អ្នក​ចាញ់បោក​ក្រុមហ៊ុន​ពិភពដីមាស​ម្នាក់​ទៀត​បាន​ស្លាប់​ ក្រោយ​គ្មាន​លុយ​ព្យាបាល​ជំងឺ

អ្នកចាញ់​បោក​អតីត​ឧកញ៉ា ហ៊ី គឹមហុង ម្នាក់​ទៀត​បាន​ស្លាប់ ដោយសារ​វិបត្តិ​បំណុល ក្រោយ គ្មាន​លុយព្យាបាល​ជំងឺ ធ្វើឱ្យ​ចំនួន​អ្នកស្លាប់​កើន​ដល់​ជិត​ ២០នាក់ ដែល​ការណ៍​នេះ ជំរុញ​ឱ្យ​មានការ​រិះគន់​ថា រដ្ឋាភិបាល​គ្រួសារ​ហ៊ុន កំពុង «ប្រមាថជីវិតពលរដ្ឋ» ដែល​ជា​អ្នក​បង់ពន្ធ​ចិញ្ចឹម​​មន្រ្តី។

លោក ផល កញ្ញា រស់នៅ​ខេត្ត​កណ្តាល ប្រាប់ វីអូឌី ថា ជីតា​របស់​លោកឈ្មោះ ផន វ័យ​ជាង ៦០ឆ្នាំ បាន​ស្លាប់​កាល​ពី​ថ្ងៃទី២ ខែ​មករា ឆ្នាំ២០២៥ ដោយសារ​គ្មាន​លុយព្យាបាល​ជំងឺ ក្រោយ​ខ្ចី​លុយធនាគារ ទៅ​វិនិយោគ​ជា​មួយ​ក្រុមហ៊ុន​ពិភពដី​មាស​ចំនួន ២ម៉ឺនដុល្លារ អំឡុង​ឆ្នាំ២០២១។

ពលរដ្ឋ​រស់​នៅភូមិ​ជ្រោយ​សំបួរ ឃុំកោះចិន រូបនេះ បន្ថែមថា រូបលោក​ផ្ទាល់​ ក៏បាន​ចាញ់បោក​ចំនួន ១ម៉ឺន៥ពាន់​ដុល្លារ​ដែរ ហើយ​លោក​បានស្នើ​ឱ្យ​រដ្ឋាភិបាល​ពន្លឿន​រឹប​អូស​ទ្រព្យ​អតីត​ឧកញ៉ា ហ៊ី គឹមហុង មក​សង​ក្រុម​ជន​រងគ្រោះ​វិញ ដើម្បី​ដោះស្រាយ​វិបត្តិ​ជីវភាព។

លោកថា៖ «ទើប​បូជា​ហើយ​ ជំពាក់​បំណុល​ធនាគារ ដោយសារ​ចាញ់បោក​ក្រុមហ៊ុន​ពិភព​ដីមាស​ ទើប​បូជា​ហើយ ត្រូវ​ជាតា​ខ្ញុំ​ដែរ គាត់​ដូច​ជា​ ពីរម៉ឺន​ដុល្លារ​ ដែរហ្នឹង​មាន​លុយ​ណា​មើល​ជំងឺ»

ជន​រងគ្រោះ​ម្នាក់​ទៀត លោក ប៊ុន ធឿន រស់នៅ​ខេត្ត​កំពត ប្រាប់ វីអូឌី ថា ​​បើគិត​ទាំង​ករណី​ចុងក្រោយ​នេះ​ មាន​អ្នកស្លាប់​កើនឡើង​ដល់ ១៧នាក់ ហើយ គិត​ត្រឹម​ថ្ងៃទី៧ ខែមករា ឆ្នាំ២០២៥​នេះ។

