អតីតឧកញ៉ា ហេង សិទ្ធី បន្តលាតត្រដាងរឿងឧកញ៉ា ហ៊ុន តូ ជាមេខ្លោងឧក្រិដ្ឋកម្មឆបោកតាមអនឡាញ និងគ្រឿងញៀន យកលុយចិញ្ជឹមអំណាចគ្រួសារហ៊ុន ដែលកំពុងបង្កការគំរាមកំហែង ដល់ក្រុមអ្នករកស៊ីបរទេស បើគ្មានការវះកាត់បន្ទាន់។
តាមរយៈសារសំឡេងរបស់អតីតឧកញ៉ា លោក ហេង សិទ្ធី ជាង៩នាទី បង្ហោះនៅថ្ងៃទី៥ ខែមករា បានទម្លាយថា ឧកញ៉ា ហ៊ុន តូ បានប្រើឈ្មោះថ្នាក់ដឹកនាំកម្ពុជា បោកបា្រស់អ្នករកស៊ីបរទេស និងគំរាមមន្រ្តី មិនឱ្យលូកដៃ ក្នុងអំពើរកស៊ីខុសច្បាប់របស់ខ្លួន រួមមានឧក្រិដ្ឋកម្មព្រៃឈើ លក់គ្រឿងញឿន និងការឆបោកតាមអនឡាញ ជាដើម។
ក្នុងសារសំឡេងនោះ លោក ហេង សិទ្ធី ក៏បានរំលេចឈ្មោះលោក គួច ចំរើន អតីតអភិបាលខេត្តព្រះសីហនុ និងស្នងការនគរបាលជាតិ លោក ស ថេត បានរួមដៃជាមួយឧកញ៉ា ហ៊ុន តូ ប្រព្រឹត្តអំពើឧក្រិដ្ឋកម្មឆបោកនៅកម្ពុជា។
លោកថា៖ «កាលពីមុនគេស្គាល់កម្ពុជា ជាប្រទេសអច្ឆរិយ អង្គរវត្ត ឥឡូវនេះគេស្គាល់កម្ពុជាដោយសារ ហ៊ុន តូ ដោយសារមន្ត្រីប៉ូលិស ស ថេត ការពារឧក្រិដ្ឋជនអនឡាញ។ កម្ពុជាក្លាយទៅជាកន្លែងបោកប្រាស់ រកស៊ីអនឡាញខុសច្បាប់ »។
អតីតឧកញ៉ារូបនេះ បានទម្លាយទៀតថាលុយដែល លោក ហ៊ុន តូ ទទួលបានពីពួកឧក្រិដ្ឋជន គឺមួយផ្នែកបានជួយទៅកាន់រដ្ឋាភិបាល គណបក្សកាន់អំណាច ហើយថា ក្មួយបង្កើតរបស់ប្រធានគណបក្សប្រជាជនកម្ពុជា លោក ហ៊ុន សែន រូបនេះកំពុងរៀបល្បិចបោកប្រាស់ ក្រុមអ្នករកស៊ីគ្រាក់ៗនៅកម្ពុជាថែមទៀត។
លោកថា៖ «តើបានជួយទៅដល់រាជរដ្ឋាភិបាលទេ! ជួយមែន១០% ទៅ២០%។ ៨០% ទៀត ដែលលាក់ទុកខ្លួនឯងតាមរយៈ គ្រីបតូ។ តិចទៀត អស់អីស៊ីវាស៊ីតែម្ដងមួយៗ។ ខ្ញុំគ្រាន់តែប្រាប់ទេ ឥឡូវនេះវាកំពុងតែអស់ផ្លូវ វាគ្មានអ្នកណាទៅផ្ទះវាទៀតទេ ព្រោះអ្នកឯងទៅផ្ទះវាទៅ បន្តិចទៀតហ្នឹង គឺអន្តរជាតិកុំស្មានតែគេមិនដឹង សាត់តាឡាយហ្នឹង ចាប់ពីលើមកគេឃើញដល់មុខ ខ្ញុំគ្រាន់តែប្រាប់។ ទៅឱ្យវាជាប់ទាំងអស់ទៅទៀត តិចទៀតដើរទៅណា ប៉ូលិសអន្តោប្រវេសន៍គេហៅ បានដឹងខ្លួន»។
ឧកញ៉ា ហ៊ុន តូ ត្រូវបានអន្តរជាតិរកឃើញជាបន្តបន្ទាប់ថា ជាឧក្រិដ្ឋជនលាងលុយកខ្វក់ មេខ្លោងឆបោកតាមអនឡាញ និងឧក្រិដ្ឋជនគ្រឿងញៀន ប៉ុន្តែគ្មានស្ថាប័នជាតិនៅកម្ពុជាបើកការស៊ើបអង្កេតនោះទេ។
