តុលាការកំពូល បានតម្កល់សេចក្តីសម្រេចរបស់សាលាឧទ្ធរណ៍បាត់ដំបង ទុកជាបានការ ពាក់ព័ន្ធនឹងសំណុំរឿងរបស់ លោក ចៅ វាសនា ប្រធានគណបក្សភ្លើងទៀនក្រុងប៉ោយប៉ែត ដែលមានន័យថា លោកត្រូវជាប់ពន្ធនាគារចំនួន៣ឆ្នាំ និងរងការពិន័យជាប្រាក់ ក្រោមការចោទពីបទ `«ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងញុះញង់ឲ្យមានការរើសអើង»។
ការប្រកាសសាលដីកានេះ ធ្វើឡើងក្រោមពី តុលាការកំពូល កាលពីថ្ងៃទី២១ ខែមករា ឆ្នាំ២០២៥ បានបើកសវនាការលើបណ្ដឹងសារទុក្ខ ដែលលោក ចៅ វាសនា បានប្ដឹងជំទាស់ទៅនឹងសេចក្ដីសម្រេចរបស់សាលាឧទ្ធរណ៍បាត់ដំបង ដែលបានផ្ដន្ទាទោសរូបលោកឱ្យជាប់ពន្ធនាគារចំនួន ៣ឆ្នាំ និងពិន័យជាប្រាក់ចំនួន ៦លានរៀល ហើយត្រូវសងសំណងដើមបណ្ដឹងរដ្ឋប្បវេណីចំនួន ៨០លានរៀល ឬប្រមាណ ២ម៉ឺនដុល្លារ ព្រមទាំងដកសិទ្ធិនយោបាយរយៈពេល ៥ឆ្នាំ។
ក្រោយស្តាប់ការប្រកាសសាលដីកា នៅរសៀលថ្ងៃសុក្រនេះ លោក អែម ចន្ថា មេធាវីការពារសិទ្ធិឱ្យលោក ចៅ វាសនា បានឱ្យដឹងថា ក្រុមប្រឹក្សាជំនុំជម្រះនៃតុលាការកំពូល បានសម្រេចតម្កល់សាលក្រមរបស់សាលាឧទ្ធរណ៍បាត់ដំបង ទុកជាបានការ ដែលមានន័យថា កូនក្តីរបស់លោកត្រូវមានទោសជាប់ពន្ធនាគារ និងការពិន័យ។
លោកបង្ហាញការខកចិត្តចំពោះការសម្រេចរបស់តុលាការគ្រប់ជាន់ថ្នាក់ ចំពោះសំណុំរឿងនេះ ដោយថាជារឿងអយុត្តិធម៌សម្រាប់កូនក្តីរបស់លោក។
លោកថា៖ «ខ្ញុំជាមេធាវីមានការខកចិត្ត ចំពោះការសម្រេចគ្រប់ជាន់ថ្នាក់មកនេះ ដោយមិនមានបទល្មើស អង្គហេតុ អង្គក្តី គឺជាការភ័ន្តច្រឡំទាំងស្រុង ហើយនៅក្នុងសាលក្រម សាលដីកា គឺមិនមានសំអាងសេចក្តី គេហៅថា ព្យសនកម្ម ឬទោសទណ្ឌបទល្មើសអីដែលត្រូវទទួលតែម្តង និយាយទៅគឺថាមានភាពអយុត្តិធម៌សម្រាប់កូនក្តីខ្ញុំតែម្តង»។
ចំណែក អ្នកស្រី ចៅ រតនៈ ត្រូវជាកូនស្រីរបស់លោក ចៅ វាសនា ក៏បង្ហាញការមិនពេញចិត្តចំពោះការសម្រេចរបស់តុលាការកំពូលនេះដែរ ដោយអ្នកស្រីចាត់ទុកការសម្រេចនេះថាជារឿងអយុត្តិធម៌ និងមានការរើសអើងចំពោះឪពុករបស់អ្នកស្រីដែលជាមន្ត្រីបក្សប្រឆាំង។
