ក្រុមអតិថិជនទិញអចលនទ្រព្យនៅក្រុមហ៊ុនឧកញ៉ា ឡេង ណាវ៉ាត្រា ជាង៣ឆ្នាំតែក្រុមហ៊ុនគ្មានប្លង់ឱ្យ គ្រោងចេញតវ៉ានៅចុងសប្តាហ៍នេះ ជំទាស់នឹងវិធានដោះដូរដី និងផ្ទះរបស់ក្រុមហ៊ុន ក្រោយសង់ផ្ទះគ្មានស្តង់ដារឱ្យពួកគេ និងបន្តអូសបន្លាយការសាងសង់ក្នុងភាពមិនច្បាស់លាស់។
គម្រោងតវ៉ារបស់ក្រុមអតិថិជននេះ ក្រោយឧកញ៉ា ឡេង ណាវ៉ាត្រា បានចេញមកអះអាងថា ខ្លួនព្យាយាមសាងសង់ផ្ទះដែលកំពុងជាប់គាំងបានប្រមាណជាង ២ពាន់ផ្ទះ គិតត្រឹមថ្ងៃទី១៥ ខែមករានេះ តែអ្នករងគ្រោះថា ផ្ទះដែលជាប់គាំងមានប្រមាណជិត២ម៉ឺនផ្ទះ ដោយមិនដឹងបញ្ចប់ការសាងសង់នៅពេលណាទេ។
អតិថិជនម្នាក់ លោក រ៉ា វុធ ប្រាប់VODនៅថ្ងៃទី១៦ ខែមករា នេះថា ការចេញតវ៉ានេះ គ្រោងធ្វើឡើងនៅទីតាំងបុរីឡេង ណាវ៉ាត្រា គម្រោង៦A ដែលមានអ្នកចួលរួមប្រមាណ៥០នាក់ នាថ្ងៃទី១៩ ខែមករា ចុងសប្តាហ៍នេះ ខណៈអ្នកខ្លះបារម្ភពីសុវត្ថិភាពទើបមិនហ៊ានតវ៉ា។
ប្រភពបន្តថា គោលបំណងរបស់អតិដិជន គឺទាមទារឱ្យក្រុមហ៊ុនរកដំណោះស្រាយ ក្រោយពួកគេមួយចំនួនព្រមទទួលយកដំណោះស្រាយដោះដូរដី និងផ្ទះ តែបានត្រឹមខកបំណង ព្រោះដីឡូត៍មិនទាន់ត្រូវបានចាក់ដីបំពេញ ហើយផ្ទះក៏មិនបានសាងសង់តាមការសន្យា និងគ្មានស្តង់ដារថែមទៀត។
លោកថា៖ «ការកំណត់ទំហំដីហ្នឹងវាអត់បាន ៥ម៉ែត្រ (គុណនឹង) ១៧ម៉ែត្រ មានន័យថា បាន៤(ម៉ែត្រ)ជាង ឬក៏៤(ម៉ែត្រ)កន្លះអ៊ីចឹងទៅ។ ករណីទី២ ដាក់ប្រព័ន្ធលូ! ប្រព័ន្ធលូជាទូទៅយើងត្រូវដាក់នៅខាងក្រៅបរិវេណ ឬក៏ទំហំដីរបស់ម្ចាស់សាមីខ្លួន ឬក៏ម្ចាស់អតិថិជន តែអាលូហ្នឹងគឺដាក់ចូលដីរបស់ម្ចាស់អតិថិជន វាត្រូវចាំបាច់ដាក់នៅខាងក្រៅ តែអ្វីដែលក្រុមហ៊ុនធ្វើគឺគាត់ជីកលូ ស្ថិតក្នុងទំហំដីរបស់ម្ចាស់អតិថិជន ម្ចាស់ដី»។
បន្ថែមលើនេះ អ្វីដែលលោកចង់បាន គឺឱ្យក្រុមហ៊ុនត្រូវប៉ះប៉ូវឱ្យអតិថិជនគឺ ត្រូវសងមួយខែ ១០០ដុល្លារតាមកិច្ចសន្យាកំណត់។
លោក រ៉ា វុធ បានចំណាយលុយជិត៤ម៉ឹនដុល្លារទិញដី និងផ្ទះ នៅបុរីឡេង ណាវ៉ាត្រា គម្រោង៦A តែក្រុមហ៊ុនពន្យាពេលសាងសង់ជាង៣ឆ្នាំហើយ។
