ជាការឆ្លើយតបទៅនឹងគ្រួសារហ៊ុន ដែលមិនព្រមប្រើយន្តការអន្តរជាតិ ដើម្បីបុព្វហេតុទឹកដី ទាមទារកោះគុត ពីភាគីថៃវិញនោះ អ្នកមានបទពិសោធន៍កិច្ចការព្រំដែន បានបង្ហាញភស្តុតាងថ្មីមួយទៀត ដែលបន្សល់ទុកពីសម័យរដ្ឋកម្ពុជា ដោយបញ្ជាក់ថាកោះគុតជារបស់ខ្មែរ។
ការបញ្ចេញឯកសារជាបន្តបន្ទាប់ របស់អ្នកមានបទពិសោធន៍ខាងព្រំដែននេះ ខណៈមេដឹកនាំគ្រួសារហ៊ុន ដែលកំពុងគ្រប់គ្រងអំណាចជាង ៤ទស្សវត្ស នៅរក្សាភាពស្ងៀមស្ងាត់ មិនប្តឹងថៃ ទៅតុលាការអន្តរជាតិ ដើម្បីទាមទារចំណែកកោះគុត ដែលថៃកំពុងគ្រប់គ្រងទាំងស្រុង។
ប្រធានក្រុមឃ្លាំមើលកម្ពុជា លោក ម៉ែន ណាត នៅថ្ងៃទី២៧ ខែធ្នូនេះ បានបង្ហោះឯកសារថ្មីមួយទៀត ដោយបញ្ជាក់ថា តាមក្រឹត្យរបស់ លោក ហេង សំរិន ឆ្នាំ១៩៨២ បញ្ជាក់ថា កោះគុត នៅជារបស់កម្ពុជានៅឡើយ។
ប្រភពបន្តថា តាមផែនទីភ្ជាប់ក្រឹត្យឆ្នាំ១៩៨២ បង្ហាញថា ព្រំដែនសមុទ្រកម្ពុជា-ថៃ គឺចេញពីបង្គោលព្រំដែននៅលើឆ្នេរ រត់ត្រង់ទៅចំណុចខ្ពស់បំផុតនៅលើ កោះគុត។
លោកសង្កត់ធ្ងន់ថា ក្រឹត្យស្តីពីការកំណត់តំបន់សមុទ្រទាំងអស់ និងខ្ពង់រាបបាតសមុទ្រ ឆ្នាំ១៩៨២ នេះ បានចុះហត្ថលេខា ដោយលោក ហេង សំរិន។
សម្រាប់លោក ម៉ែន ណាត បើយោងលើឯកសារ នាសម័យបារាំង សម័យសង្គមរាស្រ្តនិយម សម័យលន់ នល់ សម័យប៉ុល ពត សម័យ លោក ហេង សំរិន នាឆ្នាំ១៩៨២ បញ្ជាក់ថា កោះគុតជារបស់ខ្មែរ។
លោក ម៉ែន ណាត គូសបញ្ជាក់ថា កោះគុត ទើបតែឃើញកាត់ឆ្វៀលចេញ នៅក្នុងផែនទីភ្ជាប់អនុសារណៈ នៃការយោគយល់ឆ្នាំ២០០១ ដែលលោក សុខ អាន បានស៊ីញ៉េតាមបញ្ជា របស់លោក ហ៊ុន សែន កាត់ទៅឱ្យថៃគ្រប់គ្រង។
ចំណែក តំណាងរាស្រ្តបក្សសង្រ្គោះជាតិ លោក អ៊ុំ សំអាន ធ្លាប់បង្ហោះសារណា របស់បណ្ឌិត ហង់ជួន ណារ៉ុន ដែលបច្ចុប្បន្នជារដ្ឋមន្ត្រីក្រសួងអប់រំ យុវជន និងកីឡា។
បើតាមសារណានោះបញ្ជាក់ថា កោះគុតជារបស់កម្ពុជា។ ដែលសារណារបស់បណ្ឌិត ហង់ជួន ណារ៉ុន សរសេរថា «តាមសន្ធិសញ្ញាបារាំង-សៀមឆ្នាំ១៩០៧ និងពិធីសារជាឧបសម្ពន្ធ័ គណៈកម្មការព្រំដែនបានកំណត់ព្រំដែនសមុទ្រ រវាងសៀម និងឥណ្ឌូចិនបារាំង(កម្ពុជា) ដោយខ្សែបន្ទាត់មួយភ្ជាប់កំពូលខ្ពស់ជាងគេ របស់កោះគុត ទៅនឹងចំណុចមួយនៃតំបន់ឆ្នេរ ដែលស្ថិតនៅទល់មុខកោះគុត»។
