បារាំងរំឮកមេដឹកនាំកម្ពុជាថា ខ្លួនកំពុងតាមដានយ៉ាងយកចិត្តទុកដាក់ ពីដំណើរការស៊ើបអង្កេតរកអ្នកពាក់ព័ន្ធ ក្នុងសំណុំរឿងឃាតកម្មលើតំណាងរាស្រ្តបក្សសង្រ្គោះជាតិ លោក លិម គិមយ៉ា ខណៈកម្ពុជានៅមិនទាន់ចាប់បញ្ជូនជនសង្ស័យពីររូប ដែលស្និតនឹងមេដឹកនាំបក្សកាន់អំណាច ឱ្យទៅប៉ូលីសអន្តរជាតិអាំងទែប៉ូល និងតុលាការថៃ ដើម្បីកាត់ទោសក្នុងសំណុំរឿងឃាតកម្មនេះ។
តាមរយៈសេចក្តីប្រកាសរបស់ស្ថានទូត បានលើកឡើងថា កាលពីថ្ងៃទី២៣ ខែមករា ឯកអគ្គរដ្ឋទូតបារាំង លោក ហ្សាក់ ប៉ឺឡេ បានជួបពិភាក្សាជាមួយ លោក ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិកម្ពុជា។
ប្រភពនោះបញ្ជាក់ថា ក្នុងជំនួបទល់មុខនោះ ភាគីបារាំង និយាយថា ខ្លួនកំពុង«តាមដានយ៉ាងយកចិត្តទុកដាក់លើការស៊ើបអង្កេត ស្តីពីឃាតកម្មលើលោក លិម គិមយ៉ា ពលរដ្ឋបារាំង និងជាសមាជិកបក្សប្រឆាំងកម្ពុជា»។
ការជំរុញរបស់ភាគីបារាំង ហាក់ស៊ីគ្នានឹងការលើកឡើងរបស់សកម្មជនសង្គម និងអ្នកនយោបាយក្រៅរដ្ឋាភិបាលមួយចំនួន ដែលបន្តថ្កោលទោសការលាក់បាំងជនសង្ស័យពីសំណាក់ប្រព័ន្ធយុត្តិធម៌កម្ពុជា។
តំណាងរាស្រ្តបក្សសង្គ្រោះជាតិ លោក អ៊ុំ សំអាន ប្រាប់វីអូឌីនៅថ្ងៃទី២៤ ខែមករានេះថា ប្រទេសបារាំង គេមិនឈរឳបដៃមើលឃាកម្មលើ លោក លិម គិមយ៉ា ដែលមានសញ្ជាតិខ្មែរ បារាំនោះទេ។
លោកបន្តថា ករណីនេះប្រពន្ធលោក លិម គិមយ៉ា គឺអ្នកស្រី លិម អានម៉ារី កំពុងប្រមូលភស្តុតាងបន្ថែមដាក់ពាក្យបណ្តឹងទៅតុលាការបារាំង ដើម្បីបន្តស៊ើបអង្កេតសំណុំរឿងករណីឃាតកម្មលើប្តីអ្នកស្រី។
លោកសង្កត់ធ្ងន់ងថា ការដែលប្រព័ន្ធយុត្តិធម៌កម្ពុជាមិនព្រមបញ្ជូន ឈ្មោះ លី រតនរស្មី និង ពេជ្រ គិមស្រ៊ុន ដែលជាជនសង្ស័យឱ្យទៅភាគីអន្តរជាតិ ដើម្បីកាត់ទោសតាមការស្នើសុំ វាបញ្ជាក់កាន់តែច្បាស់ថា គ្រួសារហ៊ុននៅពីក្រោយឃាតកម្មនេះយ៉ាងពិតប្រាកដ។
