អតីតឧកញ៉ា ហេង សិទ្ធី អះអាងថា សមត្ថកិច្ចកំពុងរៀបល្បិច ដើម្បីចាប់ខ្លួនលោក ក្រោយលោកបានព្យាយាមលាតត្រដាងក្រុមឧក្រិដ្ឋជនឆបោកតាមអនឡាញដែលប្រទាក់ក្រឡាគ្នាជាមួយមន្ត្រីជាន់ខ្ពស់ក្នុងជួររដ្ឋាភិបាលមួយចំនួននៅកម្ពុជា រួមទាំងអតីតអភិបាលខេត្តព្រះសីហនុ លោក គួច ចំរើន ជាដើម។
ការទម្លាយនេះហាក់ស៊ីគ្នាទៅនឹងរបាយណ៍ការនានា រកឃើញថា កម្ពុជាកំពុងក្លាយជាជម្រកដែនដីឧក្រិដ្ឋជនចាប់ជំរិតតាមអនឡាញ បង្កការភ័យខ្លាចដល់ប្រទេស ក្នុងតំបន់អាស៊ី និងអ៊ឺរ៉ុប។
តាមរយៈសំណេររៀបរាប់ជាភាសាខ្មែរ និងចិន នៅលើបណ្តាញសង្គមរបស់ខ្លួនជាបន្តបន្ទាប់នៅខែធ្នូនេះ អតីតឧកញ៉ា ហេង សិទ្ធី បានទម្លាយថា លោក គួច ចំរើន អតីតអភិបាលខេត្តព្រះសីហនុ គឺជាជនពុករលួយដ៏ស្ងៀមស្ងាត់ ដែលការពារឧក្រិដ្ឋកម្មល្បែងស៊ីសងខុសច្បាប់នៅព្រះសីហនុ ក្នុងអាណត្តិរបស់លោក។
លោកបន្តថា លោក គួច ចំរើន បានសង់វិមានដ៏ធំនៅខេត្តព្រះសីហនុ គាំទ្រដោយពួកឧក្រិដ្ឋជនតាមរយៈការទទួលបានរូបិយប័ណ្ណគ្រីបតូដូចជា USDT USDC និង Bitcoin ជាដើម ហើយ ទ្រព្យសម្បត្តិរបស់លោក គួច ចំរើន មានច្រើនជាង ១៥០លានដុល្លារ រួមទាំងនៅប្រទេសក្រៅ។
ជាការកត់សម្គាល់ប៉ុន្មានថ្ងៃទៅនេះ អតីតឧកញ៉ា ហេង សិទ្ធី អគ្គនាយកក្រុមហ៊ុន Maritime Group បានព្យាយាមសរសេរសារជាហូហែរ នៅលើហ្វេសប៊ុកផ្ទាល់ខ្លួនមានទាំងបកប្រែជាភាសាចិន និងអង់គ្លេសផង ដើម្បីទម្លាយពីបទឧក្រិដ្ឋឆបោកតាមអនឡាញនៅកម្ពុជា។
ក្នុងនោះលោក ហេង សិទ្ធី ឱ្យដឹងដែរថា បុរសជនជាតិសិង្ហបុរីសញ្ជាតិខ្មែរម្នាក់ឈ្មោះ Phua Gek Seng (ភូ ហ្គិច សេង) ហៅ Tak (តាក់) ជាឧក្រិដ្ឋជនលាងលុយកខ្វក់ និងរកស៊ីខុសច្បាប់នៅកម្ពុជា។
ក្រោយមកនៅថ្ងៃទី២២ ខែវិច្ឆិកា ឆ្នាំ២០២៤ បុរសជនជាតិសិង្ហបុរីសញ្ជាតិខ្មែររូបនេះ បានប្តឹងលោកនៅស្នងការដ្ឋាននគរបាលរាជធានីភ្នំពេញ ដើម្បីចាត់ការតាមច្បាប់ ពីបទបរិហារកេរ្តិ៍ និងទាមទារសំណង២លានដុល្លារ។
កាលពីថ្ងៃទី២ ខែធ្នូ ឆ្នាំ២០២៤ ព្រះមហាក្សត្រ បានចេញព្រះរាជក្រឹត្យសម្រេចលុបគោរមងារអ្នកឧកញ៉ាពីលោក ហេង សិទ្ធី តាមសំណើរបស់នាយករដ្ឋមន្ត្រី លោក ហ៊ុន ម៉ាណែត។
វីអូឌី មិនទាន់អាចរកការបញ្ជាក់បន្ថែមពីលោក ហេង សិទ្ធី បាននៅឡើយទេ គិតត្រឹមម៉ោងផ្សាយនេះ។
