មន្រ្តីនគរបាលជាន់ខ្ពស់បាននិយាយថា តុលាការព្រហ្មទណ្ឌថៃបានកំណត់មុខសញ្ញាជនដៃដល់ និងចេញដីកាតាមចាប់ខ្លួនហើយនៅពេលនេះ ក្រោយឆ្លងកាត់ការស៊ើបអង្កេត ដោយហ្មត់ចត់រួចមក។
កាសែតក្នុងស្រុកថៃ បន្តចេញផ្សាយករណីឃាតកម្មនេះ ព្រោងព្រាតនៅថ្ងៃពុធនេះ ដោយបង្ហាញមុខឃាតករ និងឈ្មោះ ក្រោយមានរូបភាពបែកធ្លាយ។ ឃាតករដែលមានឈ្មោះថា ឯករ៉ាត់ ផាណូយ ហៅ ឯក កាឡាក់ គឺជាអតីតទាហានជើងទឹករបស់ថៃ។
លោកឧត្តមសេនីយ៍ សៃយ៉ាម ប៊ុនសុំ (Siam Boonsom) ស្នងការនគរបាលក្រុងបាងកក បានប្រាប់កាសែតថៃថា ឃាតករដែលបាញ់សម្លាប់អតីតតំណាងរាស្រ្តគណបក្សសង្រ្គោះជាតិ កាលពីថ្ងៃទី៧ ខែមករា នឹងត្រូវចាប់ខ្លួនក្នុងពេលឆាប់ៗនេះ ក្រោយសមត្ថកិច្ចជំនាញ បានកំណត់មុខសញ្ញាក្រោយឆ្លងកាត់ការស៊ើបអង្កេតដោយហ្មត់ចត់។
នេះបើតាមការចេញផ្សាយ ដោយកាសែត Reuter នៅថ្ងៃទី៨ ខែមករានេះ។ ប៉ុន្តែលោកបដិសេធក្នុងការផ្តល់អត្តសញ្ញាណជនដៃដល់ ដោយអះអាងថា នាំឱ្យប៉ះពាល់ដល់កិច្ចការសម្ងាត់ និងការស៊ើបអង្កេតមុនឈានដល់ការចាប់ខ្លួនជនល្មើស។ តែយ៉ាងណា មកដល់ពេលនេះលោកឱ្យដឹងថា ឃាតករត្រូវគេកំណត់មុខសញ្ញា និងស្គាល់ភិនភាគច្បាស់ហើយ មុនពេលតុលាការចេញដីកាតាមចាប់ខ្លួននេះ។
ក្រោយការបាញ់ប្រហារ ទៅលើលោក លឹម គីមយ៉ា មួយថ្ងៃបន្ទាប់ មានការចុះផ្សាយ នៅលើបណ្តាញសង្គមថា ជនល្មើស គឺជាជនជាតិខ្មែរ ដែលមានកម្ពស់ជិត ១,៩ម៉ែត្រ ប៉ុន្តែយ៉ាងណាមកដល់ពេលនេះ នៅមិនទាន់មានការបំភ្លឺបន្ថែម ពីសមត្ថកិច្ចថៃជុំវិញករណីនេះនៅឡើយទេ។
បើទោះបីជាកាសែតក្នុងស្រុករបស់ថៃ បានស្រង់សំដីពីក្រុមសមត្ថកិច្ច ដែលចុះប្រតិបត្តិការ ក្នុងរឿងក្តីនេះ ដោយផ្អែកលើកាំមេរ៉ាសុវត្ថិភាព បង្ហាញថាឃាតករបានត្រៀមចាំធ្វើសកម្មភាព មុនរួចជាស្រេច។ ផ្អែកតាមតម្រុយនេះ រកឃើញថា ជនល្មើសជិះម៉ូតូហុងដា វ៉េវ ១០០ សេសេ ពណ៌ក្រហម ដែលមានស្លាកលេខ ៨៤៥។ ហើយជនដៃដល់ស្លៀកខោខាវប៊យ ជើងវែងពណ៌ខៀវ និងអាវដៃខ្លីពណ៌ប្រផេះ ដោយមានកាបូបលាក់កាំភ្លើង ស្ពាយជាប់នឹងខ្លួន។
