នាយករដ្ឋមន្ត្រី លោក ហ៊ុន ម៉ាណែត នៅថ្ងៃព្រហស្បតិ៍នេះ លោកបានលើកទឹកចិត្តវប្បធម៌ច្រានចោលដោយសំអាងថា ការបញ្ចេញព័ត៌មានច្រានចោលបានរហ័ស ដើម្បីការពារភាពស្អាតស្អំ ទប់ទល់ព័ត៌មានក្លែងក្លាយ ដែលថាមានចេតនាបង្ខូចកេរ្តិ៍ឈ្មោះកម្ពុជា។
ការថ្លែងរបស់លោក ហ៊ុន ម៉ាណែត ធ្វើឡើងក្នុងពិធីប្រារព្ធ «ទិវាជាតិប្រយុទ្ធប្រឆាំងអំពើជួញដូរមនុស្ស ១២ធ្នូ» លើកទី១៨ ក្នុងរាជធានីភ្នំពេញ ដែលការថ្លែងនេះ ធ្វើឡើងនៅចំពោះមុខមន្ត្រីជំនាញរបស់រដ្ឋាភិបាល ដែលពាក់ព័ន្ធរាប់សឹបនាក់។
លោកថា៖ «អ្នកខ្លះគេចោទថា រដ្ឋាភិបាលកម្ពុជាមិនដែលទទួលការពិត អាងអីអាងតែបដិសេធ… ការពិតយើងទទួលស្គាល់ មួលបង្កាច់យើងទៅ បដិសេធយើងទៅ យើងត្រូវឆ្លើយតប។ ប៉ុន្តែអ្នកងមកលាបពណ៌យើង ធ្វើមិនត្រូវ យើងមានសិទ្ធិនៅក្នុងការការពារខ្លួន»។
ប្រសាសន៍របស់នាយករដ្ឋមន្ត្រី ដែលជាឈាមថ្មីរបស់គណបក្សជាជនកម្ពុជានេះ ស្តែងឡើងចំពេលដែលកម្ពុជា រងការរិះគន់ជាបន្តបន្ទាប់ពីសហគមន៍ជាតិ និងអន្តរជាតិ ជុំវិញការប្រើតុលាការរំលាយប្រព័ន្ធប្រជាធិបតេយ្យពហុកបក្ស រំលោភសិទ្ធិមនុស្សជាប្រព័ន្ធ បង្កើតឱ្យមានការបោះឆ្នោតក្លែងក្លាយ រំលោភរដ្ឋធម្មនុញ្ញ។
រងការអំពើជួញដូរមនុស្ស ការរីករាលដាលនៃអំពើចាប់ជំរិត បង្ខាំងមនុស្សខុសច្បាប់ អំពើពុករលួយ អំពើឆបោក វិបត្តិបំណុលពលរដ្ឋ និងការប្រកួតអំណាចខ្វះសុច្ចរឹតភាពជាដើម។
បរិបទនេះ បានបន្សល់ទុកជនរងគ្រោះរាប់លាននាក់ មិនទាន់ទទួលបានយុត្តិធម៌ ដែលធ្វើឱ្យកម្ពុជា រងសម្ពាធពីអន្តរជាតិ ដែលជាការឆ្លើយតបទៅនឹងការមិនអើពើស្តារប្រជាធិបតេយ្យ។ ពិសេសអ្នករាយការណ៍ពិសេសទទួលបន្ទុកសិទ្ធិមនុស្ស របស់អង្គការសហប្រជាជាតិប្រចាំកម្ពុជាលោក វិធិត មុនតាប៊ន និយាយចំៗក្នុងកិច្ចប្រជុំ នៅក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្វឺណែវ ថា ការផ្ទេរអំណាចឆ្នាំ២០២៣ ធ្វើឡើងក្នុងរង្វង់គ្រួសារ គ្មានលក្ខណៈប្រជាជាធិបតេយ្យ។ យ៉ាងណា លោក ហ៊ុន ម៉ាណែត ទទួលស្គាល់ដែរថា ព័ត៌មានបំភ្លឺរដ្ឋាភិបាលមានមនុស្សមើលតិចតួច តែព័ត៌មានដែលលោកថា ក្លែងក្លាយ មានអ្នកមើលរាប់លាននាក់។
ដោយ៖ ប៉ុល សម្បត្តិ
