មេដឹកនាំកម្ពុជាលោក ហ៊ុន ម៉ាណែត បានបញ្ជាផ្ទាល់មាត់ទៅមន្ត្រីឱ្យបន្តទប់ស្កាត់ព័ត៌មានក្លែងក្លាយ ដែលសំដៅដល់ជនបរទេសមួយចំនួន ដែលធ្លាប់បានកើតឡើង ដោយថា បានធ្វើឱ្យប៉ះពាល់ដល់មុខមាត់កម្ពុជា ដែលសារនេះជំរុញឱ្យមានការលើកឡើងថា អ្នកធ្វើឱ្យកម្ពុជាបាក់មុខ និងពលរដ្ឋរងគ្រោះ គឺគេដឹកនាំ។
ការលើកឡើងនេះ ចំពេលនាយករដ្ឋមន្រ្តី លោក ហ៊ុន ម៉ាណែត ថ្លែងក្នុងទិវាជាតិប្រយុទ្ធប្រឆាំងអំពើជួញដូរមនុស្ស នៅថ្ងៃទី១២ ខែធ្នូនេះ ក្នុងរាជធានីភ្នំពេញថា កម្ពុជាមិនមែនមានតែបញ្ហាជួញដូរមនុស្សទេ ដែលធ្វើឱ្យប៉ះពាល់ដល់កេរ្តិ៍ឈ្មោះកម្ពុជានោះ។
លោកបញ្ជាក់ថា ក្នុងនោះក៏មានព័ត៌មានក្លែងក្លាយ ប្រឌិតឡើងដោយជនបរទេសមួយចំនួន ដូចជាជនជាតិកូរ៉េ និងជនជាតិដទៃទៀត ដែលលោកមិនបញ្ចេញឈ្មោះ ពាក់ព័ន្ធនឹងការបូមឈាម វិធានការចាប់ខ្លួនបរទេសមួយចំនួនពីសំណាក់កម្លាំងសមត្ថកិច្ចកម្ពុជា ជាដើម។
លោកថា៖ «យើងមិនបដិសេធថា យើងគ្មានបញ្ហាទេ កម្ពុជាក៏មិនដែលបដិសេធថាកម្ពុជាមិនទទួលស្គាល់ថា កម្ពុជាគ្មានបញ្ហាការជួញដូរមនុស្ស ឬ បញ្ហាអសន្តិសុខផ្សេងៗដែរ»។
បន្ថែមពីនេះ លោកក៏បញ្ជាផ្ទាល់មាត់ ឱ្យទប់ស្កាត់ព័ត៌មានក្លែងក្លាយ ដើម្បីជៀសវាងបន្តបង្ខូចកិត្តយសកម្ពុជា ក្រោមរូបភាពប្រឌិតរបស់ជនបរទេសមួយចំនួនដែលមកជាន់ទឹកដីកម្ពុជា។
លោកថា៖ «យើងទទួលស្គាល់ថាមានបញ្ហាតែយើងខិតខំ គណកម្មការប្រឆាំងការជួញដូរមនុស្ស ក្រសួងស្ថាប័នមហាផ្ទៃដឹកនាំ អគ្គស្នងការនគរបាលជាតិ យើងអនុវត្តរាជធានីខេត្តនីមួយៗ ខំអនុវត្ត ដោយសារយើងទទួលស្គាល់បញ្ហា យើងសហការជាមួយដៃគូរមិត្តជាតិ អន្តរជាតិ ដើម្បីធ្វើ ដោយសារយើងទទួលស្គាល់ថាវាមានបញ្ហា ដើម្បីកាត់បន្ថយទប់ស្កាត់បញ្ហា»។
៣ឆ្នាំកន្លងទៅនេះ សហរដ្ឋអាមេរិក បានដាក់កម្ពុជាក្នុងបញ្ជីខ្មៅ នៃអំពើជួញដូរមនុស្សឆ្លងដែន ដោយអាមេរិកអះអាងពីការរកឃើញថា បញ្ហាដែលបានកើតឡើង ដោយសារតែមន្ត្រីរដ្ឋាភិបាលកម្ពុជាខ្លះ បានឃុបគិត នៅក្នុងបទល្មើស និងអំពើពុករលួយ ជាហេតុនាំឲ្យអំពើជួញដូរមនុស្ស នៅតែរីករាលដាល។
