ពលរដ្ឋដែលអះអាងថារងការរំលោភបំពានដីធ្លីនៅខេត្តកំពត ទាមទារឱ្យស្ថាប័នជំនាញបើកការស៊ើបអង្កេតរកមុខមន្រ្តីពាក់ព័ន្ធដែលបានគប់គិតគ្នារំលោភយកដីពលរដ្ឋ និងដីភ្នំ ដើម្បីបោសសម្អាតអំពើពុករលួយជាប្រព័ន្ធ ជៀសវាងការចេញលិខិតបដិសេដមួយសន្លឹកហើយរួចខ្លួនដែលធ្វើឱ្យពលរដ្ឋបន្តរងគ្រោះពីមួយជំនាន់ទៅមួយជំនាន់។
ការទាមទារនេះ ក្រោយរដ្ឋបាលខេត្តកំពត ចេញសេចក្តីប្រកាសព័ត៌មាននៅថ្ងៃទី២២ ខែមករា ដោយចាត់ទុកការចុះផ្សាយអត្ថបទរបស់ VOD ពាក់ព័ន្ធរឿង លោក ម៉ៅ ធនិន ច្បាមយកដីអ្នកភូមិជាង ៤០ហិកតា នៅតំបន់ភ្នំទ្វានោះ គឺជាព័ត៌មានក្លែងក្លាយ។
បើតាមប្រភពដដែល ទីតាំងនោះ គឺជាអាស្រមលោកយាយម៉ៅ ដែលដំបូងឡើយមានទីតាំងនៅក្រោមជើងភ្នំទ្វា ជាប់ផ្លូវជាតិលេខ៣ ដែលមានពលរដ្ឋតែងតែចូលគោរពបូជា បន់ស្រន់ តាមជំនឿរៀងៗខ្លួន។ ប៉ុន្តែរាល់ពេលមានបុណ្យជាតិសំខាន់ៗ ទីតាំងនេះមានសភាពកកស្ទះ និងគ្រោះថ្នាក់ជារឿយៗ ទើបអាជ្ញាធរខេត្តកំពតផ្លាស់ប្តូរអាស្រមទៅលើភ្នំទ្វាវិញ ដែលជាអចលនទ្រព្យ គ្រប់គ្រងដោយមន្ទីរធម្មការ និងសាសនាខេត្ត។
យ៉ាងណា ប្រធានសមាគមគ្រូពេទ្យគុណធម៌កម្ពុជា លោកវេជ្ជបណ្ឌិត អ៊ូច វុឌ្ឍី ដែលអះអាងថា ជាពលរដ្ឋរងគ្រោះបាត់បង់ដីជិត ៥ហិកតា នៅតំបន់ភ្នំទ្វា ដែលទិញតាំងពីឆ្នាំ១៩៩៩មក ទាមទារឱ្យស្ថាប័នជំនាញចុះស៊ើបអង្កេតលើករណីនេះ ដោយតម្លាភាពដើម្បីផ្តល់យុត្តិធម៌។
លោកចោទថា លោក ម៉ៅ ធនិន ធ្លាប់ប្រាប់លោកថា លោកយាយម៉ៅបានពន្យល់សប្តិខ្លួន ឱ្យធ្វើអាស្រមនៅទីនោះសម្រាប់ជាទីសក្ការៈបូជាទុកជាសម្បត្តិរដ្ឋ តែក្រោយមកបែរជាលេបយកដីនោះទៅឱ្យម្តាយខ្លួន គឺអ្នកស្រី គង់ ម៉ៃ ធ្វើជាម្ចាស់កម្មសិទ្ធទៅវិញ។
