លោក ​រ៉ុង ឈុន​ នៅ​​ប្រកាន់​ជំហ​​ររឹង​មាំ​ដើម្បី​សិទ្ធិ​មនុស្ស​​លើ​ផ្លូវលំ​បាក

ដោយ​​សារ​​​តែ​ចង់​​ឃើញ​កម្ពុជាមាន​នីតិរដ្ឋ មាន​ប្រជាធិបតេយ្យ​ពិត​ប្រាកដ ប្រជាពលរដ្ឋ​​ខ្មែរ​មាន​សិទ្ធិ​​សេរី​ភាព​ពេញ​លេញ​ ​មាន​​ការ​ងារ​ធ្វើ​​​ទទួល​​បាន​​ប្រាក់​កម្រៃ​​សមរម្យ​ លោក ​រ៉ុង ឈុន ​បាន​ប្រើ​ពេល​​ស្ទើ​រពេញ​មួយ​ជីវិតមក​​ហើយ​ ដើម្បី​​បំពេញ​សេចក្តីប្រាថ្នា​ របស់​​លោក​​នេះ បើ​ទោះ​បី​​​ជាលោក​ត្រូវ​ជាប់​ពន្ធនាគារ​២ដង​រួច​មក​ហើយ ​និង​កំពុង​ប្រឈម​នឹងការ​ជាប់ពន្ធនា​គារ​​ជាថ្មីទៀតក្តី​​។

នៅ​ថ្ងៃ​ទី​១៧​ ខែ​មករា ​ឆ្នាំ២០២៥​​នេះ លោក រ៉ុង ឈុន ទីប្រឹក្សា​គណបក្ស​កម្លាំងជាតិ នឹង​ទៅ​​ចូល​រួម​​សវនាការ​​​នៅ​​សាលា​ដំបូង​រាជធានីភ្នំពេញ​ជាថ្មីទៀត ក្នុង​សំណុំ​រឿង​ចោទ​​ប្រកាន់ ​ពី​បទ ​មិន​រាង​​ចាល​​ ដែល​អ្នក​​​ឃ្លាំ​មើល​​សង្គម​​បារម្ភ​​ថា មាន​ភាគរយខ្ពស់​ដែលអ្នក​តស៊ូមតិ​​​អហិង្សា​ដ៏​ស្វិត​ស្វាញ​​​រូប​​នេះ​ អាចនឹងត្រូវ​ចាប់​ឃុំ​ខ្លួន​ជា​ថ្មី​​​ទៀត​ និង​ក៏​​អាច​ត្រូវ​ដក​សិទ្ធិនយោ​បាយ​ដូច​សហការី​​របស់​​លោកផង​​ដែរ​។

ប៉ុន្តែ​សម្រាប់​លោក​​ រ៉ុង​ ឈុន ការ​ទៅចូលរួម​សវនាការ​លើក​នេះ​ បើ​និយាយ​ថា បារម្ភដូចជា​មិ​ន​បារម្ភ​ ពី​ព្រោះ​អ្វី​​ដែល​លោក​ថា​​មិន​​​បារម្ភ​ គឺដោយ​សារ​​តែ​​លោក​អត់មានបាន​ប្រព្រឹត្ត​កំហុស​អ្វី​នោះ​ទេ ហើយ​​​ប្រសិន​​បើ​​តុលាការ​​សម្រេចឃុំ​ខ្លួន​លោក​ក៏គ្មាន​ចំណេញអ្វី​ដែរ។

ជាមួយគ្នា​នេះ គណបក្ស​​កម្លាំង​ជាតិ ​ក៏បាន​ប្រកាស​ឱ្យ​អ្នក​គាំទ្រ​​គណបក្ស​ទៅ​ចូល​​រួម​​​រង់​ចាំ​ឃ្លាំ​មើល​​នៅ​​ខា​ង​​​​​តុលាការ​​ផង​​ដែរ​ ដើម្បីលើក​ទឹក​ចិត្ត​ដល់​លោក ​​រ៉ុង ឈុន នៅ​ព្រឹក​ថ្ងៃ​បើក​សវនាការ​នោះ។

