តុលាការព្រហ្មទណ្ឌថៃ បានចេញដីកាបង្គាប់ឱ្យចាប់ខ្លួនទីប្រឹក្សា លោក ហ៊ុន សែន ចំពេលប៉ូលីសអន្តរជាតិបានចេញនិវេទន៍ក្រហមឱ្យស្វែងរកចាប់ខ្លួន លោក ពេជ្រ គឹមស្រ៊ិន ជាជនសង្ស័យម្នាក់ទៀត ក្នុងសំណុំរឿងឃាតកម្មលើតំណាងរាស្ត្រគណបបក្សសង្គ្រោះជាតិលោក លិម គិមយ៉ា ។
បើតាមព័ត៌មានថៃ Thai PBS បានរាយការណ៍នៅថ្ងៃទី១៥ ខែមករានេះថា តុលាការព្រហ្មទណ្ឌថៃបានសម្រេចចេញដីកាចាប់ខ្លួន លោក លី រតនៈរស្មី ជនជាតិខ្មែរ មានឈ្មោះជាភាសាថៃថា លោក ស៊ុមវ៉ាំង បំរ៉ុងគិត។
ប្រភពបន្តថា ដោយមានភស្តុតាងចង្អុលបង្ហាញជាច្រើនតុលាការសម្រេច ដាក់ការសង្ស័យបន្ថែមទៀតលើជនសង្ស័យ ឈ្មោះ លី រតនៈរស្មី អាយុ៤៣ឆ្នាំ ដែលរងបទចោទចំនួន៣ ។
តាមប្រភព ទីប្រឹក្សាលោក ហ៊ុន សែន រូបនោះ ជាប់ចោទពីបទ ជួលមនុស្សឱ្យប្រព្រឹត្តអំពើឃាតកម្មគិតទុកជាមុន កាន់អាវុធដោយខុសច្បាប់នៅទីសាធារណៈ និងការបំផ្ទុះអាវុធនៅក្នុងទីក្រុង ដែលសំណុំរឿងនេះពាក់ព័ន្ធនឹង លោក អ៊ែកកាឡាក់ ផែណយ ជាអ្នកស៊ីឈ្នួលបាញ់សម្លាប់ លោក លិម គិមយ៉ា តំណាងរាស្រ្តគណបក្សសង្គ្រោះជាតិ កាលពីថ្ងៃទី៧ ខែមករា។
ប្រភពថា «តុលាការព្រហ្មទណ្ឌថៃបានស្នើសុំចេញដីកាចាប់ខ្លួនលោក លី រតនៈរស្មី ឬឈ្មោះថៃថា ស៊ុមវ៉ាំង បំរ៉ុងគិត ជនជាតិខ្មែរ អាយុ៤៣ឆ្នាំ ក្រោមបទចោទប្រកាន់ចំនួន៣ រួមមានជាអ្នកញុះញង់ឲ្យប្រព្រឹត្តបទឧក្រិដ្ឋជាអាទិ៍ ឬឃាតកម្មគិតទុកជាមុន»។
ប្រភពដដែលបានឱ្យដឹងទៀតថា អាជ្ញាធរថៃនឹងសុំកិច្ចសហប្រតិបត្តិការណ៍ជាមួយរដ្ឋាភិបាលកម្ពុជា ដើម្បីស្វែងរកតាមចាប់ខ្លួន លោក លី រតនៈរស្មី និងបុគ្គលម្នាក់ទៀតឈ្មោះ ពេជ្រ គិមស្រ៊ិន។
ប្រភពបន្តថា ករណីឃាតកម្មលើអតីតតំណាងរាស្រ្តបក្សសង្គ្រោះជាតិលោក លិម គិមយ៉ា មានលក្ខណៈរៀបចំទុកជាមុន និងមានការគប់គិតគ្នា ដើម្បីជួលឃាតករថៃឱ្យបាញ់សម្លាប់មនុស្សលើទឹកដីប្រទេសថៃ ហើយថា ជនសង្ស័យឈ្មោះ ពេជ្រ គឹមស៊្រិន ជាជនជាតិខ្មែរដែរនោះ ប៉ូលីសអន្តរជាតិInterpol បានចេញនិវេទន៍ក្រហមឱ្យស្វែងរកចាប់ខ្លួនផងដែរ។
