ក្រុមអ្នកតស៊ូមតិកម្ពុជា ដែលមានមូលដ្ឋាននៅក្រៅប្រទេស បាននិយាយថា រយៈពេល ១៦ខែ នៃការឡើងកាន់អំណាចរបស់ លោក ហ៊ុន ម៉ាណែត រដ្ឋាភិបាលថ្មីនេះបន្តអនុវត្តមរតកពីឳពុក ដោយបោះបង់យុត្តិធម៌ចោលទាំងគ្មានការអៀនខ្មាស់ ដើម្បីតែបុព្វហេតុបន្តវេន ធ្វើឱ្យកម្ពុជា មានហានិភ័យទាំងនយោបាយ សេដ្ឋកិច្ច សង្គម និងបញ្ហាបូរណភាពទឹកដី។
នេះបើតាមការសង្កេត និងវាយតម្លៃប្រចាំឆ្នាំ២០២៤ ពីការវិវត្តនៃការដឹកនាំប្រទេសកម្ពុជាក្នុងរយៈពេល១៦ខែ ក្រោមការដឹកនាំរបស់លោក ហ៊ុន ម៉ាណែត ពីខែសីហាឆ្នាំ២០២៣ ដល់ខែធ្នូ ឆ្នាំ២០២៤ ចេញផ្សាយនៅថ្ងៃទី២ ខែមករា ឆ្នាំ២០២៥ នេះ ពីទីក្រុងម៉ែលប៊ន ប្រទេសអូស្ត្រាលី។
CAT សង្កេតឃើញថា ក្នុងរយៈពេល ១៦ខែ នៃការឡើងកាន់តំណែងជានាយករដ្ឋមន្ត្រីរបស់លោក ហ៊ុន ម៉ាណែត សិទ្ធិមនុស្ស និងសិទ្ធិនយោបាយត្រូវបានរំលោភជាប្រព័ន្ធធ្ងន់ធ្ងរជាងអាណត្តិចាស់ តាមរយៈប្រើច្បាប់ និងរដ្ឋធម្មនុញ្ញធ្វើជាឧបករណ៍ ដើម្បីតែបុព្វហេតុបន្តវេន។
CAT គូសបញ្ជាក់ថា បញ្ហានេះជំរុញឱ្យ កម្ពុជាបន្តជាប់ផុងក្នុងស្ថានភាពហានិភ័យទាំងនយោបាយ សេដ្ឋកិច្ច សង្គម និងបញ្ហាបូរណភាពទឹកដី។
បើតាម CAT ១៦ខែទៅនេះ ការរំលោភសិទ្ធិមនុស្សនៅបន្ត ហើយកាន់តែធ្ងន់ធ្ងរ តាមរយៈចំណាត់ការរបស់កងកម្លាំងប្រដាប់អាវុធ នគរបាលយុត្តិធម៌ ការសម្រេចរបស់តុលាការ និង ការដាក់មនុស្សឃុំឃាំង ក្នុងពន្ធនាគារចង្អៀតណែន ហើយការអនុវត្តន៍ច្បាប់ គឺនៅបន្តជាយន្តការបង្ក្រាប និងទប់ស្កាត់សំឡេងប្រជែងនឹងអំណាចរបស់គណបក្សប្រជាជនកម្ពុជា។
ជាងនេះទៀត សម្រាប់ក្រុមអ្នកតស៊ូមតិកម្ពុជា រដ្ឋាភិបាលរបស់គណបក្សប្រជាជនកម្ពុជា បន្តមិនខ្វាយខ្វល់ពីមតិរិះគន់របស់សហភាពអឺរ៉ុប ឬប្រទេសប្រជាធិបេតយ្យផ្សេងៗ ដោយបន្តឥរិយាបទ «ដឹកនាំក្នុងទម្រង់បង្រ្កាបអ្នកមានមតិផ្ទុយ ដើម្បីបន្តការត្រួតត្រាប្រទេស»។