សម្រាប់លោក អំ សំអាត ដែលជានាយកទទួលបន្ទុកកិច្ចការទូទៅ នៃអង្គការ ការពារសិទ្ធិមនុស្ស លីកាដូ យល់ឃើញថា មានតែការស៊ើបអង្កេត ដោយឯករាជ្យមួយគត់ ទើបអាចធានាបានថា នឹងជួយស្វែងរកយុត្តិធម៌ ឱ្យជនរងគ្រោះ ដោយអំពើបាញ់ប្រហារនេះ។ មិនតែប៉ុណ្ណោះ អ្នកការពារសិទ្ធិមនុស្សរូបនេះ ក៏អំពាវនាវ ឱ្យស្ថាប័នជំនាញរបស់ភាគីថៃ ធ្វើការដោយតម្លាភាព ក្នុងសំណុំរឿងព្រហ្មទណ្ឌនេះ។
លោក អំ សំអាត បន្តថា៖ «អង្គការសង្គមស៊ីវិល ដែលធ្វើការផ្នែកសិទ្ធិមនុស្ស នៅតែទទូចសុំឱ្យអាជ្ញាធរថៃធ្វើការស៊ើបអង្កេត ដោយតម្លាភាពដើម្បីស្វែងរកយុត្តិធម៌ សម្រាប់ជនរងគ្រោះ ក៏ដូចជាក្រុមគ្រួសារ។ ហើយទី២ ក៏ដើម្បីចង់ដឹងអំពីមូលហេតុពិតប្រាកដ នៃការបាញ់សម្លាប់ទៅលើលោក លឹម គីមយ៉ា»។
ក្រោយមានអំពើឃាតកម្មកើតឡើង ចំពោះលោក លឹម គីមយ៉ា អតីតតំណាងរាស្រ្តមណ្ឌលកំពង់ធំ កូតាគណបក្សសង្រ្គោះជាតិ គេសង្កេតឃើញថាមានប្រតិកម្មជាបន្តបន្ទាប់ ប្រឆាំងការបាញ់សម្លាប់នេះ។ មិនថាតែអ្នកនយោបាយក្នុងគណបក្សតែមួយ សូម្បីពលរដ្ឋថៃមួយផ្នែកធំ ក៏បង្ហាញអារម្មណ៍ហួសចិត្ត និងក្តុកក្តួល ចំពោះអំពើឃាតកម្មនេះដូចគ្នាដែរ។ ពួកគេម្នាក់ៗ បានបញ្ចេញខម្មិនផ្សេងៗ នៅលើតំណភ្ជាប់នៃព័ត៌មាន ដែលចុះផ្សាយដោយកាសែតក្នុងស្រុករបស់ខ្លួន ហើយចាត់ទុកករណីនេះថាជាទម្រង់នៃអំពើមនុស្សឃាតដ៏ឃោរឃៅ។
ចំណែក គណបក្សកម្លាំងជាតិ ក៏បានចេញសាររំលែកទុក្ខ និងថ្កោលទោស ក្នុងពេលដែលលោក ហ្វៀល រ៉ូបឺតសុន (Phil Robetson) នាយកទទួលបន្ទុក នៃអង្គការឃ្លាំមើលសិទ្ធិមនុស្សអន្តរជាតិ Human Right Watch ប្រចាំតំបន់អាស៊ី ក៏បានបង្ហាញភាពរន្ធត់ និងថ្កោលទោសចំពោះករណី អំពើបាញ់ប្រហារនេះដែរ។
