ការ​ចាប់ខ្លួន​សកម្មជន​យ៉ាង​គំហុក​ឆ្នាំ​២០២៤ ឆ្លុះបញ្ចាំង​ថា​គ្រួសារ​ហ៊ុន​បន្ត​សម្លាប់​ប្រជាធិបតេយ្យ

ការចាប់​សកម្មជន​សង្គម​យ៉ាង​គំហុក ក្នុង​ឆ្នាំ​២០២៤ ជំរុញ​ឱ្យ​មាន​ការ​លើក​ឡើង​ថា ជា​ភស្តុតាង​ថ្មី​ទៀត បង្ហាញ​ថា គ្រួសារ​ហ៊ុន​បន្ត​លេង​ល្បែង​ប្រជាធិប​តេយ្យ ដើម្បី​សម្រេច​មហិច្ឆតា​ក្តោម​អំ​ណាច បែប​ផ្តាច់​ការ បង្ក​វិនាសកម្ម​ដល់​ជាតិ និង​ពលរដ្ឋ​ទូទាំង​ប្រទេស បើ​គ្មាន​ចរន្ត​ផ្តាស់​ប្តូរ ទាន់​ពេល​នេះទេ​នោះ។

ការ​សំអាង​នេះ ក្រោយ​ពី​អង្គការ​លីកាដូ កាល​ពី​ថ្ងៃ​ទី​១១ ខែ​ធ្នូនេះ បាន​បង្ហាញ​ទិន្ន័យ​កត់​ត្រា​ត្រួសៗ​រក​ឃើញ​ថា ឆ្នាំ២០២៤អាណត្តិ​លោក ហ៊ុន ម៉ាណែត នេះ​មាន​ករណី​ចាប់​ខ្លួន​កម្មជន​សង្គម​យ៉ាង​គំហុក យ៉ាង​តិច ១០២នាក់ ពាក់​ព័ន្ធ​នឹង​ការ​រិះ​គន់​គោលនយោបាយ​រដ្ឋាភិបាល។

ជុំវិញ​បញ្ហា​នេះ ប្រធាន​អង្គការ​ប្រជាធិបតេយ្យ​ប្រចាំ​អូស្ត្រាលី លោក ស៊ឹងសែន ករុណា ប្រាប់​ វីអូឌី នៅ​ថ្ងៃ​ទី១៣ ខែធ្នូនេះថា ករណី​រក​ឃើញ​របស់​អង្គការ​លីកាដូ នេះ​ឆ្លុះ​បញ្ចាំង​ថា មេដឹក​នាំ​បក្ស​កាន់​អំណាច​កំពុង​ទាញ​ទម្លាក់​កម្ពុជា​ពី​របបប្រជាធិបតេយ្យ​កាន់​តែ​ខ្លាំង។

លោក​សង្កត់​ធ្ងន់​ថា ការ​ដឹក​នាំ​បែប​គ្រួសារ​​និយម ឬ​បក្ស​ពួក​និយម ដោយ​ចាប់​ពរលដ្ឋ​តាម​ទំនើង​ចិត្ត​បែប​នេះ វា​នឹង​បង្ក​វិនាសកម្ម​ដល់​ប្រទេសជាតិ និង​ប្រជាពលរដ្ឋ រស់​នៅ​ទាំង​ភាព​ភ័យ​ខ្លាច​ និង​រង​ទុក្ខវេទនា។

លោកថា៖ «ការដឹក​នាំ​​របស់​​រដ្ធា​ភិបាលថ្មី​ឪពុក និង​កូន​នឹង​យើង​ឃើញ​ថា​គ្មាន​​ឆន្ទៈ​ក្នុង​ការ​​ស្ដារ និង​ការពារ​ប្រជាធិបតេយ្យ​​ដោយ​គោរព​​សិទ្ធិ​មនុស្ស​នោះ​ទេ ផ្ទុយ​ទៅ​វិញ​សកម្មភាព​ទាំង​អស់​នឹង​ហាក់​ដូច​ជា ធ្វើ​ខ្លាំង​ឡើងក្នុងន័យតែការពារផលប្រយោជន៍ និងអំណាចគ្រួសារ និងបក្សពួកនិយមប៉ុណ្ណោះ»

សម្រាប់​តំណាង​រាស្រ្ត​បក្សសង្រ្គោះជាតិ អ៊ុំ សំអាន ហាក់​ស្តីបន្ទោស​ថា មេដឹកនាំគ្រួសារហ៊ុន គ្មាន​ចេះ​ដឹក​នាំ​អ្វី ក្រៅតែ​ពីចាប់ចង​ពលរដ្ឋ ធ្វើ​បាប​រាស្រ្ត បំផ្លាញ​ប្រជាធិបតេយ្យ និង​កាត់​ដី​ឱ្យបរទេស​នោះទេ។

