ចំពេលអាជ្ញាធរថៃបង្ហាញមុខជនសង្ស័យទី២រួមដៃបាញ់សម្លាប់តំណាងរាស្រ្តគណបក្សសង្រ្គោះជាតិ លោក លិម គិមយ៉ា គណបក្សសង្រ្គោះជាតិប្រចាំសហរដ្ឋអាមេរិក បានទាមទារឱ្យបារាំង និងរដ្ឋាភិបាលថៃចាប់ខ្លួនឃាតករពិត និងអ្នកបញ្ជាមកផ្តន្ទាទោស ដើម្បីបញ្ចប់មន្ទិលសង្ស័យឱ្យបានឆាប់។
រឿងក្តីឃាតកម្មកណ្តាលក្រុងបាងកកនេះ ក្រៅពីបានកំណត់មុខសញ្ញាឃាតករ ឈ្មោះ អ៊ែក ការ៉ាត់ ផែណយ ជាជនជាតិថៃហើយនោះ សមត្ថកិច្ចថៃ ក៏បានរកឃើញជនសង្ស័យជនជាតិខ្មែរម្នាក់ទៀត មានឈ្មោះ ពេជ្រ គិមស្រ៊ិន ជាអនុប្រធានគណៈកម្មការផ្សារកណ្តាល ដែលជាកូនចៅរបស់ លោក ឃួង ស្រេង អភិបាលរាជធានីភ្នំពេញ។
តាមរយៈកាមេរ៉ាសុវត្ថិភាពផ្សព្វផ្សាយដោយប្រព័ន្ធផ្សព្វផ្សាយថៃ បង្ហាញថា ជនសង្ស័យរូបនេះបានជិះក្នុងរថយន្តក្រុងជាមួយ លោក លិម គិមយ៉ា នៅថ្ងៃទី៧ ខែមករា ហើយក្រោយឃាតកម្មកើតឡើង លោក ពេជ្រ គិមស្រ៊ិន បានជិះយន្តហោះត្រលប់មកកម្ពុជាវិញនៅម៉ោង៩យប់នៅថ្ងៃដដែល។
ចំពេលមានភស្តុតាងចង្អុលបង្ហាញបែបនេះ គណបក្សសង្គ្រោះជាតិប្រចាំសហរដ្ឋអាមេរិក តាមរយៈសេចក្តីថ្លែងការណ៍របស់ខ្លួន បានជំរុញឱ្យទូតបារាំងនៅទីក្រុងបាងកក និងរដ្ឋាភិបាលថៃ ពន្លឿនការស៊ើបអង្កេតរឿងក្តីនេះ ដើម្បីបញ្ចប់ការសង្ស័យឲ្យបានឆាប់ តាមរយៈការវែកមុខ អ្នកបញ្ជា និងហេតុផលពីក្រោយអំពើឃាតកម្មនេះ។
សម្រាប់គណបក្សសង្រ្គោះជាតិ ព្រឹត្តិការណ៍បាញ់ប្រហារ ជាឃាតកម្មនយោបាយគិតទុកជាមុនរៀបចំដោយឃាតករ និងមានអ្នកបញ្ជានៅពីក្រោយខ្នងយ៉ាងច្បាស់លាស់ ដែលមានទម្រង់ «ឃោរឃៅនិងយង់ឃ្នងបំផុត»។
បន្ថែមលើសេចក្តីថ្លែងការណ៍នេះ តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្ទ ប្រាប់ VOD ថា មានតែការស៊ើបអង្កេតដោយឯករាជ្យពីរដ្ឋាភិបាលបារាំង និងថៃទេ ទើបអាចទម្លាយការពិតបាន ព្រោះថា ឃាតកម្មនេះអាចមានជាប់ពាក់ព័ន្ធនឹងគ្រួសារហ៊ុន។
