ក្រុមគ្រួសារកងទ័ពជិត ២០គ្រួសារ ទទូចឱ្យរដ្ឋាភិបាល ជួយទប់ស្កាត់ការរំលោភដីទំហំជាង ៣០ហិកតា ស្ថិតនៅសង្កាត់និមិត្ត ខេត្តបន្ទាយមានជ័យ ដោយសំអាងថា មេបញ្ជាការកងពលរបស់ខ្លួន គប់គិតគ្នារំលោភយក បើទោះបីដីនោះ រដ្ឋាភិបាលបានចែកឱ្យសម្រាប់អាស្រ័យផលក្តី។
តាមវីដេអូរ ដែលគេចែកចាយលើបណ្តាញសង្គម លោក ស៊ាំង ដារ៉ាយុទ្ធ បាននិយាយថា លោកជាអតីតទាហាន ដែលបានមកតាំងទីលំ នៅក្នុងភូមិកូនដំរី សង្កាត់និមិត្ត ក្រុងប៉ោយប៉ែត តាំងពីជាង ៣០ឆ្នាំមុន ជាមួយគ្រួសារ និងយុទ្ធមិត្តផ្សេងទៀត។
លោកបញ្ជាក់ នៅឆ្នាំ ១៩៩០ រូបលោក និងយុទ្ធមិត្តជិត ២០គ្រួសារ ផ្សេងទៀត ត្រូវបានរដ្ឋាភិបាលសម័យរដ្ឋកម្ពុជាចែកដីនៅតំបន់នោះ ក្នុង១គ្រួសារ ទំហំជាង ១ហិកតា សម្រាប់អាស្រ័យផល។
ប៉ុន្តែលោកថាឆ្នាំ១៩៩៤-៩៥ ពោលគឺប្រមាណជាង ៥ឆ្នាំ ក្រោយមក ដីដែលរដ្ឋាភិបាលចែកឱ្យពួកគាត់ ដើម្បីអាស្រ័យនោះ ចាប់ផ្តើមមានវិវាទ ជាមួយមេបញ្ជាការកងពលរបស់ខ្លួន។
ប្រភពនោះគូសបញ្ជាក់ ច្រើនឆ្នាំទៅនេះ ពួកគាត់មិនបានអាស្រ័យផលលើដីនោះទៀតទេ ទោះបានប្តឹងករណីនេះទៅកាន់ស្ថាប័នពាក់ព័ន្ធនៅក្នុងខេត្តនេះ ដើម្បីរកយុត្តិធម៌ក្តី ដែលការណ៍នេះ ជាហេតុធ្វើឱ្យពួកគាត់ទាំងជិត ២០គ្រួសារ នោះបង្ខំចិត្តទម្លាយរឿងនេះ។
បន្ថែមពីនេះ ស៊ាំង ដារ៉ាយុទ្ធ អះអាងទៀតថា ពួកគេគាត់ពេលនេះ ដីក៏ត្រូវគេរំលោភយក ហើយថែមទាំងរងពាក្យបណ្តឹង ពីបទរារាំងអចលនទ្រព្យស្របច្បាប់ទៀតផង។
លោកថា៖ «កាន់កាប់តាំងពី១៩៩២ ហើយដីនៅភូមិកូនដំរីនេះ ឃុំយាមនេះ ខ្ញុំឈរជើងតាំងពីឆ្នាំ១៩៩០ តាំងពីមិនទាន់ធ្វើផ្លូវ ហើយប្រសិនបើច្បាស់ ចូលមកតតាំងជាមួយខ្ញុំ អ្នកឯងធ្វើទាហាននៅឆ្នាំណា? បានដីឆ្នាំណា? អ្នកឯងដែលអះអាងថាដីអ្នកឯង បានមកពីណាអ្វី ខ្ញុំអត់ដឹងទេណា ទិញពីអ្នកណា ខ្ញុំអត់ដឹងទេ ប៉ុន្តែបើអ្នកឯងច្បាស់ពីប្រវត្តិដីនេះ ដីទាហាន បើអ្នកមិនមែនទាហានទេ ខ្ញុំមិនដឹងទេ»។
