឿជាក់យកលុយទៅទិញដី ក្នុងក្រុមហ៊ុន លោក សោម សុធា ព្រោះឃើញ លោក ដួង តារា ជំនួយការ លោក ហ៊ុន សែន តែងតែបង្ហាញសកម្មភាពនានាក្នុងក្រុមហ៊ុននេះ និងថ្លែងការពារគម្រោងលក់ដីឡូរ និងផ្ទះរបស់លោក សោម សុធា ដោយចំហផងដែរ។
យ៉ាងណាបុគ្គលសំខាន់២រូបនេះ គឺលោក សោម សុធា និងជំនួយការលោក ហ៊ុន សែន គឺលោក ដួង ដារ៉ា ត្រូវបានចាប់ខ្លួន ពាក់ព័ន្ធអំពើឆបោកពលរដ្ឋដូចគ្នា។
ភាពចម្រូងចម្រាស់ ក្នុងក្រុមហ៊ុនភូមិខ្មែរគ្រុបនេះ ក្រសួងរៀបចំដែនដី បានសេចក្តីជូនដំណឹងកាលពីថ្ងៃទី៨ ខែធ្នូ បញ្ជាក់ថា ពាក់ព័ន្ធ អតិថិជនដែលបង់ប្រាក់តាមដំណាក់កាល ឬបង់រំលោះប្រចាំខែ ទិញដី ឬផ្ទះ ក្នុងគម្រោងនៅភូមិមរតក ត្រូវផ្អាកបង់ប្រាក់ចូលក្រុមហ៊ុនបណ្ដោះអាសន្ន។
ដោយឡែក អតិថិជនដែលបានបង់ប្រាក់ ថ្លៃលក់ទិញដីឡូតិ៍គ្រប់ចំនួន១០០% និងអ្នកកំពុងបង់ប្រាក់រំលោះប្រចាំខែត្រូវដាក់ពាក្យស្នើសុំចុះបញ្ជីផ្ទេរកម្មសិទ្ធិ និងធ្វើបច្ចុប្បន្នភាពព័ត៌មាននៅមន្ទីររៀបចំដែនដី នគរូបនីយកម្ម សំណង់ និង សុរិយោដីខេត្តស្វាយរៀង។ យ៉ាងណា ក្នុងសេចក្តីជូនដំណឹងនោះ មិនបានបញ្ជាក់ពីដំណោះស្រាយ សម្រាប់អតិថិជន ដែលទិញដីក្នុងគម្រោងមរតកថ្មស របស់លោក សោម សុធា ស្ថិតនៅភូមិតាម៉ ឃុំតាសួស ស្រុកស្វាយជ្រុំ ខេត្តស្វាយរឿងនោះទេ ដែលធ្វើឱ្យក្រុមជនរងគ្រោះទាមទាររកយុត្តិធម៌សម្រាប់អ្នកទិញដី រាប់រយគ្រួសារតែក្រុមហ៊ុនគ្មានប្លង់ឱ្យ៕
ដោយ៖ លោក សែន សច្ចៈ
