ខ្មាន់​កាំភ្លើង​​អតីត​​ឧកញ៉ា ស្រី ស៊ីណា ត្រូវ​ផ្តន្ទា​ទោស​៣១ឆ្នាំ

តុលាការ​ផ្តន្ទាទោស​ខ្មាន់​កាំភ្លើង អតីត​ឧកញ៉ា លោក ស្រី ស៊ីណា ដាក់​ពន្ធនាគារ​៣១ឆ្នាំ​ ពាក់ព័ន្ធ​​​នឹង​ការ​បើក​ការ​បាញ់សម្លាប់​មនុស្ស​ដ៏​ឃោរឃៅ កាលពី​ជិត​៧ខែមុន នៅ​បុរី​ប៉េងហួត​បឹង​ស្នោ រាធានានីភំ្នពេញ។

ព្រឹត្តិការណ៍​បាញ់​ប្រហារ​នោះ បង្កឱ្យ​មនុស្ស​២នាក់​ស្លាប់​ជា​គូរ​ដណ្តឹង​នឹង​គ្នា និង​២នាក់​ផ្សេង​ទៀត បាន​រង​របួល ដែល​សមត្ថកិច្ច​អះអាង​ថា មក​ពី​ទំនាស់​ពាក្យ​សម្តី។

សេចក្តី​ប្រកាស​ព័ត៌មាន របស់​អ្នក​នាំពាក្យ​​សាលាដំបូង​រាជធានីភ្នំពេញ ឱ្យ​​ដឹង​​ថា កាល​ពី​ថ្ងៃ​ទី០៦ ខែធ្នូ ឆ្នាំ២០២៤នេះ ក្រុម​ប្រឹក្សា​ជំនុំ​ជម្រះ​​នៃ​​សាលា​ដំបូង​​រាជ​ធានី​ភ្នំពេញ បាន​​បើក​​សវនាការ​​ជំនុំ​ជម្រះ​លើ​សំណុំ​រឿង​ព្រហ្មទណ្ឌ​ចំនួន​៣ ពាក់ព័ន្ធ​នឹង​​ជន​ជាប់​ចោទ​ឈ្មោះ ស្រី ស៊ីណា ក្នុង​នោះ​សំណុំ​រឿង​ទី១ ពាក់ព័ន្ធ​នឹងបទ ឃាត​កម្ម និង​ប្រើប្រាស់​អាវុធ​ដោយ​គ្មាន​ច្បាប់​អ​នុញ្ញា​ត​ សំណុំ​រឿង​ទី២ ពីបទ​ប៉ុនប៉ង​ឃាតកម្ម និង​ប្រើប្រាស់​អាវុធ​ដោយ​គ្មាន​ការ​អនុញ្ញាត និង​សំណុំរឿង​ទី៣ រំលោភ​លើ​លំនៅ​ឋាន។​

ប្រភព​ដដែល​បន្ត​ថា ក្រោយ​​បើក​សវនាការ​​រួច នៅ​​ថ្ងៃ​ទី​២៣ ខែធ្នូ​នេះ ក្រុម​​ប្រឹក្សា​​​ជំ​នុំ​​​ជម្រះ បាន​ប្រកាស​សាល​​ក្រម​​ដោយ​​​សម្រេច​​ផ្តន្ទា​ទោស​​ជន​​ជាប់​​ចោទ​ ស្រី ស៊ីណា ក្នុង​សំណុំ​រឿង​ទាំង​៣នេះ ដាក់​​​ពន្ធនាគារ​រយះពេល​សរុប​​ចំនួន ៣១ឆ្នាំ និងបង្គាប់​អោយ​សង​​សំណង​​​ជា​ប្រាក់​ចំនួន ២លានដុល្លារ ជូន​​ដល់​​គ្រួសារ​​​​​​ជន​រង​គ្រោះ​ជាគូរ​ដណ្តឹង​​​​ដែ​​ល​ត្រូវ​បាន​​ជនជាប់ចោទ​​​បាញ់​​ស្លាប់​ចំនួន ២នាក់ និង​សំណង​​ចំនួន ៥០​ម៉ឺនដុល្លារ​ទៀត​​​សម្រាប់​អ្នក​រង​របួស​ចំនួន​២នាក់​​ក្នុង​ការ​បាញ់​ប្រហារ​​នោះ។​

អ្នកនាំ​ពាក្យ​​សាលាដំបូង​រាជធានីភ្នំពេញ បានគូស​បញ្ជាក់​ថា ការ​ផ្តន្ទា​ទោស​​របស់​​ក្រុម​ប្រឹក្សា​ជំនុំ​ជម្រះ​លើជន​ជាប់ចោទ​ឈ្មោះ ស្រី ស៊ីណា ក្នុង​សំណុំរឿង​ទាំង​៣​នេះ គឺជា​ការ​ផ្តន្ទា​ទោស​ក្នុង​កម្រិត​​អតិបរមា​នៃ​ទោស។ អតីត​ឧកញ៉ា ស្រី ស៊ីណា ត្រូវបាន​សមត្ថកិច្ច​ចាប់​ខ្លួន កាល​ពីថ្ងៃ​ទី​១៧ ខែមិថុនា ឆ្នាំ​២០២៤ បន្ទាប់​​ពី​ជនជាប់​ចោទ​រូប​នេះ បាន​រត់​គេច​ខ្លួន​ពីកន្លែងប្រព្រឹត្តឃាត​កម្ម  ក្រោយ​ពី​បានបាញ់​ទៅលើ​​ជន​​រង​គ្រោះ​​ឈ្មោះ ឡុង លីសុង អាយុ​​​២៧​ឆ្នាំ និង​គូរដណ្តឹង​​របស់​​គាត់​​ឈ្មោះ ឃិន កញ្ចនា អាយុ២៦ឆ្នាំ បណ្តាល​អោយ​​ស្លាប់ និង​​មនុស្ស​​២នាក់​​ផ្សេង​ទៀត​​រង​របួស នៅ​ខណ្ឌ​ច្បារ​អំពៅ រាជធានីភ្នំពេញ។ បីថ្ងៃក្រោយ​​ពី​​រង​​ការចោទ​ប្រកាន់ថា បាន​បាញ់សម្លាប់​ជន​រងគ្រោះ ព្រះមហាក្សត្រ ​បាន​​ត្រាស់​​បង្គាប់​​បញ្ចប់​​គោរ​មងារ​ឧកញ៉ា ពី​លោក ស្រី ស៊ីណា ខណៈ​រដ្ឋមន្ត្រី​ក្រសួង​​យុត្តិធម៌​​លោក កើត រិទ្ធ ធ្លាប់​​បាន​អះអាង​​ជា​ចំហ​ថា នឹងដើរ​ចេញ​ពី​តំណែង​រដ្ឋ​មន្ត្រី ប្រសិន​​បើ​​បុគ្គល​​ឈ្មោះ ស្រី​ ស៊ីណា ជាប់គុកតែ​២ ឬ៣ឆ្នាំ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