សហគមន៍​ដីធ្លីខេត្តកោះកុង​ជំរុញឱ្យរដ្ឋផ្ដល់ដី​អាស្រ័យផល​ក្រោយដី​ពួកគេធ្លាក់​ក្នុង​ដៃ​ឧកញ៉ា​ជិត​២០​ឆ្នាំ

អ្នកមាន​ជម្លោះ​ដីធ្លី ជំរុញ​ឱ្យ​អាជ្ញាធរ​ខេត្ត​កោះកុង ផ្ដល់​ដី​សម្បទាន​ឱ្យ​ពួក​គាត់​ជិត ២០០គ្រួសារ តាម​ការ​ណែនាំ​រប​ស់​ក្រសួង​រៀបចំ​ដែនដី ដើម្បី​ស្ដារវិបត្តិ​គ្រួសារ ក្រោយ​ក្រុម​ហ៊ុន ឧកញ៉ា ហេង ហ៊ុយ រំលោភ​យក​ជិ​ត​២​០ឆ្នាំទៅនេះ។

ការជំរុញនេះ ធ្វើឡើងតាមរយៈប្រមូលផ្ដុំគ្នាមុខ​សាលាខេ​ត្ត​កោះកុង កាលពីថ្ងៃទី២១ ខែមករា ដែល​មាន​អ្នក​ចូល​រួម​ប្រមាណ​ជា​៦០នាក់ ។ ពួកគេ​លើក​បដា និងដាក់ញត្តិ​​ស្នើ​ឱ្យ​រដ្ឋបាល​ខេត្តកោះកុង ពន្លឿន​ការ​ដោះ​​ស្រាយ​ដីសម្បទាន​សង្គមកិច្ច ​តាមដែលក្រសួងដែនដីធ្លាប់បានសន្យា ដើម្បីបញ្ចប់វិវាទរ៉ៃរ៉ានេះ ។

តំណាងសហគមន៍ អ្នកស្រី ដេត ​ហួរ ប្រាប់វីអូឌី នៅថ្ងៃទី២២ ខែមករា​​នេះថា គោលបំណងដាក់ញត្តិ គឺ​ដើម្បី​ស្នើ​ឱ្យក្រសួង​ពន្លឿន​ដោះស្រាយ​ដីសម្បទានសង្គមកិច្ច  តាមលក្ខខណ្ឌផ្ដល់​ដី​ចំនួន ០៣​ហិកតា​ក្នុង​មួយ​គ្រួសារ ដោយគ្មានការសម្ភាសន៍ ជាសំ​ណងថវិកា​ចំនួន ប្រាំពីរពាន់ដុល្លារក្នុងមួយគ្រួសារ រួម​ទាំង​ទម្លាក់​បទ​ចោទ​លើ​តំណាង​សហគមន៍។

អ្នកស្រីបន្តថាបច្ចុប្បន្ន ពលរដ្ឋសហគមន៍​១៩៧ កំពុងមានទុក្ខ​ដ៏រាំរ៉ៃ​ដោយ​គ្មាន​ដី​អាស្រ័យ​ផល សមាជិក​ពួក​គាត់​ត្រូវ​បាត់​បង់​ជីវិត​ដោយ​សារ​គ្មាន​ប្រាក់​ព្យាបាល​ជំងឺ គ្រួសារខ្លះ​ត្រូវ​បង្ខំចិត្ត​ឱ្យកូន​ឈប់​រៀន ចំណាក​ស្រុក ព្រោះ​គ្មាន​លទ្ធភាព និងដើម្បីដោះបំណុល ។

អ្នកស្រីថា៖ «ពួកខ្ញុំតំណាង​ព្រម​ទាំង​សមាជិក​១៩៧​មាន​ផល​វិបាក​ខ្លាំង​គាត់​ជំពាក់​បំណុល​ធនាគារ​បាត់​ប្រាក់​ចំណូល​ហើយ​និង​កូន​ៗ​​បោះបង់​ការ​សិក្សា​ឈាន​ដល់​ជាប់​ពន្ធនាគារ​ ដូច​ខ្ញុំ​ផ្ទាល់​ហ្នឹង ខ្ញុំពិ​បាក​ខ្លាំង​ ជាប់​ពន្ធនា​គារ បែក​បាក់​ក្រុម​គ្រួសារ​ បាត់​បង់​ប្រាក់​ចំណូល កូន​​បោះ​បង់​ការ​សិក្សា​ម្តាយ​ជាប់​ពន្ធនាគារ ហើយ​រក​អី​មិន​បាន​ ផល​វិបាក​របស់​ពួក​យើង គឺ​គ្រប់​បែប​គ្រប់​យ៉ាង​ហើយ​ខ្លះ​ទៀត​ក៏​គាត់​មាន​ជំងឺ​ឈឺ​រហូត​ដល់​ស្លាប់​ទៅ ដោយ​សារ​តែ​គាត់​មិន​បាន​ អត់​មានលុយព្យាបាល»។

តំណាងសហគមន៍ម្នាក់ទៀត អ្នកស្រី អិប តឹង មាន​ប្រសាសន៍​ថា អ្នកស្រី​ជា​អ្នក​បាត់​បង់​ដី​សម​ណាស់​នឹង​ទទួល​បាន​យុត្តិ​ធម៌ ហើយ​ពួកគាត់​នឹង​បន្ត​ទាម​ទារ​រហូត​ទាល់​តែ​មាន​ដំណោះ​ស្រាយ ព្រោះបើ​គ្មាន​ដី​ប្រៀប​បាន​គ្មាន​ជីវិត​។