ជន​រងគ្រោះ​ចាញ់​បោក​​ក្រុមហ៊ុន​​ពិភព​​ដីមាស​ចំនួន ២ម៉ឺន​ដុល្លារ រូប​នេះ ឱ្យ​ដឹង​ថា ការ​ជឿជាក់​យក​លុយ​ទៅ​វិនិយោគ​ក្នុង​ក្រុមហ៊ុន​ពិភព​ដីមាស​នេះ ដោយ​សារ​តែ​ឃើញ​ក្រុមហ៊ុន​នេះ​ មានការ​ទទួល​ស្គាល់​ពី​ស្ថាប័ន​រដ្ឋ តែ​ពេល​មាន​អំពើ​ឆបោក​ លោកថា​បែរ​ជា​រដ្ឋា​ភិបាល​មិន​អើ​ពើ​ជួយ​រក​យុត្តិធម៌​ សម្រាប់​ជន​រង​គ្រោះ​ទៅ​វិញ។

លោកថា ៖ «គេថា​ក្រុមហ៊ុន​គេមាន​អាជ្ញាប័ណ្ណ​ក្រុមហ៊ុន​គេ​​ស្រប​ច្បាប់​ ក្រុមហ៊ុន​គេ​មាន​ទំនួល​ខុស​ត្រូវ​ ក្រុមហ៊ុន​គេ​មាន​រដ្ឋ​បើក​អាជីវកម្ម​ឲ្យ​ពេញ​សិទ្ធិ​ត្រឹមត្រូវ។ ឥលូវ អាជ្ញាប័ណ្ណ​យក​មក​បោក​ប្រជា​ពលរដ្ឋ គេ​មាន​ថ្នាក់​ដឹកនាំ​គេ​ទទួល​ដឹងឮ ចេញ​អាជ្ញា​ប័ណ្ណ ឥលូវ​បែរ​ជា​យក​អាជ្ញាប័ណ្ណ​ហ្នឹង​យក​មក​បោក​ពលរដ្ឋ។ សួរ​ថា​ក្រុមហ៊ុន​ហ្នឹង​អត់​មាន​គេច​វេស​ទៅ​ណា​ទេ ហេតុ​អី​ច្បាប់ ធ្វើ​មិន​ចេញ។ អ៊ីចឹង​ច្បាប់​ស្រុកខ្មែរ​យើង​ត្រូវការ​តែ​លុយ បើ​អ្នក​ណា​មាន​លុយ​នឹង​ឈ្នះ បើ​អ្នក​អត់​លុយ គឺចាញ់​ ទុក​ឲ្យស្លាប់​ឈឺបន្ត​ទៅ​ទៀត​ អ៊ី​ចឹងប្រជា​ពលរដ្ឋ​ឈឺ​ចាប់»

មាត្រា​ ៣៥ នៃ​រដ្ឋធម្មនុញ្ញ ចែងថា សេចក្ដី​ស្នើ​ទាំង​ឡាយ​របស់​ប្រជាពលរដ្ឋ ត្រូវ​បាន​ទទួល​ការ​ពិនិត្យ និង​ដោះ​ស្រាយ​យ៉ាង​ហ្មត់​ចត់​ពី​អង្គការ​រដ្ឋ។

រីឯ មាត្រា ៥២ បញ្ញត្តិ​ថា រដ្ឋ​យក​ចិត្ត​ទុក​ដាក់​ជា​អាទិភាព ចំពោះ​ជីវភាព​រស់​នៅ និង​សុខុមាល​ភាព​​របស់​ប្រជា​ពលរដ្ឋ។

ទោះ​ជា​រដ្ឋធម្មនុញ្ញ​ចែង​បែប​នេះ​ក្តី​ប៉ុន្តែ ជន​រងគ្រោះ​អះអាង​ថា​ពួកគេ​សរុប ៨០០០នាក់ ដែល​ចាញ់​បោក​ក្រុមហ៊ុន​ឆបោក​របស់​អតីត​ឧកញ៉ា ហ៊ី គឹមហុង មិន​ទទួល​បាន​ការ​អើពើ​ពី​រដ្ឋាភិបាល​ទេ ទោះបី​ពួក​គេ​ផ្ទុះ​ការ​តវ៉ា​ជា​ច្រើន​ដង​ក្តី។