​ដីកាកោះ​របស់​តុលាការ​ ដែល​ចោទ​​ប្រកាន់លោក ​រ៉ុង ឈុន ពីបទ ​មិន​​រាង​ចាល គឺ​​ពាក់ព័ន្ធ​នឹង​សំណុំ​​រឿង​កាលពីឆ្នាំ​២០២០ ​ដែល​លោក​ទៅមើលការបាត់​បង់ដី​ធ្លី​​​​របស់​ប្រជាពលរដ្ឋ នៅ​ត្រពាំង​ផ្លុង​ ក្នុង​​ខេត្ត​ត្បូងឃ្មុំ។ ​បើ​តាម​វិធាន​​របស់​តុលាការ​​ដែល​​ដាក់​ឱ្យ​លោក ​រ៉ុង​ ឈុន ​ត្រូវ​​ធ្វើ​​តាម នៅ​ពេល​​ដែល​លោក​​ចេញពីពន្ធនាគា​រ​ កាលពីថ្ងៃទី១២ ​ខែ​វិច្ឆិកា ឆ្នាំ២០២១​ ចំណុចទី​១​ ហាម​ឃាត់​មិន​ឱ្យលោក​​ចាក​ចេញទៅក្រៅប្រទេស ហើយ​បើ​ចាក​ចេញទាល់តែមានការ​អនុញ្ញាត​ពីតុលាការ​។ ទី២ បើផ្លាស់​ប្តូរទីលំនៅ​​ត្រូវតែជូនដំណឹងទៅអាជ្ញាធរ។ ទី៣​ ​ត្រូវ​សហ​ការ​ជាមួយ​តុលាការ​​ពេល​​តុលាការ​ហៅជួប ចំណែក​​ចំណុច​ផ្សេងទៀត គឺ​ជាបញ្ហា​បន្ទាប់​បន្សំ មិនសូវ​សំខាន់​នោះទេ។

លោក ​រ៉ុង ឈុន​ ថ្លែង​ថា លោក​​មិន​មាន​​អ្វីដែល​​បាន​ប្រព្រឹត្ត​ផ្ទុយ​​ទៅនឹង​ការ​ណែនាំតាម​​វិធាន​តុលាការ​​ដែល​​បាន​ដាក់​ឱ្យនោះ​ទេ ហើយ​អ្វីដែល​តុលាការ​ចោទលោកពីបទមិនរាងចាល គឺ​លើក​ឡើង​​ទាក់​ទងទៅនឹងរឿងដែល​លោក​បានទៅជួប​ប្រជាពល​រដ្ឋ ​ដែល​មាន​បញ្ហា​វិវាទ​ដីធ្លី​នៅ​បឹង​តាមោក និង​ប្រជាពលរដ្ឋ​មាន​បញ្ហា​វិវាទដីធ្លីនៅជិតព្រលាន​យន្តហោះ​ ក្នុង​ស្រុក​កណ្តាល​ស្ទឹង ​ខេត្ត​​កណ្តាល។

មួយ​ទៀតទាក់​ទង​ទៅនឹង​លោក​ទៅសម្ពោធស្នាក់ការ​​គណ​បក្ស​កម្លាំងជាតិ ​នៅស្រុកកោះធំ ខេត្តកណ្តាល ហើ​យ​​​នឹង​​បាន​ផ្តល់បទសម្ភាសន៍​ជាមួយ​​វិទ្យុអាស៊ី​សេរី​ ទាក់​ទងនឹងលោក​នាយក​រដ្ឋ​មន្ត្រី​ ​ហ៊ុន ម៉ាណែត​ ទៅ​ពិនិត្យ​មើល​តាម​បណ្តោយ​ព្រំដែន​នៅខេត្ត​​ភាគឦ​សាន​។

លោកថា៖ «ចឹង​​អ្វីដែល​ខ្ញុំជាអ្នក​ធ្វើកិច្ច​ការ​ងារសង្គមកន្លង​​មក ហើយ​​ឥឡូវ​នេះ​ខ្ញុំ​មក​ចូល​រួម​សកម្ម​​ភាព​នយោបាយ​ពេល​ឃើញ​​​ប្រជាពលរដ្ឋ​​រងគ្រោះ​រឿង​ដីធ្លី គឺ​យើង​​ត្រូវ​ទៅ​​សួរ​សុខ​ទុក្ខ​គាត់។ បើ​ធ្វើ​នយោ​បាយ​​​នៅ​​សម្ងំ​​នៅក្នុងប៊ុយរ៉ូ អាហ្នឹង​ធ្វើម៉េចរកការគាំទ្រ​ពី​ប្រជាពល​រដ្ឋ​បាន​។​ ចឹង​មើល​​ទៅ​​វា​អត់​មាន​ខុស​អី ហើ​​យ​បើសិនជាតុលាការ​គាត់​អនុវត្តទៅ​​តាម​​វិជ្ជាជីវៈ​​របស់​តុលា​ការ​ហើយ​​​មិន​​ទទួល​​ឥទ្ធិពល​នយោ​បា​យ ​ចឹង​ខ្ញុំអត់​មាន​អី​ដែល​​ត្រូវ​បារម្ភត្រូវភ័យពីការ​ឃាត់ខ្លួន​អី​ទេ»

