ក្រុមជនរងគ្រោះចាញ់បោកអតីតឧកញ៉ា ហ៊ី គឹមហុង ចាត់ទុកការថ្លែងរបស់អ្នកនាំពាក្យគណបក្សកាន់អំណាច លោក សុខ ឥសាន ដែលហៅពួកគេថាមនុស្ស «ភ្លើ» គឺជាការម៉ាក់ងាយធ្ងន់ធ្ងរ ចំពោះជនរងគ្រោះ ដែលឆ្លុះបញ្ចាំងថា បក្សកាន់អំណាចនៅពីក្រោយឧក្រិដ្ឋជនឆបោក ដែលនឹងធ្វើឱ្យពួកគេជាង ៨ពាន់គ្រួសារ បន្តរងគ្រោះច្រើនឆ្នាំទៀត ដោយសារវិបត្តិបំណុល។
ការលើកឡើងរបស់ជនរងគ្រោះនេះ ក្រោយសមាជិកព្រឹទ្ធសភា និងជា អ្នកនាំពាក្យគណបក្សប្រជាជនកម្ពុជា លោក សុខ ឥសាន បានផ្តល់បទសម្ភាសន៍ឱ្យ វីអូឌី ថា ក្រុមពលរដ្ឋចាញ់បោកក្រុមហ៊ុនដែលគ្រាន់តែគេបង្ហាញរូបថតថ្នាក់ដឹកនាំថតជាមួយឧកញ៉ាឆបោកនោះជាមនុស្ស «ភ្លើ»។
ក្នុងន័យនេះមន្រ្តីរូបនេះ បញ្ជាក់ថា ថ្នាក់ដឹកនាំគណបក្សកាន់អំណាចមិនមានជាប់ពាក់ព័ន្ធជាមួយក្រុមហ៊ុនឆបោកពិភពដីមាសនេះទេ ហើយការបង្ហាញខ្លួនថតរូបជាមួយបុគ្កលណាម្នាក់នោះ គឺគ្រាន់តែការថតរូបអនុស្សាវរីយ៍តែប៉ុណ្ណោះ។
លោកថា៖ «ហើយថ្នាក់ដឹកនាំលោក មានសណ្តានចិត្តល្អណាស់ ដែលកូនចៅចង់សុំជួបថតជាមួយ ដើម្បីអនុស្សវរីយ៍អី អាហ្នឹងជារូបធម្មតា ជាមនោសញ្ចេតនា គោរព រាប់អានគ្នាមិនមែនឱ្យថតដើម្បីថា យកអារូបថតហ្នឹង ទៅប្រើប្រាស់ដោយវិធីផ្សេងៗខុសច្បាប់ អត់ទេ។ អ៊ីចឹង កុំយករឿងហ្នឹងមកនិយាយ ខ្លះហ្នឹងគ្រាន់តែស្គាល់ ខ្ញុំស្គាល់សម្តេចនេះ សម្តេចនោះ ហើយអាងគេថត អាហ្នឹងយើងភ្លើ អ្នកចាញ់បោកគេហ្នឹងភ្លើទេ យកសំអាងអ៊ីចឹងយើងទៅជឿគេឱ្យគេបោកអាហ្នឹងយើងភ្លើទេ»។
ជនរងគ្រោះម្នាក់ លោក មុត ពិសី បង្ហាញការហួស ចិត្តចំពោះការលើកឡើងរបស់អ្នកនាំពាក្យគណបក្សកាន់អំណាចរូបនេះ។ ហួសចិត្តនៅត្រង់ថា លោកកំពុងរងភាពអយុត្តិធម៌គ្មានដំណោះស្រាយ តែបែរជារងការម៉ាក់ងាយពីមន្រ្តីបែបនេះទៅវិញ។
ជាងនេះទៀតសម្រាប់ លោក ពិសី អ្វីដែលលោក សុខ សាន ថ្លែងនេះ ឆ្លុះបញ្ចាំងថាមន្រ្តីរដ្ឋាភិបាលរូបនេះ កំពុងតែគាំទ្រក្រុមជនឆបោក ធ្វើឱ្យពលរដ្ឋនឹងកាន់តែរងគ្រោះថែមទៀត។