លោក​អះអាង​ថា មេដឹក​នាំគ្រួសារ​ហ៊ុន គ្មាន​ថ្ងៃ​កែ​ខ្លួន​វិល​ទៅស្តារ​ប្រជាធិបតេយ្យទេ ដរាប​ណា ពលរដ្ឋ​ខ្មែរ​ស្នេហា​ជាតិ​ និង​អ្នក​នយោបាយ​មិន​សាមគ្គីគ្នា រើបម្រះ​ទាញ​ទម្លាក់​របបផ្តាច់ការ​នេះ​ចេញ​ពី​អំណាច។

លោកថា៖ «ត្រកូល​ហ៊ុន​ធ្វើ​ទង្វើទុច្ច​រិត ថោក​ទាប ឥត​កេរ្ត៍​ខ្មាស់​យ៉ាង​ម៉េច​ក៏ពួក​គាត់​ធ្វើបាន​ដែរ​ ចឹង​វា​បង្ហាញ​ថា មេ​ដឹក​នាំ​នេះ​អត់​គិត​ពី​សុខ​ទុក្ខ​​ប្រជាពលរដ្ធ ប្រទេស​ជាតិ​ទេ គិត​តែ​ពី​អំណាច​របស់​ខ្លួន ទោះ​បី​ពួក​គេ​រត់​ទៅ​ដល់​ថៃ​ក៏ចាប់ ទៅ​ដល់​ម៉ាឡេស៊ី​ក៏​ចាប់​ពួក​គេ​មក​វិញ​ដែរ ដើម្បី​ធ្វើទុក្ខ​បុក​ម្នេញ​អោយ​ពួក​គេ​ចុះ​ចូល​ខ្លួន​ដូច្នេះ​ខ្ញុំយល់​ថា ទង្វើ​គំម្រក់​ថោក​ទាប​របៀប​នេះ សូម្បី​ប្រទេស​កូរ៉េ​ខាង​ជើង និង​ប្រទេស​ស៊ីរី​មិន​មាន​ផង»

ម្យ៉ាង​វិញ​ទៀត​លោក អ៊ុំ សំអាន ថា​ការដឹក​នាំ​បំផ្លាញ​ប្រជា​ធិបតេយ្យ រំលោភ​សិទ្ធិ​មនុស្ស​ជា​ប្រព័ន្ធ ធ្វើ​បាបរាស្រ្ត ឬ​ចាប់​ចង​តាម​ទំនើង​ចិត្ត​នេះ នឹង​គ្មាន​វាសនា​ដឹក​នាំ​យូរ​អង្វែ​ងទេ បើ​ពលរដ្ឋ​អស់​ការ​អត់​ធ្មត់។

ជុំវិញ​បញ្ហា​នេះ អ្នក​នាំ​ពាក្យ​គណបក្ស​ប្រជាជនកម្ពុជា លោក សុខ ឥសាន្ត បាន​ច្រាន​ចោល ដោយ​លោក​អះអាង​ថា វិធាន​ចាប់​ខ្លួន និង​ឃុំ​ខ្លួន ជា​ការ​អនុវត្ត​ច្បាប់។

លោកថា៖ «ការចាត់​វិធានការ​ផ្លូវច្បាប់ ទៅលើ​សកម្មជន​បរិស្ថាន​នោះ គឺ​មិន​ខុស​ច្បាប់​ទេ គឺ​ធ្វើ​ត្រឹម​ត្រូវ​ទៅ​តាម​ច្បាប់ អ្នក​ដែល​ប្រព្រឹត្ត​ខុស​ទេ​ ជាអ្នក​ត្រូវ​ទទួល​ខុស​ត្រូវ​ទទួល​មុខ​ច្បាប់»

យ៉ាង​ណា កាល​ពីថ្ងៃ​ទី៧ ខែសីហា ឆ្នាំ២០២៣ ក្នុង​ពិធី​ប្រកាស​ចូលកាន់​តំណែង​ជា​នាយករដ្ឋមន្រ្តី​នៅ​ចំពោះ​ព្រះភ័ក្រ្ត​អង្គព្រះមហាក្សត្រ លោក ហ៊ុន ម៉ាណែត ​ប្រកាស​​ប្តេជ្ញា​ចិត្ត​​ថា ​នឹង​ខិត​ខំ​​បំពេញ​​បេសកកម្ម​ ដើម្បី​បុព្វ​ហេតុ​ជាតិ និង​ការពារ​ប្រព័ន្ធ​ប្រជាធិបតេយ្យ​ពហុបក្ស ​ ដូច​មាន​ចែង​ក្នុង​រដ្ឋ​ធម្មនុញ្ញ។

លោកថា៖«ការប្ដេជ្ញា​ចិត្ត​របស់​រដ្ធាភិបាល​ថ្មី ធានាឲបាន​នូវ​សុខ​សន្ដិភាព ស្ថេរភាព​មិនឲ​បាត់​ទៅវិញ​ទេ​ជាពិសេស​កុំឲ​មាន​សង្គ្រាម​កើត​ឡើង​វិញ​ ទីពីរ​ត្រូវ​ធ្វើ​យ៉ាង​ណា​ពង្រីក​ សម្ធិផល​បន្ថែម​ជូន​ប្រជា​ពលរដ្ធ ជាពិសេស គឹ​ជីវភាព​របស់​ប្រជា​ពល​រដ្ធ សិទ្ធិសេរីភាព​របស់​ប្រជាពលរដ្ធ និង​សេចក្ដី​ថ្លៃថ្នូរ​របស់​ប្រជា​ពលរដ្ធ​យើង​ត្រូវ​ការពារ និងផ្ដល់ឲបាន»