អតីត​​​ប្រធានសមាគមគ្រូបង្រៀន​កម្ពុជា​​ឯក​រាជ្យ ​និង​​ជាអតី​ត​មេដឹកនាំ​សហជីព​រូប​នេះ ​​បាន​ចោទ​សួរ​ថា ហើ​យ​​​បើ​​ឃាត់ខ្លួន លោក​ រ៉ុង ឈុន ​និង​មិន​ឃាត់​ខ្លួន​​មួយ​ណា​​ចំណេញ​ជាង​ តែ​បើ​លោក​​មើល​ទៅបើ​​​ឃាត់​ខ្លួន​​លោក​ដែល​​​មិន​បាន​ប្រព្រឹត្ត​កំហុស​វា​​មិន​មាន​អ្វី​​ចំណេញ​សម្រាប់​រដ្ឋាភិ​បាល​​ទេ ដូច្នេះ​​តុលាការ​​ក៏ត្រូវគិតត្រង់​ចំណុ​​ច​​នឹង​ដែរ គិត​អំពីមុខ​មាត់​រដ្ឋាភិបាល​ ហើយក៏គិត​អំពី​កេរ្តិ៍​ឈ្មោះ​តុលាការ​ផងដែរ។

លោកថា៖ «កុំឱ្យគេនិយាយ​ថា ​តុលាការ​​អីចេះ​តុលាការ​អីចុះអី​ចឹង​ទៅ​ណា​ តុលាការ​​ជា​តេឡេ តុលា​ការ​​​ជាឧបករណ៍អ្នកមាន​អំណាច​អីចឹងទៅ ក្នុងនាម​យើង​​ពលរដ្ឋយើងអត់ចង់ឮអាពាក្យ​ពេចន៍​​​អីចឹង​ទេ។ ដូច្នេះ​​ការ​​បារម្ភ​ដូច​ខ្ញុំ​បាន​​ឆ្លើយ​​ខាងដើមចឹងថា បារម្ភ​ក៏ថា​បាន​ មិនបារម្ភ​ក៏​ថា​បាន ពីព្រោះ​​យើង​​អត់​​មាន​​ធ្វើអ្វីដែល​ខុស​ឆ្គងផង»

យ៉ាងណាក្តី លោក វន ចាន់ឡូត អ្នក​សិក្សា​ច្បាប់​បាន​​​ហៅ​​ការ​កោះ​ហៅ​​ លោក ​រ៉ុង ឈុន ​ចូល​សវនាការ​​ជាថ្មី​ទៀត​​នេះ​ថា​ជា​​ដីកា​ប្រហារ​សេរីភាព។

លោក​​ថ្លែង​ថា លោក រ៉ុង ឈុន មាន​​ភាគរយខ្ពស់នឹ​ង​ត្រូវចាប់បញ្ជូនទៅដាក់ពន្ធនាគារសារជាថ្មី ដូច​​ទៅ​​នឹង​​ករ​ណីលោក នី ណាក់ ​សកម្ម​ជន​​នយោ​បាយ​និង​សង្គម​ ករណីកញ្ញា សេង ធារី និង​ករណី​សកម្មជន​​ចលនា​​មាតា​ធម្មជាតិ​ជា​ដើម​ ដែល​ត្រូវ​បាន​ចាប់​បញ្ជូន​ទៅ​ដាក់​ពន្ធនាគារ​ភ្លាមៗ បន្ទាប់​ពី​ប្រកាស​​សាល​ក្រម។