យ៉ាងណា លោក ហេង សិទ្ធី បញ្ជាក់ថា មន្រ្តីពាក់ព័ន្ធនៅកម្ពុជាកំពុងរៀបចំផែនការ ដើម្បីគំរាម ដាក់ឈ្មោះលោកនៅក្នុងនិវេតក្រហម របស់ស្ថាប័នប៉ូលិសអន្តរជាតិ (Interpol) ដើម្បីចាប់ខ្លួន ខណៈ លោកកំពុងគេចខ្លួនទៅក្រៅប្រទេស។
លោកចោទថា បុរសជនជាតិសិង្ហបុរីសញ្ជាតិខ្មែរឈ្មោះ ភូ ហ្គិច សេង បានបង់ប្រាក់ ៥លានដុល្លារទៅឱ្យលោក ស ថេត ជាថ្នូរនឹងផលិតរបាយការណ៍ក្លែងក្លាយ ដើម្បីចាប់ខ្លួនលោក។
បើតាមលោក ហេង សិទ្ធី ពួកគេបានស្នើសុំឱ្យស្ថាប័នប៉ូលិសអន្តរជាតិ (Interpol) ដាក់ឱ្យលោកនៅក្នុងសេចក្តីជូនដំណឹងក្រហម ឬហៅថានិវេតក្រហមរួចហើយ ទាំងគ្មានភស្តុតាង ឬសំណុំរឿងរបស់តុលាការ ផ្ទុយនឹងច្បាប់អន្តរជាតិ។
ក្រោយមក ដោយបរាជ័យក្នុងសុំដាក់ឈ្មោះលោកក្នុងនិវេតក្រហម ពួកគេក៏បានស្នើសុំឱ្យ ប៉ូលិសអន្តរជាតិ ដាក់ឱ្យខ្ញុំនៅក្នុងនិវេតពណ៌ខៀវវិញម្តង។
លោកក៏បានស្នើឱ្យបើកការស៊ើបអង្កេតជាបន្ទាន់ លើក្រសួងមហាផ្ទៃអំពីអំពើពុករលួយ និងផ្តល់ការការពារដល់ឧក្រិដ្ឋជន ក្នុងនោះមាន រដ្ឋមន្រ្តីក្រសួងមហាផ្ទៃលោក ស សុខា រួមទាំង លោក ស ថេត លោក ជួន ណារិន លោក គួច ចំរើន ជាដើម។
វីអូឌី មិនអាចសុំការឆ្លើយតបពី លោក ទូច សុឃៈ អ្នកនាំពាក្យរងក្រសួងមហាផ្ទៃ និងអគ្គស្នងការរងនគរបាលជាតិលោក ឆាយ គឹមឃឿន បានទេគិតត្រឹមម៉ោងផ្សាយនេះ ដោយគ្មានអ្នកទទួលទូរសព្ទ។
យ៉ាងណា តាមរយៈវិឌីអូ ជិត១នាទីលើបណ្តាញសង្គម លោក គួច ចំរើន ដែលត្រូវបានផ្ទេរពីអភិបាលខេត្តព្រះសីហនុ មកជាអភិបាលខេត្តកណ្តាល បានឆ្លើយតបទៅកាន់អតីតអ្នកឧកញ៉ា ហេង សិទ្ធី ថា លោកមិនមានជាប់ពាក់ព័ន្ធដូចការចោទប្រកាន់នោះទេ។
លោកថា៖ «ខ្ញុំពុំមានលុយគ្រីបតូ ដូចការសរសេរបំផ្លើសបំផ្លោង ដូចការបង្ហោះចែកចាយនោះទេ បើសិនអ្នកណាដឹងថាលុយគ្រីបតូរបស់ខ្ញុំនោះ នៅកន្លែងណា សូមទៅយកមកជូនមន្ទីរពេទ្យគន្ធបុប្ផាទៅ ចែកប្រជាជនក្រីក្រទៅ សង់សាលារៀន សង់មន្ទីរពេទ្យឱ្យអស់ម៉ងទៅ»។
ជុំវិញរឿងនេះ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ យល់ថាការបែកធ្លាយពត៌មានលើបណ្តាញសង្គមវាអាចជារឿងពិត និងមិនពិត តែលោកថា ដើម្បីបង្ហាញពីតម្លាភាព ស្ថាប័នពាក់ព័ន្ធក៏ត្រូវបើកការស៊ើបអង្កេតរឿងនេះបន្ទាន់ផងដែរ។
លោក សេក សុជាតិ កត់សម្គាល់ថា កន្លងទៅរឿងអំពើពុករលួយទុច្ចរិត របស់មន្រ្តីបក្សកាន់អំណាច ការអនុវត្តច្បាប់ហាក់មានភាពយឺតយ៉ាវ និងទាល់តែសម្ពាធខ្លាំងពីពលរដ្ឋថែមទៀត ទើបមានចំណាត់ការ។
