តុលាការក្រុងភ្នំពេញ បង្គាប់ឱ្យទីប្រឹក្សាគណបក្សកម្លាំងជាតិ លោក រ៉ុង ឈុន ចូលរួមសវនាការ នៅពាក់កណ្តាលខែមករានេះ ទាក់ទងបទចោទ មិនរាងចោល ខណៈអ្នកនយោបាយរូបនេះ ធ្លាប់ដាក់បណ្តឹងសុំឱ្យតុលាការផ្តល់នីតិសម្បទានឡើងវិញ ក្នុងបទល្មើសទី១ ដែលបានផុតកំណត់ ។
ដីកាបង្គាប់ចុះថ្ងៃទី៣១ ខែធ្នូ ឆ្នាំ២០២៤ ចេញដោយព្រះរាជអាជ្ញារង លោក សេង ហៀង ឱ្យដឹងថា សវនាការសំណុំរឿងព្រហ្មទណ្ឌនេះ នឹងធ្វើនៅថ្ងៃទី១៧ ខែមករា ឆ្នាំ២០២៥។
តុលាការក្រុងភ្នំពេញ ចោទលោក រ៉ុង ឈុន ពីបទ «មិនរាងចាល» នេះ ធ្វើឡើងបន្ទាប់ពីចៅក្រមស៊ើបសួរ នៃសាលាដំបូង លោក ទិត សុទ្ធីបូរ៉ាឆាត បានជូនដំណឹងស្តីពីការបិទបញ្ចប់ការស៊ើបអង្កេតជាស្ថាពរ ក្នុងរឿងក្តីនេះ កាលពីថ្ងៃទី១៩ ខែវិច្ឆិកា ឆ្នាំ២០២៤។
ជុំវិញសវនាការជាថ្មីទៀតលើលោក រ៉ុង ឈុន ត្រូវបានតុលាការចោទប្រកាន់ពីបទ «មិនរាងចាល» ក្នុងបទមជ្ឈឹម បន្ទាប់ពីបានផ្តន្ទាទោសក្នុងបទមជ្ឈឹម លើបទចោទ «ញុះញង់ បង្កឱ្យមានភាពវឹកវរធ្ងន់ធ្ងរ ដល់សន្តិសុខសង្គម»។
បទចោទលោក រ៉ុង ឈុន ថ្មីទៀតនេះ កើតឡើងបន្ទាប់ពីអ្នកនយោបាយរូបនេះ បង្ហាញមុខក្នុងវេទិកាគណបក្ស រួមទាំងការរៀបចំសមាជវិសាមញ្ញ ដែលសមាជនេះ ត្រូវបានអាជ្ញាធរក្រុងភ្នំពេញបិទម្តងជាពីរដង តែគណបក្សនៅតែអាចធ្វើបាន។
ថ្មីៗនេះ អតីតប្រធានគណបក្សកម្លាំងជាតិលោក ស៊ុន ចន្ធី ត្រូវបានតុលាការកាត់ទោសឱ្យជាប់ពន្ធនាគារ ២ឆ្នាំ និងដកសិទ្ធិធ្វើនយោបាយ ក្នុងសំណុំរឿងញុះញង់ ក្រោយអតីតមេបក្សរូបនោះរិះគន់ ពីភាពមិនប្រក្រតីចែកប័ណ្ណក្រីក្រឱ្យពលរដ្ឋមិនស្មើភាពគ្នា និងធានាអះអាងពីការផ្អាកឱ្យពលរដ្ឋសងបំណុលធនាគាររយៈពេល ៥ឆ្នាំ បើគណបក្សខ្លួនឈ្នះការបោះឆ្នោត បានឡើងកាន់អំណាចនៅឆ្នាំ២០២៨ ខាងមុខ។
ក្រុមអ្នកជំនាញសិទ្ធិមនុស្ស នៃអង្គការសហប្រជាជាតិ ធ្លាប់និយាយថា តុលាការនៅកម្ពុជា ត្រូវបានបក្សកាន់អំណាចប្រើប្រាស់ ដើម្បីបំបិទមាត់អ្នករិះគន់ ដែលមានការរៀបចំច្បាស់លាស់លក្ខណៈជាប្រព័ន្ធ ធ្វើឱ្យសកម្មជនសិទ្ធិមនុស្ស និងសកម្មជននយោបាយ នៅក្នុងប្រទេសកម្ពុជា រងការយារយី និងផ្តន្ទាទោសដោយមិនត្រឹមត្រូវ បំពានសិទ្ធិសេរីភាពបញ្ចេញមតិ ផ្ទុយពីកតិកាសញ្ញាអន្តរជាតិ ស្ដីពីសិទ្ធិពលរដ្ឋ និងសិទ្ធិនយោបាយ៕
ដោយ៖ កញ្ញា កែវ មរកត