ប្រភពថា «សម្រាប់លោក ពេជ្រ គិមស្រ៊ិន ដែលជាអ្នកចង្អុលបង្ហាញមុខសញ្ញាដែលបង្ហាញនៅក្នុងកាម៉ារ៉ា CCTV និងជាអ្នកដែលបានចាកចេញពីប្រទេសថៃភ្លាមៗនៅថ្ងៃកើតហេតុ ហើយបានធ្វើដំណើរជាមួយអ្នកស្លាប់ គឺលោក លិម គិមយ៉ា នៅថ្ងៃកើតហេតុនោះ ប៉ូលីសបានចេញដីកាចាប់មុននេះ។ អ្នកស៊ើបអង្កេតកំពុងស្ថិតក្នុងដំណើរការបញ្ជូនសំណុំរឿងនេះទៅនាយកដ្ឋានកិច្ចការបរទេសនៃប៉ូលិសភូមិន្ទថៃ ដើម្បីស្នើសុំសេចក្តីជូនដំណឹងពណ៌ក្រហមជាមួយប៉ូលីស Interpol ដើម្បីតាមដាន និងកាត់ទោស»។
ស្នងការនគរបាលក្រុងបាងកក លោក ស្យាម ប៊ុនស៊ុម (Siam Bunsom) បានប្រាប់សារព័ត៌មានក្នុងស្រុកកាលពីថ្ងៃទី១៤ ខែមករានេះថា ករណីឃាតកម្មលើ លោក លិម គិមយ៉ា អាជ្ញាធរថៃនឹងតាមដានយ៉ាងយកចិត្តទុកដាក់ ដើម្បីបញ្ជាក់ថា នរណានៅពីខាងក្រោយឃាតកម្មនេះពិតប្រាកដ។
លោកបន្តថា បច្ចុប្បន្នអាជ្ញាធរថៃ កំពុងដុតដៃតាមប្រមាញ់ចាប់អ្នកពាក់ព័ន្ធជាបន្តបន្ទាប់ រួមទាំងជនជាតិថៃ ដែលបាននាំឃាតករគេចខ្លួនទៅប្រទេសកម្ពុជា។
លោកថា៖ «ឥលូវនេះលទ្ធផលដែលពិនិត្យបានទទួលបានរួចរាល់ហើយ ក៏នឹងខាងស៊ើបអង្កេតជួយវិភាគមើលថាអ្នកណាពាក់ព័ន្ធ ហើយមានការជាប់ពាក់ព័ន្ធនឹងនរណាខ្លះ ប្រហែលមានគុណចំពោះគេខ្លាំងណាស់បានជាគេយល់ព្រមប្រព្រឹត្ត ហើយអ្នកដែលមានគុណលើគេក៏នៅមិនទាន់ដឹងថាជានរណា ព្រោះគេមិនបានប្រាប់ប៉ុន្តែគាត់ត្រូវតេសងគុណ តាមអ្វីដែលអ្នកសារព័ត៌មានដឹងនោះគឺកំពុងដំណើរការស៊ើបអង្កេតហើយ ហើយពេលនេះក៏បានចេញដីកាក្រហមរួចរាល់ហើយ កំពុងស្ថិតក្នុងដំណើរការស៊ើបអង្កេត»។
តំណាងរាស្រ្តគណបក្សសង្គ្រោះជាតិ លោក អ៊ុំ សំអាន និយាយប្រាប់វីអូឌីនៅថ្ងៃទី១៥ ខែមករានេះថា លោកគាំទ្រចំពោះចំណាត់ការរបស់តុលាការថៃ។