ប្រភពពីអន្តរជាតិ ដែលរកឃើញពីបទឧក្រិដ្ឋរបស់ លោក ហ៊ុន តូ រួមមានដូចជា កាសែត DL News នៅទីក្រុងឌូបៃ ក្រុមហ៊ុនវិភាគកាក់ឌីជីថល Elliptic នៅប្រទេសអង់គ្លេស សារព័ត៌មាន The Australian និងទូរទស្សន៍អាល់ចាហ្សីរ៉ា (Al Jezera) ជាដើម។
ក្នុងពេលថ្មីៗនេះ ក្រៅពីសារសំឡេងនិយាយលើហ្វេសប៊ុកហើយនោះ អតីតឧកញ៉ា ហេង សិទ្ធី ក៏បានបង្ហោះពាក្យបណ្តឹងចុះថ្ងៃទី៣ ខែមករា ឆ្នាំ២០២៤ របស់ខ្លួន ដោយទាមទារឱ្យលោក កើត រិទ្ធ រដ្ឋមន្ត្រីក្រសួងយុត្តិធម៌ បើកការស៊ើបអង្កេតលើលោក ហ៊ុន តូ ផងដែរ។
ជុំវិញរឿងនេះក្រសួងយុត្តិធម៌ បានឆ្លើយតបតាមបណ្តាញសង្គមហ្វេសបុកខ្លួន នៅថ្ងៃទី៦ ខែមករា នេះ ដោយជំរុញឱ្យលោក ហេង សីទ្ធី ដែលជាម្ចាស់បណ្តឹងចូលខ្លួនមកដោយផ្ទាល់ ដើម្បីផ្តល់ព័ត៌មានលម្អិតទាក់ទងនឹងបណ្តឹងរបស់ខ្លួន ដោយថា ពាក្យបណ្តឹង ដែលបង្ហោះលើបណ្តាញសង្គមមិនផ្លូវការទេ។
ប៉ុន្តែលោក ហេង សិទ្ធី ចាត់ទុកការឆ្លើយតបរបស់ក្រសួងថា ជាល្បិចចូលដៃជាមួយ លោក ហ៊ុន តូ ដើម្បីចាប់ខ្លួនលោកតែប៉ុណ្ណោះ ព្រោះថា បើលោកហ៊ានទៅទឹកដីកម្ពុជា ដើម្បីដាក់ពាក្យបណ្ដឹងអាចប្រឈមមុខនឹងការសម្លាប់ ឬហានិភ័យផ្សេងៗ។
ក្រៅពីបណ្តឹងផ្ទាល់ខ្លួនហើយ លោក ហេង សិទ្ធី ក៏បានបង្ហាញបណ្តឹងមួយទៀត របស់លោក SUN RUIFENG (សាន់ រ៉ូហ្វាង) ជាអ្នកជំនួញ ជនជាតិចិន បានប្តឹងលោក ហ៊ុន តូ ពីបទរំលោភសេចក្តីទុកចិត្ត និងបោកប្រាស់អ្នកវិនិយោគបរទេស ដោយទាមទារឱ្យលោក កើត រិទ្ធ ជួយរកយុត្តិធម៌។
ពាក្យបណ្តឹងចុះថ្ងៃទី៥ ខែមករា នោះ សរសេររៀបរាប់ថា កាលពីថ្ងៃទី១៨ ខែតុលា ឆ្នាំ២០២៤ លោក ហ៊ុន តូ បានទទួលប្រាក់ពីលោកចំនួន ៩លានដុល្លារអាមេរិក ដើម្បីរត់ការអាជីវកម្មរ៉ែមាស នៅខេត្តមណ្ឌលគីរី។
ប៉ុន្តែពេលទទួលប្រាក់គ្រប់ចំនួន លោក ហ៊ុន តូ មិនបានបំពេញការងារនោះទេ ថែមទាំងបានបញ្ជូនក្រុមជនអន្ធពាលចង់ចាប់ជំរិតរូបលោក ហើយក្រោយមកលោកបានគេចខ្លួនចេញពីកម្ពុជា ដើម្បីសុវត្ថិភាព។
វីអូឌី មិនទាន់អាចសុំការឆ្លើយតបពីលោក ហ៊ុន តូ បានទេ គិតត្រឹមម៉ោងផ្សាយនេះ។
ជុំវិញរឿងនេះប្រធានអង្គការប្រជាធិបតេយ្យខ្មែរប្រចាំប្រទេសអូស្ត្រាលី លោក ស៊ឹង សែន ករុណា យល់ថា ការមិនអើពើស៊ើបអង្កេតរឿងនេះបញ្ជាក់ថា ឧក្រិដ្ឋជន និងគ្រួសារហ៊ុន ជាបក្សពួកតែមួយ ហើយថា ការដឹកនាំបែបគ្រួសារនិយមនៅកម្ពុជា មានតែមេដឹកនាំកំពូលទេ ទើបមានអំណាចវះកាត់ឧក្រិដ្ឋជនជាប់សែស្រឡាយនឹងខ្លួនដូចឧកញ៉ា ហ៊ុន តូនេះបាន។