ដោយក្នុងសារណានោះ បញ្ជាក់ថាកំពូលខ្ពស់ជាងគេ នៃកោះគុត កម្ពុជាទទួលបានយ៉ាងហោចណាស់ពាក់កណ្តាលនៃកោះគុត បើតាមសារណារបស់បណ្ឌិត ហង់ជួន ណារ៉ុន ឆ្នាំសិក្សា ២០១០-២០១២។
វត្ថុតាងរឹងមួយទៀត ដែលបានបញ្ជាក់ថា កម្ពុជាជាម្ចាស់កម្មសិទ្ធិកោះគុតដែរនោះ គឺនិក្ខេបទថ្នាក់បណ្ឌិត របស់សម្តេចក្រុមព្រះ នរោត្តម រណប្ញទ្ធិ។
ក្នុងនិក្ខេបទថ្នាក់បណ្ឌិត របស់សម្តេចក្រុមព្រះ នរោត្តម រណប្ញទ្ធិ បញ្ជាក់ថា កោះគុតយ៉ាងហោចពាក់កណ្តាលជារបស់កម្ពុជា។
ដោយយោងតាមផែនទី ទី១ ជាផែនទីឧបសម័ន្ធភ្ជាប់សន្ធិសញ្ញាបារាំង-សៀម ឆ្នាំ១៩០៧ និងផែនទី ទី២ គឺជាផែនទីសម័យសង្គមរាស្រ្តនិយម (សម័យសីហនុ) ឆ្នាំ១៩៧០ រីឯផែនទី ទី៣ គឺជាផែនទីសម័យ លន់ នល់ ឆ្នាំ១៩៧២ កោះគុត និងកោះត្រល់ក៏ជារបស់ខ្មែរ។
បន្ថែមពីនេះ សៀវភៅ «កម្ពុជាបាត់បង់ទឹកដី នៅភាគខាងលិច» របស់បណ្ឌិត ឥន សុផល បានសរសេរថា «បើយោងតាមនិក្ខេបទ របស់ព្រះអង្គម្ចាស់ នរោត្តម រណប្ញទ្ធិ ស្តីពីព្រំដែនសមុទ្រកម្ពុជា សរសេរនៅឆ្នាំ១៩៧៦ ព្រះអង្គម្ចាស់បានយោងទៅលើផែនទីឧបសម័្ពន្ធ ភ្ជាប់សន្ធិសញ្ញាបារាំង-សៀម ឆ្នាំ១៩០៧ រួចបានបញ្ជាក់ថា ខ្សែព្រំដែនសមុទ្ររវាងកម្ពុជា និងថៃ ចេញពីចំណុចខ្ពស់បំផុតនៃកោះគុត តភ្ជាប់មកបង្គោលព្រំដែននៅលើឆ្នេរ»។
ដោយក្នុងសៀវភៅ របស់បណ្ឌិត ឥន សុផល បានសរសេរយ៉ាងច្បាស់ថា កោះគុតជារបស់កម្ពុជា ហើយផែនទីបារាំង ក្នុងសៀវភៅនេះ ក៏បង្ហាញថា យ៉ាងហោចណាស់ពាក់កណ្តាល នៃកោះគុតជារបស់កម្ពុជា។
មួយវិញទៀត កាលពីថ្ងៃទី៦ ខែធ្នូ លោក អ៊ុំ សំអាន ក៏បានបង្ហាញសៀវភៅព្រំដែនដែលចងក្រងដោយអតីតប្រធានគណៈកម្មាធិការព្រំដែនកម្ពុជានៅប្រទេសបារាំង លោក ស៊ាន ប៉េងសែ អះអាងថា យ៉ាងហោចណាស់ពាក់កណ្តាលនៃកោះគុតជារបស់កម្ពុជា។
លោកបន្តថា សៀវភៅនោះសរសេរថា «ព្រំប្រទល់រវាងប្រទេសឥណ្ឌូចិន(កម្ពុជា) និងសៀម ចាប់ផ្តើមពីមាត់សមុទ្រ ចំត្រង់ចំណុចមួយនៅពីមុខកោះគុត ហើយកាត់ត្រង់ទៅលើកំពូលខ្ពស់ជាងគេបំផុត»។
ប្រភពនោះសំអាងថា លោក ស៊ាន ប៉េងសែ ជាបីតាព្រំដែនសមុទ្រកម្ពុជា និងជាអ្នកជំនាញព្រំដែនទី២ របស់កម្ពុជា បន្ទាប់ពីបីតាព្រំដែនកម្ពុជា លោកបណ្ឌិត សារិន ឆាក។
លោក ម៉ែន ណាត ប្រធានក្រុមឃ្លាំមើលកម្ពុជា ឱ្យ វីអូឌី ដឹងថា ការបន្តទម្លាយឯកសារជុំវិញកោះគុតនេះ គឺចង់ក្រើនរំឮកគ្រួសារហ៊ុន និងពលរដ្ឋខ្មែរថាកម្ពុជាមានឯកសារគ្រប់គ្រាន់ បញ្ជាក់ថាកោះគុតជារបស់ខ្មែរ។
