ក្រុមជំនាញស៊ើបអង្កេតរបស់ភាគីថៃ បានកំណត់មុខសញ្ញាឃើញហើយ អ្នកដែលបញ្ជាឱ្យបាញ់សម្លាប់ អ្នកតំណាងរាស្រ្តគណបក្សសង្រ្គោះជាតិ នៅចំថ្ងៃទី៧ ខែមករា ស្របពេលដែលជនសង្ស័យមួយចំនួន ត្រូវបានសមត្ថកិច្ចចាប់ខ្លួន មកសួរចម្លើយជុំវិញរឿងក្តីព្រហ្មទណ្ឌនេះ។
បណ្តាញព័ត៌មានក្នុងស្រុករបស់ថៃ បានដកស្រង់សំដីសមត្ថកិច្ច ដែលបើកប្រតិបត្តិការស៊ើបអង្កេត បង្ហាញនៅថ្ងៃនេះថា មានជនសង្ស័យម្នាក់ទៀតហើយ ត្រូវចាប់ខ្លួនពាក់ព័ន្ធនឹងរឿងក្តីឃាតកម្មនេះ។ ប្រភពបន្តថា ជនសង្ស័យឈ្មោះ ចាក់កិត បូប្លឿ (Chakit Buaplee) វ័យ៤៧ឆ្នាំ ត្រូវបានសមត្ថកិច្ចនាំខ្លួនពីស្រុកកំណើតនៅខេត្ត ឈុនបូរី ជាទីដែលជនសង្ស័យរូបនេះ សម្ងំលាក់ខ្លួន ក្រោយធ្វើសកម្មភាពរួច។
បើតាមបណ្តាញព័ត៌មានថៃ នៅពេលនេះ ជនសង្ស័យ ត្រូវបានសមត្ថកិច្ចបញ្ជូនបន្តមកសួរចម្លើយ នៅស្នងការនគរបាលភូមិន្ទថៃ ក្នុងទីក្រុងបាងកក។ មុនឈានដល់ការចាប់ខ្លួន អ្នកពាក់ព័ន្ធបន្ថែមទៀតនេះ សមត្ថកិច្ចរកឃើញតម្រុយ និងភស្តុតាងមួយចំនួន តាមរយៈកាមេរ៉ាសុវត្ថិភាព ដែលចាប់រូបភាពបាន បង្ហាញពីការជួយជ្រោមជ្រែងរបស់ជនសង្ស័យរូបនេះ ក្នុងការជម្លៀសឃាតករតាមរថយន្ត Pick Up មួយគ្រឿង ដោយឆ្លងកាត់ច្រកព្រំដែនពីថៃ មកកម្ពុជា។
ដោយឡែក នៅក្នុងរបាយការណ៍យកចម្លើយរបស់សមត្ថកិច្ចស៊ើបអង្កេតវិញ រកឃើញថា ជនសង្ស័យឈ្មោះ ចាកគិត នេះបានទំនាក់ទំនងជាមួយនិងពលបាល អែម ដែលជាឃាតករ នៅម៉ោងជិត២រសៀល ពោលប្រមាណ៤ម៉ោង មុនធ្វើសកម្មភាពបាញ់សម្លាប់លោក លិម គិមយ៉ា កាលពីថ្ងៃទី៧ ខែមករា។ ក្រោយកើតហេតុនេះ ជនសង្ស័យរូបនេះ គឺជាអ្នកផ្តល់មធ្យោបាយ ក្នុងការដឹកឃាតករ អេកាឡាក ផេណយ ឬពលបាល អែម ចូលមកក្នុងទឹកដីកម្ពុជា។
សមត្ថកិច្ច បញ្ជាក់ប្រាប់ក្រុមបណ្តាញព័ត៌មានថៃថា ជនសង្ស័យរូបនេះ ត្រូវជាប់ចោទពីបទ «មានបំណង ឬជួយសម្របសម្រួលទាំងមុន និងក្រោយធ្វើសកម្មភាពបាញ់សម្លាប់ តាមមធ្យោបាយធ្វើដំណើរឱ្យជនដៃដល់ ក្នុងអំពើមនុស្សឃាត»។ ប៉ុន្តែជនសង្ស័យរូបនេះ បានបដិសេធ នៅចំពោះមុខការយកចម្លើយរបស់សមត្ថកិច្ចថាខ្លួនធ្លាប់ស្គាល់ឈ្មោះ ពលបាល អែម នេះដែរ ប៉ុន្តែមិនបានដឹងពីការប្រព្រឹត្តឧក្រិដ្ឋកម្មទេ ហើយរថយន្តដែលខ្លួនប្រើ ក្នុងមធ្យោបាយធ្វើដំណើរនេះ គឺជារថយន្តដែលខ្ចីពីអ្នកជិតខាងប៉ុណ្ណោះ។
ដោយឡែក កាសែត The Nation បានចេញផ្សាយនៅថ្ងៃនេះ ដោយភ្ជាប់រូបថតអ្នកពាក់ព័ន្ធមួយចំនួន ក្នុងនោះមានរូប លោក ហ៊ុន សែន លោក ពេជ្រ ស្រស់ និងរូបលោក លី រតនរស្មី នៅក្នុងរបាយការណ៍ផ្សាយរបស់ខ្លួន នៅថ្ងៃនេះដែរ។ ការព្យាយាមភ្ជាប់ អ្នកដែលសង្ស័យនៅក្នុងសំណុំរឿងព្រហ្មទណ្ឌមួយនេះ ស្របពេលដែលក្រុមអ្នកជំនាញស៊ើបអង្កេតរបស់ថៃ បានបញ្ជាក់ជំហរថា ខ្លួនបានកំណត់មុខសញ្ញាអ្នកដែលបញ្ជានៅពីក្រោយខ្នង នៃអំពើឃាតកម្មនេះហើយ ប៉ុន្តែនៅរក្សាការសម្ងាត់សិន នាំឱ្យប៉ះពាល់ដល់ការស៊ើបអង្កេតបន្ត។
ក្នុងពេលជាមួយគ្នានេះ នគរបាលថៃ ក៏បាននាំខ្លួនឃាតករ ទៅបង្ហាញនៅចំពោះមុខ តុលាការព្រហ្មទណ្ឌថៃ ដោយស្នើសុំដីកាឃុំខ្លួនជនដៃដល់នេះបន្តទៀត ដើម្បីបើកផ្លូវឱ្យសមត្ថកិច្ច ស៊ើបអង្កេតបន្ថែម។ បើទោះជាបែបណា សមត្ថកិច្ចថៃ ប្រកាសថា ខ្លួននឹងបង្ហាញអត្តសញ្ញាណអ្នកបញ្ជា និងអ្នកនៅពីក្រោយខ្នង នៃអំពើឃាតកម្មនេះ ក្នុងពេលឆាប់ៗ៕