ផ្ទុយ​ទៅ​វិញ តំណាង​របស់​ពួក​គេ​ត្រូវ​ក្រុម​ឆបោក​ នៅ​ក្រុមហ៊ុន​ពិភព​ដីមាស​ប្តឹង​ពីបទ​ញុះ​ញង់ ទៅ​វិញ ក្រោយ​សកម្ម​ទាមទារ​យុត្តិធម៌​ ឱ្យ​អ្នក​រង​គ្រោះ​រាប់​ពាន់​គ្រួសារ តែ​បណ្តឹង​ជន​រង​គ្រោះ​ប្តឹង​ក្រុម​លោក ហ៊ី គឹមហុង ត្រូវ​បាន​ផ្អឹប​ចោល​គ្មាន​ការ​ដោះ​សា្រយ។

ជាក់​ស្តែង​កាល​ថ្ងៃទី២ ខែមករា ជន​រង​គ្រោះ​ប្រ​មាណ ៣០០នាក់ បាន​ប្រមូល​ផ្តុំ​គ្នា​តវ៉ា​នៅ​មុខ​តុលាការ​ក្រុង​ភ្នំ​ពេញ ទាមទារ​ឱ្យ​ចាប់​ខ្លួន​មេ​ឆបោក​អតីត​ឧកញ៉ា ហ៊ី គឹមហុង និង​បក្ខ​ពួក ដែល​ការ​ជួប​ជុំគ្នា​នេះ​ចំ​ថ្ងៃ​លោក មុត ពិសី តំណាង​ជន​រងគ្រោះ​ត្រូវ​ចូល​ឆ្លើយ​ នៅ​សាលា​ដំបូង​រាជធានី​ភ្នំពេញ តាម​បណ្តឹង​របស់ អ៊ែល ស៊ីធីន ជា​បក្ខ​ពួ​កលោក ហ៊ឺ គឹម​ហុង។

អនុ​​ប្រធាន​​​អង្គការ​​ ពលរដ្ឋ​​យើង លោក មាន ព្រហ្មមុនី បាន​ស្តីបន្ទោស​​រដ្ឋាភិបាល​បក្ស​កាន់​អំណាច​ថា គ្មាន​ឆន្ទៈគិតគូ​ពី​សុខទុក្ខ​ របស់​រាស្រ្ត​ជា​ធំ​នោះ​ទេ ហើយ​ថា ការ​ទុក​ឱ្យមាន​ជន​រង​គ្រោះ​សា្លប់​បែប​នេះ បង្ហាញ​យ៉ាងច្បាស់​ថា​ឈ្មួញ​ទុច្ចតិត និង​រដ្ឋាភិបាល​ជាបក្ខពួក​តែ​មួយ។

លោកថា៖ «រដ្ឋាភិបាល​របៀប​ហ្នឹង​ គឺ​រដ្ឋាភិបាល​ត្រូវ​រ៉ូវ​ជាមួយ​ឈ្មួញ​ ជាមួយ​ជន​ឆបោក ឬ​ក៏​អ្នក​រកស៊ី​ទុច្ចរិត។ រដ្ឋាភិបាល​បែប​ហ្នឹង​ គឺ​ជា​រដ្ឋាភិបាល​មិន​មាន​សុចរិត​ភាព ហើយ​ជា​រដ្ឋាភិបាល​ដែល​ដឹក​នាំ​បែប​ទុច្ចរិត បែប​ខ្មៅ​ងងឹត​ គឺ​យកសុខ​តែ​គ្រួសារ​ខ្លួន​ឯង មិន​ដឹង​សុខ​ទុក្ខ​របស់​ប្រជា​ពលរដ្ឋ​ មិន​បម្រើ​សេវា​ប្រជា​ពលរដ្ឋ​ទេ»

