លោក ហ៊ុន ម៉ាណែត រងការចោទថា នឹងក្លាយជាជនក្បត់ជាតិតជំនាន់ ដោយគេមើលឃើញថា ក្លាហានបង្ក្រាបតែខ្មែរគ្នាឯង ដើម្បីពង្រឹងអំណាច តែមិនក្លាហានប្រើយន្តការអន្តរជាតិទប់ទល់នឹងបទេសឈ្លានពាន ធ្វើឱ្យទឹកដីកម្ពុជាបាត់បង់ជាបន្តបន្ទាប់ ទៅប្រទេសជិតខាងរួមទាំងករណីកោះគុត ដែលថៃកំពុងច្បាមយក។
ករណីកោះគុត អតីតតំណាងរាស្រ្តបក្សសង្រ្គោះជាតិ លោក អ៊ុំ សំអាន និយាយនៅថ្ងៃទី២៣ ខែធ្នូនេះថា អតីតនាយករដ្ឋមន្ត្រី លោក ហ៊ុន សែន ចុះអនុសារណៈនៃការយោគយល់គ្នាឆ្នាំ២០០១ ជាមួយមេដឹកនាំថៃ លោក ថាក់ស៊ី យល់ព្រម ឱ្យកោះគត់ទៅថៃ តាមរយៈលោក សុខ អាន។
លោកគូសបញ្ជាក់ថា នេះបើយោងតាមផែនទីភ្ជាប់អនុសារណៈ នៃការយោគយល់ឆ្នាំ២០០១ ដែលលោកសំអាងលើបន្ទាត់គូសវាងកោះគុត ឬបន្ទាត់គូសផតចូលមកដែនសមុទ្រខ្មែរ ដែលបានកាត់ឆ្វៀលកោះគុតចេញ។
សម្រាប់លោក អ៊ុំ សំអាន បញ្ហាចម្បងនេះ ដែលធ្វើឱ្យលោក ហ៊ុន សែន និងលោក ហ៊ុន ម៉ាណែត មិនបាននិយាយថា មួយផ្នែកនៃកោះគុត ជារបស់ខ្មែរនោះទេ បើទោះបីនាយករដ្ឋមន្រ្តីថៃ លោកស្រី ផេថងថាន បាននិយាយថា កោះគុតជារបស់ថៃ។
លោកថា បញ្ហានេះ បើលោក ហ៊ុន ម៉ាណែត មិនប្តឹងថៃទៅតុលាការអន្តរជាតិ ដើម្បីទាមទារយកកោះគុតមកវិញនោះទេ លោក ហ៊ុន ម៉ាណែត នឹងក្លាយជាជន «ក្បត់ជាតិ តជំនាន់» ដូចត្រកូលអភ័យវង្សបែន គឺឪកាត់កោះត្រល់ឱ្យយួន ឯកូនកាត់កោះគុតឱ្យថៃ។
ការណ៍នេះ លោក ទាមទារឱ្យលោក ហ៊ុន ម៉ាណែត ត្រូវតែបញ្ជាក់ថា មួយផ្នែកនៃកោះគុត ជារបស់កម្ពុជា ហើយត្រូវលុបចោល អនុសារណៈនៃការយោគយល់ឆ្នាំ២០០១ បន្ទាប់មក ត្រូវប្តឹងថៃទៅតុលាការអន្តរជាតិ ទាមទារចំណែកកោះគុតយ៉ាងហោចពាក់កណ្តាលមកវិញ ទើបអាចគេចផុតពីទង្វើកាត់ទឹកដីឱ្យបរទេស ដែលប្រឈមនឹងទោសក្បត់ជាតិ។
លោកថា៖ «បើសិនជាលោក ម៉ាណែត មិនប្រកាសថាកោះគុតមួយផ្នែក ជាកម្មសិទ្ធិរបស់កម្ពុជានោះទេ ហើយគាត់មិនទាមទារយកកោះគុតមកវិញនោះទេ ហើយគាត់មិនលុបចោលអនុសារណៈនៃការយោគយល់ឆ្នាំ២០០១ ដែលបោះបង់ចោលកោះគុតនោះទេ ហើយមិនព្រមប្តឹងថៃទៅកាន់តុលាការអន្តរជាតិ ដើម្បីទាមទារយកកោះគុតមកវិញនោះទេ លោក ហ៊ុន ម៉ាណែត នឹងក្លាយជាជនក្បត់ជាតិទីពីរបន្ទាប់ពីឳពុករបស់គាត់»។