បន្ថែមពីនេះ លោកជំរុញឱ្យរដ្ឋាភិបាលគ្រួសារហ៊ុន ត្រូវចាប់បញ្ជូនជនសង្ស័យទាំងពីរនោះ ឱ្យភាគីថៃ និងប៉ូលីសអន្តរជាតិ ដើម្បីឈានទៅផ្តន្ទាទោស អ្នករួមគំនិត និងរៀបចំគម្រោងធ្វើឃាតលើលោក លិម គិមយ៉ា លើទឹកដីថៃនេះ។
លោកថា៖ «ការដឹកនាំរបស់គ្រួសារហ៊ុនហ្នឹង គឺប្រព្រឹត្តិតែបទឧក្រិដ្ឋទៅលើតែពលរដ្ឋឯងទៅលើមន្ត្រីបក្សប្រឆាំង ហើយព្យាយាមការពារជនដៃដល់ និងជនផ្សំគំនិតដែលខ្លួនបញ្ជាហ្នឹង មិនព្រមចាប់ពួកគេមកផ្តន្ទាទោសទៅតាមផ្លូវច្បាប់អីក៏មិនព្រមសហការជាមួយថៃ ដើម្បីចាប់អ្នកទាំងអស់ហ្នឹងទៅផ្តន្ទាទោសនៅតុលាការយុត្តិធម៌ថៃ»។
សម្រាប់ លោក អ៊ុំ សំអាន បើអំពើឃាតកម្មនេះ មិនត្រូវបានបោសសម្អាតក្រុមឧក្រិដ្ឋជនទេ វានឹងបង្កការរងគ្រោះដល់ប្រជាពលរដ្ឋ និងមន្ត្រីនៅក្នុងជួរបក្សកាន់អំណាចផងដែរ ខណៈប្រព័ន្ធតុលាការបច្ចុប្បន្ន មិនបានការពារយុត្តិធម៌សង្គមនោះ។
លោកបន្តថា ការសម្លាប់មនុស្សតាមទំនើងចិត្ត វាឆ្លុះបញ្ចាំងថាកម្ពុជាកំពុងរអិលជើងកាន់តែជ្រៅក្នុងរបបផ្តាច់ការដែលបង្កការគំរាមកំហែងដល់ជីវភាពរស់នៅរបស់ពលរដ្ឋ រួមទាំងមន្ត្រីរាជការទូទាំងប្រទេស។
លោកថា៖ «រឿងហ្នឹងវាប៉ះពាល់ទៅដល់ឆ្នាំងបាយរបស់ប្រជាពលរដ្ឋ ហើយមួយទៀតវាប៉ះពាល់ដល់មន្ត្រីបក្សប្រជាជនហ្នឹង ជាពិសេសអ្នកដែលចុះចូលហ្នឹង វាអាចមានវាសនាដូចអាប្រេស៊ីល គេអាចយកវាឱ្យក្រពើស៊ី ឬក៏បាត់ខ្លួនទៅ គេបំបាត់ភស្ដុតាង ដើម្បីកុំឲ្យជំពាក់វាក់វិនទៅនឹងមេដឹកនាំប្រទេស នឹងគេអាចសម្លាប់បំបិទមាត់ វាអាចមានជោគវាសនាអញ្ចឹងឯង អ្នកដែលធ្វើការបម្រើឱ្យត្រកូលហ៊ុនដែលភ្លាត់ស្នៀត ឬបែកការ»។
បន្ថែមពីនេះ តំណាងបក្សសង្គ្រោះជាតិ លោក អ៊ុំ សំអាន ក៏បានបង្ហោះសារដែរថា ឈ្មោះ ពេជ្រ គឹមស្រ៊ិន និង លី រតនៈរស្មី កំពុងលាក់ខ្លួននៅវីឡាមួយក្បែរទួលក្រសាំង (ជិតផ្ទះលោក ហ៊ុន សែន) ដោយមានបំរាមហាមមិនឱ្យដើរចេញក្រៅ។