លោកថា៖ «កើតមាន ឬមិនកើតមានក៏គួរតែដោះស្រាយដោយ ឈរលើគោលការតម្លាភាព បើមិនអ៊ីចឹងទេ សហគមន៍អន្តរជាតិ នៅតែបន្តដាក់សញ្ញាសួរ ឬក៏ចំណុចក្រហមទៅលើកម្ពុជា ពាក់ព័ន្ធជាមួយថាប្រទេសដែលជាសំបុកនៃការប្រព្រឹត្តអំពើខុសច្បាប់ លើបណ្តាញអនឡាញ ហើយក៏អាចហ្នឹងទទួលរង ទណ្ឌកម្មផ្សេងៗទៀត ប្រសិនបើនៅតែមិនមានចំណាត់ការណាមួយ ដែលអាចផ្តល់ទំនុកចិត្តទៅដល់ភាគីពាក់ព័ន្ធផ្សេងទៀត»។
អតីតតំណាងរាស្រ្តគណបក្សសង្រ្គោះជាតិ លោក អ៊ំ សំអាន លើកឡើងថា ការលាតត្រដាងរបស់លោក ហេង សិទ្ធី នេះឆ្លុះបញ្ចាំងពីការពិតនៅកម្ពុជា ព្រោះស៊ីគ្នាទៅនឹងរបាយការណ៍នានារបស់អន្តរជាតិរកឃើញថាកម្ពុជាជាសំបុកពួកឧក្រិដ្ឋជន។
លោកថា នៅកម្ពុជាអ្នកដែលហ៊ាននិយាយពីរឿងអាស្រូវប៉ះពាល់មន្រ្តីបក្សកាន់អំនាច តែងតែរងការគំរាមតាមផ្លូវច្បាប់ ដូចករណីលោក ហេង សិទ្ធិ នេះជាដើម។
លោកថា៖ «ឧកញ៉ា ហេង សិទ្ធី បានបញ្ជាក់ហ្នឹង វាកើតជាក់ស្តែងនៅកម្ពុជាយើង។ ឃើញមានការចាប់ជំរិត ការបង្ខាំងមនុស្សឱ្យឆបោកតាមអនឡាញ ការជួញដូរមនុស្ស ហ្នឹងគឺ មានអ៊ីចឹងមែនឯង ដូចគាត់ចោទប្រកាន់ចឹងឯង ដោយសារតែមានការគប់គិតគ្នារវាងមន្រ្តីជាន់ខ្ពស់រដ្ឋាភិបាលជាមួយពួកឧក្រិដ្ឋជនហ្នឹងឯង បានជាបទល្មើសទាំងអស់នោះមិនអាចបង្រ្កាបបាននៅកម្ពុជា។ ផ្ទុយទៅវិញបទល្មើស ទាំងអស់នោះកាន់តែកើនច្រើនឡើងៗនៅកម្ពុជា ដោយសារតែមានមន្រ្តីជាន់ខ្ពស់ក្នុងជួររដ្ឋាភិបាល ចៅហ្វាយខេត្ត ទទួលសំណូក ពីពួកឧក្រិដ្ឋទាំងអស់នោះ។ ខ្ញុំជឿថា លោក ហ៊ុន សែន លោក ហ៊ុន ម៉ាណែត ក៏ដឹងដែរ គាត់ចេះតែបិទភ្នែកទៅ ដើម្បីឱ្យមន្រ្តីទាំងអស់ហ្នឹងរកស៊ីមានបានរកលុយជួយពង្រឹងអំណាចរបស់គាត់»។
ក្រុមឧកញ៉ាដែលអន្តរជាតិរកឃើញថាជាឧក្រិដ្ឋជន សុទ្ធសឹងតែជាមនុស្សដែលនៅកៀកនឹងគ្រួសារហ៊ុនរួមមាន ឧកញ៉ា លី យ៉ុង ផាត់ ឧកញ៉ា កុក អាន ឧកញ៉ា ហ៊ុន តូ និងឧកញ៉ា ជេន ស៊ី ទីប្រឹក្សាលោក ហ៊ុន សែន ដែលត្រូវតុលាការចិនរកឃើញថាជាឧក្រិដ្ឋជនលាងលុយ និងឆបោកតាមអនឡាញ ជាដើម។ ឧកញ៉ា លី យ៉ុងផាត់ អ្នកគ្រប់គ្រងលុយឱ្យបក្សកាន់អំណាច ត្រូវក្រសួងរតនាគារជាតិមេរិក ដាក់ទណ្ឌកម្មបង្កកទ្រព្យសម្បត្តិ ក្រោយមានជាប់ព័ន្ធការជួញដូរមនុស្ស ការរកស៊ីឆបោកតាមអនឡាញ។
ដោយ៖ លោក សែន សច្ចៈ