អ្នកស្រីថា៖ « បង​សុខ​ចិត្ត​តស៊ូ​លើ​ដី​បើ​អត់​មាន​ដី​ក៏​អត់​មាន​អី​រស់​ដែរ ទោះ​បី​ឳពុក​ម្ដាយ​បង​មិន​តវ៉ា​តែ​បង​តវ៉ា ព្រោះ​ដី​ហ្នឹង​បង​ធំធាត់​កម្ម​សិទ្ធិ​លើ​ដី​ហ្នឹង​ទាំងអស់​ បើអត់​ដី​ហ្នឹង​បាន​អី​រស់»។

អ្នកស្រី​សង្កត់​ធ្ងន់​ថា រដ្ឋាភិបាល​គួរ​ពន្លឿន​ការ​ដោះ​ស្រាយ​ដី​សម្បទាន​ជូន​ពួក​គាត់​ដែល​រង​គ្រោះ​តាម​លក្ខខណ្ឌ​ដែល​បាន​ដាក់​ស្នើ រួម​ទាំង​ទម្លាក់​ចោល​រាល់​បទ​ចោទ​ម​ក​លើ​ពួកគាត់​ជា​តំណាង​សហគមន៍។

ជុំវិញបញ្ហានេះ អភិបាល​ខេត្ត​កោះកុង លោក​ស្រី មិថុនា ភូថង បាន​បញ្ជាក់ថា ក្រសួងរួមទាំងអាជ្ញាធរខេត្ត បាន​នឹងកំពុងរៀបចំ​ចំណាត់​ការស្រាវជ្រាវ​ហើយ​​។

លោកស្រីថា៖ «សម្រាប់​ការ​ងារហ្នឹង​ សម្រាប់​ខេត្ត​បាន​រៀបចំ​ត្រៀម​ក្រុម​ការ​ងារ​សម្រាប់​ចុះ​ទៅ​ស្រង់​ហើយ ដី​សង្គម​កិច្ច​ជា​​ដី​តម្រូវ​ការ​ប្រជាពលរដ្ឋ​ អ៊ីចឹង​នៅ​តែ​ការ​វាយ​តម្លៃ ព្រោះ​អី​ស្រង់​អត់​ទាន់​ចប់​ ការ​តវ៉ា​រឿង​មនុស្ស​អី​អី​ថាអត់​ពិត​ប្រាកដ​ អ៊ីចឹងណា ​នៅ​ពេលយើង​នៅ​ឲ្យ​បើក​ផ្លូវ​ឲ្យ​តវ៉ា​អី​ទៀត»។

ដោយឡែក អនុប្រធាន​​ផ្នែក​​​សិទ្ធិ​​​មនុស្ស ដីធ្លី និង​​ធនធាន​​ធម្មជាតិ នៃ​សមាគម​​ការពារ​​សិទ្ធិ​​មនុស្ស​អាដ​ហុក លោក យិន ម៉េងលី មាន​ប្រសាសន៍​ថា  ក្រសួងគួរតែពន្លឿនស្វែង​​រក​​ដំណោះ​​ស្រាយ​​ជូន​​ពលរដ្ឋ ជា​​ជាង​ការ​​មិ​ន​អើពើ​​ចំពោះ​កាតព្វ​កិច្ច​រដ្ឋាភិបាល​ក្នុង​ការ​បម្រើ​រាស្រ្តស្របតាមរដ្ឋធម្មនុញ្ញកម្ពុជា។​

លោកថា៖ «ខេត្តត្រូវតែ​ទទួល​យក​ពិចារណា​ទៅ​ក្រសួង​ដើម្បី​ឲ្យ​ធ្វើការ​ដោះ​ស្រាយ​បញ្ហា​នេះ ប្រជាពលរដ្ឋ​សុំ​ដី​សង្គម​កិច្ច​ មាន​ន័យ​ថា​ពលរដ្ឋ​លោក​អត់​ដី​ លោក​ត្រូវ​ការ​ដី ដើម្បី​បង្ក​បង្កើន​ផល អ៊ីចឹង​បើ​សិន​ជា​គាត់​ព្រងើយ​កន្តើយ​ទៅ​នឹង​សំណើ​របស់​ប្រជាពលរដ្ឋ​ធ្វើឲ្យ​ប្រជាពលរដ្ឋ​ខក​ចិត្ត​ ផ្ទុយ​ទៅ​នឹង​រដ្ឋ​ធម្មនុញ្ញ ដែល​រដ្ឋ​ត្រូវ​តែ​យក​ចិត្ត​ទុក​ដាក់​ចំពោះ​សំណើ​របស់​ពលរដ្ឋ​នេះ សុំឲ្យ​អាជ្ញាធរ​ខេត្ត​លោក​ក៏​ទទួល​យក​ ពន្លឿន​មធ្យោបាយ​ដោះ​ស្រាយ​»។

វិវាទ​ដី​ធ្លី​របស់​សហគមន៍​នៅ​ក្នុង​ខេត្ត​កោះកុង បាន​អូស​បន្លាយ​​អស់​រយៈពេល​ជិត ២០ឆ្នាំ​មក​ហើយ ដោយ​សារ​​រដ្ឋាភិបាល​​កាត់​​ឆ្វៀល​ដី​របស់​សហគមន៍​ឱ្យ​ទៅ​ឧកញ៉ា ​ធ្វើ​ជា​កម្មសិទ្ធិ ក្នុង​នោះ មាន លោក លី យ៉ុង​ផាត់ ជា​​សមាជិក​​ព្រឹទ្ធ​សភា​​មក​ពី​គណបក្ស​ប្រជាជន​កម្ពុជា និង​ជា​ប្រធាន​សមាគម​ឧកញ៉ា និង​លោក ហេង ហ៊ុយ ជា​មន្ត្រី​ជាន់​ខ្ពស់​ក្រសួង​មហាផ្ទៃ​ជាដើម៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