លោកថា៖ «រដ្ឋាភិបាលបារាំង គេនៅឃ្លាំមើលរឿងហ្នឹងទៀត ហើយមានបណ្តឹងមួយគឺបណ្តឹងពីរដ្ឋអំណាចរបស់បារាំងតែម្តង មានន័យថា ពាក្យបណ្តឹងរបស់រដ្ឋតែម្តងហ្នឹងទី១។ បណ្ដឹងទី២ គឺបណ្ដឹងភរិយារបស់លោក លិម គិមយ៉ា ដូច្នេះខ្ញុំជឿថាពេលអនាគតតុលាការបារាំង គេនឹងចេញដីកាចាប់ខ្លួនមេខ្លោងនៅពីខាងក្រោយខ្នងហ្នឹង គឹមេខ្លោងធំតែម្តងគឺលោក ហ៊ុន សែន ហើយនិងបក្សពួករបស់គាត់»។
មួយវិញទៀត លោកថា សារជំរុញរបស់ភាគីបារាំង អាចបញ្ជាក់បានថា បារំាងគ្មានទំនុកចិត្តលើប្រព័ន្ធយុត្តិធម៌នៅកម្ពុជាដែលត្រួតត្រាដោយគ្រួសារហ៊ុន។
លោកថា៖ «ខ្ញុំយល់ថា ជាចេតនារបស់រដ្ឋាភិបាលដែលអត់មានបំណងចាប់ខ្លួនអ្នកទាំងពីរ និងបញ្ជូនពួកគេទៅឲ្យតុលាការថៃទេ។ តែយើងមើលសកម្មជនបក្សប្រឆាំងទៅដល់ម៉ាឡេស៊ីដល់ថៃ ក៏ចាប់បានដែរ តែអ្នកទាំងពីរនៅក្នុងស្រុកខ្មែរ រហូតដល់ថ្ងៃនេះ ហើយប៉ុន្មានថ្ងៃ អត់ទាន់ចាប់បានផងហ្នឹង។ ចឹងមានន័យគាត់អត់មានចេតនាបញ្ជូនអ្នកទាំងពីរ ឲ្យតុលាការថៃទេ ព្រោះខ្លាចបែកការថាមានអ្នកបញ្ជានៅពីក្រោយខ្នងហ្នឹង គឺលោក ហ៊ុន សែន»។
ក្រៅពីនេះ ប្រធានចលនាជាតិតស៊ូជាតិនៅក្រៅប្រទេស លោក សម រង្ស៊ី បានលើកឡើងក្នុងហ្វេសប៊ុករបស់លោកថា ភរិយាលោក លិម គិមយ៉ា គឺលោកស្រី លិម អាន-ម៉ារី បញ្ជាក់ថា ការធ្វើឃាតស្វាមីអ្នកស្រី ជារឿងនយោបាយសុទ្ធសាធ ពីព្រោះលោក លិម គិមយ៉ា មិនមានសត្រូវផ្ទាល់ខ្លួន ឬក៏ជម្លោះផ្ទាល់ខ្លួនណាមួយឡើយ។
ជុំវិញបញ្ហានេះ លោក មុត ចន្ថា អតីតនាយកខុទ្ធកាល័យ លោក កឹម សុខា ប្រធានគណបក្សសង្គ្រោះជាតិ បង្ហាញការយល់ឃើញថា ការណ៍ដែលរដ្ឋាភិបាលមិនទាន់បង្ហាញមុខជនសង្ស័យ អាចមកពីចេតនាលាក់បំពួន ការពារ ឬត្រូវបានគេសម្លាប់បំបិទមាត់ និងកំពុងរៀបចំសេណារីយោ ដើម្បីទម្លាក់កំហុស និងលាងសំអាតខ្លួន នៅមិនទាន់ចប់សព្វគ្រប់។
អ្នកវិភាគនយោបាយនិងសង្គម លោក គឹម សុខ និយាយដែរថា ដើម្បីបញ្ជាក់ពីភាពស្អាតស្អំលោកនាយករដ្ឋមន្រ្តី ហ៊ុន ម៉ាណែត គួរតែបញ្ជូនជនដៃដល់ទាំងពីរនេះទៅប្រទេសថៃ ដើម្បីលាតត្រដាងការពិត។
ប្រភពបន្តថា ជម្រើសចុងក្រោយរបស់លោក លី រតនរស្មី មានតែមកជាប់គុកនៅប្រទេសថៃទេ ទើបបានរួចផុតពីចំណីឆារាវ៉ាន់ គឺក្រពើ។