លោកថា៖ «គឺមានការហួសចិត្តយ៉ាងខ្លាំង ហាក់បីដូចជាគាត់កាន់ជើងជនឆបោកប្រជាពលរដ្ឋ ដែលជាម្ចាស់សន្លឹកឆ្នោតចឹង។ ហើយខ្ញុំស្នើសុំឱ្យសម្តេចបវធិបតី សម្តេចនាយករដ្ឋមន្រ្តី នៃព្រះរាជាណាចក្រកម្ពុជា ព្រមទាំងស្នើសុំឱ្យសម្តេចពុក ប្រធានព្រឺទ្ធសភា ហ៊ុន សែន ឱ្យលោករកយុត្តិធម៌ជួយដល់បងប្អូនប្រជាពលរដ្ឋ រងគ្រោះចំនួន ៨ពាន់គ្រួសារ នេះផង»។
ចំណែក ជនរងគ្រោះម្នាក់លោក ចាន់ ធឿន ដែលចាញ់បោកក្រុមហ៊ុនពិភពដីមាសចំនួន ២ម៉ឺនដុល្លារ ចាត់ទុកការលើកឡើងរបស់ លោក សុខ ឥសាន គឺជាការប្រមាថធ្ងន់ធ្ងរ ចំពោះពលរដ្ឋ ដែលលោកមិនអាចទទួលយកបានទេ។
លោកថា៖ «ចាត់ទុកថាប្រជាពលរដ្ឋល្ងង់ ប្រជាពលរដ្ឋមិនដឹង! មានន័យថាគាត់មើលងាយប្រជាពលរដ្ឋ គាត់ប្រមាថប្រជាពលរដ្ឋ ថាជាការអត់ប្រយោជន៍ បានគេបោកបាន។ គាត់វាយតម្លៃពលរដ្ឋ អតិថិជនអ្នករងគ្រោះ។ អ៊ីចឹង គាត់អត់មានជួយស្ទួយខាងប្រជាពលរដ្ឋឱ្យបានរស់ ដកដង្ហើមឡើងវិញទេ គាត់ជិះរំលិចប្រជាពលរដ្ឋរឹតតែថែមទៀត គាត់មើលងាយ គាត់មិនឱ្យតម្លៃពលរដ្ឋ ខ្ញុំអត់ទទួលទេសម្តីហ្នឹង »។
លោក ប៊ុន ធឿន ប្រាប់ វីអូឌី ថាបច្ចុប្បន្នលោកត្រូវបង់ធនាគារជាង ៥០០ដុល្លារក្នុងមួយខែ តែដោយសារគ្មានលុយបង់ ធ្វើឱ្យលោកកំពុងជាប់បណ្តឹងរបស់ធនាគារផងដែរ ក្រោយលោកខ្ចីលុយធនាគារយកទៅវិនិយោក តាមការអូសទាញរបស់អតីតឧកញ៉ា ហ៊ី គឹមហុង។
ក្រុមជនរងគ្រោះបញ្ជាក់ប្រាប់ វីអូឌី ថា មូលហេតុដែលពួកគេជឿជាក់លើក្រុមហ៊ុនឆបោកពិភពដីមាសនេះ ដោយសារតែអតីឧកញ៉ា ហ៊ី គឹមហុង ជាម្ចាស់ក្រុមហ៊ុនបានយករូបថតថ្នាក់ដឹកនាំមកអូសទាញពួកគេ ឱ្យដាក់លុយវិនិយោគក្នុងគម្រោងបោកប្រាស់របស់ខ្លួន។
បើតាមអតិថជន អំពើបោកប្រាក់នោះ គឺក្រុមហ៊ុនសន្យាថា ពលរដ្ឋនឹងទទួលបានការប្រាប់ ៣ ឬ៤% នៃទំហំទឹកប្រាក់ដើមជារៀងរាល់ខែ រយៈពេល ២ឆ្នាំ ប៉ុន្តែជាក់ស្តែងពួកគេបើកបានតែប៉ុន្មានខែដំបូង ក៏ជាប់គាំងលែងទទួលបានបន្តទៀត។