លោកថា៖«ដូចរឿងលោក កែម ឡី ដូចរឿងគ្រប់ទាំងអស់ ឃាតកម្មទាំងអស់មិនដែលរកឃើញសោះ មិនដែលរកឃើញទេ រាជរដ្ឋាភិបាលប្រកែក អត់ដែលរកឃើញទេ ប៉ុន្តែ បើសិនជាទង្វើកំប៉ិកកំប៉ុកគណបក្សប្រឆាំង សង្គមស៊ីវិល រឿងស្អីកំប៉ិកបំប៉ុក រកឃើញភ្លាម រឿងនយោបាយ រកមិនដែលឃើញសោះ បើរដ្ឋាភិបាល ហ៊ុន ម៉ាណែត ធ្វើឱ្យល្អដើម្បីឱ្យមានជំនឿ ឱ្យប្រជាពលរដ្ឋខ្មែរមានជំនឿ សង្គមស៊ីវិលមានជំនឿ និងអន្តរជាតិមានជំនឿ និងគណបក្សប្រឆាំងមានជំនឿទាល់តែរកឱ្យឃើញ»។
ប៉ុន្តែ អ្នកនាំពាក្យរដ្ឋាភិបាលកម្ពុជា លោក ប៉ែន បូណា បានចេញមកឆ្លើយតបលើបណ្តាញសង្គមរបស់ខ្លួនច្រានចោលការចោទប្រកាន់នេះ។
លោកថា៖ «វប្បធម៌លាបពណ៌មួលបង្កាច់ ចោទប្រកាន់ដែលគ្មានភស្តុតាងមកលើ រាជរដ្ឋាភិបាលនេះ វាបានក្លាយទៅជា អត្តសញ្ញាណរបស់ក្រុមប្រឆាំងជ្រុលនិយម អស់រយៈពេលជាច្រើនទស្សវត្សមកហើយ ទាំងក្រុមអង្គការសិទ្ធិមនុស្សមួយចំនួន ទាំងក្នុងស្រុកនិងបរទេស ហើយទាំងប្រព័ន្ធឃោសនារបស់គេមួយចំនួនផង។ ពួកគេ តែងតែធ្វើសេចក្តីថ្លែងការណ៍ចោទប្រកាន់ ទម្លាក់កំហុសដោយគ្មានការទទួលខុសត្រូវ គ្មានវិជ្ជាជីវៈ គ្មានភស្តុតាងអ្វីទាំងអស់ តាមតែរបៀបវារៈនយោបាយ ទុច្ចរិត»។
យ៉ាងណា ប្រធានអង្គការប្រជាធិបតេយ្យខ្មែរប្រចាំប្រទេសអូស្ត្រាលី លោក ស៊ឹង សែនករុណា និយាយថាដើម្បីការពារភាពស្អាតស្អំរបស់ខ្លួនបានទាមទារឲ្យរដ្ឋាភិបាលកម្ពុជាមានឆន្ទៈសហការណ៍ជាមួយភាគីថៃ និងបារាំង ដើម្បីវែកមុខឧក្រិដ្ឋជនដែលនៅពីក្រោយរឿងក្តីនេះ។
លោកថា៖ «ការឆ្លើយដែលថា ខ្លួនអត់ជាប់ពាក់ព័ន្ធហើយកើតហេតុនៅថៃ! ធម្មតាថៃ គេធ្វើការស៊ើបអង្កេត គេស្រាវជ្រាវធ្វើរបាយការណ៍ហើយ ប៉ុន្តែរឿងដែលពាក់ព័ន្ធ មកកម្ពុជា អ៊ីចឹងកម្ពុជា ខ្លួនឯងដែលត្រូវបានប្រទេសថៃ គេចោទប្រកាន់សួរ ហើយសហគមន៍អន្តរជាតិគេកំពុងតែឃ្លាំមើលរឿងហ្នឹងដែរ»។
តំណាងរាស្រ្តគណបក្សសង្រ្គោះជាតិ លោក លិម គិមយ៉ា ជនជាតិខ្មែរ សញ្ជាតិបារាំង ត្រូវបានខ្មាន់កាំភ្លើងបាញ់សម្លាប់នៅម៉ោង ៥ និង៤៥នាទីល្ងាច នៅថ្ងៃទី៧ ខែមករា ឆ្នាំ២០២៥ ក្នុងខណ្ឌព្រះនគរ ក្បែរវត្ត Bowonniwet Vihara ទីក្រុងបាងកក ប្រទេសថៃ។