គណនីហ្វេសប៊ុកមួយទៀត ឈ្មោះ លិម គិមស័រ និយាយថា ខ្លួនសង្ឃឹមថា តុលាការបារាំង នឹងនៅតែបន្ដចាត់ការលើរឿងឃាតកម្មបាញ់សម្លាប់លោក លិម គិមយ៉ា នេះ។
ជុំវិញបញ្ហានេះ វីអូឌី មិនទាន់អាចសុំការបំភ្លឺពីអ្នកនាំពាក្យរងក្រសួងមហាផ្ទៃ លោក ទូច សុខៈ និងអ្នកនាំពាក្យស្នងការនគរបាលជាតិ លោក ឆាយ គឹមខឿន បាននៅឡើយទេ គិតត្រឹមម៉ោងផ្សាយនេះ។
យ៉ាងណា អ្នកនាំពាក្យរដ្ឋាភិបាល លោក ប៉ែន បូណា ធ្លាប់បានចាត់ទុកក្រុមបក្សប្រឆាំងមួយថាបានព្យាយាមបង្កើតក្រុមបដិវត្តន៍ពណ៌ ពង្រីករឿងតូចឱ្យទៅជាធំ ដើម្បីជំរុញឱ្យមានការផ្តួលរំលំរដ្ឋាភិបាល និងដើម្បីដាក់កំហុសរដ្ឋាភិបាលកម្ពុជា។
លោកថា៖ «គេត្មេះតេះដៀលលើថ្នាក់ដឹកនាំដែលខិតខំស្វែងរកសន្តិភាព ដើម្បីការពារសន្តិភាព ភាពសុខសាន្តរបស់ប្រជាពលរដ្ឋហ្នឹង គេក្តៅក្រហាយគេអត់ចូលចិត្តទេ អ៊ីចឹងគេបំផ្លាញសន្តិភាពជាមុនសិន រួចហើយគេបំផ្លាញភាពសុខសាន្តរបស់ប្រជាពលរដ្ឋ បានន័យថា បង្កឲ្យមានភាពវឹកវរ ឈឺចាប់ហើយបើមានរបួសស្នាម បើមានស្លាប់ទៀត គេរឹតតែចំណេញពីយកបញ្ហាហ្នឹង បញ្ឆេះបន្ថែមដើម្បីឈានដល់ផ្ទុះកំហឹងប្រជាពលរដ្ឋ អ៊ីចឹងហើយបានជាគេចាត់ទុកថាជាសត្រូវរបស់សន្តិភាព និងភាពសុខសាន្តរបស់ពលរដ្ឋ»។
ដោយឡែក ប្រធានអង្គការប្រជាធិបតេយ្យប្រចាំនៅប្រទេសអូស្រ្តាលី លោក ស៊ឹង សែនករុណា យល់ថា សាររំឭករបស់ភាគីបារាំង ឆ្លុះបញ្ចាំងថា យុត្តិធម៌ក្នុងសំណុំរឿងឃាតកម្មលោក លិម គិមយ៉ា មិនបិទបញ្ចាប់ត្រឹមរដ្ឋាភិបាលកម្ពុជា រក្សាភាពស្ងៀមស្ងាត់នេះទេ។
លោកថា៖ «វាឆ្លុះបញ្ចាំងថាគេអត់បានបោះបង់សំណុំរឿងរបស់លោក លិម គិមយ៉ា ត្រឹមហ្នឹងទេ ទោះបីជំនួបការទូតហ្នឹង ក្នុងកម្រិតណាមួយក៏ដោយ ក៏គេចាត់ទុកថា ករណីដែលបាញ់សម្លាប់ពលរដ្ឋបារាំងរបស់គេ គឺជារឿងសំខាន់ គេយកកិច្ចការងារពលរដ្ឋបារាំងគេត្រឹមមួយរូបនេះ យកទៅជជែកក្នុងជំនួបកិច្ចការទូតរវាងប្រទេសនិងលក្ខណៈអន្តរជាតិ ប៉ុណ្ណឹងគេមិនបោះបង់ មានន័យថា គេនឹងបន្តធ្វើកិច្ចការងារគេតាមដានលើករណីហ្នឹង ហើយជាសម្ពាធទៅដល់កម្ពុជា ហើយក៏ពញ្ញាក់ដល់កម្ពុជាដែរ។ អ្នកដែលធ្វើការគប់គិតគ្នាក្នុងការកាប់សម្លាប់ ឬក៏បញ្ជាឲ្យមានសម្លាប់ហ្នឹង គឺអ្នកហ្នឹងមិនអាចគេចផុតអំពីការតាមដាន ឬរួចពីសំណាញ់ច្បាប់របស់ប្រទេសបារាំងទេ»។
