មេធាវី ផែង ហេង រំលេច​បទ​ល្មើស​ក្បត់​ជាតិ​បង្កប់​ក្នុង​សារ​សុំទោស​មេដឹក​នាំ​បក្ស​កាន់​អំណាច

សហមេធាវី​ការពារ​ក្តី​ឱ្យ​លោក កឹម សុខា ប្រធាន​គណបក្ស​សង្គ្រោះជាតិ ដែល​តុលាការ​បាន​រំលាយ គឺលោក ​ផែង ហេង ហាក់​បាន​ពញ្ញាក់​អារម្មណ៍ បទ​ល្មើស​ក្បត់​ជាតិ ដែល​បង្កប់​ក្នុង​សារ​សុំទោស​មេ​ដឹក​នាំ ដើ​ម្បី​​បា​ន​​នៅ​ក្រៅ​ឃុំ ក្រោយ​ជន​ត្រូវ​ចោទ ត្រូវ​តុលាការ​បង្គាប់​ឱ្យ​ឃុំ​ខ្លួន​ក្នុង​ពន្ធានាគារ។

មួយ​រយៈ​ចុង​ក្រោយ​នេះ សកម្មជន​សង្គម​មួយ​ចំនួន បាន​ចេញ​វីដេអូ សុំទោសមេដឹក​នាំ​បក្ស​កាន់​អំណាច ដើម្បី​បាន​នៅ​ក្រៅ​ឃុំ ក្រោយ​ពួក​គេ​ត្រូវ​បាន​តុលាការ​បង្គាប់​ឱ្យ​ឃុំ​ខ្លួន​បណ្តោះ​អាសន្ន ក្នុង​ពន្ធនាគារ តាម​ការ​ចោទ​ប្រកាន់​ពី​នគបាល​យុត្តិធម៌។

តាមរយៈ​​សំឡេង​​ដែល​​សកម្មជន​​សង្គម​មួយ​​ចំនួន​​បាន​​និយាយ​​សារភាព និង​​ត្រូវ​​បាន​​គេ​​ទម្លាយ​​លើ​បណ្តាញ​​សង្គម​​ជា​ហូរហែ​ទៅ​នេះ សារ​ដែល​ជន​ត្រូវ​ចោទ ឬជន​ជាប់​ចោទ បានសារភាព ខ្លឹមសារ​ហាក់​ដូចៗ​គ្នា​ទាំង​ស្រុង មុន​ពេល​ពួក​គេ ត្រូវ​បាន​ដោះលែង​ឱ្យ​នៅក្រៅឃុំ។

សារ​ទាំង​នោះ​ដូច​ជា​ពាក្យ​ថា បាន​លង់​ខ្លួន​ធ្វើ​សកម្មភាព ជា​មួយ​ពួក​បរទេស ក្នុង​ចលនា​បដិវត្ត​ពណ៌ ដែល​ជា​កំហុស​របស់​ខ្លួន​ជា​ដើម។

ជុំវិញ​​សារ​​នេះ លោក​​មេធាវី ផែង ហេង បាន​និយាយ លើ​​ហ្វេស​ប៊ុក​​របស់​លោក នា​ថ្ងៃទី៣១ ខែ​ធ្នូ​នេះ បែប​ក្រើន​​រំ​ឭក​​ថា​​សូម «សិក្សា​​ស្វែង​​យល់​​អំពី​​សីលធម៌​​សង្គម និង​ច្បាប់​ខ្មែរ​ជាធរមាន»។

លោក លើក​ឡើងថា ការ​សារភាព​បែប​នេះ ត្រូវ​អរគុណ​ទាំង​ចៅ​ក្រម​ដែល​ចេញ​ដីកា សម្រេច​ឱ្យ​នៅ​ក្រៅ​ឃុំ​ និង ព្រះរាជ​រាជ្ញា ដែល​មិន​ប្តឹង​ជំទាស់​នឹង​ដីកា​សម្រេច​នេះ​ផង​ដែរ ទើប​ត្រូវ។

មួយ​ទៀត លោក​ថា តាម​ច្បាប់ អ្នក​សារ​ភាព ប្រៀប​បាន​នឹង​ទទួល​ស្គាល់​កំហុស​ថា ខ្លួន​ពាក់ព័ន្ធ​នឹង​បណ្តាញ​បរទេស​ ដែល​ប៉ុន​ប៉ង​ធ្វើ​បដិវត្ត​ពណ៌ ។ លោកថា៖ «បើដូច្នេះ​មែន​បទ​ល្មើស​គឺ​អាច​ចោទ ពីបទ​ថា​ក្បត់​ជាតិ​បាន បើ​តុលាការ​រក​ឃើញ​ថា បដិវត្ត​ពណ៌​នោះ ជា​អំ​ពើ​ក្បត់​ជាតិ ដែល​ច្បាប់​បាន​ប្បញ្ញត្តិ។ ជាគោលការណ៍​ច្បាប់ អ្នក​សារ​ភាព នៅ​តែ​អាច​ប្រឈម​នឹង​ការ​ចាប់​ដាក់​គុក​ដដែល បើ​តុលាការ មិន​សម្រេច​ឱ្យ​រួច​ផុត​ពី​បទ​ចោទ»

ដោយ៖ ញឹម សុខន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