លោក ស៊ឹង សែនករុណា ប្រធានអង្គការប្រជាធិបតេយ្យខ្មែរ ប្រចាំប្រទេស អូស្ត្រាលី ចាត់ទុកថា អំពើឃាតកម្មនេះ ទំនងមានទំនាក់ទំនងគ្នា នឹងការរិះគន់របស់លោក ប្រឆាំងសកម្មភាពនានា ក្នុងរយៈពេលប៉ុន្មានមកនេះ អំពីភាពមិនប្រក្រតី នៃថ្ងៃឆ្លងឆ្នាំជាដើម។ លោកបន្តថា បើតាមការសង្កេត អ្នកនយោបាយរូបនេះ មិនមានភាពសកម្មអ្វីប៉ុន្មានទេ ក្រោយគណបក្សប្រឆាំងត្រូវរំលាយ ប៉ុន្តែអាចហេតុផលមួយនេះ ជាដើមចម ដែលនាំទៅដល់កើតរឿងរ៉ាវនេះឡើង។
លោកថា៖ «ក្នុងករណីនេះ យើងឃើញថាលោក លឹម គីមយ៉ា ដូចអត់មានធ្វើសកម្មភាពនយោបាយអ្វីច្រើនទេ គ្រាន់តែជាការសំដែងមតិ របស់លោកនៅលើបណ្តាញសង្គម ហើយចុងក្រោយ មុនបួនថ្ងៃ នៃការបាញ់សម្លាប់នេះ គឺលោកលើកឡើងព័ត៌មានអំពីការពាក់ព័ន្ធ ទៅនឹងការឆេះនៅមុខព្រះបរមរាជវាំង ហើយនិងការដែលធ្វើសកម្មភាពពាក់ព័ន្ធ នឹងកម្មវិធីនាឱកាសបុណ្យធំៗកន្លងទៅ ដែលដឹកនាំដោយលោក ម៉ា នី។ អញ្ចឹងចង់ ឬមិនចង់ក្នុងករណីនេះ គេមន្ទិលសង្ស័យថាជាករណីឃាតកម្មនយោបាយ អាចថាពាក់ព័ន្ធទៅការបំបិទមាត់ »។
ជុំវិញសំណុំរឿងព្រហ្មទណ្ឌនេះ លោក គឹម សុខ អ្នកវិភាគសង្គម បានលើកឡើងនៅលើបណ្តាញសង្គមរបស់លោក ដោយចោទប្រកាន់ថាអំពើឃាតកម្មនេះ អាចមានជាប់ទាក់ទិន នឹងសំដីរបស់លោក ហ៊ុន សែន។ ប្រភពបន្តថា ក្នុងរយៈពេលប៉ុន្មានថ្ងៃមុននេះ អតីតនាយករដ្ឋមន្រ្តីរូបនេះ បានផ្ញើសារជាសំឡេង ដោយលើកឡើងថា លោកមានបណ្តាញសម្ងាត់ធំ នៅប្រទេសថៃ ដែលធ្វើការជិតស្និតជាមួយកម្លាំងថៃ ដែលអាចកម្ចាត់ក្រុមអ្នកប្រជាធិបតេយ្យខ្មែរ រស់នៅលើទឹកដីថៃពេលណាក៏បាន។
បើតាមលោក គឹម សុខ អំពើឃាតកម្មនេះ មានចំណុចសង្ស័យជាច្រើន ដែលត្រូវស៊ើបអង្កេត លើអ្នកមានអំណាច នៅទីក្រុងភ្នំពេញ។ ដូចគ្នានេះដែរ អង្គការឃ្លាំមើលសិទ្ធិមនុស្សអន្តរជាតិ Human Right Watch ក៏បានចេញសេចក្តីប្រកាសព័ត៌មាន នៅថ្ងៃនោះ ភ្ជាប់ដោយការថ្កោលទោស និងចូលរួមរំលែកទុក្ខ។ ស្ថាប័នអន្តរជាតិមួយនេះ ក៏បានកត់សំគាល់ដែរថា ការបាញ់សម្លាប់អតីតអ្នកតំណាងរាស្រ្តវ័យ ៧៣ឆ្នាំ នៅចំកណ្តាលទីក្រុងបាងកងនេះ ចំថ្ងៃជាមួយនឹងការផ្ញើសាររបស់លោក ហ៊ុន សែន ដែលជំរុញឱ្យរដ្ឋាភិបាលដឹកនាំដោយកូនប្រុសរបស់ខ្លួន ធ្វើច្បាប់ប្រឆាំងភេរវកម្ម ដើម្បីទប់ទល់ និងកម្ចាត់អ្នកដែលមានសំឡេងផ្ទុយពីលោក។