ខណៈយុត្តិធម៌កំពុងជាប់គាំងច្រើនឆ្នាំទៅនេះ ក្រុមជនរងគ្រោះក៏បានធ្វើយុទ្ធនាការលើបណ្តាញសង្គមបង្ហាញរូបភាពអតីតឧកញ៉ា ហ៊ី គឹមហុង រួមទាំងភរិយា គឺលោកស្រី សាន សុទ្ធាវិន ឈរថតជាមួយអនុប្រធានគណបក្សប្រជាជនកម្ពុជា លោកស្រី ម៉ែន សំអន និងប្រធានកិត្តិយសគណបក្សប្រជាជនកម្ពុជា លោក ហេង សំរិន។
សកម្មភាពនេះ ដើម្បីជំរុញយុត្តិធម៌សម្រាប់ពួកគេ ៨ពាន់គ្រួសារ ដោយក្រុមជនរងគ្រោះអះអាងថាវិបត្តិបំណុលកំពុងសម្លាប់ពួកគេជាបន្តបន្ទាប់ កើនដល់ ១៦នាក់ គិតត្រឹមថ្ងៃទី២៥ ខែធ្នូនេះ។
ជនរងគ្រោះម្នាក់ទៀត លោក មម ម៉េត ប្រាប់ វីអូឌី ថា ជនរងគ្រោះសរុបមាន ៨០០០គ្រួសារ ដែលបាត់បង់ថវិកា ប្រមាណ ៤០០លានដុល្លារអាមេរិក ហើយការផុងខ្លួនជឿជាក់ក្រុមហ៊ុនរបស់លោក ហ៊ី គឹមហុង នេះ ដោយសារតែអតីឧកញ៉ារូបនេះ បានយករូបភាពថ្នាក់ដឹកនាំបក្សកាន់អំណាចមកដើរឃោសនាអូសទាញពលរដ្ឋ។
ចំពោះមុខនេះសម្រាប់ អ្វីដែលលោកចង់បាននោះ គឺថ្នាក់ដឹកនាំចេញមុខការពារជនរងគ្រោះ មិនមែនប្រើពាក្យប្រមាថលើពួកគាត់ ដូចការថ្លែងរបស់អ្នកនាំពាក្យបក្សកាន់អំណាច លោក សុខ ឥសាន នោះទេ។
លោកថា៖ «សំឡេងរបស់លោក ពូ សុខ ឥសាន គាត់និយាយមកក៏មិនសមរម្សដែរ។ ជាថ្នាក់ដឹកនាំ គួរណាស់តែគាត់ជួយប្រាប់សម្តេច ហ៊ុន សែន សម្តេចបវរធិបតី ហ៊ុន ម៉ាណែត ឱ្យគាត់ជួយរកយុត្តិធម៌។ ដោយសារគាត់ល្ងង់ ហ្នឹងហើយបានជាគាត់ចាញ់បោកក្រុមឧកញ៉ា មួយចំនួន ប្រជាពលរដ្ឋគាត់ដឹងថា គាត់ឧកញ៉ា ដូចថាជួយប្រជាពលរដ្ឋ ល្អណាស់ឧកញ៉ា តែគាត់មិនដឹងថា ឧកញ៉ា ខ្លះស្មោគគ្រោគ ដូចឧកញ៉ា ហ៊ី គឹមហុង នេះ ជាដើម។ ដោយសារគាត់ឃើញរូបភាពទាំងប៉ុន្មានសន្លឹកនេះ ឃើញបណ្ណប៉ាតង់របស់លោក ហ៊ី គឹមហុង បានជាគាត់ផុងខ្លួនជឿ។ រៀបចំធនាគារឱ្យទាំងអស់ខាងទីផ្សារ ខាងបរិវា ខាងប្រធានទីផ្សារហ្នឹង គេរៀបចំធនាគារឱ្យទាំងអស់ តាមពិតទៅសមត្ថភាពរបស់បងប្អូន ដែលរកស៊ីគ្មានសមត្ថភាពទៅខ្ចីធនាគាររាប់ម៉ឺនដុល្លារទេម្នាក់ៗ»។