លោកបន្តថា ការមិនអើពើ សម្ងំស្ងៀម មិនប្តឹងករណីកោះគុត ទៅតុលាការអន្តរជាតិ ឆ្លុះបញ្ចាំងថា មេដឹកនាំគ្រួសារហ៊ុន ជាមេដឹកនាំកំសាក គ្មានឆន្ទៈការពារបូរណភាពទឹកដី រួមទាំងកោះគុតរបស់ខ្មែរ។
លោកថា៖ «យើងគាស់កកាយ ដើម្បីជម្រាបជូនពលរដ្ឋ យើងដឹងតែគ្រួសារហ្នឹង វាមានការគប់គិតជាមួយនឹងរដ្ឋាភិបាលថៃ ថាក់ស៊ីន ដែលជាបងប្អូនធម៌រួចទៅហើយ ហើយថាមិនងាយគាស់កកាយចេញទេ ពីព្រោះទំនាក់ទំនងគ្រួសារហ្នឹង គឺជិតស្និទ្ធណាស់ ហើយជួយការពារគ្នាទៅវិញទៅមក យើងដឹងអ៊ីចឹងហើយ បានជាយើងព្យាយាមបញ្ចេញឯកសារ យើងព្យាយាមនិយាយ ហើយជំរុញឱ្យប្រជាពលរដ្ឋខ្មែរគ្រប់ទិសទី និងចូលរួមក្នុងការនិយាយរឿងហ្នឹងដូចគ្នា ដើម្បីដាក់សម្ពាធទៅរដ្ឋាភិបាលកម្ពុជា នឹងត្រូវតែយកចិត្តទុកដាក់ហើយត្រូវតែប្ដឹងប្រទេសថៃ ហ្នឹងទៅកាន់តុលាការអន្តរជាតិ»។
សម្រាប់លោក ម៉ែន ណាត អះអាងថា គ្រួសារហ៊ុន នឹងជាប់ឈ្មោះអាក្រក់ ក្នុងបញ្ជីប្រវត្តិសាស្រ្តខ្មែរ ពីការធ្វើឱ្យបាត់បង់ទឹកដីដូនតា បើមិនភ្ញាក់ខ្លួនប្តឹងទាមទារ បូរណភាពទឹកដីពីប្រទេសជិតខាងនោះទេ។
លោកបារម្ភថា ទឹកដីកម្ពុជានឹងបាត់បង់បន្ថែមទៀតក្រោមស្នាដៃគ្រួសារហ៊ុន បើពលរដ្ឋខ្មែរស្នេហាជាតិ នៅតែខ្លាចរអាមិនហ៊ានងើបរើបម្រះ ទាមទារឱ្យគ្រួសារនេះប្តឹងករណីកោះគុតទៅតុលាការអន្តរជាតិ។
លោកថា៖«លោក ហ៊ុន សែន និងលោក សុខ អាន ជំនាន់ហ្នឹង រួមទាំងលោក ហ៊ុន ម៉ាណែត បច្ចុប្បន្នហ្នឹងគប់គិតគ្នា ចង់បោះបង់ចោលកោះគុត ចឹងបានជាយើងថាដើម្បីដោះស្រាយបញ្ហាហ្នឹង ត្រូវទៅប្ដឹងប្រទេសថៃហ្នឹងឯង»។
តំណាងរាស្រ្តបក្សសង្រ្គោះជាតិ លោក អ៊ុំ សំអាន និយាយថា ការបន្តគាស់កកាយរឿងនេះ គឺចង់បញ្ជាក់ប្រាប់ពលរដ្ឋឱ្យដឹងថាគ្រួសារហ៊ុន កំពុងធ្វើនយោបាយយកទឹកដីធ្វើជាដើមទុនដើម្បីរក្សាអំណាចផ្តាច់ការរបស់ខ្លួន។
លោកបន្តថា គ្រួសារហ៊ុន គ្មានឆន្ទៈការពារទឹកដីដូនតាខ្មែរទេ គឺពួកគេហ៊ានធ្វើគ្រប់យ៉ាងដើម្បីតែរក្សាអំណាចផ្តាច់ការ តត្រកូលរបស់គេ សុខចិត្តយកទឹកដីរបស់ដូនតា ទៅបញ្ចាំឱ្យបរទេសជិតខាងជាដើម។
លោកសង្កត់ធ្ងន់ថា បញ្ហាបូរណភាពទឹកដី ជាអាយុជីវិតជាតិ ដែលអ្នកនយោបាយត្រូវបង្ហាញតម្លាភាព រាល់ការកំណត់ខ្សែបន្ទាត់ព្រំដែនត្រូវមានការឯកភាពជាតិ ដើម្បីបញ្ជាក់ថាខ្លួនពិតជាស្នេហាជាតិមាតុភូមិ។