ឧកញ៉ា ឡេង ណាវ៉ាត្រា បានឱ្យដឹងថា គិតត្រឹមថ្ងៃទី១៥ ខែមករា ឆ្នាំ២០២៥នេះ គម្រោងបុរី ឡេង ណាវ៉ាត្រា 6A បានដោះស្រាយបញ្ចប់ផ្ទះចំនួនជាង ២៥០០ផ្ទះ ហើយបណ្ណកម្មសិទ្ធិក្រុមហ៊ុន បានតម្កល់នៅក្រសួងស្ទើរទាំងស្រុង និងបន្តដោះស្រាយជាបន្តបន្ទាប់។
បើតាមលោក រ៉ា វុធ ផ្ទះជាង២ពាន់ខ្នងដែលលោក ឡេង ណាវាត្រា ថា សង់ហើយនោះ ជាចំនួនតិចតួចប៉ុណ្ណោះ ព្រោះផ្ទះជាប់គាំងការសាងសង់ជិត២ម៉ឹនខ្នង ហើយផ្ទះសង់រួចនោះមានការអូសបន្លាយពេលសាងសង់ខ្លះដល់៥ឆ្នាំឯណោះ។
លោកថា៖ «ផ្ទះ២ពាន់ជាងហ្នឹង ធ្វើកំឡុង៣ទៅ៤ឆ្នាំហើយ ខ្លះរហូតដល់៥ឆ្នាំ។ ចឹង! វាជាបញ្ហាទីតាំងខ្លះគឺគាំងស្ដូក! មានន័យថា សូម្បីតែជាងម្នាក់ ឬក៏ទីតាំងខ្លះត្រូវចាក់ដីបំពេញក៏អត់ចាក់ដែរ។ កាលពីមុនមក ពួកគាត់យោគយល់ថា ដោយសារភាគីខាងបុរីជួបបញ្ហានេះបញ្ហានោះ សុខចិត្តដោះដូរ! ហើយការដោះដូរហ្នឹង មិនមែនដោះដូរស្មើទៀត ដោះដូរ ថែមលុយឲ្យក្រុមហ៊ុនទៀត។ អ៊ីចឹងគាត់សុខចិត្តលះបង់ពីទុក្ខវេទនា ដើម្បីឲ្យជួយសម្រាល ភាគីខាងក្រុមហ៊ុន ឲ្យគាត់ជួយសម្រាលគាត់ដែរ។ តែលទ្ធផលចុងក្រោយ ការសម្រាលរបស់ភាគីខាងក្រុមហ៊ុន គឺកាន់តែស្រួលតែភាគីអតិថិជនកាន់តែលំបាកទៅៗ »។
ជុំវិញរឿងនេះ សហស្ថាបនិកគណបក្សកែទម្រង់កម្ពុជា លោក អ៊ូ ច័ន្ទរ័ត្ន និយាយថា ក្នុងជម្លោះទិញដី និងផ្ទះនេះ បើភាគីណាមួយរំលោភកិច្ចសន្យាត្រូវតែទទួលខុសត្រូវតាមផ្លូវច្បាប់ ហើយរដ្ឋាភិបាលក៏មានតួនាទីចេញមុខអន្តរាគមន៍ដែរ ព្រោះខ្លួនជាអ្នកផ្តល់អាជ្ញាបណ្ណដល់ក្រុមហ៊ុនទាំងនោះ។
លោកសង្កត់ធ្ងន់ថា ជាទូទៅ ពលរដ្ឋខ្មែរហាក់មិនមានជំនឿលើប្រព័ន្ធតុលាការទេ ទើបជ្រើសរើសផ្លួវងើបតវ៉ាបែបនេះ។
លោកថា៖ «អ្នករងគ្រោះ គឺប្រជាពលរដ្ឋដែលលោកជំពាក់បំណុលគេហើយអ្នកខ្លះហ្នឹងក៏ខ្ចីបុលគេយកមកទិញអ្នកខ្លះក៏លក់ កេរ្តិ៍អាករ ដើម្បីយកមកទិញស្នាក់នៅ។ ម្ល៉ោះហើយវាធ្វើឲ្យជីវភាពពួកគាត់នោះកាន់តែលំបាកដុនដាបទៅដុនដាបទៅហើយ។ ធ្វើឱ្យប្រជាពលរដ្ឋដុនដាបទៅ! អ្នកដែលមានសិទ្ធិអំណាចក្នុងការធ្វើអន្តរាគមន៍ឲ្យជួយសង្គ្រោះដល់ប្រជាពលរដ្ឋមានតែ រាជរដ្ឋាភិបាលហ្នឹងហើយ បើរដ្ឋាភិបាលមិនទទួលខុសត្រូវអាហ្នឹងយើងមិនដឹងថាយ៉ាងម៉េច»។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ជំរុញឱ្យភាគី ពាក់ព័ន្ធដោះស្រាយករណីនេះ ឱ្យភាគីអតិថិជន និងក្រុមហ៊ុន អាចទទួលយកបាន តែបើបន្តអូសបន្លាយ នោះពលរដ្ឋនឹងកាន់តែរងគ្រោះ ហើយរដ្ឋាភិបាលនឹងរងបន្ទុកកាន់តែធំថែមទៀត។