ក្នុងទម្រង់នេះ ក្រុមអ្នកតស៊ូមតិកម្ពុជា យល់ថា ទោះបីជាប្រទេសកម្ពុជាបាត់អស់កោះ អស់សមុទ្រ អស់ទន្លេ អស់ទឹកដី អស់ធនធានធម្មជាតិ អស់ទាំងប្រជាពលរដ្ឋ ក៏លោក ហ៊ុន សែន និង លោក ហ៊ុន ម៉ាណែត ហ៊ានចំណាយដើម្បីពាក្យ «សន្តិភាព» របស់គាត់។
ដោយឡែក លំហប្រជាធិបតេយ្យ រួមកាន់តែតូច ហើយលោក ហ៊ុន សែន បន្តការគំរាមកំហែងជាសាធារណៈថា «ងើបមួយវ៉ៃមួយ និងតាមកម្ទេចពួកប្រឆាំងឲ្យអស់ដល់ឬសគល់»។ ការគំរាមកំហែងនេះ ភ្ជាប់ដោយគោលដៅការបោះឆ្នោតឆ្នាំ២០២៧ និង២០២៨។
ជាភស្តុតាង CAT រកឃើញថា មានការបន្តពន្យាពេលសំណុំរឿងលោក កឹម សុខា ការចាប់ខ្លួនមនុស្សជាង ១០០នាក់ ក្នុងសំណុំរឿងកិច្ចព្រមព្រៀងតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម ការឃុំខ្លួនអ្នកការពារសិទ្ធិមនុស្ស យុវជនការពារបរិស្ថាន និង សកម្មជនគណបក្សប្រឆាំង ជាដើម។
យ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន បានច្រានចោលការសង្កេតរបស់ក្រុមអ្នកតស៊ូមតិកម្ពុជានេះ។
លោកថា៖ «អាហ្នឹងគ្រាន់តែជាយោបល់ របស់ពួកប្រឆាំងនៅក្រៅប្រទេសទេ វាអត់មានអីចម្លែកទេ។ ទោះរាជរដ្ឋាភិបាលខិតខំធ្វើយ៉ាងណាក៏ដោយ ក៏មិនចេះល្អដែរ មិនចេះបានផលដែរ តែរាជរដ្ឋាភិបាលធ្វើ ហើយការងារមួយចំនួន វាមិនមែនដោះស្រាយភ្លាមបានភ្លាមទេ ដូចជាករណីឆបោករបស់ ឧកញ៉ាមួយចំនួន គឺក្រុមហ៊ុនមានបងប្អូនប្រជាពលរដ្ឋច្រើនរយ ច្រើនពាន់នាក់ អ៊ីចឹងយើងត្រូវក្រុមមេធាវី ឬគាត់ធ្វើការលម្អិតត្រូវស្រង់ស្ថិតិ អំពីលក្ខណៈនៃការជំពាក់នីមួយៗ»។
សម្រាប់ អ្នកវិភាគនយោបាយលោក ប៉ោ មករា កត់សម្គាល់ថា បើពិនិត្យទៅលើរបាយការណ៍នានា ដែលអន្តរជាតិបានរកឃើញ បង្ហាញថា បញ្ហាអំពើពុករលួយ ប្រជាធិបតេយ្យ និងបទឧក្រិដ្ឋ ជាដើម នៅតែញាំញីក្នុងរដ្ឋាភិបាលអាណត្តិថ្មីនេះ ដែលប៉ះពាល់ដល់មុខមាត់កម្ពុជាឆាកអន្តរជាតិ។
លោកថា៖ «គឺជាការបារម្ភ របស់បណ្ដាប្រទេសតំបន់អាស៊ាន ក៏ដូចជាពិភពលោក ជាការកង្វល់របស់គេ យើងមើលទៅតាមរបាយការណ៍ហ្នឹង។ ប៉ុន្តែជាក់ស្តែងសង្កេតទៅលើរបាយការណ៍ ជាទិដ្ឋភាពរួមគឺយើងឃើញមានពិន្ទុទាប។ មួយវិញទៀត បើយើងនិយាយអំពីលទ្ធិប្រជាធិតេយ្យ យើងឃើញថាទាំងសហរដ្ឋអាមេរិក សហគមន៍អឺរ៉ុប ប្រទេសដែលជាហត្ថលេខី នៃកិច្ចព្រមព្រៀងទីក្រុងប៉ារីសហ្នឹង តែងតែបារម្ភ ហើយក៏ទទូចស្នើសុំឲ្យកម្ពុជាពិនិត្យ ពិចារណាឡើងវិញ ពាក់ព័ន្ធទៅនឹងបញ្ហាលម្អលទ្ធិប្រជាធិបតេយ្យ»។