ប្រធានចលនាជាតិតស៊ូ លោក សម រង្ស៊ី បានបង្ហោះសារលើហ្វេសប៊ុករបស់លោកនៅថ្ងៃទី១៥ មករានេះដោយនិយាយថា ឃាតករ និងអ្នកជួយលាក់បាំងឃាតករ មានទោសដូចគ្នា។ បើមេដឹកនាំប្រទេសណា ជួយការពារឃាតករ មេដឹកនាំប្រទេសនោះ ជាមេភេរវករ។
ជុំវិញរឿងនេះ អ្នកនាំពាក្យក្រសួងយុត្តិធម៌ លោក សេង ឌីណា បានប្រាប់វីអូឌីយ៉ាងខ្លីថា តាមច្បាប់កម្ពុជាមិនអាចចាប់បញ្ជូនជនសង្ស័យទៅឱ្យតុលាការបរទេសកាត់ទោសនោះទេ។
ម្យ៉ាងវិញទៀត លោកបានបដិសេធថា តុលាការថៃក៏មិនទាន់បញ្ជូនដីកាចាប់ខ្លួនឱ្យអាជ្ញាធរកម្ពុជានៅឡើយទេ ដូច្នេះត្រូវរកនិតីវិធីសិន ថាតើត្រូវដោះស្រាយយ៉ាងម៉េច។
លោកថា៖ «ជាគោលការណ៍ច្បាប់រដ្ឋធម្មនុញ្ញរបស់យើង រដ្ឋធម្មនុញ្ញនៃព្រះរាជាណាចក្រកម្ពុជា ហាមដាច់ខាតមិនឲ្យមានការចាប់បញ្ជូនពលរដ្ឋខ្មែរណាមួយ ក្នុងករណីណាក៏ដោយ ពលរដ្ឋខ្មែរមិនអាចជាកម្មវត្ថុនៃការចាប់ខ្លួនបញ្ជូនទៅបរទេសទេ នេះគឺជាអ្វីដែលមានចែងក្នុងរដ្ឋធម្មនុញ្ញ និងជាគោលការណ៍ច្បាប់។ ខ្ញុំអាចឆ្លើយបានប៉ុណ្ណឹង»។
ដោយឡែក ប្រធានអង្គការប្រជាធិបតេយ្យប្រចាំនៅប្រទេសអូស្រ្តាលី លោក ស៊ឹង សែនករុណា និយាយថា ការចេញដីការបស់តុលាការថៃនេះ ឆ្លុះបញ្ចាំងថាកម្ពុជាជាមេខ្លោងនៃឃាតកម្មបាញ់សម្លាប់មនុស្ស។
លោកបន្តថា មេដឹកនាំកម្ពុជាត្រូវសហការជាមួយភាគីថៃចាប់ខ្លួនជនសង្ស័យទាំងពីរនាក់ យកទៅផ្តន្ទាទោសតាមច្បាប់ និងដើម្បីរួចផុតពីការរិះគន់ថារដ្ឋាភិបាលមានជាប់ពាក់ព័ន្ធករណីបាញ់សម្លាប់នេះ។
យ៉ាងណា លោកថា បើរដ្ឋាភិបាលកម្ពុជាសម្ងំស្ងៀមមិនមានចំណាត់ការចាប់ខ្លួនជនសង្ស័យទាំងពីរនាក់ដែលភាគីថៃបង្ហាញមុខសញ្ញាយ៉ាងច្បាស់លាស់នេះ ឆ្លុះបញ្ចាំងថាមេដឹកនាំកំពុងលាក់បាំងការពិត។