លោកថា ៖ «ការឆបោក ធ្វើឲ្យអ្នកវិនិយោគទុនភ័យខ្លាចក្នុងការចូលទៅវិនិយោគនៅក្នុងប្រទេសកម្ពុជាអីទាំងអស់ នេះខ្ញុំយល់ថាមិនអាចចៀសផុតពីភ្នែក របស់មេដឹកនាំប្រទេសបច្ចុប្បន្ននោះទេ។ ប៉ុន្តែអ្វីដែលសំខាន់គឺមេដឹកនាំប្រទេសបច្ចុប្បន្នហ្នឹង ហ៊ានអារកាត់ទៅលើសាច់ឈាមខ្លួនឯង ដែលជាជនប្រព្រឹត្តដោយប្រើប្រាស់ វិធានការផ្លូវច្បាប់ក្នុងការចាត់វិធានការ ឬអត់! បើឲ្យទៅមន្ត្រី ឬក៏តុលាការដែលមានឋានៈតូចទាប ខ្ញុំថាមិនហ៊ានប៉ះពាល់សែស្រឡាយគ្រួសាររបស់មេដឹកនាំ»។
ចំណែក តំណាងរាស្រ្តគណបក្សសង្រ្គោះជាតិលោក ម៉ែន សុថាវរិន្ទ មើលឃើញថា ការទម្លាយរបស់លោក ហេង សិទ្ធី នេះ វាអាចកើតចេញពីទំនាស់ផលប្រយោជន៍ លើទីលានរកស៊ី របស់ក្រុមឧកញ៉ានៅកម្ពុជា ហើយអ្នកគ្មានខ្សែ គ្មានអំណាច នឹងក្លាយជាជនរងគ្រោះក្រោមដៃឧក្រិដ្ឋស្និទ្ធិនឹងគ្រួសារហ៊ុន។
លោកថា ដើម្បីចាកចេញពីវិបត្តិសង្គមនេះ ទាល់តែកម្ពុជាមានប្រព័ន្ធត្រួតពិនិត្យអំណាច តាមគន្លងប្រជាធិបតេយ្យ ឡើងវិញ។
លោកថា ៖«តាំងពីចាប់ផ្តើមពីប្រទេសកម្ពុជាយើងបាត់ប្រជាធិបតេយ្យពិតប្រាកដ បាត់រឿងសិទ្ធិមនុស្ស តាំងពីឆ្នាំ២០១៧ តាំងពីរំលាយគណបក្សជំទាស់អតីតបក្សសង្គ្រោះជាតិមក ហើយគាត់រំលាយសារព័ត៌មានឯករាជ្យ វីអូឌី អាស៊ីសេរី ខេមបូឌាឌែលលី ទាំងអស់មក គឺគ្រឿងញៀនក៏ពេញទូទាំងប្រទេសច្រើនរាប់តោន ហើយរឿងអ្នកចាប់ជំរិតតាមអនឡាញ រដ្ឋាភិបាលអត់មានតាំងពីអតីត លោកហ៊ុន សែន រហូតដល់កូនចៅ អត់មានចាត់វិធានការទាំងអស់រកមិនឃើញអ្វីទាំងអស់»។
ជុំវិញរឿងឧក្រិដ្ឋកម្មតាមអនឡាញនេះ កាលពីខែធ្នូ ឆ្នាំ២០២៤ ភារធារីស្តីទីនៃស្ថានទូតសហរដ្ឋអាមេរិក ប្រចាំកម្ពុជាគឺ អ្នកស្រី ប្រៃហ្គេត អែលវ៉កឃឺរ បានលើកឡើងចំពោះមុខអតីតនាយករដ្ឋមន្ត្រីកម្ពុជាលោក ហ៊ុន សែន ពីការព្រួយបារម្ភអំពីបទល្មើសឆបោកអនឡាញ ដែលជះឥទ្ធិពលមិនល្អដល់បរិយាកាសវិនិយោគ សេដ្ឋកិច្ចនៅកម្ពុជា និងនៅក្នុងតំបន់។ របាយការណ៍របស់អង្គការសហប្រជាជាតិ ចេញផ្សាយនៅចុងខែសីហា ឆ្នាំ២០២៣ បង្ហាញថា កម្ពុជា និងមីយ៉ាន់ម៉ា ជាប្រទេសដែលមានការឆបោក និងជួញដូរ មនុស្សទ្រង់ទ្រាយធំ នៅតំបន់អាស៊ីអាគ្នេយ៍។ របាយការណ៍នេះរកឃើញថា មនុស្សប្រមាណ ១សែននាក់ រងគ្រោះក្នុងអំពើឆបោក និងចាប់ជំរិតនៅកម្ពុជា៕
ដោយ៖ លោក សែន សច្ចៈ