បន្ថែមពីនេះ លោក អ៊ុំ សំអាន អះអាងថា លោក ហ៊ុន សែន ធ្លាប់បម្រើមហិច្ចតាវៀតណាម កាត់កោះត្រល់ ចង្កោមកោះក្រចកសេះ និងដីតាមបន្ទាត់ព្រំដែនជាច្រើនរយហិកតា ឱ្យទៅវៀតណាម ដែលជាការដឹងគុណវៀតណាម ដែលបានលើកបន្តុបឱ្យឡើងកាន់អំណាច ចាប់ពីឆ្នាំ១៩៧៩ មក។
លោកបន្តថា លោក ហ៊ុន សែន មិនត្រឹមតែកាត់ទឹកដីឱ្យប្រទេសជិតខាងទេ គាត់ធ្លាប់គំរាមអង្គព្រះមហាក្សត្រចង់រំលាយរបបរាជានិយមអាស្រ័យរដ្ឋធម្មនុញ្ញចោល បើព្រះអង្គមិនព្រមឡាយព្រះហស្ថលេខា លើសន្ធិសញ្ញាព្រំដែនខុសច្បាប់ ឆ្នាំ១៩៨២ ១៩៨៣ និង១៩៨៥ រស់ឡើងវិញនៅឆ្នាំ២០០៥ ដើម្បីសម្រេចមហិច្ឆតាវៀតណាមលេបទឹកដីខ្មែរ ទាំងលោក ហ៊ុន សែន ដឹងថា ទង្វើនេះបានបំពានលើរដ្ឋធម្មនុញ្ញកម្ពុជា និងកិច្ចព្រមព្រៀងសន្តិភាពទីក្រុងប៉ារីស ២៣តុលា ឆ្នាំ១៩៩១ក្តី ។
លោកថា៖ «មេដឹកនាំធ្វើឱ្យបាត់បង់ទឹកដី ទៅប្រទេសជិតខាង ឬកាត់ទឹកដីឱ្យប្រទេសជិតខាងហ្នឹងគាត់នឹងក្លាយជាជនក្បត់ជាតិ ដូចឳពុករបស់គាត់ ដែលឳពុករបស់គាត់កាត់កោះត្រល់ឱ្យយួន ហើយលោក ហ៊ុន ម៉ាណែត អាចនឹងកាត់កោះគុតឱ្យថៃ ដូច្នេះត្រកូលហ៊ុន នឹងក្លាយជាជនក្បត់ជាតិតជំនាន់»។
អ្នកនាំពាក្យគណបក្សប្រជាជនកម្ពុជាលោក សុខ ឥសាន បានបដិសេធចំពោះការចោទប្រកាន់របស់លោក អ៊ុំ សំអាន។ លោកថា រដ្ឋាភិបាលមិនបានធ្វើឱ្យបាត់បង់ទឹកដីទៅប្រទសជិតខាងនោះទេ។
មន្រ្តីនាំពាក្យរូបនេះ បានវាយបកវិញថា អ្នកដែលចោទប្រកាន់មេដឹកនាំបក្សកាន់អំណាច ជាជនក្បត់ជាតិ គឺជាការទម្លាក់កំហុសដាក់រដ្ឋាភិបាល ក្នុងបំណងចង់ផ្តួលរំលំរដ្ឋាភិបាល។
លោកថា៖ «ការចោទប្រកាន់ ការដែលតវ៉ារឿងព្រំដែន នៅតាមហ្វេសប៊ុក ទៅតាមវោហារសាស្រ្ត តាមរលកធាតុអាកាសទាំងអស់ហ្នឹងវាអត់ប្រយោជន៍ទេ»។
យ៉ាងណាកាលពីចុងសប្តាហ៍នេះ រដ្ឋាភិបាលបានដឹកនាំពលរដ្ឋប្រមាណជាង២០០នាក់ ធ្វើទស្សនកិច្ចតាមខ្សែក្រវាត់ព្រំដែនកម្ពុជា វៀតណាម ចាប់ពីបង្គោលព្រំដែនលេខ៦៩ នៅច្រកទ្វារអន្តរជាតិត្រពាំងស្រែ ស្រុកស្នួល ខេត្តក្រចេះ រហូតដល់បង្គោលព្រំដែនលេខ៦៥ ច្រកទ្វារព្រំដែនឡាប៉ាខេ ស្រុកកែវសីមា ខេត្តមណ្ឌលគិរី។