ការ​លើក​ឡើង​របស់​អ្នក​ឃ្លាំមើល​សង្គម​រូបនេះ ហាក់​ស៊ីគ្នា​ទៅ​នឹង​សារ​របស់​នាយក​រដ្ឋមន្រ្តី​កម្ពុជា លោក ហ៊ុន ម៉ាណែត ដែល​ធ្លាប់​ថ្លែង​ជា​សារធារណៈ​ថា លោក​មិន​សម្លាប់​មេ​មាន់​នោះ​ទេ គឺ​លោក​ទុក​មេមាន់​ដើម្បី​យក​ពង។

លោកថា៖ «រដ្ឋាភិបាល​ពិត​ណាស់​ មិន​ងាក​ឆាប់ៗ​នោះ​ទេ ត្រូវ​​ធ្វើ​យ៉ាង​ម៉េច​គោល​ដៅ​ធំ​បំផុត គឺ​ដោះ​ស្រាយ​បញ្ហា​ជូន​អតិថិជន ហើយ​ធ្វើ​យ៉ាង​ម៉េច​ឲ្យ​ក្រុមហ៊ុន​អភិវឌ្ឍន៍​នៅ​មាន​លំនឹង​បន្ត​ដោះ​ជូន​ទៀត បញ្ជាក់​ថា​រាជរដ្ឋា​ភិបាល​ខិត​ខំ​ជា​ប្រចាំ​ ដើម្បី​ដោះ​ស្រាយ​បញ្ហា​នេះ​ ព្រោះ​យើង​មិន​អាច​បំផ្លាញ​សេដ្ឋកិច្ច​យើង​នៅ​ក្នុង​រយៈពេល​មួយ​ឆ្នាំ​នេះ​ទេ។ វា​ឡើង​ចុះ​ពេល​លំបាក​ យើង​រួម​គ្នា​ដោះ​ យើង​មិន​អាច​យក​រូប​មន្ត សម្លាប់​មេ​មាន់​នោះ​ទេ​ យើង​ត្រូវ​ធ្វើ​ម៉េច​ឲ្យ​មេ​មាន់​នៅ​រស់​ ដើម្បី​យក​ពង​មាន់​ទៅ​ឲ្យ​បង​ប្អូន​ប្រជា​ពលរដ្ឋ​ នេះ​ជា​គោល​ដៅ​ធំ»

តំណាង​រាស្រ្ត​គណបក្សសង្រ្គោះ​ជាតិ លោក អ៊ំ សំអាន ថា​ការ​ថ្លែង​របស់​លោក ហ៊ុន ម៉ាណែត បែប​នេះ គឺ កំពុង​បើក​ផ្លូវ​ឱ្យ​ក្រុម​ឈ្មួញ​ទុច្ចរិត​ដើរ​បោក​ពលរដ្ឋ ដើម្បី​ជួយ​រក​លុយ​ចិញ្ជឹម​អំណាច​របស់​ខ្លួន ដែល​ធ្វើ​ឱ្យ​ប្រព័ន្ធ​ច្បាប់​ជាប់​គាំង​ មិនអាច​រក​យុត្តិ​ធម៌​ឱ្យ​ជន​រងគ្រោះ បាន​ដូច​ករណី​អតីត​ឧកញ៉ា ហ៊ី គឹមហុង នេះ​ជាដើម។

លោក សំអាន សង្កត់​ធ្ងន់​ថា រដ្ឋាភិបាល​គ្រួសារ​ហ៊ុន​ដែល​បណ្តោយ​ឱ្យ​មាន​ពលរដ្ឋ​ស្លាប់​ ជា​បន្តបន្ទាប់ ក្រោម​ដៃ​ឧកញ៉ា​ខិល​ខូច​បែប​នេះ គឺ​ជា​ការ​ប្រមាថ​ជីវិត​ពលរដ្ឋ​យ៉ាង​ធ្ងន់ធ្ងរ។

