សកម្មបរិស្ថាន កញ្ញា ភួន កែវរស្មី ដែលត្រូវបានតុលាការបង្គាប់ ឱ្យឃុំខ្លួនក្នុងពន្ធនាគារជាលើកទី២ ដោយសារតែភាពសកម្មការពារបរិស្ថាននោះ ត្រូវបានគេបញ្ចេញសារមកថា នាងសុខចិត្តជាប់ពន្ធនាគារ រហួត១០ឆ្នាំ មិនចុះចាញ់ចំពោះមនុស្សអាក្រក់នោះឡើយ។
នេះបើតាមការអះអាងរបស់អង្គការចលនាមាតាធម្មជាតិ ដែលជាអង្គការមួយលេចធ្លោជាងគេ ក្នុងប្រទេសកម្ពុជា ដែលមានធនធានយុវជនក្លាហាន ហ៊ានប្រឈមនឹងប្រព័ន្ធតុលាការ ដែលគេដឹងថា ជាឧបករណ៍របស់គណបក្សកាន់អំណាច ។
មាតាធម្មជាតិ បាននិយាយនៅលើហ្វេសប៊ុករបស់ខ្លួន នាថ្ងៃទី២១ ខែមករានេះ ក្នុងន័យដើមថា មិត្តរបស់យើង កែវរស្មី «ទោះបីខ្ញុំត្រូវជាប់គុក ៥ ឬ ៦ឆ្នាំ ឬ ១០ឆ្នាំក៏ដោយ ក៏យើងមិនលើកដៃសុំទោសចំពោះរឿងដែលខ្ញុំមិនបានធ្វើខុសឡើយ។ ហើយថា ខ្ញុំក៏មិនចុះចាញ់ចំពោះមនុស្សអាក្រក់ដែលចង់គាបសង្គត់យើងដែរ។»
កាលពីថ្ងៃទី២ ខែកក្កដា ឆ្នាំ២០២៤ កញ្ញា ភួន កែវរស្មី និងមិត្តរួមការងារចំនួន៣នាក់ទៀត សរុប៤នាក់ ត្រូវបានតុលាការចោទប្រកាន់ និងបង្គាប់ឱ្យដាក់ពន្ធនាគារពី ៦ ទៅ៨ឆ្នាំ ចោទពីបទ រួមគំនិតក្បត់ និងក្បត់ជាតិ។
ការចោទប្រកាន់របស់តុលាការនេះ ធ្វើឱ្យកម្ពុជាអាមាស់មុខលើឆាកអន្តរជាតិ ដោយសារតែមានការថ្កោលទោសពីបណ្តាប្រទេសប្រកាន់ប្រជាធិបតេយ្យជឿនលឿន ។
ដោយឡែក អង្គការការពារសិទ្ធិមនុស្សលីកាដូ ដែលមានការិយាល័យនៅក្នុងប្រទេសកម្ពុជា បានចាត់ទុកសេចក្តីសម្រេចនេះថា ជាទង្វើបំបាក់ស្មារតីសកម្មជនដែលមិនធ្លាប់មានពីមុនមក និងថា វិធានការចាប់ខ្លួនសកម្មជនទាំងនោះ ពីសំណាក់អាជ្ញាធរ បង្ហាញពីរូបភាពយ៉ាងឃោរឃៅ និងកំរោល គឺមិនអាចទទួលយកបានសម្រាប់ប្រទេសដែលប្រកាន់លទ្ធិប្រជាធិបតេយ្យ។
លីកាដូ បាននិយាយពេលនោះថា សេចក្តីសម្រេចរបស់សាលាដំបូងរាជធានីភ្នំពេញ ដែលបានផ្តន្ទាទោសទៅលើសកម្មជនបរិស្ថាន ដាក់ពន្ធនាគារពី ៦ ទៅ ៨ឆ្នាំ គឺជារឿងដែលគួរឱ្យអាម៉ាស់យ៉ាងខ្លាំង សម្រាប់ជាតិយើង ។
សម្រាប់លីកាដូ ការបំបិទសំឡេងសកម្មជនបរិស្ថាន និងការចោទប្រកាន់ថា សកម្មភាពតស៊ូមតិ ដោយសន្តិវិធីរបស់ពួកគេ ជាការគំរាមកំហែងដល់សន្តិសុខជាតិ ធ្វើឱ្យប្រព័ន្ធយុត្តិធម៌រងភាពអាម៉ាស់ ។
ការបញ្ជូនពួកគេទៅឃុំខ្លួននៅខេត្តឆ្ងាយ ដូចជា ខេត្តព្រះវិហារ និងពន្ធនាគារ ត្រពាំងផ្លុង ក្នុងខេត្តត្បូងឃ្មុំ ជាប់ព្រំដែនវៀតណាមជាដើមនោះ ប្រៀបបាននឹងការធ្វើទារុណកម្មផ្លូវចិត្ត ដោយសារតែបង្កការលំបាកដល់មេធាវីធ្វើដំណើរទៅពិគ្រោះយោបល់ផ្លូវច្បាប់ និងបង្កការលំបាកដល់គ្រួសារដែលចង់ទៅសួរសុខទុក្ខ។
យុវជនដែលត្រូវចាប់ខ្លួននៅពេលនោះ រួមមាន លោក ថុន រដ្ឋា អាយុ ៣២ឆ្នាំ លោក លី ចាន់ ដារ៉ាវុត អាយុ ២៤ឆ្នាំ កញ្ញា ឡុង គន្ធា អាយុ ២៦ឆ្នាំ និងកញ្ញា ភួន កែវរស្មី អាយុ ២៣ឆ្នាំ និងលោក យីម លាងហ៊ី។
លោក យីម លាងហ៊ី ត្រូវបានបញ្ជូនទៅឃុំខ្លួននៅពន្ធនាគារខេត្តកំពង់ស្ពឺ លោក ថុន រដ្ឋា ត្រូវបានបញ្ជូនទៅឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ ចំណែក លោក លី ចាន់ដារ៉ាវុត ត្រូវបានបញ្ជូនទៅឃុំខ្លួននៅពន្ធនាគារខេត្តកណ្តាល រីឯកញ្ញា ភួន កែវរស្មី ត្រូវបានបញ្ជូនទៅឃុំខ្លួននៅពន្ធនាគារខេត្តពោធិ៍សាត់ ។
កាលពីដើមខែកញ្ញា ឆ្នាំ២០២០ កន្លងទៅ ពួកគេក៏ធ្លាប់បានប្រកាសធ្វើយុទ្ធនាការទាមទាររដ្ឋាភិបាលឱ្យបញ្ឈប់លុបបឹងតាមោក ដែលស្ថិតនៅជាយរាជធានីភ្នំពេញ រួមទាំងការធ្វើយុទ្ធការឱ្យរដ្ឋាភិបាលការពារកោះកុងក្រៅ ទំនាស់នឹងផលប្រយោជន៍របស់ក្រុមហ៊ុនឧកញ៉ា លី យ៉ុងផាត់៕