ជុំវិញបញ្ហានេះ តំណាងរាស្រ្តបក្សសង្រ្គោះជាតិ លោក អ៊ុំ សំអាន ប្រាប់ វីអូឌី នៅថ្ងៃទី១២ ខែធ្នូនេះថា ការមិនអាចទប់ស្កាត់អំពើជួញដូរមនុស្សបាន បង្ហាញពីកម្សោយមេដឹកនាំ អសមត្ថភាពដឹកនាំប្រទេសជាតិ។
លោកថា ការចោទប្រកាន់បរទេសថា ជាអ្នកបំផ្លាញកិត្តិយសកម្ពុជា ជាការគេចវេសមិនហ៊ានទទួលស្គាល់ការពិតរបស់មេដឹកនាំគ្រួសារហ៊ុន ខណៈខ្លួនជាអ្នកបណ្តោយឱ្យមានក្រុមឧក្រិដ្ឋជនជួញដូរមនុស្ស។
លោកថា៖ «ឆ្លុះបញ្ចាំងពីការដឹកនាំរបស់ខ្លួនគឺអសមត្ថភាពក្នុងការបង្ក្រាបការជួញដូរមនុស្សដោយសារតែអសមត្ថភាពក្នុងការដឹកនាំ នេះហើយដែលធ្វើឲការជួញដូរមនុស្សនៅមាននៅឡើយ កម្ពុជានៅមិនទាន់រួចផុតពីបញ្ជីខ្មៅរបស់អាមេរិកនៅឡើយនោះទេ ពាក់ព័ន្ធនឹងការជួញដូរមនុស្ស ដូច្នេះបង្ហាញថាត្រកូលហ៊ុនគ្មានសមត្ថភាពក្នុងការបង្ក្រាបបទល្មើសជួញដូរមនុស្សនោះទេ»។
សម្រាប់លោក អ៊ុំ សំអាន អះអាងថា អ្នកដែលបំផ្លាញកិត្តិយស កេរ្តិ៍ឈ្មោះកម្ពុជាពិតប្រាដក គឺមេដឹកនាំគ្រួសារហ៊ុន ឃុបឃិតជាមួយក្រុមម៉ាហ្វីយ៉ា និងពួកឧក្រិដ្ឋជន យកប្រទេសកម្ពុជា ជាទីលានសម្រាប់ជួញដូរ។
លោកបន្តថា មេដឹកនាំកម្ពុជាមិនអាចទប់ស្កាត់ឧក្រិដ្ឋជនជួញដូរមនុស្ស ឬអំពើជួញដូរមនុស្សបានទេ ដរាបណា ពួកគេមិនហ៊ានសម្អាតអំពើពុករលួយចំពោះមន្រ្តីគ្រាក់ៗ ដែលស្និទ្ធនឹងមេដឹកនាំគ្រួសារហ៊ុន។
លោកថា៖«រដ្ធាភិបាលជិះសេះលែងដៃ គ្មាននរណាហ៊ានរិះគន់ខ្លួនទោះបីខ្លួនធ្វើខុសក៏គ្មាននរណាហ៊ានរិះគន់ ចឹងវាធ្វើឲបទល្មើសទាំងអស់នោះនៅតែកើតមានឡើង ហើយមួយទៀតដោយសារតែរដ្ធាភិបាលមិនហ៊ានអារសាច់ស្អុយដែលមន្ត្រីជាន់ខ្ពស់រដ្ធាភិបាលពាក់ព័ន្ធ ឬឃុបឃិតនៅពីក្រោយខ្នងរឿងការជួញដូរមនុស្ស»។
ចំណែក អ្នកជំនាញច្បាប់ និងអភិបាលកិច្ច បែបប្រជាធិបតេយ្យ លោក វ៉ន់ ចាន់ឡូត និយាយថា សារបកស្រាយរបស់មេដឹកនាំបក្សកាន់អំណាច គ្រាន់តែសារប្រជាភិថុត ដើម្បីបិទបាំងកំហុសរបស់ខ្លួនប៉ុណ្ណោះ។
