ក្រសួងធនធានទឹក និងឧតុនិយម បានចេញសេចក្តីជូនដំណឹង ឱ្យមានការប្រុងប្រយ័ត្នពីអាកាសធាតុ ដែលនឹងចុះត្រជាក់រយៈពេលជិត ១០ថ្ងៃ ចាប់ពីសប្តាហ៍ក្រោយទៅ ដោយសារកម្ពុជា រងឥទ្ធិពលខ្យល់ពីសមុទ្រចិនខាងត្បូង ដែលការណ៍នេះធ្វើឱ្យខេត្តមួយចំនួន ជាប់ព្រំដែន មានសីតុណ្ហភាពចុះត្រជាក់ រហូតដល់ ១៥°C។
ក្រសួងបានលើកឡើងក្នុងសេចក្តីជូនដំណឹង ចុះថ្ងៃទី៣ ខែមករា នេះថាការចុះត្រជាក់នេះ ដោយសារកម្ពុជារងឥទ្ធិពលខ្យល់មូសុងឦសាន បក់ពីសមុទ្រចិនខាងត្បូង។
សម្រាប់ក្រសួង ឥទ្ធិពលនេះ នឹងធ្វើឱ្យអាកាសធាតុនៅកម្ពុជាចុះត្រជាក់ ចាប់ពីថ្ងៃទី៦ ដល់ថ្ងៃទី១៤ ខែមករា ឆ្នាំ២០២៥។
ខេត្តយ៉ាងតិច៧ ស្ថិតក្នុងតំបន់វាលទំនាប មានខេត្តបន្ទាយមានជ័យ បាត់ដំបង សៀមរាប ពោធិ៍សាត់ កំពង់ឆ្នាំង កំពង់ធំ និងត្បូងឃ្មុំ មានសីតុណ្ហភាពមធ្យមអប្បបរមា ១៦°C និងសីតុណ្ហភាពមធ្យមអតិបរមា ៣០°C។
ដោយឡែក តំបន់ខ្ពង់រាប ខេត្តប៉ៃលិន ឧត្តរមានជ័យ ព្រះវិហារ ស្ទឹងត្រែង ក្រចេះ រតនគិរី មណ្ឌលគិរី តំបន់ជួរភ្នំក្រវាញ និងជួរភ្នំដងរែក មានសីតុណ្ហភាពមធ្យមអប្បបរមា ១៥°C និងសីតុណ្ហភាពមធ្យមអតិបរមា ២៩°C។
រីឯតំបន់មាត់សមុទ្រមាន ខេត្តកោះកុង និងជួរភ្នំបូកគោ មានសីតុណ្ហភាពមធ្យមអប្បបរមា ១៨°C និង សីតុណ្ហភាពមធ្យមអតិបរមា ៣០°C។ ខ្យល់បក់មកពីទិសឧត្តរ និងទិសឦសាន មានល្បឿនមធ្យម ៤,៥០ ម៉ែត្រក្នុងមួយវិនាទី។ រលកសមុទ្រមានកម្ពស់មធ្យមអប្បបរមា កន្លះម៉ែត្រ និងកម្ពស់មធ្យមអតិបរមា ១ម៉ែត្រកន្លះ ។
ស្ថិតក្នុងស្ថានភាពបែបនេះ ក្រសួងអំពាវនាវឱ្យ ប្រជានេសាទ និងអាជ្ញាធរដែនដី យកចិត្តទុកដាក់ ដោយប្រុងប្រយ័ត្ន ដើម្បីបង្ការពីជំងឺឈឺថ្កាត់នានា ដែលអាចកើតមានឡើងជាយថាហេតុ ក្នុងករណីប្រែប្រួល ក្រសួងនឹងជូនដំណឹងជាបន្តបន្ទាប់៕
ដោយ៖ កញ្ញា កែវ មរកត