លោកថា៖ «អ្នកណាមានអីហៅមកប្រជុំមក ដើម្បីឱ្យតម្លាភាពថាឥឡូវខ្ញុំយកកន្លែងហ្នឹងអភិវឌ្ឍន៍ ដើម្បីអាស្រមលោកយាយម៉ៅដែលខ្ញុំយល់សប្តិអ៊ីចឹង ប្រកាសប្រាប់ប្រជាពលរដ្ឋមក ដូចខ្ញុំអ៊ីចឹង! ខ្ញុំអស់ចិត្តហើយ ស្រាប់តែមួយខែក្រោយមក បែកធ្លាយចេញម៉ែគាត់មក ហើយមេភូមិក៏ខ្សឹបប្រាប់ដែរថា ថាពេទ្យអើយមែនទេដាក់ម៉ែគាត់ មេឃុំរងអីហ្នឹង គេលួចខ្សឹបប្រាប់ខ្ញុំ ជំទប់ទីមួយហ្នឹង ហើយមេភូមិគាត់ប្រាប់ថា គ្រូពេទ្យមែនទេ ដាក់ឈ្មោះម៉ែគាត់ ខ្ញុំប្រាប់ថាដូចមិនកើតទេ គាត់និយាយជាមួយខ្ញុំច្បាស់ហើយ។ ខ្ញុំអត់ជឿ! ស្រាប់តែឃើញឯកសារមែន! ឯកសារបែកធ្លាយមែន! ដាក់ឈ្មោះ ម៉ែគាត់មានទិន្នន័យក្បាលដីបិទប្រកាសនៅសុរិយោដីខេត្ត សុរិយោដីស្រុក គេថតបានគេយកការបាន»។
បើតាមលោក អ៊ូច វុឌ្ឍី មានពលរដ្ឋជិត២០គ្រួសារ បាត់បង់ដីជាង ៤០ហិកតា នៅតំបន់ភ្នំទ្វា ក្រោមអំណាចច្បាមយកដីពីលោក ម៉ៅ ធនិន នេះ។
លោកថា ៖ «កុំអាដែងលេងប៉ាហ៊ីស្ពិនភ្នែកអ៊ីចឹងអត់បានទេ ហើយបងប្អូនប្រជាពលរដ្ឋក៏គាត់ឈឺចាប់ដែរ ហើយមកខេត្តកំពតនេះ កន្លែងណាក៏រឿងរ៉ាវដីធ្លីដែរ យើងដាក់ភ្នាក់ងារឯករាជ្យទៅស៊ើបអង្កេតទៅតាមសំណូមពរខ្ញុំ។ ដាក់ភ្នាក់ងារឯករាជ្យស៊ើបអង្កេតហើយចេះអាណិតប្រជាពលរដ្ឋ។ បីពេលដូចគ្នា ប៉ុន្តែ បីពេលគាត់ផ្សេង បីពេលប្រជាពលរដ្ឋផ្សេង បីពេលកម្មករផ្សេង បីពេលខ្ញុំផ្សេង។ អ៊ីចឹងយើងគួរណាតែយកអ្នកឯករាជ្យអ្នកសង្កេតការណ៍ ឬមួយអធិការកិច្ចឯករាជ្យ ក្រសួងពាក់ព័ន្ធចុះមកពិនិត្យ តើដីកន្លែងណាខ្លះដែលគាត់ច្បាមយកជាប្រព័ន្ធ។ អាងតែ អំណាចខ្លួនឯង គាត់សម្លុតគំរាមកំហែងរហូតទៅដល់កាសែតក្នុងស្រុកមួយៗភ័យគ្រប់គ្នា»។
លោក ម៉ៅ ធនិន បានរៀបការជាមួយអ្នកស្រី ហ៊ុន ចាន់ធី កូនស្រីរបស់អ្នកស្រី ហ៊ុន ប៊ុនធឿន ប្អូនស្រីពៅរបស់ប្រធានគណបក្សកាន់អំណាច លោកហ៊ុន សែន។ លោក ម៉ៅ ធនិន គឺជាក្មួយប្រសាររបស់លោក ហ៊ុន សែន។
ជាមួយគ្នានេះ ពលរដ្ឋម្នាក់គឺ អ្នកស្រី ឈិត ស្រីលន ប្រាប់VODថា អ្នកស្រីបាត់បង់ដីជិត១ហិកតានៅតំបន់ភ្នំទ្វានេះ ដែលម្តាយឪពុកគាត់កាន់កាប់តាំងពីឆ្នាំ១៩៨៦ មកម្លេះ តែត្រូវបាត់បង់ក្រោយ លោក ម៉ៅ ធនិន ចូលមកកាន់កាប់តំណែងជាអភិបាលខេត្តកំពត។