លោកបន្តថា អំពើជួញដូរមនុស្សអាចកើតមានទៅបាន លុះត្រាតែមានអ្នកនៅពីខាងក្រោយ ទើបករណីនេះអាចប្រព្រឹត្តិទៅបាន ព្រោះថាគ្មានអ្វីកើតឡើង ដោយមិនមានការរៀបចំទុកជាមុននោះទេ។
លោកថា៖ «ប្រទេសជាតិមួយ នឹងមិនអាចជាតិសាសន៍ណាមួយងាយនៅ ក្នុងការប្រើប្រាស់ដើម្បីទៅប្រព្រឹត្តបទឧក្រិដ្ធនានា បានដោយស្រួលនោះទេ ប្រសិនបើមាននូវការលបលួចលាក់នៅក្នុងការសហការ ឬក៏លួចសម្រួលឲឧក្រិដ្ឋជនទាំងអស់នោះអាចប្រើប្រាស់មូលដ្ធាននៅប្រទេសកម្ពុជា ជាទឹកដីដើម្បីឆ្លងកាត់ ឬក៏ជាទឹកដីដើម្បីប្រព្រឹត្តបទឧក្រិដ្ឋកម្មរបស់ខ្លួន»។
តែយ៉ាងណា សម្រាប់លោក ចាន់ឡូត ផ្តល់ជាយោបល់ថាដើម្បីទប់ស្កាត់ការជួញដូរមនុស្ស វាចាំបាច់ណាស់ត្រូវហ៊ានគាស់រំលើងឫសគល់របស់វា គឺត្រូវលុបបំបាត់អំពើពុករលួយបក្សពួកនិយម ជាពិសេសហ៊ានដាក់ទោសទណ្ឌមន្រ្តី ស្និតនឹងមេដឹកនាំ ឬគ្រួសារមេដឹកនាំផ្ទាល់។
កាលពីឆ្នាំ២០២២ និងឆ្នាំ២០២៣ អាមេរិកបានចាត់ចំណាត់ថ្នាក់ឱ្យកម្ពុជា ស្ថិតនៅក្នុងកម្រិតលេខ ៣ ដែលជាចំណាត់ថ្នាក់អាក្រក់បំផុត ក្នុងការមិនបានប្រឹងប្រែងប្រយុទ្ធប្រឆាំងនឹងការជួញដូរមនុស្ស។
ក្នុងរបាយការណ៍ ស្តីពីការជួញដូរមនុស្សរបស់អាមេរិកបានលើកច្រើន ពីបញ្ហាអំពើពុករលួយ និងនិទណ្ឌភាពរបស់មន្រ្តីដែលអាចជាប់ពាក់ព័ន្ធនឹងការជួញដូរមនុស្សនៅកម្ពុជា។
អាមេរិកចាត់ទុកថា កម្ពុជាត្រូវបានក្រុមជួញដូរមនុស្ស ប្រើប្រាស់ជាកន្លែងបោកបញ្ឆោតតាមប្រព័ន្ធអ៊ីនធើណេត ឬហៅថា SCAM។ បើតាមរបាយការណ៍របស់អាមេរិកបញ្ជាក់ថា ជនបរទេស និងជនជាតិខ្មែរក្នុងស្រុកត្រូវបានក្រុមឈ្មួញជួញដូរមនុស្ស ដែលជាប់ពាក់ព័ន្ធនឹងក្រុមហ៊ុនចិន ត្រូវបានបោកបញ្ឆោតឲ្យធ្វើការនៅតាមអគារក្នុងប្រទេសកម្ពុជា រហូតដល់មានសេចក្តីរាយការណ៍ពីការចាប់បង្ខាំងទុក មិនឲ្យមានសេរីភាព ការធ្វើទារុណកម្ម និងការជំរិតទារប្រាក់ជាដើម៕
ដោយ៖ ប៉ុល សម្បត្តិ