កាលពីថ្ងៃទី១៥ខែមករា នគរបាលអន្តរជាតិ អាំងទែប៉ូល (Interpol) បានចេញនិវេទន៍ក្រហម(Red notice) ឱ្យស្វែងរកចាប់ខ្លួន អ្នកផ្តល់តម្រុយឱ្យបាញ់សម្លាប់លោក លិម គិមយ៉ា ។
ដោយឡែក តុលាការព្រហ្មទណ្ឌថៃ ក៏បានចេញដីកាឱ្យតាមចាប់ខ្លួនជនសង្ស័យ លី រតនរស្មី តាមចម្លើយសារភាពរបស់ខ្មាន់កាំភ្លើង ដែល លី រតនរស្មី ត្រូវបានលោក ហ៊ុន សែន តែងតាំងឱ្យធ្វើជាទីប្រឹក្សា នៅដើមឆ្នាំ២០២៤។
កាលពីថ្ងៃទី៧ ខែមករា ឆ្នាំ២០២៥ តំណាងរាស្រ្តបក្សសង្រ្គោះជាតិ លោក លិម គិមយ៉ា ត្រូវបានគេបាញ់ប្រហារនៅក្បែរទីតាំងវត្ត Bowonniwet Vihara នៃទីក្រុងបាងក ប្រទេសថៃ។ លោក លឹម គីមយ៉ា ដែលមានវ័យ ៧៣ឆ្នាំ បានស្លាប់ភ្លាមនៅនឹងកន្លែងកើតហេតុ ក្រោយរងការបាញ់ប្រហារចំនួន៣គ្រាប់។
ក្រោមការដឹកនាំរបស់មេដឹកនាំបក្សកាន់អំណាចកម្ពុជាជាង៤ទសវត្សរ៍ទៅនេះ មនុស្សជាច្រើនត្រូវបានគេបាញ់សម្លាប់ ក្នុងនោះមានទាំងអ្នកសារព័ត៌មាន ព្រះតេជគុណធម្មវិបស្សនា សំ ប៊ុនធឿន មេដឹកនាំសហជីពសេរីកម្មករលោក ជា វិជ្ជា។
ក្រៅពីនេះ សកម្មជនការពារព្រៃឈើ លោក ឈុត វុទ្ធី និងការសម្លាប់លោកបណ្ឌិត កែម ឡី និងសកម្មជនគណបក្សប្រឆាំង រាប់សិបនាក់ទៀត ត្រូវបានគេលួចធ្វើឃាត ដោយវាយសំដៅក្បាល ដែលខ្លះស្លាប់ ខ្លះពិការមួយជិវិត តែជនដៃដល់មិនត្រូវបានប្រព័ន្ធយុត្តិធម៌នាំខ្លួនមកផ្តន្ទាទោសទេ សូម្បីមួយករណី។
បញ្ហាទាំងអស់នេះ ត្រូវបានសហគមន៍ជាតិ និងអន្តរជាតិ ស្តីបន្ទោសថា ប្រព័ន្ធយុត្តិធម៌ បានបរាជ័យផ្តល់យុត្តិធម៌ឱ្យជនរងគ្រោះ ជំរុញឱ្យកម្ពុជារអិលយ៉ាងលឿន ទៅរករបបដឹកនាំបែបគ្រួសារនិយមផ្តាច់ការ បំពានរដ្ឋធម្មនុញ្ញធ្ងន់ធ្ងរ ដែលនឹងគំរាមកំហែងដល់ជីវិតពលរដ្ឋរាប់លាននាក់ទៀត បើប្រព័ន្ធយុត្តិធម៌នៅតែមិនអាចកាត់ទោសកំហុសមេដឹកនាំបាន៕