មុនពេលស្លាប់ លោក លិម គិមយ៉ា បានរិះគន់ចំៗ ចំពោះលោក ហ៊ុន ម៉ានី ជុំវិញការឆេះរូបព្រះឆាយាល័ក្ខណ៍ព្រះមហាក្សត្រក្នុងព្រឹត្តិការណ៍សាទរកម្ពុជា ជម្លោះកោះគុត និងការដឹកនាំបែបគ្រួសារនិយមរបស់បក្សកាន់អំណាច ជាដើម។
១ថ្ងៃក្រោយការបាញ់សម្លាប់នេះ សមត្ថកិច្ចថៃបានកំណត់អត្តសញ្ញាណឃាតករ ដែលមានឈ្មោះ លោក អ៊ែក ការ៉ាត់ ផែណយ ជាអតីតទាហ៊ានជើងទឹកថៃ និងធ្លាប់រងការចោទប្រកាន់ថាកាប់អាវុធខុសច្បាប់ និងមានប្រវត្តិពាក់ព័ន្ធការប៉ងសម្លាប់មនុស្សផងដែរ។
ដោយឡែក អគ្គស្នងការនគរបាលជាតិកម្ពុជា បានបញ្ជាក់ក្នុងលិខិតចុះថ្ងៃទី៨ ខែមករា ថា ក្រោយធ្វើសកម្មភាពជនសង្ស័យបានរត់គេចខ្លួនពីទីក្រុងបាងកក ធ្វើដំណើរឆ្ពោះមកកាន់ខេត្តជាប់ព្រំដែនប្រទេសកម្ពុជា ហើយនគរបាលកម្ពុជាចាប់ជនសង្ស័យនៅថ្ងៃទី៨ ខែមករា នឹងត្រៀមបញ្ជូនទៅប្រទេសថៃ តាមការស្នើសុំ ក្រោយកម្ពុជាបញ្ចប់នីតិវិធីលើជនសង្ស័យ។
ជ្រុងមួយនៃអំពើហិង្សាឆ្លងដែននេះ ប្រធានគណបក្សប្រជាជនកម្ពុជា លោក ហ៊ុន សែន ធ្លាប់បានបញ្ជាឱ្យចាប់ខ្លួនសកម្មជនសង្គម លោក ផន ផាន់ណា អំឡុងពេលភៀសខ្លួននៅប្រទេសថៃ ដោយលោក ហ៊ុន សែន ថា ទោះបីស្លាប់ ឬរស់ត្រូវតែចាប់ឱ្យបាន។
ជាងនេះទៀត តាមរយៈសារជាសំឡេងបែកធ្លាយ លោក ហ៊ុន សែន បានបញ្ជាឱ្យបោសសម្អាតក្រុមសំឡេងជំទាស់ក្នុងស្រុកដោយប្រើពាក្យថា «ងើបមួយវាយមួយ» ដើម្បីបើកផ្លូវឱ្យលោក ហ៊ុន ម៉ាណែត ជាកូនឈ្នះឆ្នោតនៅឆ្នាំ២០២៧ និង២០២៨ ដោយគ្មានគូរប្រកួតប្រជែង។
ច្រើនឆ្នាំទៅនេះ គេសង្កេតឃើញថា អំពើហិង្សាលើអ្នកតស៊ូមតិ និងឃាតកម្មដែលកើតមាននៅលើទឹកដីកម្ពុជា ដូចជា ការបាញ់សម្លាប់លោក ឈុត វុទ្ធី លោកបណ្ឌិត កែម ឡី និងលោក ជា វិជ្ជា ជាដើម ត្រូវបានរដ្ឋាភិបាលកប់ចោស ដែលជាមន្ទិលថាមេដឹកនាំបក្សកាន់អំណាច លោក ហ៊ុន សែន គឺជាអ្នកបញ្ជាដោយផ្ទាល់ធ្វើឱ្យឧក្រិដ្ឋជនអាចបន្តរស់នៅក្រៅសំណាញ់បែបនេះ៕
ដោយលោក សែន សច្ចៈ