សម្រាប់លោក សុខ ឥសាន អ្នកនាំពាក្យគណបក្សប្រជាជនកម្ពុជា ថ្លែងការពារថា បញ្ហានេះមិនជាប់ទាក់ទងអ្វីសោះឡើយ ជាមួយកម្ពុជា។ អ្នកនាំពាក្យរូបនេះ ជំរុញឱ្យទៅសួរនាំ និងការបំភ្លឺពីភាគីថៃ ព្រោះសំណុំរឿងព្រហ្មទណ្ឌនេះ មិនមែនកើតឡើង នៅលើទឹកដីកម្ពុជាឡើយ។
លោកថា៖ «រាជរដ្ឋាភិបាលកម្ពុជាដឹកនាំ និងគ្រប់គ្រងតែក្នុងព្រះរាជាណាចក្រកម្ពុជាទេ។ អញ្ចឹងរឿងនេះ ត្រូវទៅសួរប៉ូលីសថៃណោះ ព្រោះបាតុភាពវាបានកើតឡើង នៅក្នុងទីក្រុងបាងកក។ រឿងនេះមិនត្រូវសួររដ្ឋាភិបាលនៅទីក្រុងភ្នំពេញទេ។ លោកមិនបានដឹងរឿងហ្នឹងទេ ព្រោះអានេះវាក្រៅវិសាលភាព នៃការដឹកនាំ និងគ្រប់គ្រងដោយរាជរដ្ឋាភិបាលកម្ពុជា »។
បើទោះជាបែបណា ព្រឹត្តិការណ៍ដែលបានកើតឡើងនេះ វាហាក់ដូចគ្នាទៅនឹងការបាញ់សម្លាប់លោក បណ្ឌិត កែម ឡី កាលពីខែកក្កដា ឆ្នាំ២០១៦ ដែរ។ មុនស្លាប់អ្នកវិភាគសង្គមរូបនេះ បានធ្វើអត្ថាធិប្បាយ ដោយវិភាគចំៗ ទៅលើរបាយការណ៍របស់អង្គការ ហ្គូបបល់ វីតនេស(Global Witness) ទាក់ទងនឹងអាណាចក្រជំនួញ ក្នុងក្រុមគ្រួសារត្រកូលហ៊ុន។ ដោយឡែក លោក លឹម គីមយ៉ា ឯណេះវិញ ក៏បានរិះគន់ លោក ហ៊ុន ម៉ានី ដែលជាកូនប្រុសរបស់លោក ហ៊ុន សែន ដូចគ្នាដែរ អំពីរឿងអាស្រូវមួយចំនួន របស់រដ្ឋមន្រ្តីមុខងារសាធារណៈរូបនេះ ដូចជារៀបចំសាទរកម្ពុជា នៅចុងឆ្នាំ នាំឱ្យកើតរឿង អន្សមវែងជាងគេលើពិភពលោក និងមូលហេតុដែលនាំឱ្យឆេះរូបព្រះឆាយ៉ាលក្ខណ៍ ព្រះមហាក្សត្រជាដើម។ មិនបាន ៥ថ្ងៃស្រួលបួលផង ក្រោយការរិះគន់នៅលើបណ្តាញសង្គម ដ៏វែងអន្លាយរបស់លោក ត្រូវឃាតករបាញ់សម្លាប់ កាលពីរសៀលថ្ងៃទី៧ ខែមករា ចំថ្ងៃដែលបក្សកាន់អំណាច រៀបចំមីទ្ទិញរបស់ខ្លួន ដោយរំលឹកខួបជ័យជំនះ នៃថ្ងៃ៧មករា ថែមទៅទៀត៕