លោកថា៖ «ទុក​ឲ្យ​ពលរដ្ឋ​ស្លាប់​ជា​បន្ត​បន្ទាប់​បែប​នេះ ជាការ​ប្រមាថ​ទៅ​ដល់​អាយុ​ជីវិត របស់​ប្រជា​ពលរដ្ឋ។ ចាត់​ទុក​ប្រជា​ពលរដ្ឋ​ដូច​ជា​សត្វ អត់​មាន​តម្លៃ​នោះ​ទេ​សម្រាប់​មេដឹក​នាំ​កម្ពុជា​ព្រោះអ្នក​ដែល​មាន​តម្លៃ​សម្រាប់​មេដឹកនាំ​កម្ពុជា គឺ​ឧកញ៉ា ព្រោះ​ឧកញ៉ា គេ​បាន​យក​លុយ​ទៅ​ឱ្យ​ត្រកូល​ហ៊ុន និង​គណបក្ស​ប្រជាជន​ ដើម្បី​ពង្រឹង​​អំណាច​ដល់​ប្រជា​ពលរដ្ឋ គេ​ចាត់​ទុក​ដូច​ជា​សត្វ​ហ្នឹង​ឯង​ ព្រោះ​សព្វ​ថ្ងៃ​លែង​មាន​ការ​បោះឆ្នោត​ប្រកួត​ប្រជែង​ពី​គណបក្ស​ប្រឆាំង​ ទោះ​បី​ជា​បោះ​របៀប​ម៉េច គេ​នៅ​តែ​ជាប់​ចឹង ព្រោះ​អត់​មាន​គូ​ប្រកួត​ប្រជែង​ផង អត់​មាន​ការ​បោះឆ្នោត​ដោយ​សេរី និង​យុត្តិធម៌​ផង​ហ្នឹង»

អតីត​​ឧកញ៉ា ហ៊ី គឹមហុង ត្រូវ​បាន​​ចាប់ខ្លួន​​កាល​ពី​ខែ​សីហា ឆ្នាំ២០២៣ ពីបទ​​ឆបោក​​ពលរដ្ឋ តែ​​ប្រមាណ ​៤ខែ ក្រោយ​​មក​​ពោល​គឺ​​នៅ​ខែ​វិច្ឆិកា ឆ្នាំ២០២៣ តុលាការ​​ដោះ​លែង​​វិញ ក្រោយ​សន្យា​​រកលុយ​សង​​​​​ជនរង​គ្រោះ​​វិញ តែ​​ពេល​បាន​នៅ​ក្រៅឃុំ​ លោក​បាន​គេច​វេស​​មិន​គោរព​​សន្យា​នោះ​​ទេ។ ជុំវិញ​​បញ្ហា​​នេះ ក្រោយ​​យុត្តិធម៌​​ពួក​​គេ​ត្រូវ​បាន​​កប់​ចោល​​ច្រើន​​ឆ្នាំ និង​​មាន​​អ្នក​​ស្លាប់​​កើន​​ឡើង​ជិត​​ដល់​ ២០នាក់ នៅ​​តែ​​គ្មាន​​ដំណោះ​​ស្រាយ​​នោះ ក្រុម​​ជន​រង​គ្រោះ​​បាន​​ធ្វើ​យុទ្ធនាការ​​លើ​បណ្តាញ​​សង្គម​​ចោទ​​​ថា ឧបសគ្គ​​រារាំង​​ដល់​​ការ​​ស្វែង​រក​​យុត្តិធម៌​​ពួក​​គេ អាច​​ជាប់​​ពាក់​ព័ន្ធ​​មន្ត្រី​មាន​​អំណាច នៅ​​ពីក្រោយ​​ក្រុម​ហ៊ុន​​ឆបោក​​នេះ ដោយ​​ក្នុង​​នោះ ពួក​គេ​​បាន​​រំលេច​​មុខ អនុប្រធាន​​គណបក្ស​​ប្រជាជន​​កម្ពុជា​​លោក​ស្រី ម៉ែន សំអន និង​​អតីត​​ប្រធាន​​រដ្ឋសភា​​លោក ហេង សំរិន ​ផង​​ដែរ​៕

ដោយ៖ លោក សែន សច្ចៈ

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