ក្រុមប្រឹក្សាជំនុំជម្រះ នៃតុលាការខេត្តកំពង់ឆ្នាំង បានផ្តន្ទាទោសដាក់ពន្ធនាគារ អតីតមន្រ្តីសាលាស្រុកកំពង់លែង ដោយដាក់ពន្ធនាគារ ចន្លោះពី៣ឆ្នាំ ទៅ៤ឆ្នាំ។
កាសែតក្នុងស្រុក បានចុះផ្សាយនៅថ្ងៃទី១២ ខែធ្នូ នេះដោយដកស្រង់សេចក្តីសម្រេចរបស់តុលាការខេត្តកំពង់ឆ្នាំងមកចុះផ្សាយ ឱ្យដឹងថា លោក ពុំ សុផល ជាអតីតអភិបាលរងស្រុកកំពង់លែង ត្រូវបានតុលាការផ្តន្ទាទោសដាក់ពន្ធនាគារ ៣ឆ្នាំ និងពិន័យជាប្រាក់ ១០លានរៀល។ ជាមួយគ្នានេះ លោក លឹម ដានីន អតីតប្រធានការិយាល័យ ប្រជាពលរដ្ឋស្រុកកំពង់លែង និងឈ្មោះ ជួន តុំ ម្ចាស់សិប្បកម្មផលិតទឹកកក ត្រូវតុលាការផ្តន្ទាទោសដាក់ពន្ធនាគារ ៤ឆ្នាំ និងពិន័យប្រាក់ ១០លានរៀល។ ការផ្តន្ទាទោសជនជាប់ចោទទាំង ៣នាក់នេះ នៅបន្ទាប់ពីអង្គភាពប្រឆាំងអំពើពុករលួយ ចាប់ខ្លួនកាលពីខែមេសា ឆ្នាំ២០២៤ ពាក់ព័ន្ធការទន្ទ្រាន និងកាន់កាប់ដីព្រៃលិចទឹក នៅជាប់បឹងទន្លេសាប៕