លោក​​ ចាន់​​ឡូត ថ្លែង​ថា វា​ជាតាក់ទិក​ថ្មី ដើម្បី​ប្រាកដ​ថា អ្នក​តស៊ូ​ដើម្បី​ប្រជាធិប​តេយ្យ និង​យុត្តិ​ធម៌​សង្គម​ត្រូវ​​ជាប់​ពន្ធនា​គារ​គ្រប់​ចំនួន​កំណត់ និង​​​​កាត់​​បន្ថយ​​ចលនា​​មក​​គាំទ្រ​​​នៅ​​មុខ​តុលាការ។

លើស​ពី​​នេះ លោក រ៉ុង ឈុន ទំនង​​​ជា​​ត្រូវ​​បាន​​ប្រហារ​​ជីវិត​​នយោបាយ​​តែ​ម្ដង ដូច​​ទៅនឹង​​ករណី លោក ស៊ុន ចន្ធី ប្រធានបក្សកម្លាំងជាតិ​កាលពីពេល​ថ្មីៗនេះ។

កាល​ពី​ថ្ងៃ​ទី​២៦ ខែធ្នូ ឆ្នាំ​​២០២៤ សាលា​ដំបូង​រាជ​ធានី​ភ្នំពេញ ​បាន​​កាត់​​ទោស ​លោក ស៊ុន ចន្ធី ​ឲ្យ​ជាប់​​ពន្ធ​នា​គារ ២​ឆ្នាំ ​ពិន័យ​ប្រាក់ ​៤លាន​រៀល និង​ដក​សិទ្ធ​​បោះ​​ឆ្នោត និង​​ដក​​សិទ្ធិ​​ឈរ​​ឈ្មោះឲ្យ​​គេ​បោះ​ឆ្នោត​​ជា​​អចិន្ត្រៃយ៍​។​ នេះជា​ករណី​​កម្រ​​មួយ​​ទៀត​​ដូច​គ្នា​នឹង​ករណី ​លោក កឹម សុខា ​ប្រធាន​គណបក្ស​​សង្គ្រោះ​ជាតិ​​ដែរ​។ ​

អ្នក​នយោបាយ និង​អ្នក​តាម​ដាន​នយោ​បាយ​មួយ​ចំនួន​ យល់ថា​ ទម្ងន់​​ទោស​លើ​​គណបក្ស​កម្លាំង​​ជាតិ​​នេះ​​​មាន​​លក្ខណៈ​​ធ្ងន់​​ធ្ងរ​​ខ្លាំង ​និង​ជា​ការ​រំលោភ​លើ​រដ្ឋ​ធម្មនុញ្ញ​ជាច្បាប់​កំពូល​​របស់​​រដ្ឋ​ដែល​​ចែង​​ថា ពលរដ្ឋ​ខ្មែរ​មាន​សិទ្ធិ​បោះ​ឆ្នោត និង​មាន​សិទ្ធិ​ឈរ​ឈ្មោះឲ្យ​​គេបោះ​ឆ្នោត​ឲ្យ​។

គិត​រហូតមក​ដល់ពេលនេះ ​លោក រ៉ុង ឈុន ​ធ្លាប់​​ជាប់​ពន្ធនាគារ​​២​ដង​ និង​ត្រូវសមត្ថកិច្ច​ចាប់​ឃុំ​ខ្លួន​ក្នុង​រយៈ​ពេល​ខ្លី​១ដង។​

 លោកត្រូវបាន​ចាប់បញ្ជូន​ទៅ​ឃុំខ្លួន​នៅ​ពន្ធនាគារ​​លើក​ទី​១ ​កាលពី​ថ្ងៃទី១៥ ខែតុលា ឆ្នាំ​២០០៥ ហើយ​ត្រូវ​កាត់​ទោស​ឱ្យជាប់​ពន្ធ​នាគារ​រយៈពេល​​៩៦​ថ្ងៃ ពាក់​ព័ន្ធ​នឹង​រឿង​រិះ​គន់​អតីត​នាយក​រដ្ឋមន្ត្រី លោក​ ហ៊ុន សែន លើ​ប​ញ្ហា​សន្ធិ​សញ្ញា​​បំពេញ​​បន្ថែម​ព្រំដែន​កម្ពុជា-វៀតណាម ឆ្នាំ​២០០៥ ប៉ុន្តែ លោក​ត្រូវ​បាន​ដោះលែង​​វិញ​ប​ន្ទាប់​ពី​បាន​​ជាប់​ពន្ធនាគារ​ជាង ៣ខែ។