ជាមួយគ្នានេះដែរ អ្នកស្រី កែវ លាវ និយាយថា រដ្ឋកម្ពុជា ឬទាហាន ង-៤២ បានប្រគល់ដីឱ្យគ្រួសារអ្នកស្រីកាន់កាប់ សម្រាប់អាស្រ័យផល តាំងពីឆ្នាំ១៩៩២ ខណៈប្តីអ្នកស្រី ជាទាហានការពារជាតិ។
អ្នកស្រីបន្តថា វាជារឿងអយុត្តិធម៌ សម្រាប់គ្រួសារអតីតយោធិនការពារជាតិ ដែលខំធ្វើពលិកម្មគ្រប់បែបយ៉ាង ដើម្បីជាតិមាតុភូមិ តែបែរជារងគ្រោះបែបនេះទៅវិញ។
អ្នកស្រីថា៖«ដីខ្ញុំបានមកពីរដ្ឋកម្ពុជា ទាហាន ង ៤២ ចែកឱ្យ ប្តីខ្ញុំគាត់ធ្វើទាហាន ឆ្នាំ១៩៩២ ខ្ញុំបានកាន់កាប់៤ឆ្នាំ ខ្ញុំបានធ្វើស្រែធ្វើអីនឹង ដូចប្អូនបានរៀបរាប់ចឹង កំពុងតែធ្វើៗចឹង តាការ៉ា (កូនចៅឡាយវីរៈ) គេមកភ្ជូរពីលើដី ហើយគេដេញពួកខ្ញុំចេញមិនឱ្យនៅ»។
យោធិនម្នាក់ទៀត រស់នៅភូមិកូនដំរី សង្កាត់និមិត្ត គឺលោក ញឹម ញាន អះអាងថា មេបញ្ជាការកងពលឈ្មោះ ឡាយ វិរៈ ជាអ្នករំលោភយកដីពួកគាត់ ហើយបានបំភ្លៃថា ពួកគាត់បានផ្តិតមេដៃលក់ដី ទាំងពួកគាត់មិនបានដឹងអ្វីទាំងអស់។
លោកថា មេបញ្ជាការឈ្មោះ ឡាយ វីរៈ គប់គិតគ្នាជាប្រព័ន្ធ លួចលក់ដីពួកគាត់ឱ្យទៅឈ្មួញ ខណៈដីនេះគឺពួកគាត់ខំលះបង់ឈាមស្រស់បម្រើជាតិ ទើបមេដឹកនាំរដ្ឋកម្ពុជាចែកឱ្យគ្រួសារលោកម្នាក់២ហិកតា សម្រាប់បង្កបង្កើនផល។
លោកថា៖ «មួយគ្រួសារទទួលបានដីក្បាល៥០ បណ្តោយ៤០០ គឺវាស្មើនឹងពីរហិកតា»។
ការណ៍នេះ លោកទទូចឱ្យរដ្ឋាភិបាលថ្មី លោក ហ៊ុន ម៉ាណែត អន្តរាគមន៍ផ្តល់យុត្តិធម៌ឱ្យពួកគាត់ ដែលធ្លាប់ធ្វើពលីកម្ម ដើម្បីជាតិមាតុភូមិ រួចផុតពីការចោទប្រកាន់ និងបានដីនោះមកអាស្រ័យផលឡើងវិញ។
ជុំវិញបញ្ហានេះ អតីតតំណាងរាស្រ្តបក្សសង្គ្រោះជាតិ លោក អ៊ុំ សំអាន ហៅបញ្ហាដែលបានលេចឡើងនេះ សបញ្ជាក់ថា របបដឹកនាំបែបគ្រួសារនិយម គ្មានប្រព័ន្ធត្រួតពិនិត្យអំណាច វាមិនមែនបង្កការរងគ្រោះតែពលរដ្ឋសាមញ្ញទេ តែពេលនេះវាបានរាលដាលដល់ជួរកងទ័ពផងដែរ។
លោកយល់ថា បញ្ហានេះ វានឹងបន្តរីករាលដាលដល់មន្ត្រីបក្សកាន់អំណាចផ្សេងទៀត នៅថ្ងៃណាមួយ បើពួកគេមិនអើពើជំរុញឱ្យមេដឹកនាំ មានទំនួសខុសត្រូវចំពោះមុខជាតិ និងពលរដ្ឋជាម្ចាស់ប្រទេសនោះ។