ជុំវិញរឿងនេះ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ យល់ថា ឥរិយាបទរបស់ លោក សុខ ឥសាន នេះគឺជាការមើលងាយពលរដ្ឋជាម្ចាស់ឆ្នោទធ្ងន់ធ្ងរ ដែលមន្រ្តីរូបនេះគួរចេញមុខសុំទោសពលរដ្ឋជាសាធារណៈ ហើយថាកាតព្វកិច្ចរបស់ មន្រ្តីដែលជាអ្នកបំរើរាស្រ្ត គឺដោះស្រាយឱ្យពលរដ្ឋ មិនមែនដាក់បន្ទុកដល់រាស្រ្តបែបនេះទេ។
ជាងនេះទៅទៀត សម្រាប់លោក សុជាតិ អ្វីដែលត្រូវបន្ទោស គឺមន្រ្តីជាន់ខ្ពស់ដែលបានផ្តល់លទ្ធភាពឱ្យក្រុមជនទុច្ចរិតយករូបថតរូបខ្លួនដើរបោកពលរដ្ឋ ហើយបើគិតតាមផ្លូវច្បាប់មន្រ្តីពាក់ព័ន្ធទាំងនោះ ក៏គួរមានការបើកការស៊ើបអង្កេត ដើម្បីបង្ហាញពីតម្លាភាពផងដែរ។
លោកថា៖ «ខ្ញុំគិតថា លោក សុខ ឥសាន គួរពិចារណានៅក្នុងការសុំទោសទៅបងប្អូនប្រជាពលរដ្ឋឡើងវិញពីព្រោះវាមិនសមទេហើយវាមិនល្អទេសម្រាប់យើងដែលជាបុគ្គលដែលមានកិត្តិយសនិងសេចក្ដីថ្លៃថ្នូរនៅក្នុងសង្គមហើយអ្នកដែលធ្វើការងាររាជការ អ្នកដែលធ្វើកិច្ចការ ទាំងអស់ដើម្បីផលប្រយោជន៍រួមរបស់សង្គម និងប្រទេសជាតិជាពិសេស គឺដោះស្រាយបញ្ហាជូនប្រជាពលរដ្ឋ មិនមែនជាការស្ដីបន្ទោសប្រជាពលរដ្ឋនោះឡើយ ហើយបើសិនជាមិនមានសមត្ថភាពនៅក្នុងការដោះស្រាយ ជូនបងប្អូនប្រជាពលរដ្ឋមិនគួរធ្វើជាតំណាងរបស់ពួកគាត់នៅក្នុងតួនាទីដ៏សំខាន់ដែលប្រជាពលរដ្ឋគ្រប់គ្នា ការផ្តល់ទំនុកចិត្តនោះឡើយ»។
ព្រះមហាក្សត្របានចេញរាជក្រឹត្យនៅខែមេសា ឆ្នាំ២០២៤ បញ្ចប់គោរមងារអ្នកឧកញ៉ាពីលោក ហ៊ី គឹមហុង តាមការស្នើពីលោក ហ៊ុន ម៉ាណែត នាយករដ្ឋមន្រ្តីកម្ពុជា ក្រោយបែកធ្លាយអំពើឆបោកពលរដ្ឋ។