ចំណែក​លើកទី២​ គឺ​​នៅថ្ងៃទី​៣១ ខែកក្កដា ឆ្នាំ​២០២០ ហើយ​​​​នៅថ្ងៃទី​១៨ ខែ​សីហា ឆ្នាំ​២០២១ ​លោក រ៉ុង ឈុន ត្រូវ​បានសាលាដំបូងរាជ​ធានី​ភ្នំពេញ ​កាត់ទោសឲ្យជាប់ពន្ធនាគារ​ចំនួន២​ឆ្នាំ និង​​បង្គាប់​ឲ្យសង​ជំងឺ​ចិត្ត​រួម​គ្នាចំ​នួន ៤០០​លាន​រៀល ឬ​ប្រហែល ១០ម៉ឺនដុល្លារ ​ទៅ​ឲ្យ​​គណៈ​កម្មា​ធិការ​ព្រំដែន​កម្ពុជា។

ការកាត់​ទោសអ្នករិះគន់បញ្ហាព្រំដែនរូបនេះ ធ្វើឡើង​ក្រោយ​ពី​លោក រ៉ុង ឈុន និង​មនុស្ស​​មួយ​ចំនួន​​ទៀត បាន​ចុះទៅ​ខេត្ត​ត្បូង​ឃ្មុំ ហើយ​បាន​​ជួប​ប្រជា​ពលរដ្ឋ​នៅទីនោះដែល​អះ​អាង​ថា ដី​របស់​ពួក​គេ​ត្រូវ​បាន​អាជ្ញាធរ​វៀតណាម​​ហាម​មិន​ឲ្យ​​​ធ្វើស្រែចម្ការ និងថា​មាន​ការ​​បោះ​បង្គោល​ព្រំដែន​ចូល​ក្នុង​ទឹក​ដី​ខ្មែរ។

 នៅ​ពេល​ដែល​សាលាឧទ្ធរណ៍​​បើក​សវនាការ​ជំនុំ​ជម្រះ​​សំណុំ​រឿង​​នេះ ​ក៏​បាន​កាត់ទោស​តម្រឹម​ឱ្យ​ជាប់​​ពន្ធនា​គារ​​១ឆ្នាំ៣ខែ១១ថ្ងៃ នៅ​សល់​ប៉ុន្មាន​ត្រូវ​ព្យួរ​ហើយ​ដាក់​វិធានការឱ្យ​ស្ថិត​នៅក្រោម​ការ​ត្រួត​ពិនិត្យ​​​រ​បស់​​តុ​លា​ការ​រយៈ​ពេល​៣ឆ្នាំ បន្ទាប់​មក​​លោកត្រូវដោះ​លែង​នៅ​ថ្ងៃ​ទី​១២​​​ខែ​វិច្ឆិកា ឆ្នាំ​២០២១​។

ការ​ប្រើ​ពេល​ស្ទើ​រ​ពេញ​មួយ​ជីវិត ​​ដើម្បី​ធ្វើ​កិច្ចការ​ងារ​សង្គម​របស់​បុរស​ដែល​មាន​ស្រុក​កំណើត​នៅ​ភូមិ​​ចុង​​កោះ​តូច ឃុំ​តា​លន់ ស្រុក​ស្អាង ខេត្ត​កណ្ដាល​​រូប​នេះ​​ ​គឺ​ចង់​ចូលរួម​ជួយ​​អភិវឌ្ឍន៍​​កសាង​ស្រុក​​ទេ​ស​ ជាពិសេស​ចង់​​ជួយ​ប្រ​ជាពល​រដ្ឋ​ទន់ខ្សោយ​ ចង់​​ឃើញ​សង្គមមួយ​មានការ​គោរពសិទ្ធិ​មនុស្ស​​ប្រជាពល​រដ្ឋ​មានការងារធ្វើទទួលបាន​ប្រាក់​ខែខ្ពស់ មន្ត្រីរាជការ​គ្រូបង្រៀនក្តី កម្មករ អាច​​រស់នៅ​ក្នុង​ជីវភាព​សមរម្យ។

