ភរិយារបស់អតីតមន្រ្តីចៅសង្កាត់រងចតុមុខ នៃខណ្ឌដូនពេញ កូតាមកពីគណបក្សសង្រ្គោះជាតិចោទប្រកាន់ថា ពាក្យថាយុត្តិធម៌ដែលទទួលបានតាមការជំនុំជម្រះរបស់តុលាការគ្មានឡើយ ខណៈប្រធានក្រុមប្រឹក្សាជំនុំជម្រះ នៃតុលាការកំពូលនៅថ្ងៃនេះ បន្តតម្កល់បទចោទប្រឆាំងលោក វឿង សំណាង របស់តុលាការក្រុងភ្នំពេញ ទុកជាបានការដដែល។
អ្នកស្រី ទៀង ចិន្តា ដែលត្រូវជាភរិយារបស់លោក វឿង សំណាង ឱ្យដឹងនៅថ្ងៃទី២៤ ខែធ្នូ ឆ្នាំ២០២៤ នេះថា ស្វាមីរបស់អ្នកស្រីនៅតែជាប់ចោទ ដូចអ្វីដែលតុលាការក្រុងភ្នំពេញ ចោទប្រកាន់ដដែលទេ។ ប្រភពបន្តថា មើលទៅពាក្យថាយុត្តិធម៌ដែលគេឯងតែឮពេញៗមាត់រាល់ថ្ងៃនេះ គឺមាននៅតែលើក្រដាស និងសរសេរទុកឱ្យតែបានល្អមើលប៉ុណ្ណោះ។ ផ្ទុយទៅវិញ អ្នកដែលរងគ្រោះដោយអំពើយុត្តិធម៌ នៅតែមិនអាចស្វែងរកការពិត និងបង្ហាញពីភាពស្អាតស្អំរបស់ខ្លួន តាមរយៈតុលាការនេះបានដដែល។
ប្រតិកម្មរបស់អ្នកស្រី ទៀង ចិន្តា នៅពេលនេះ ធ្វើឡើងស្របពេលដែល ប្រធានក្រុមប្រឹក្សាជំនុំជម្រះ នៃតុលាការកំពូលលោក តាំង ស៊ុនឡាយ នៅថ្ងៃនេះ បានប្រកាសសាលដីកា ដោយរក្សាការចោទប្រកាន់ប្រឆាំងលោក វឿង សំណាង ដូចដែលតុលាការក្រុងភ្នំពេញ ធ្លាប់បានអនុវត្តក្នុងពេលកន្លងទៅដែរ។
លោក វឿង សំណាង ជាអតីតចៅសង្កាត់រង នៃសង្កាត់ចតុមុខ ខណ្ឌដូនពេញ កូតាមកពីគណបក្សសង្រ្គោះជាតិ ដែលលោកបានភាសខ្លួនទៅស្នាក់នៅប្រទេសថៃ អំឡុងចុងឆ្នាំ២០១៧ ក្រោយតុលាការរំលាយគណបក្សប្រឆាំងដ៏ធំមួយនេះ ត្រូវបានតុលាការកំពូលរំលាយ។ ការចោទប្រកាន់នេះ ធ្វើឡើងបន្ទាប់ពី លោក វឿង សំណាង ត្រូវបានចាប់បញ្ជុនមកកាន់ប្រទេសកម្ពុជាវិញ។
លោក វឿង សំណាង ត្រូវបានតុលាការក្រុងភ្នំពេញផ្តន្ទាទោសដាក់ពន្ធនាគារ ចំនួន៦ឆ្នាំ និងពិន័យជាប្រាក់ចំនួន ៤លានរៀល។
អតីតមន្រ្តីគណខបក្សប្រឆាំងរូបនេះ រង់ការចោទប្រកាន់ពីបទ «រួមគំនិតក្បត់ និងបទចោទញុះញង់បង្ករឱ្យមានភាពវឹកវរធ្ងន់ធ្ងរ ដល់សន្តិសុខសង្គម »៕
