ពលរដ្ឋជិត ៦០គ្រួសារ នៅភូមិឈើទាលលើ ឃុំរលាំងគ្រើល ស្រុកសំរោងទង ខេត្តកំពង់ស្ពឺ បន្តទាមទារឲ្យមន្ត្រីសុរីយោដី ខេត្តកំពង់ស្ពឺ និងអាជ្ញាធរពាក់ព័ន្ធរក្សាទុកសហគមន៍រួមជិត១០ហិកតា ឱ្យប្រជាជនក្នុងភូមិបានប្រើប្រាស់ជាសម្បត្តិរួម ដោយមិនត្រូវវាស់វែង បែងចែកទៅឲ្យមន្ត្រី និងបុគ្គលឯកជន ជាង ១០គ្រួសារ ទៀតកាន់កាប់ផ្តាច់មុខនោះទេ។
ការទាមទារជាថ្មីទៀតនេះ ធ្វើឡើងស្របពេលរដ្ឋបាលខេត្តកំពង់ស្ពឺ កាលពីថ្ងៃទី៦ ខែធ្នូ ឆ្នាំ២០២៤ បានជូនដំណឹង ពីការផ្សព្វផ្សាយកំណត់តំបន់វិនិច្ឆ័យ សម្រាប់ការចុះបញ្ជីដី មានលក្ខណៈប្រព័ន្ធនៅភូមិឈើទាលលើ ជាទីតាំងនៃដីដែលកំពុងទំនាស់នោះ។
យោងតាមលិខិត របស់ប្រជាពលរដ្ឋ ៥៧គ្រួសារ នៅភូមិឈើទាលលើ បានបញ្ជាក់ថា ដីសហគមន៍រួមដែលមានទំហំ ៨ហិកតា ត្រូវបានរដ្ឋអំណាច តាំងពីក្រោយឆ្នាំ១៩៧៩ មក បែងចែកទុកជាសម្បត្តិរួមរបស់ប្រជាជនក្នុងភូមិ សម្រាប់ប្រើប្រាស់ ជាពិសេស ទុកសម្រាប់ធ្វើជាទីទួលសុវត្ថិភាព នៅពេលមានទឹកជំនន់ម្តងៗ។
តែនៅក្នុងលិខិត ដែលមានផ្តិតស្នាមមេដៃ របស់ពលរដ្ឋនោះ បានអះអាងថា ដីនេះត្រូវបានបុគ្គលជាង១០គ្រួសារទៀត ក្នុងនោះ មានទាំងមន្រ្តីគយឈ្មោះ ឆែ ចេង និងមន្ត្រី សាលាស្រុកសំរោងទងឈ្មោះ យឹម ធា រួមទាំងឈ្មោះ ខេ ធឿន ជាគ្រូបង្រៀន នៅវិទ្យាល័យហ៊ុនសែនក្តីល្វា (ឌីប៉ុក) បានគប់គិតគ្នាមករំលោភបំពានយកដីរួមនោះ ទៅជាធ្វើកម្មសិទ្ធិផ្ទាល់ខ្លួន។
ប្រជាពលរដ្ឋបានចោទប្រកាន់ថា មន្ត្រីទាំងនោះ បានគប់គិតគ្នាជាមួយមន្ត្រីសុរិយោដី និងអាជ្ញាធរ ឃុំរលាំងគ្រើល ប្តឹងប្រជាពលរដ្ឋ ដែលជាចាស់ទុំនៅក្នុងភូមិ រួមទាំងយុវជនចំនួន ៩នាក់ ទៅអភិបាលខេត្តកំពង់ស្ពឺ លោក ជៀម ច័ន្ទសោភ័ណ្ឌ ដោយចោទថា ពលរដ្ឋទាំងនោះ ជាមេក្លោង និងជាអ្នករារាំង ការចុះវាស់វែងដីរបស់មន្ត្រីសុរិយោដី នៅដើមខែធ្នូ ឆ្នាំ២០២៤។
តែពលរដ្ឋដែលរងបណ្តឹង បានបញ្ជាក់ថា ពួកគេគ្រាន់តែទៅសួរនាំមន្ត្រីសុរិយោដី និងបានប្រាប់មន្ត្រីសុរិយោដីថា ដីសហគមន៍ទាំង ៨ហិកតា នោះ កំពុងតែមានទំនាស់មិនទាន់បានដោះស្រាយនៅឡើយទេ។
តាមច្បាប់ គឺហាមដាច់ខាត មិនឱ្យមន្ត្រីធ្វើការវាស់វែងដី ដែលមានទំនាស់ ដើម្បីផ្តល់ប័ណ្ណកម្មសិទ្ធិនោះទេ។ តែមេឃុំរលាំងគ្រើល ប្តឹងចោទប្រជាពលរដ្ឋខ្លួនឯងថា ជាអ្នករារាំងការងារមន្ត្រីរាជការទៅវិញ។