លោក ​រ៉ុង ឈុន ​លើកឡើង​ថា បើ​យើងមិនមានការ​លះបង់ មិន​មាន​ការ​ខិត​​ខំ​ប្រឹង​​ប្រែង​​នោះ​បញ្ហា​​អ្វី​​ក៏ដោយ​​មិន​អាចទទួល​បាន​ដំណោះស្រាយ​ដោយ​ស្រួល​ៗ​នោះ​ទេ ​មិន​​ថា​​សេរីភាព​​ ជីវភាព រហូត​​ដល់​​រឿង​​យុត្តិធម៌​សង្គម គឺ​​មិន​​អាច​​បាន​​មក​​ដោយ​​ស្រួលៗ​ទេ​ ដូច្នេះ​​​វាត្រូវ​មាន​ការ​លះ​បង់​ច្រើន​ទើប​​អាច​ទទួល​​បាន​​នូវ​​​អ្វីដែល​​ប្រជាពលរដ្ឋ​ចង់បាន។

ចាប់តាំង​ពី​គណបក្ស​សង្គ្រោះ​ជាតិ​ ត្រូវ​បាន​រំលាយ​កាលពី​ចុង​ឆ្នាំ២០១៧​​មក សកម្ម​ជន​​នយោ​បាយ​ ​និង​​សកម្ម​ជន​​សង្គម​​ជាច្រើន ​ដែល​​អត់​ទ្រាំ​និងកា​រ​​ធ្វើទុក្ខ​បុកម្នេញ ពី​រដ្ឋាភិបាល​​​ដែល​ដឹក​នាំ​ដោយ​​គ្រួសារ​ហ៊ុន​មិនបាន​ បាន​ចុះ​ចូល​ជាមួយ​គណបក្ស​ប្រជាជនកម្ពុជា​​ជាបន្ត​បន្ទាប់​។

ប៉ុន្តែ​​សម្រាប់​​លោក ​រ៉ុង ឈុន បាន​​​ជ្រើស​រើសយក​ផ្លូវ​មិន​ចុះ​ចូលឡើយ​ ដោយ​​ពី​ដំបូង​​លោក​​ទៅ​ចូល​​រួម​​ជា​មួយ​​គណបក្ស​ភ្លើង​ទៀន ប៉ុន្តែក្រោយ​មក​លោក​និង​​​សហការី​​ជិត​ដិតផ្សេង​ទៀត​បាន​ចេញ​​មកបង្កើតគ​ណ​បក្ស​កម្លាំងជាតិ។

លោក​ថ្លែងថា អ្វី​ដែល​លោក​​​ជ្រើស​រើសគឺមិន​មាន​អ្វី​ផ្ទុយ​ពីច្បាប់​នោះទេ​ ពីព្រោះ​ក្នុង​ច្បាប់​​​បាន​កំណត់​​ថា ប្រ​ជាពលរដ្ឋ​​មាន​​សិទ្ធិ​​ជ្រើស​រើស​គណបក្ស​​នយោបាយ​​ មាន​សិទ្ធិ​ចូល​រួម​សកម្ម​ភាព​នយោ​បាយ មាន​​សិទ្ធិ​ជ្រើ​​សរើស​ការ​ងារ ដែល​​មានការ​ធានានៅក្នុង​រដ្ឋធម្មនុញ្ញ​​ ហើយ​លោក​​ធ្វើ​ទៅ​តាម​អ្វី​ដែល​​មាន​ចែង​ក្នុង​​រដ្ឋធម្មនុញ្ញ។

លោក​បញ្ជាក់ថា លោក​​ចូលរួម​​បង្កើតគណបក្ស​កម្លាំង​ជាតិ ​មានគោល​បំណង​តែមួយ​គត់​ គឺ​ចូល​រួម​​ប្រកួតប្រជែង​នៅ​​ក្នុង​ការ​បោះ​ឆ្នោតដោយ​សេរី​​ ត្រឹម​​ត្រូវ​ និង​យុត្តិធម៌ ហើយ​បើនិយាយ​ពី​​​ការ​បោះ​ឆ្នោត​​វិញ គឺ​ត្រូវ​ចាប់គិត​​​ពីឥឡូវ​ទៅដែរ ដូច្នេះ​រដ្ឋាភិបាល​ត្រូវ​បើកលំហសេរីភាព​ដល់​អ្នក​នយោបាយ​ពីគ្រប់​គណបក្ស​នយោបា​​យឱ្យ​មា​ន​សេរីភាពពេញ​​លេញ​ក្នុងការ​ធ្វើ​សកម្មភាព​ ដើម្បី​ត្រៀម​​ខ្លួន​ប្រកួត​​ប្រជែង​ក្នុង​​ការ​​បោះ​ឆ្នោត​នា​ពេល​ខាងមុខ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