មន្ត្រីរដ្ឋាភិបាលអះអាងថា ការដឹកនាំពលរដ្ឋចុះមើលព្រំដែននេះ ឆ្លុះបញ្ចាំងពីកិច្ចការពារអធិបតេយ្យភាព បូរណភាពទឹកដី របស់រាជរដ្ឋាភិបាលទាំងពីរជំនាន់ ជាពិសេសចង់បង្ហាញប្រាប់ពលរដ្ឋថា រាជរដ្ឋាភិបាលមិនអនុញ្ញាតឱ្យបាត់បង់ទឹកដីសូម្បីមួយមីល្លីម៉ែត្រ។
ដោយឡែក ប្រធានក្រុមឃ្លាំមើលកម្ពុជា លោក ម៉ែន ណាត និយាយថា ការដឹកនាំពលរដ្ឋទៅមើលព្រំដែន ជានយោបាយប្រជាភិថុត៌របស់គ្រួសារហ៊ុន ចង់បិទបាំងទង្វើអាក្រក់របស់ខ្លួនកាត់ដីឱ្យបរទេស។
លោកគូសបញ្ជាក់ថា មេដឹកនាំដែលមានឆន្ទៈ ការពារជាតិទឹកដី គេមិនដែលយកសន្ធិសញ្ញាខុសច្បាប់ដែលគូសវាសដោយប្រទេសជិតខាងចង់លេបទឹកដី ទៅកំណត់បន្ទាត់ព្រំដែនដូចបច្ចុប្បន្នទេ លោកថា ការនាំពលរដ្ឋទៅមើលបង្គោលបច្ចុប្បន្ន ជាបង្គោលដែលបោះចូលដីខ្មែរ តាមការចង់បានរបស់ប្រទេសជិតខាង មិនមែនជាព្រំដែនត្រឹមត្រូវ ដូចមានចែងក្នុងរដ្ឋធម្មនុញ្ញទេ។
លោកថា៖ «ការដឹកនាំប្រជាពលរដ្ឋទៅមើលព្រំដែន ហ្នឹងវាជាការសម្ដែងទេ មិនមែនទៅនាំប្រជាពលរដ្ឋទៅការពារបូរណភាពទឹកដីទេ។ គ្រាន់ជាវេទិកាមួយទៅសម្ដែងនៅតាមតំបន់ព្រំដែន ហើយថតបង្ហោះផ្សព្វផ្សាយនៅលើបណ្ដាញព័ត៌មានរបស់ជាតិហ្នឹង។ ហើយអាហ្នឹងដូចជាការជួយបំបាំងរឿងពិតនៅពីខាងក្រោយថែមទៀត»។
អ្នកជំនាញច្បាប់ និងអភិបាលកិច្ចបែបប្រជាធិបតេយ្យ លោក វ៉ន់ ចាន់ឡូត និយាយប្រាប់ វីអូឌី ថា អ្នកធ្វើឱ្យបាត់បង់ទឹកដី ទៅប្រទេសជិតខាង នឹងជាប់ឈ្មោះជាជនក្បត់ជាតិ ក្នុងប្រវត្តិសាស្រ្តខ្មែរតជំនាន់ និងក្បត់ឆន្ទៈបុព្វបុរសខ្មែរ ។
លោកថា៖ «នៅពេលដែលអ្នកដឹកនាំក្បត់ជាតិ ហើយមិនអាចការពារនូវបូរណភាពទឹកដីបាន អំណាចអ្នកដឹកនាំ នោះនឹងត្រូវអស់នៅពេលណាមួយមិនខាន។ វាមិនមែនជារឿងលេងសើចទេ ហើយក៏ពលរដ្ឋ និងមិនបណ្ដោយឲ្យមានមេដឹកនាំ ដែលមិនអាចការពារនូវបូរណភាពទឹកដី ការពារនូវសុខសន្តិភាព ឬក៏យុត្តិធម៌សង្គមសម្រាប់ប្រជាពលរដ្ឋរបស់ខ្លួនហ្នឹងដែរ»។
បន្ថែមពីនេះ លោក វ៉ន ចាន់ឡូត ក៏បានបង្ហោះសារលើហ្វេសប៊ុកកាលពីថ្ងៃទី២២ ខែធ្នូថា ប្រជាជាតិមួយត្រូវតែមានកាតព្វកិច្ចការពារឱ្យបានគត់មុត នូវអធិបតេយ្យ និងបូរណភាពទឹកដីរបស់ខ្លួន។