លោក ស្រី ភុន អាយុ ៧៨ឆ្នាំ ជាសាក្សីរស់នៅភូមិឈើទាលលើ បានបញ្ជាក់ថា ដីសហគមន៍ទាំង ៨ហិកតា នោះគឺប្រជាពលរដ្ឋបានកាន់កាប់អាស្រ័យជាទ្រព្យសម្បត្តិរួម តាំងពីក្រោយឆ្នាំ១៩៧៩ ជាពិសេសទុកសម្រាប់ធ្វើជាទីទួលសុវត្ថិភាព នៅពេលមានទឹកជំនន់ម្តងៗ។
លោកបញ្ជាក់ថា នៅប៉ុន្មានឆ្នាំមកនេះ ដីសហគមន៍រួមនោះ ត្រូវបានបុគ្គលមួយចំនួនរំលោភកាន់កាប់ជាដីកម្មសិទ្ធិផ្តាច់មុខទៅវិញ។ លោកបញ្ជាក់ថា អ្នកភូមិទាំងជិត ៦០គ្រួសារ ទាមទារដាច់ខាតឲ្យអាជ្ញាធររក្សាដីនោះ ទុកជាសម្បត្តិរួមដដែល។
យោងតាមរបាយការណ៍ ដែលទទួលបាន ទំនាស់ដីសហគមន៍រួមនៅភូមិឈើទាលលើ ឃុំរលាំងគ្រើល ស្រុកសំរោងទង ខេត្តកំពងស្ពឺ បានឈានដល់មានអំពើហិង្សាកើតឡើងនៅថ្ងៃទី២០ ខែធ្នូ ឆ្នាំ២០២០។ ពេលនោះ ប្រជាពលរដ្ឋ បានទៅសុំអន្តរាគមន៍ពីអភិបាលស្រុកសំរោងទង តែខាងថ្នាក់ស្រុកបានរុញឲ្យទៅខាងថ្នាក់ខេត្ត ហើយពេលពលរដ្ឋទៅប្តឹងនៅថ្នាក់ខេត្ត ខាងថ្នាក់ខេត្តបានរុញមកខាងស្រុកវិញ។
ករណីនេះប្រជាពលរដ្ឋ ជាជនរងគ្រោះ បានសំដែងការខកចិត្តយ៉ាងខ្លាំង ចំពោះអាជ្ញាធរខេត្តកំពង់ស្ពឺ ក្នុងករណីទំនាស់ដីធ្លីមួយកន្លែងនេះ។
លោក ម៉ែន សុខុម អាយុ៧០ឆ្នាំ ជាចាស់ទុំក្នុងភូមិឈើទាលលើ បានបញ្ជាក់ថា អ្នកមានអំណាចមួយចំនួនក្នុងខេត្តកំពង់ស្ពឺ ជាអ្នកគប់គិតជាមួយមេភូមិដើម្បីយកដីសហគមន៍រួម ទៅធ្វើជាកម្មសិទ្ធិផ្ទាល់ខ្លួន។
ដោយសារអស់សង្ឃឹមលើការដោះស្រាយ របស់អាជ្ញាធរខេត្តកំពង់ស្ពឺ កាលពីថ្ងៃទី១៩ ខែមករា ឆ្នាំ២០២១ តំណាងប្រជាពលរដ្ឋទាំង ៥៧គ្រួសារ បានដាក់លិខិតសុំអន្តរាគមន៍ទៅ លោក ហ៊ុន សែន ដែលកាលនោះនៅជានាយករដ្ឋមន្ត្រី ដោយប្តឹងមន្ត្រី និងបុគ្គលចំនួន ១២នាក់ ដែលបានគប់គិតគ្នារំលោភបំពានយកដីសហគមន៍រួមនោះ មានឈ្មោះ ចែ ឆេង, ចែ ទ្រី, យឹម ខុន, សុខ ថន, កឹម តន, ញឹម វ៉ាន ,ស្រី ឆន, អ៊ុក យ៉ន, ស៊ុំ ភឿន, រស់ សាវ៉េត, ឈុន សុគន្ធ និង សាយ អ៊ីម។
ក្នុងលិខិតសុំអន្តរាគមន៍នេះ តំណាងពលរដ្ឋ បានបញ្ជាក់ថា ការរំលោភយកដីសហគមន៍រួមទៅធ្វើជាកម្មសិទ្ធិផ្ទាល់ខ្លួននេះ មានការចូលរួមពីឈ្មោះ ម៉េង សុខគា ជាមេភូមិឈើទាលលើ។ មកទល់ពេលនេះ អាជ្ញាធរខេត្តកំពង់ស្ពឺ នៅមិនទាន់មានចំណាត់ការណាមួយ លើមន្ត្រីក្នុងខេត្តនេះ ដែលពលរដ្ឋចោទថា បានគប់គិតគ្នា យកដីសហគមន៍រួម ទៅធ្វើជាកម្មសិទ្ធិផ្ទាល់ខ្លួន ដែលរំលោភបំពានច្បាប់ភូមិបាល និងរំលោភបំពានច្បាប់ ស្តីពីលក្ខខន្តិកៈមន្ត្រីរាជការនោះទេ៕