អតីតឧកញ៉ា ហ៊ី គឹមហុង ត្រូវបានចាប់ខ្លួនកាលពីខែសីហា ឆ្នាំ២០២៣ ពីបទឆបោកពលរដ្ឋ តែប្រមាណ ៤ខែ ក្រោយមក ពោលគឺនៅខែវិច្ឆិកា ឆ្នាំ២០២៣ តុលាការដោះលែងវិញ ក្រោយជនរងគ្រោះព្រមព្រៀងជាមួយអតីតឧកញ៉ា ហ៊ី គឹមហុង ផ្តិតមេដៃដើម្បីនៅក្រៅឃុំរកលុយសងលុយជនរងគ្រោះ តែជាងមូយឆ្នាំទៅនេះ លោកមិនបានគោរពសន្យានោះទេ។
អនុក្រឹតចុះថ្ងៃទី១៦ ខែកុម្ភៈ ឆ្នាំ២០២៣ បញ្ជាក់ថា លោក ហ៊ី គឹមហុង គឺជាទីប្រឹក្សារបស់លោក ហេង សំរិន កាលលោក ហេង សំរិន កាន់តំណែងជាប្រធានរដ្ឋសភា។
បើគេគណនាត្រួសៗ លើចំនួនពលរដ្ឋចាញ់បោកក្រុមឧកញ៉ាខិលខូច ក្នុងរយៈពេលចុងក្រោយនេះ មានពលរដ្ឋរងគ្រោះយ៉ាងហោចណាស់ មិនក្រោម៣ម៉ឹននាក់នោះទេដែលចាញ់បោក។
ក្នុងនោះរួមមា ដូចជារងគ្រោះដោយការបោកប្រាស់ពី អតីឧកញ៉ា ហ៊ី គឹមហុង អតីតឧកញ៉ា ជា សារ៉ន អតីតឧកញ៉ា ឡេង ចាន់ណា ក្រុមហ៊ុនភូមិខ្មែរគ្រុបរបស់លោក សោម សុធា ក្រុមហ៊ុន CIC របស់បណ្តុំគ្រូជោគជ័យ និងគម្រោងអចលនទ្រព្យមួយចំនួនទៀត។
ក្រុមជនរងគ្រោះទម្លាយថា ក្រុមហ៊ុនទុច្ចរិតទាំងនោះ តែងតែមានជាប់ពាក់ព័ន្ធជាមួយមន្រ្តីមានអំណាច និងជ្រកក្រោមអាវគណបក្សប្រជាជនកម្ពុជា ទើបពួកគេផុងខ្លួនជឿជាក់ ដូចជាក្រុមហ៊ុន អ្នកស្រី ឡេងចាន់ណា មានលោក ស៊ាន បូរ៉ាត់ មន្រ្តីនៅអង្គភាពអំពើពុករលួយនៅពីក្រោយ និងក្រុមហ៊ុនភូមិខ្មែរគ្រុបរបស់លោក សោម សុធា មានជំនួយការលោក ហ៊ុន សែន ធ្លាប់ចេញមុខអះអាងថា ជាក្រុមហ៊ុនស្អាតស្អំជាដើម។ អ្នកឃ្លាំមើលសង្គម ព្រមានថា បើពលរដ្ឋទប់កំហឹងលែងបាន ពួកគេអាចនឹងផ្ទុះការតវ៉ាព្រមគ្នាដើម្បីប្តូរយកយុត្តិធម៌ ដែលជាផ្នែកមួយអាចធ្វើឱ្យចលាចលសង្គមផ្ទុះឡើង គំរាមគំហែងដល់អំណាចមេដឹកនាំផងដែរ បើរដ្ឋាភិបាលមិនអើពើដោះស្រាយឱ្យជនរងគ្រោះរាប់ម៉ឹននាក់ ផ្ទុយទៅវិញបែរជារងការស្តីបន្ទោសថា ជាមនុស្ស «ភ្លើ» ដូចការថ្លែងរបស់លោក សុខ ឥសាន អ្នកនាំពាក្យបក្សកាន់អំណាចបែបនេះទៅវិញ៕
ដោយ៖ លោក សែន សច្ចៈ
