ខ្មែរនៅ​អាមេរិក​ធ្វើ​បាតុកម្ម​ទាម​ទារ​ឱ្យគ្រួ​សារ​ហ៊ុន​ការ​ពារ​កោះ​គុត​និង​យុត្តិ​ធម៌ លោក លិម គិម​យ៉ា

ប្រជាពលរដ្ឋ​ខ្មែររស់នៅសហរដ្ឋអាមេរិក និង​​អ្នក​តំណាង​រាស្ត្រ​គណបក្ស​សង្គ្រោះជាតិ បាន​ប្រមូល​ផ្តុំ​គ្នា​ធ្វើ​បាតុកម្ម​ ផ្ញើសារ​ទៅ​មេដឹកនាំ​កម្ពុជា គ្រួសា​រហ៊ុន​ជា​ថ្មី​ទៀត ឱ្យ​ប្តឹង​ករណី​កោះ​គុត​ទៅ​តុលាការ​អន្តរជាតិ​(ICJ) ដើម្បី​ការ​ពារ​កោះ​គុត ដែល​ថៃ​កំពុង​គ្រប់​គ្រង​ទាំង​ស្រុង។

លោក អ៊ុំ​ សំអាន តំណាង​រាស្ត្រគណបក្សសង្គ្រោះជាតិ ដែល​បាន​ចូល​រួម​ធ្វើ​បាតុកម្ម បាន​និយាយ​ថា ការ​ប្រើ​យន្ត​ការ​អន្តរ​ជាតិ ដើម្បីទាមទារ​ចំណែក​កោះគុត ជាជម្រើសដ៏​ត្រឹម​ត្រូវ​មួយ ធ្វើ​ឱ្យ​ពលរដ្ឋ​គ្រប់​ភាគី​អាច​ទទួល​យក​បាន ក្រោយ​តុលាការអន្តរជាតិសម្រេចបែបណានោះ មិន​មែន​ជា​ការ​ដុតឱ្យមានសង្គ្រាម​ជាមួយ​ប្រទេស​ជិត​ខាង​ដូច​ដែល​បក្សកាន់អំណាច​លើក​ឡើង​នោះ​ទេ។

លោកថា៖ «អនុសញ្ញា​អង្គការ​សហប្រជាជាតិ​ឆ្នាំ​១៩៨២ ថៃ​ខ្លាច​អាហ្នឹង​បំផុត​ថា​បើ​សិន​ជា​កម្ពុជា​ប្តឹង​ករណី​កោះគុត​​ នៅ​តំបន់​ត្រួត​ស៊ីគ្នា​ទៅ​តុលាការ​អន្តរជាតិ គឺ​ថៃ​ចប់​ហើយ​ យើង​អភ័ព្វ​ដែល​មាន​មេដឹកនាំ​មិន​ស្នេហា​ជាតិ​ដឹង​ថា ថៃ​ខ្លាច​តុលាការ​អន្តរ​ជាតិ​ហើយ កម្ពុជា​មាន​សិទ្ធិ​ទាម​ទារ​យក​កោះគុត​មក​វិញ តាម​រយៈ​តុលាការ​អន្តរ​ជាតិ​ហើយ តំបន់​ត្រួត​ស៊ីគ្នា​៣០​ពាន់​គីឡូ​ម៉ែត្រ​ការ៉េ​មក​វិញ​ហើយ ប៉ុន្តែ​មិន​ព្រម​ប្តឹង​ថៃ​ទៅ​តុលាការ​អន្តរ​ជាតិ»។

ការ​ទាមទារ​ពីសំណាក់​ខ្មែរ​នៅ​អាមេរិក​នេះ ដូច​គ្នានឹ​ង​ករណី​ធ្វើឡើង​នៅ​ប្រទេស​ជប៉ុន កូរ៉េ​ខាង​ត្បូង និង​ប្រទេស​អូស្ត្រាលី​ដែរ ខណៈ​មេដឹក​នាំ​ខ្មែរ គ្រួសារ​ហ៊ុន​នៅរក្សាភាពស្ងៀមស្ងាត់​ មិន​ប្តឹង​ករណី​កោះគុត​នេះ​ទៅតុលាការអន្តរជាតិ ដើម្បីការពារបូរណភាពទឹកដី។

បាតុកម្មនេះ ធ្វើឡើងនៅទីក្រុងឡងប៊ិច រដ្ឋកាលីហ្វ័រញ៉ា សហរដ្ឋអាមេរិក នាថ្ងៃទី១៩ ខែ​មករា​នេះ ដែល​មាន​អ្នក​ចូល​រួម​ប្រមាណ​ជា ២០០​នាក់។

មេដឹ​កនាំបក្សកាន់អំណាច លោក ហ៊ុន សែន ធ្លាប់​ចោទ​ក្រុម​ប្រឆាំង​ថា ការ​បំផុស​រឿង​បាត់​បង់​ទឹក​ដី​ទៅ​ប្រទេស​វៀត​ណាម និង​ថៃ​នេះ ជា​ការ​បញ្ឆេះ​កំហឹង​ឱ្យ​មាន​សង្គ្រាម​ជាមួយ​ប្រទេស​ជិត​ខាង។

យ៉ាងណា លោក ហ៊ុន សែន រងការ​ចោទ​ថា ការក្តោប​អំណាច​ជាង​៤ទសវត្សរ៍​ទៅ​នេះ បាន​គំរាម​រំលាយ​របប​រាជា​និយម​អាស្រ័យ​រដ្ឋធម្មនុញ្ញ​ចោល បើ​ព្រះមហាក្សត្រមិន​ព្រម​ឡាយ​ព្រះហស្តលេខា ធ្វើ​ឱ្យព្រំដែន​ខុសច្បាប់​រស់​នៅឡើ​ង​វិញ ដើម្បីបម្រើមហិច្ឆតាវៀតណាមលេបទឹកដី។

មាត្រា៤៤០​នៃក្រមព្រហ្មទណ្ឌកម្ពុជា ចែងថា អ្នកធ្វើឱ្យបាត់បង់ទឹក​ដី​ទាំង​ស្រុង ឬ​មួយ​ផ្នែក ជា​ទង្វើ​ក្បត់​ជាតិ ត្រូ​វផ្តន្ទាទោស​ដាក់​ពន្ធនាគារអស់មួយជីវិត។

យ៉ាង​ណាក្រុម​អ្នកធ្វើបាតុកម្ម ក្រៅពីរំឭកមេដឹកនាំគ្រួសារហ៊ុនឱ្យការពារទឹកដី តាម​យន្ត​ការ​អន្តរ​ជាតិ ពួក​គេក៏បាន​ទាមទារ​ឱ្យ លោក ហ៊ុន ម៉ាណែត លុប​ចោល​អនុ​សារណៈ​យោគ​យល់​ឆ្នាំ​២០០១ (MOU 2001 ឬ MOU44) ដើម្បី​រួម​គ្នា​ការ​ពារ​កោះគុត កោះ​ខ្មែរ និង​ទាមទារ​ឱ្យ​ស្វែង​រក​យុត្តិ​ធម៌​លើ​ឃាតកម្ម​លោក លិម គិមយ៉ា ផងដែរ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