លោកថា៖ «ខ្ញុំយល់ថា អាចអតីតយុទ្ធជនទាំងអស់ហ្នឹងគាត់ អត់ទ្រាំមិនបាននូវភាពអយុត្តិធម៌ ដែលរឹបអូសយកដីធ្លីគាត់ នៅពេលគាត់ខំតស៊ូដាច់ដៃដាច់ជើងហ្នឹង មើលទៅដូចជាអត់ហ៊ានយកដីគាត់ទេ ប៉ុន្តែនៅពេលគាត់អស់តម្លៃហើយ ចាប់ផ្តើមយកដីរបស់គាត់ ដូច្នេះគាត់អត់ទ្រាំមិនបានអាចនឹងងើបឡើងតស៊ូជាមួយទាហានដទៃទៀត ដើម្បីទម្លាក់ត្រកូលហ៊ុន ចេញពីអំណាចហើយ ប្រសិនបើរឿងហ្នឹងគាត់មិនដោះស្រាយ»។
វីអូឌី មិនទាន់អាចទាក់ទង មេបញ្ជាការកងពល លោក ឡាយ វិរៈ ដើម្បីសុំប្រតិកម្មជុំវិញការចោទប្រកាន់នេះបានទេ ខណៈអភិបាលខេត្តបន្ទាយមានជ័យ លោក អ៊ុំ រាត្រី និងអ្នកនាំពាក្យក្រសួងការពារជាតិ អ្នកស្រី ម៉ាលី សុជាតា មិនលើកទូរសព្ទ។
យ៉ាងណា ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង ជំរុញ រដ្ឋាភិបាលពន្លឿនដោះស្រាយបញ្ហានេះ ដើម្បីបង្ហាញពីការយកចិត្តទុកដាក់ លើក្រុមគ្រួសារកងទ័ព។
លោកថា៖ «ខ្ញុំថាអ្វីដែលសំខាន់ គឺពាក់ព័ន្ធនឹងរឿងអតីតយុទ្ធជន អតីតយោធិននេះ គឺបើកាលណាមានបញ្ហាគឺត្រូវតែមានការបញ្ជូនក្រុមការងារចុះធ្វើការស៊ើបអង្កេតភ្លាម ដើម្បីកុំឱ្យពួកគាត់ធ្លាក់ទៅក្នុងភាពរ៉ាំរ៉ៃនៃជម្លោះ។ ហើយរឿងទី២ទៀត បើសិនថាមានការរំលោភបំពានអ្វីចឹងមែន គឺត្រូវតែដោះស្រាយឱ្យគាត់ ត្រូវតែផ្តល់នូវយុត្តិធម៌សម្រាប់គាត់»។
យ៉ាងករណីប្រហាក់ប្រហែលគ្នានេះ បានកើតឡើងលើគ្រួសារយោធិន និងពលរដ្ឋសរុប ១៣គ្រួសារ នៅឃុំស្រយ៉ង់ ស្រុកគូលេន ខេត្តព្រះវិហារ តែត្រូវបានរដ្ឋាភិបាលចេញអន្តរាគមន៍ អំឡុងខែមីនា ឆ្នាំ២០២៤។ កិច្ចអន្តរាគមន៍ពីរដ្ឋាភិបាលពេលនោះ ធ្វើឡើងបន្ទាប់ពី មន្ត្រីយោធាបម្រើការកងការពារឃ្លាំងចំណុះយោធិភូមិភាគទី៤ លោក រ័ត្ន ទីណា បានចេញឡាយវីដេអូរលើបណ្តាញសង្គម ទម្លាយពីអ្នកពាក់ព័ន្ធ និងមានការចាប់អារម្មណ៍ពីអ្នកប្រើប្រាស់បណ្តាញសង្គម ក្នុងការចែករំលែកវីដេអូរនេះតៗគ្នា៕
ដោយ៖ លោក ប៉ុល សម្បត្តិ