លោកថា អ្វីដែលលោក ហ៊ុន ម៉ាណែត លើកឡើងថា រដ្ឋាភិបាលនឹងមិនទៅលេងល្បែងទឹកដីជាមួយប្រទេសជិតខាង ទំនងជាទស្សនៈនយោបាយកំសាកអន់ថយ និងគ្មានភាពស្មោះត្រង់ចំពោះមុខប្រជាជាតិខ្មែរ។
លោកបន្តថា ពលរដ្ឋខ្មែរមួយចំនួនធំបានដឹងជាសច្ចៈថា «កោះគុត» មានចំណែកកម្មសិទ្ធិមួយផ្នែក ជារបស់កម្ពុជាសំអាងលើសន្ធិសញ្ញាបារាំង-សៀម ថ្ងៃទី២៣ ខែមីនា ឆ្នាំ១៩០៧។ ព្រំដែនគោកយកត្រឹមបង្គោលលេខ៧៣ រីឯព្រំដែនសមុទ្រយកត្រឹមចំណុចខ្ពស់បំផុតនៃកោះគុត។
យ៉ាងនេះក្តី អ្វីដែលមិនអាចប្រកែកបាន នាសម័យទំនើបនេះ គេចាំសារសំឡេង របស់លោក ហ៊ុន សែន ដែលបានគំរាមរំលាយស្ថាប័នព្រះមហាក្សត្រ អំឡុងឆ្នាំ២០០៥ ដើម្បីសម្រេចមហិច្ឆតាវៀតណាម លេបទឹកដី ដោយបានប្រែក្លាយ ធ្វើឱ្យសន្ធិសញ្ញាខុសច្បាប់ ឱ្យរស់ឡើងវិញនេះ។
សំឡេង៖ «ខ្ញុំនិយាយជាមួយសម្តេចក្រុមព្រះហើយ ខ្ញុំថាព្រះអង្គ និយាយប្រាប់ឯកឧត្តម ស៊ុន ចាន់ថុល កុល ផែង ស៊ីសុវត្ថិ សន្ថារ៉ា នៅលើយន្តហោះ ហើយខ្ញុំប្រាប់សម្តេចក្រុមព្រះពេលដែលជួបតាមទូរស័ទ្ទថាព្រះអង្គបើលើកនេះវាពិបាកស៊ីញ៉េ ត្រូវពិនិត្យឡើងវិញ យើងគួរទុករាជានិយម ឬធ្វើសាធារណរដ្ឋ ឱ្យវាមានប្រធានាធិបតីម៉ង»។
កម្តៅនេះ វាបានលេចឡើង នូវវិធានប្រើតុលាការ ដើម្បីរំលាយគណបក្សសង្គ្រោះជាតិ ចេញពីឆាកនយោបាយ ខណៈគណបក្សនេះ មានអាសនៈក្នុងសភាជិតពាក់កណ្តាល ដែលជារឿយៗតំណាងរាស្ត្រគណបក្សនេះ តែងតែជំទាស់នឹងការបោះបង្គោលព្រំដែននេះ ។
យ៉ាងណាក្តី អ្នកឃ្លាំមើល ថា ទង្វើរបស់ លោក ហ៊ុន សែន ទាំងរំលាយគណបក្សសង្ក្រោះជាតិ ការរំកិលបង្គោលព្រំដែន និងការធ្វើឱ្យសន្ធិសញ្ញាព្រំដែនខុសច្បាប់ ឱ្យរស់ឡើងវិញនៅឆ្នាំ២០០៥ បានរំលោភ រដ្ឋធម្មនុញ្ញត្រង់មានត្រា៥៥ និងក្រមព្រហ្មទណ្ឌមាត្រា ៤៤០។
មាតា៥៥ នៃរដ្ឋធម្មនុញ្ញកម្ពុជាចែងថា «សន្ធិសញ្ញា និងកិច្ចព្រមព្រៀងទាំងឡាយណា ដែលមិនស្របនឹងឯករាជ្យ អធិបតេយ្យ បូរណភាពទឹកដី អព្យាក្រឹត្យភាព និងឯកភាពជាតិរបស់ព្រះរាជាណាចក្រកម្ពុជា ត្រូវលុបចោល»។ ដោយឡែក ក្រមព្រហ្មទណ្ឌមាត្រា ៤៤០ ចែងថា «អំពើប្រគល់ឱ្យរដ្ឋបរទេស ឬភ្នាក់ងារបរទេស នូវដែនដីជាតិទាំងស្រុង ឬមួយផ្នែក ជាអំពើក្បត់ជាតិ ត្រូវផ្តន្ទាទោសដាក់ពន្ធនាគារអស់មួយជីវិត»៕
ដោយ៖ លោក ប៉ុល សម្បត្តិ