អ្នកស្រីស្នើឱ្យស្ថាប័នជំនាញបើកការស៊ើបអង្កេត ដើម្បីរកយុត្តិធម៌ចំពោះការបាត់ដបង់ដីធ្លីនេះ ខណៈគាត់ដាក់ពាក្យបណ្តឹងរកការអន្តរាគមន៍នៅសាលាខេត្តកំពត មន្ទីរសុរីយោដីស្រុក និងខេត្ត ជាង១ឆ្នាំហើយ នៅតែមិនទាន់មានដំណោះស្រាយ។
អ្នកស្រីថា៖ «ដាំដំណាំ ដាំអី ប្រកបអាជីវកម្មនៅហ្នឹង តាំងពី១៩៨៦មកម្ល៉េះ។ ដីខ្ញុំហ្នឹងគឺមានX Y ត្រឹមត្រូវដោយសារពេលសុរិយោដីចុះវាស់ហើយហ្នឹង គឺខ្ញុំបានទៅសុំ X Y ពីសុរិយោដី មន្ទីរខេត្តកំពត ដែលដីខ្ញុំមាន ៣៨៦ម៉ែត្រការ៉េ តែនៅពេលដែលចុះផ្សាយ គឺដីខ្ញុំបានតែ ២៥០០ជាងទេ មានន័យថា បាត់ជិត៨ពាន់ម៉ែត្រការ៉េ ជិតមួយហិកតា។ ដីនេះវាស់តាំងពីឯកឧត្តម ជាវ តាយ នៅមកម្ល៉េះតាំងពីថ្ងៃទី២៥ ខែ២ ឆ្នាំ២០២១ តែបិទផ្សាយនេះ ទើបតែបិទផ្សាយទេ បាត់នៅជំនាន់ឯកឧត្តម ម៉ៅ ធនិន គាត់មកកាន់កាប់នេះ ប្ដឹងនៅសាលាខេត្តផងដែរ តែមិនមានដំណោះស្រាយទេ»។
ប្រធានសមាគមការពារសិទ្ធមនុស្សអាដហុក លោក នី សុខា ជំរុញឱ្យស្ថាប័នថ្នាក់ជាតិ បង្កើតគណៈកម្មការឯករាជ្យមួយ ស៊ើបអង្កេតលើរឿងនេះដោយតម្លាភាព ដើម្បីផ្តល់យុត្តិធម៌ដល់ជនរងគ្រោះពិតប្រាកដ។
លោកថា៖ «ប្រសិនបើយើងយកទៅលើរដ្ឋបាលខេត្ត ហើយចេញលិខិតបដិសេធបែបនេះ ខ្ញុំគិតថា ធ្វើឲ្យប្រជាពលរដ្ឋ នឹងមិនសុខចិត្តសុខកាយទេ ដូច្នេះនៅពេលដែលពលរដ្ឋលោកមិនសុខចិត្ត លោកមិនទទួលយកបាន អាហ្នឹងរឿងហ្នឹងវានៅតែបន្តទៅទៀត បែបហ្នឹងឯង ហើយឲ្យវាធ្វើឲ្យ បើសិនជាខាងឯកឧត្តម ម៉ៅ ធនិន លោកយល់ថា រឿងហ្នឹងវាមិនមែនជាការពិត យើងស្នើឲ្យមានការស៊ើបអង្កេតពីគណៈកម្មការឯករាជ្យឲ្យបានត្រឹមត្រូវទៅ ដើម្បីចៀសវាងកុំឲ្យមានការចោទប្រកាន់ធ្វើឲ្យប៉ះពាល់ដល់កិត្តិយសគាត់ផង»។
ជាមួយគ្នានេះ ប្រធានគណបក្សដើម្បីកម្ពុជា លោក ឯម សុខសុវណ្ណ យល់ថា បើគ្រាន់តែចេញលិខិតច្រាលចោលមួយសន្លឹករបស់រដ្ឋបាលខេត្តកំពត មិនអាចជម្រះមន្ទិលជុំវិញការចោទប្រកាន់នេះបានទេ បើគ្មានការស៊ើបអង្កេតដោយឯករាជ្យទេនោះ។