លោកថា៖ «ក្នុងករណីនេះ សមត្ថកិច្ចកម្ពុជាគួរតែមានការសហការ ហើយស្វែងរកការចាប់ខ្លួនលោក លី រតនៈរស្មី ដើម្បីឱ្យសមត្ថកិច្ចថៃគេអនុវត្តនីតិវិធីទៅតាមផ្លូវច្បាប់ ដើម្បីរកនូវយុត្តិធម៌ដល់លោក លិម គិមយ៉ា ដែលបានស្លាប់ ហើយក៏រកអ្នកដែលបញ្ជាពីក្រោយខ្នងផងដែរ ចឹងយើងជឿជាក់ថាសំណុំរឿងហ្នឹងមិនត្រឹមចប់តែលើករណីចេញដីកាចាប់ខ្លួនលោក លី រតនៈរស្មី ទេអាចនឹងមានពាក់ព័ន្ធអ្នកពីក្រោយខ្នងដែលបញ្ជាធំជាងហ្នឹងជាច្រើននាក់ទៀត ពីព្រោះករណីនេះខ្ញុំយល់ថា វាជាការធ្វើឡើងតែរៀបចំជាប្រព័ន្ធ»។
យ៉ាងណាលោក ស៊ឹង សែនករុណា ជំរុញឱ្យមេដឹកនាំកម្ពុជាត្រូវសហការជាមួយថៃ តាមចាប់ខ្លួនជនសង្ស័យទាំងពីរនាក់ដែលភាគីថៃបង្ហាញមុខសញ្ញាថាជាជនជាតិខ្មែរ ដើម្បីបញ្ជាក់ពីភាពស្អាតស្អំ។
កាលពីថ្ងៃ៧ ខែមករា ឆ្នាំ២០២៥ តំណាងរាស្រ្តបក្សសង្រ្គោះជាតិ លោក លិម គិមយ៉ា ត្រូវបានឃាតករបាញ់ប្រហារនៅក្បែរទីតាំងវត្ត Bowonniwet Vihara នៃទីក្រុងបាងក ប្រទេសថៃ។ លោក លិម គិមយ៉ា ដែលមានវ័យ ៧៣ឆ្នាំ បានស្លាប់ភ្លាមនៅនឹងកន្លែងកើតហេតុ ក្រោយរងការបាញ់ប្រហារចំនួន៣គ្រាប់។
យ៉ាងក្រុមអ្នកតស៊ូមតិហៅកាត់ថា CAT បាននិយាយក្នុងសេចក្តីថ្លែងការណ៍ចុះថ្ងៃទី១៣ ខែមករា ដោយចាត់ទុកការបាញ់សម្លាប់លោក លិម គិមយ៉ា ថាជាឃាតកម្មនយោបាយ មានទម្រង់ឃោរឃៅ និង ជាអំពើមានការរៀបចំទុកជាមុន ដោយក្រុមឃាតករ។ ក្រៅពីការថ្កោលទោស CAT ក៏បានអំពាវនាវដល់រដ្ឋាភិបាលកម្ពុជា សហការបញ្ជូនជនជាតិខ្មែរដែលជាជនសង្ស័យក្នុងដីកាចាប់ខ្លួន តាមការស្នើសុំរបស់សមត្ថកិច្ចថៃ ដែលជនសង្ស័យមានឈ្មោះ ពេជ្រ គឹមស្រ៊ិន និង លី រតនៈរស្មី ដើម្បីរកការពិត។
CAT សំអាងថា ខ្លួនទទួលស្គាល់អំពីឯករាជ្យភាព និងអធិបតេយ្យភាពនៃប្រទេសកម្ពុជា ប៉ុន្តែ កន្លងទៅប្រទេសកម្ពុជា ក៏ធ្លាប់បញ្ជូនពលរដ្ឋខ្មែរទៅឱ្យអាជ្ញាធរវៀតណាមផងដែរ។ ជាឧទាហរណ៍ ក្នុងខែកក្កដា ឆ្នាំ២០០៧ ព្រះតេជគុណ ទឹម សាខន ជាព្រះចៅអធិការវត្តភ្នំដិនខាងជើង ក្នុងស្រុកគិរីវង់ ខេត្តតាកែវ ត្រូវបានអាជ្ញាធរកម្ពុជាចាប់ផ្សឹក និងបញ្ជូនទៅឱ្យអាជ្ញាធរវៀតណាម ដោយសារតែព្រះអង្គចែកចាយព័ត៌មានអំពីខ្មែរកម្ពុជាក្រោម៕