ចំណាត់​ការ​ចាប់​ខ្លួន​សកម្មជន​សង្គម និង​សកម្មជន​នយោបាយ​យ៉ាង​គំហុក​នេះ នៅឆ្នាំ២០២៤ នេះ ហាក់​ស៊ីគ្នា​ទៅ​នឹងសារ​បែកធ្លាយ របស់​អតីត​នាយក​រដ្ឋមន្រ្តី លោក ហ៊ុន សែន ដែលមាន​មហិច្ឆតា ចង់​កម្ទេច​ក្រុម​អ្នក​មាន​និន្នាការ​ប្រជាធិបតេយ្យ ដើម្បី​បើក​ផ្លូវ​ឱ្យលោក ហ៊ុន ម៉ាណែត ឈ្នះ​ឆ្នោត​នៅ​ឆ្នាំ២០២៧ និងឆ្នាំ២០២៨ ខាងមុខ ដោយ​គ្មាន​គូ​រប្រកួត។

លោកថា៖ «សុំ​ឲគ្រប់​ខេត្ត​ទាំង​អស់​យក​ចិត្ត​ទុក​ដាក់​ពី​ពេលនេះ​ទៅ ត្រូវ​តែ​វាយ​កម្លាំង​នេះ​កុំ​ឲទាស់​មុខ​ទាស់​មាត់​បន្ត​ទៀត ហ៊ាន​និយាយ​ច្បាស់​ចឹង​តែ​ម្ដង ទន្ទឹម​នឹង​បំផ្លាញ​កម្លាំង​ចោល​ហើយ​កេង​កម្លាំង​យក​មក​ប្រើ»

អ្នកស្រាវជ្រាវពីការ​អភិវឌ្ឍសង្គម លោកបណ្ឌិត មាស នី ហៅ​បញ្ហា​ដែល​លីកាដូ បាន​រក​ឃើញ ហាក់​ផ្ទុយ​នឹង​ការ​ប្តេជ្ញា​ចិត្ត​របស់អ្នក​នយោបាយ ដែល​លោក​ចង់​ឃើញ​មេដឹកនាំ មាន​ទំនួល​ខុសត្រូវ ចំពោះ​ប្រទេស​ជាតិ និងម្ចាស់​ឆ្នោត។

លោកថា៖ «ប៉ុន្តែ​បើយើង​ប្រើ​តែ​វិធីសាស្រ្ត​គំរាម បង្ក្រាប និង​ចាប់​ខ្លួន​តែមុខ​នេះ​ ជួន​កាល​វា​អាច​ជះផល​អវិជ្ជមាន​ត្រឡប់​មក​រដ្ធាភិបាល​វិញ ហើយ​ធ្វើឲស្ថានភាព​កាន់​តែ​មាន​ភាព​លំបាក​ ទី​បំផុត​រដ្ធ​ខ្លាច​រាស្ត្រ រាស្រ្ត​ក៏​ខ្លាច​រដ្ធ ចឹង​ធ្វើឲសង្គម​មាន​ការ​ពិបាក»

សម្រាប់​លោក ស៊ឹង​សែន ករុណា ព្រមាន​ថា មេដឹកនាំ​បក្ស​កាន់អំណាច នឹង​មាន​វាសនា មិនខុស​ពី​មេ​ដឹកនាំ​ផ្តាច់ការ​មួយ​ចំនួន​នៅ​លើ​ពិភព​លោក ដូច​បង់ក្លាដេស ដែល​ងើប​បះ​បោរ បណ្តេញចុះ​ពីអំណាច ប្រទេស​បង់ក្លាដែស និង​ថ្មីៗ​នៅ​ប្រទេសស៊ីរី។ តែ​យ៉ាង​ណាលោក​ថា សម្រាប់​អ្នក​តាមដាន​មិន​ចង់​ឃើញ​កម្ពុជា​ដើរ​លើ​ផ្លូវចាស់​នោះ​ទេ ព្រោះ​វាបាន​ធ្វើ​ឱ្យ​ប្រទេស​ជួប​វិនាសកម្ម  ដែល​មេ​ដឹកនាំ​ត្រូវ​ប្រញាប់​ភ្ញាក់​ខ្លួន វិល​ទៅ​ស្តារ​ប្រជាធិតេយ្យ គោរព​សិទ្ធិ​មនុស្ស និង​បង្រួមបង្រួម​ជាតិ ដែល​ជា​បំណង​ប្រាថ្នា​របស់​ពលរដ្ឋ និង​សហគមន៍​អន្តរជាតិ។

ដោយ៖ លោក ប៉ុល សម្បត្តិ

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