លោកថា៖ « ខ្ញុំយល់ថា បញ្ហានេះ បើមានការសម្របសម្រួលពីអាជ្ញាធរ និងរដ្ឋាភិបាលទៅលើបញ្ហានេះឲ្យមានដំណោះស្រាយសមស្រប ឬក៏ដំណោះស្រាយដែលអាចទទួលយកបានទាំងអស់គ្នាវាកាន់តែល្អប្រសើរឡើង បើមានបញ្ហាធំ គឺបន្ទុកត្រូវ រដ្ឋាភិបាលត្រូវជួយសម្របសម្រួលដោះស្រាយដដែល»។
ជុំវិញរឿងនេះ កាលពីខែកុម្ភៈ ឆ្នាំ២០២៤ ប្រធានគណបក្សកាន់អំណាច លោក ហ៊ុន សែន ធ្លាប់បញ្ជាក់លើហ្វេសប៊ុកខ្លួនចង់ឱ្យឧកញ៉ា ឡេង ណាវ៉ាត្រា ឈរឈ្មោះជាបេក្ខភាពប្រធានសមាគមសិល្បករខ្មែរ តែដោយសារឧកញ៉ារូបនេះ មានរឿងអាស្រូវបោកអតិថិជនករណីលក់ដី និងផ្ទះ លោក ហ៊ុន សែន ក៏ប្តូរចិត្តវិញ។
ក្រុមហ៊ុនឧកញ៉ា ឡេង ណាវ៉ាត្រា ធ្លាប់បានទទួលសិទ្ធិអភិវឌ្ឍន៍នៅតំបន់ភ្នំតាម៉ៅ និងបានកាប់បំផ្លាញព្រៃឈើសេសសល់ចុងក្រោយនៅតំបន់នោះ ក្រោយមកប្រជាពលរដ្ឋបានទាមទារឱ្យអតីតនាយករដ្ឋមន្រ្តីលោក ហ៊ុន សែន កាត់ទោសម្ចាស់ក្រុមហ៊ុននោះដាក់ពន្ធនាគារតាមផ្លូវច្បាប់។
ប៉ុន្តែលោក ហ៊ុន សែន ពេលនោះថ្លែងការពារថា បើចង់ចាប់ម្ចាស់ក្រុមហ៊ុននោះពន្ធនាគារ គឺមានតែចាប់រូបលោកដាក់គុកដែរ។
លោកថា៖ «ត្រូវកាត់ទោសអ្នកបំផ្លាញព្រៃអភិរក្សភ្នំតាម៉ៅ និងអ្នកស៊ីញេផ្តល់សិទ្ធិ! អើនាងអើយ ទៅកាត់ទោស កាត់ទោសអញម៉ង!»។
ព្រះមហាក្សត្រកម្ពុជា បានចេញព្រះរាជ្យក្រឹត្យស្តីពីគោរម្យងាឧកញ៉ានៅថ្ងៃទី២៣ ខែតុលា ឆ្នាំ២០២៤នេះ តម្រូវឱ្យលោកអ្នកឧកញ៉ា អ្នកឧកញ៉ា និងឧកញ៉ា ត្រូវគោរពរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តនានារបស់ព្រះរាជាណាចក្រកម្ពុជា ប្រកាន់ខ្ជាប់នូវសីលធម៌ល្អប្រកបមុខរបរស្របច្បាប់ និងចៀសវាងសកម្មភាពណា ដែលធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់គោរមងារឧកញ៉ា។
ប៉ុន្តែបើមើលករណីឧកញ៉ា ឡេង ណាវ៉ាត្រា បំពានកិច្ចសន្យាទិញលក់ផ្ទះច្រើនឆ្នាំទៅនេះ គ្មានចំណាត់ការច្បាប់ទេ ដែលជាមន្ទិលថា មានលោក ហ៊ុន សែន ជាខ្នងបង្អែក ទើបធ្វើឱ្យចំណាត់ការផ្លូវច្បាប់ត្រូវជាប់គាំងច្រើនឆ្នាំបែបនេះ៕