លោកថា៖ «ខ្ញុំព្យាយាមទម្លាយរឿងកោះគុត ដោយសារតែចង់ឱ្យប្រជាពលរដ្ឋនឹងយល់ដឹងថាកោះគុត ហ្នឹងយ៉ាងហោចណាស់ពាក់កណ្តាល ជាកម្មសិទ្ធិរបស់កម្ពុជាដែរ ទី១ ហើយ ទី២ ដើម្បីឱ្យប្រជាពលរដ្ឋហ្នឹងដាក់សម្ពាធទៅលោក ហ៊ុន ម៉ាណែត ហ្នឹងឱ្យទាមទារយកកោះគុតមកវិញ ហើយនិងប្ដឹងថៃទៅកាន់តុលាការអន្តរជាតិ ដើម្បីទាមទារយកកោះគុតមកវិញ ទី៣ គឺខ្ញុំព្យាយាមដើម្បីទម្លាយរឿងកោះគុតនេះ ដើម្បីកុំឱ្យត្រកូលហ៊ុន និងជាពិសេសលោក ហ៊ុន ម៉ាណែត ហ្នឹងអាចកុហកប្រជាពលរដ្ឋខ្មែរបោកប្រាស់ប្រជាពលរដ្ឋខ្មែរ ក៏គាត់មិនមែនជារបស់កម្ពុជានោះទេ»។
វីអូឌី មិនអាចទាក់ទង រដ្ឋមន្រ្តីទទួលបន្ទុក រដ្ឋលេខាធិការដ្ឋានកិច្ចការព្រំដែនលោក ឡាំ ជា បានទេគិតត្រឹមម៉ោងផ្សាយនេះ។
យ៉ាងណាលោក ហ៊ុន សែន ធ្លាប់បង្ហាញការប្តេជ្ញាចិត្តថា ក្រោមការដឹកនាំរបស់លោក នឹងមិនឱ្យដីខ្មែរបាត់បង់ទៅប្រទេសជិតខាង សម្បីតែមួយម៉ីលលីម៉ែត្រ ខណៈគណបក្សប្រឆាំងអះអាងថា វៀតណាមបានរំលោភយកដីខ្មែរ តាមបន្ទាប់ព្រំដែនច្រើនកន្លែង រួមទាំងប្រជុំកោះក្រចកសេះ និងកោះត្រល់ជាដើម ដោយគ្មានការជំទាស់ពីលោក ហ៊ុន សែន ដែលវៀតណាមលើកបន្តុប ឱ្យកាន់អំណាចអំឡុងឆ្នាំ១៩៧៩នោះទេ។
បន្ថែមពីនេះ លោក ហ៊ុន តែងតែចោទ មេដឹកនាំគណបក្សប្រឆាំងថា ជាជនក្បត់ជាតិ បើទោះបីក្រមព្រហ្មទណ្ឌចែងថា អំពើក្បត់ជាតិ សំដៅដល់ការធ្វើឱ្យបាត់បង់ដែនដីជាតិទាំងស្រុង ឬមួយផ្នែក ទៅប្រទេសជិតខាងក្តី។
កោះគុតស្ថិតនៅខេត្តកោះកុង មានផ្ទៃក្រឡាប្រមាណ ១០៥គីឡូម៉ែត្រការ៉េ មានបណ្តោយប្រវែង ២៥គីឡូម៉ែត្រ និងទទឹង ៩គីឡូម៉ែត្រ។
មាត្រា៥៥ ចែងថា សន្ធិសញ្ញា និងកិច្ចព្រមព្រៀងទាំងឡាយណា ដែលមិនស្របនឹងឯករាជ្យ អធិបតេយ្យ បូរណភាពទឹកដី អព្យាក្រឹតភាព និងឯកភាពជាតិរបស់កម្ពុជា ត្រូវលុបចោល។
រាជរដ្ឋាភិបាលកម្ពុជា ប្តេជ្ញារក្សាការពារឯករាជ្យ អធិបតេយ្យ បូរណភាពទឹកដី អនុវត្តនយោបាយបង្រួបបង្រួមជាតិ ដើម្បីការពារឯកភាពជាតិ។ ដោយឡែក ក្រមព្រហ្មទណ្ឌមាត្រា ៤៤០ ចែងថា «អំពើប្រគល់ឱ្យរដ្ឋបរទេស ឬភ្នាក់ងារបរទេស នូវដែនដីជាតិទាំងស្រុង ឬមួយផ្នែក ជាអំពើក្បត់ជាតិ ត្រូវផ្តន្ទាទោសដាក់ពន្ធនាគារអស់មួយជីវិត»៕
ដោយ៖ លោក ប៉ុល សម្បត្តិ