លោកថា៖ «ចំពោះការបដិសេធថាព័ត៌មានដែលចុះដោយVOD ឬក៏សារព័ត៌មានផ្សេងៗទៀតថាវាជាព័ត៌មានបំភ្លៃការពិត ចុះបើបដិសេធ បដិសេធទៅលើអីគេ ការបដិសេធជារឿងមួយហើយ ប៉ុន្តែយើងត្រូវតែបង្ហាញភ័ស្តុតាងជាក់លាក់ឱ្យពលរដ្ឋស្ងប់ចិត្តបានយុត្តិធម៌ ហើយមហាជនទូទៅគាត់ជឿជាក់ គាត់ជឿជាក់ត្រង់ណា ថាតើ ចៅហ្វាយខេត្តកំពត ពិតជាបានដឹកនាំខេត្តមួយហ្នឹង ជាខេត្តស្អាតស្អំធ្វើឲ្យប្រជាពលរដ្ឋអ្នកជឿទុកចិត្តបានកម្រិតណា ហើយមហាជនទូទៅនោះ គាត់សប្បាយចិត្តថាការបដិសេធរបស់រដ្ឋបាលខេត្តហ្នឹង វាពិតជាមានភ័ស្តុតាងមួយបង្ហាញឲ្យសាធារណៈទូទៅជឿជាក់ និងស្ងប់អារម្មណ៍ថា ការពិតជាទទួលបានយុត្តិធម៌មែន»។
ក្រៅពីរឿងអាស្រូវយកដីនៅតំបន់ភ្នំទ្វាហើយនោះ លោក ម៉ៅ ធនិក ក៏រងការចោទថា បានដើរទន្រ្ទានយកដីរដ្ឋ ដូចជា នៅភ្នំថ្កូវ នៅឃុំត្រពាំងឃ្លាំង ស្រុកឈូក និងតំបន់ព្រែកត្នោត នៅស្រុកទឹកឈូ ដែលប៉ះពាល់ដល់ពលរដ្ឋជិត១០០គ្រួសារ តែអ្នកភូមិមិនហ៊ានតវ៉ាទេ ព្រោះខ្លាចអំណាចលោក ម៉ៅ ធនិន។
បន្ថែមលើនេះ អភិបាលខេត្តកំពតរូបនេះ ក៏រងការសង្ស័យជាប់ពាក់ព័ន្ធអំពើពុករលួយផងដែរ ក្រោយពេលមានការចែកចាយរូបភាព និងវីដេអូភូមិគ្រឹះរបស់លោក ម៉ៅ ធនិន ដែលសាងសង់ឡើងដោយឈើប្រណិតនៅលើបណ្ដាញសង្គម នាពេលកន្លងទៅ។ មតិខ្លះបានលើកឡើងថា ទ្រព្យសម្បត្តិដែលមានច្រើននេះ មិនសមាមាត្រទៅនឹងប្រាក់ខែមន្ត្រីរាជការ។
ជាងនេះទៀត ក្មួយប្រសារលោក ហ៊ុន សែន រូបនេះ ត្រូវបានពលរដ្ឋទម្លាយថា បានទម្លាក់តំណែងលោក ដាញ់ សារី ប្រធានមន្ទីររៀបចំដែនដី នគរូបនីយកម្មសំណង់ និងសុរិយោដីខេត្តកំពត ក្រោយបដិសេដមិនព្រមរួមគំនិតកាត់ឆ្វៀលដីតាមការចង់បានរបស់លោក ម៉ៅ ធនិន ដោយឱ្យលោក ព្រាប សុផាត អនុប្រធានមន្ទីរសុរិយោដីខេត្តកំពត កាន់តំណែងជំនួសវិញ៕