វីអូឌី មិនអាចសុំការអត្ថាធិប្បាយជុំវិញករណីនេះពីអ្នកនាំពាក្យតុលាការកំពូល លោកស្រី ម៉ៅ ធីតា បានទេនៅថ្ងៃនេះ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា បើផ្អែកលើការពិនិត្យលើដំណើរការនៃការកាត់ក្តី ពីសហគមន៍ជាតិនិងអន្តរជាតិ គេសង្កេតឃើញថា ការចាប់ខ្លួន ឃុំខ្លួន និងកាត់ទោសទៅលើលោក ចៅ វាសនា ធ្វើឡើងក្រោមហេតុផលនយោបាយច្រើនជាងការអនុវត្តច្បាប់ ខណៈលោក ចៅ វាសនា មានភាពសកម្មក្នុងជីវភាពនយោបាយរបស់លោក ក្រោយជាប់ឃុំម្តងរួចមកហើយ។
លោកថា៖ «អញ្ចឹងយើងមានការសោកស្តាយដែរ ចំពោះសាលដីការបស់តុលាការកំពូល នៅថ្ងៃនេះ បើសិនយើងមើលរឿងលោក ចៅ វាសនា នេះ ការចោទប្រកាន់ និងភស្តុតាងហ្នឹងវាហាក់ដូចជាមិនមានភស្តុតាងអីដាក់បន្ទុកនៃការចោទប្រកាន់បានគ្រប់គ្រាន់ទេ ដោយសំអាងតែលើតេឡេក្រាម អីចឹងការទំនាក់ទំនងតាមតេឡេក្រាម គឺជាលក្ខណៈជាឯកជន អីចឹងមិនអាចយកមកដាក់បន្ទុកទេ ទី២ បើតេឡេក្រាមជាក្រុម យើងឃើញហើយជួនកាលលេខក្នុងតេឡេក្រាមយើងអាចនឹងទាញចូល(ក្រុម)បាន អីចឹងមិនអាចជាភស្តុតាងរឹងសម្រាប់ក្នុងការចោទប្រកាន់ដែរ»។
អាជ្ញាធរខេត្តបន្ទាយមានជ័យ បានចាប់ខ្លួនអតីតចៅសង្កាត់ក្រុងប៉ោយប៉ែតដែលជាប់ឆ្នោត និងជាប្រធានគណបក្សភ្លើងទៀនក្រុងប៉ោយប៉ែត លោក ចៅ វាសនា កាលពីថ្ងៃទី២៣ ខែកក្កដា ឆ្នាំ២០២៣ ក្រោមការចោទប្រកាន់ពីបទ `«ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងញុះញង់ឲ្យមានការរើសអើង» ពាក់ព័ន្ធនឹងរឿងរ៉ាវនៃការយុទ្ធនាការឲ្យពលរដ្ឋគូសខ្វែងសន្លឹកឆ្នោត។ អាជ្ញាធរបានបញ្ជូនលោក ចៅ វាសនា ទៅឃុំខ្លួន នៅក្នុងពន្ធនាគារខេត្តនេះ កាលពីថ្ងៃទី២៥ ខែកក្កដា ឆ្នាំ២០២៣។
លោក ចៅ វាសនា ធ្លាប់ត្រូវបានតុលាការខេត្តបន្ទាយមានជ័យ កាត់ទោសឲ្យជាប់ពន្ធនាគារម្ដងរួចមកហើយ ពីបទញុះញង់ និងបានចេញពីពន្ធនាគារវិញ កាលពីដើមឆ្នាំ២០២២ បន្ទាប់ពីលោកបានអនុវត្តទោសគ្រប់ចំនួនរយៈពេល ៥ឆ្នាំពេញ នៅក្នុងពន្ធនាគារ៕