តំណាងរាស្រ្តគណបក្សសង្រ្គោះជាតិ លោក អ៊ំ សំអាន និយាយថា របាយការណ៍របស់ក្រុមអ្នកតស៊ូមតិ ឆ្លុះបញ្ចាំងពីការពិតក្នុងសង្គម ហើយថា បើរដ្ឋាភិបាលគ្រួសារហ៊ុន មិន កែលម្អការដឹកនាំទេ ភាពចលាចលសង្គមនឹងផ្ទុះឡើង។
លោកថា៖ «ដោយសារតែគ្មានការបោះឆ្នោតដោយសេរី និងយុត្តិធម៌ គ្មានការត្រួតពិនិត្យអំណាចហ្នឹងហើយ រឿងអយុត្តិធម៌ក្នុងសង្គម នឹងកើនឡើងបន្ថែមទៀតនៅកម្ពុជា អ៊ីចឹងនៅពេលអនាគត ខ្ញុំយល់ថាទីណាមានការជិះជាន់ ប្រាកដជាមានការរើបំរាស់ ចឹងប្រជាពលរដ្ឋអាចនឹងងើបឡើង ដើម្បីទំលាក់ត្រកូលហ៊ុនចេញពីអំណាចនៅពេលអនាគត នៅពេលដែលពួកគាត់ដល់ក ខ្មែរយើងថាមនុស្សតែអត់អីហូបហើយ! ក្រពះរើហើយ ទោះបីស្លាប់ក៏ត្រូវតែរើបំរាស់ដែរ»។
សម្រាប់ ក្រុមអ្នកតស៊ូមតិកម្ពុជា ការបូកសរុបលទ្ធផលសង្កេតនេះ មានគោលបំណងបង្ហាញដល់មតិជាតិ និងអន្តរជាតិថា គណបក្សប្រជាជនកម្ពុជា កំពុងខិតខំធ្វើអ្វីៗគ្រប់យ៉ាង ដើម្បីរក្សាអំណាចរបស់ខ្លួន តាមរយៈបំភិតបំភ័យ និងកម្ទេចអ្នកប្រជែងនឹងខ្លួន ដោយមិនផ្តល់អាទិភាពដល់ការកសាងប្រទេសជាតិ តាមបែបប្រជាធិបតេយ្យ សុច្ចរិត និង យុត្តិធម៌បានឡើយ។ ជារួម CAT ថា ក្នុងរយៈពេល ១៦ខែ កន្លងទៅនេះ ប្រទេសកម្ពុជាស្ថិតក្នុងស្ថានភាពហានិភ័យ ទាំងផ្នែកនយោបាយ សេដ្ឋកិច្ច សង្គមកិច្ច និងវប្បធម៌ ពលរដ្ឋគ្មានសេចក្តីស្ងប់ (សន្តិភាព) ក្នុងចិត្ត ចង់ឲ្យពលរដ្ឋអស់សង្ឃឹមហើយតាមកម្ទេចសំឡេងប្រជែង ថានឹងមិនមានការដឹកនាំថ្មី ពីខាងប្រជាធិបតេយ្យកើតវិញឡើយ។ ចំណែកប្រជាពលរដ្ឋដែលស្នេហាជាតិ និងប្រជាធិបតេយ្យ ក៏នៅតែធ្វើការងាររប៉ាត់រប៉ាយ មិនទាន់ផ្តល់ក្តីសង្ឃឹមជាជម្រើសថ្មី ដល់ប្រជាពលរដ្ឋ ដែលធ្លាប់គាំទ្រគណបក្សសង្គ្រោះជាតិនៅឡើយ៕
ដោយ៖ លោក សែន សច្ចៈ
