អង្គការសង្គមស៊ីវិលធ្វើការផ្នែកសិទ្ធិមនុស្ស ចំនួន៣ បង្ហាញការខកចិត្តចំពោះស្ថាប័នទទួលពាក្យបណ្តឹងថ្នាក់ជាតិរបស់ប្រទេសហូឡង់ ដែលបានបញ្ចប់ដំណើរការសម្រុះសម្រួល ដោយមិនមានការព្រមព្រៀងគ្នាណាមួយ រវាងអង្គការទាំង៣ដែលជាដើមបណ្តឹង និងភាគីក្រុមហ៊ុន អយកូក្រេឌីត (Oikocredit) ដែលវិនិយោគលើវិស័យមីក្រូហិរញ្ញវត្ថុនៅកម្ពុជា ដែលអង្គការទាំងនោះថា នាំឱ្យមានការរំលោភសិទ្ធិមនុស្សនៅក្នុងប្រទេសកម្ពុជា។
អង្គការមិនមែនរដ្ឋាភិបាលទាំងបី ដែលបានដាក់ពាក្យបណ្ដឹងនេះ រួមមាន អង្គការសិទ្ធិមនុស្សពីរនៅក្នុងប្រទេសកម្ពុជា គឺអង្គការលីកាដូ និងអង្គការសមធម៌កម្ពុជា ព្រមទាំងអង្គការ FIAN អាល្លឺម៉ង់។
ពួកគេបានដាក់ពាក្យបណ្ដឹង ទៅកាន់ស្ថាប័នទទួលពាក្យបណ្ដឹងថ្នាក់ជាតិរបស់រដ្ឋាភិបាលប្រទេសហូឡង សម្រាប់ការទទួលខុសត្រូវសកម្មភាពអាជីវកម្ម ដោយចោទប្រកាន់ក្រុមហ៊ុនអយកូក្រេឌីត ដែលជាវិនិយោគិនសង្គមជាសកល ថាបានបរាជ័យក្នុងការអនុវត្តវិធានការត្រួតពិនិត្យឲ្យបានគ្រប់ជ្រុងជ្រោយ និងធ្វើការវិនិយោគ ដែលផ្ដល់ផលប៉ះពាល់អវិជ្ជមាននៅក្នុងវិស័យមីក្រូហិរញ្ញវត្ថុនៅកម្ពុជា ចាប់តាំងពីឆ្នាំ២០១៧ បើទោះជាមានភស្តុតាងយ៉ាងច្បាស់លាស់អំពីផលប៉ះពាល់ដោយផ្ទាល់ ពាក់ព័ន្ធនឹងការវិនិយោគទាំងនោះក៏ដោយ។
សេចក្តីថ្លែងការណ៍របស់អង្គការទាំង៣ ដែលចេញផ្សាយនៅថ្ងៃទី២៨ ខែមករា ឆ្នាំ២០២៥នេះ បានលើកឡើងថា ដំណើរការសន្ធានកម្ម ឬដំណើរការសម្រុះសម្រួល ដែលបានចាប់ផ្តើមឡើង តាំងពីពេលមានការដាក់នូវពាក្យបណ្តឹងរបស់អង្គការទាំងបី ទៅកាន់ស្ថាប័នទទួលពាក្យបណ្តឹងថ្នាក់ជាតិនៃប្រទេសហូឡង់ កាលពីខែធ្នូ ឆ្នាំ២០២២ ពាក់ព័ន្ធនឹងការរំលោភបំពានសិទិ្ធមនុស្សយ៉ាងធ្ងន់ធ្ងរ នៅក្នុងវិស័យមីក្រូហិរញ្ញវត្ថុនៅកម្ពុជា ត្រូវបានបញ្ចប់ ដោយមិនមានការព្រមព្រៀងគ្នាណាមួយ រវាងភាគីនៃអង្គការទាំងបី និងភាគីក្រុមហ៊ុន Ecumenical Development Cooperative Society U.A. ឬ Oikocredit នោះទេ ។
ករណីនេះ ពួកគេ មានការខកចិត្តយ៉ាងខ្លាំង ដែលដំណើរការសន្ធានកម្មនេះ មិនបានផ្តល់លទ្ធផលជាដំណោះស្រាយឱ្យបានទាន់ពេលវេលា និងការអនុគ្រោះជាក់លាក់ណាមួយ ដល់កូនបំណុលជាច្រើននាក់នៅកម្ពុជា ដែលកំពុងរងគ្រោះពីការរំលោភសិទិ្ធមនុស្សនៅក្នុងវិស័យនេះ។
អង្គការទាំង៣នោះ បានលើកឡើងថា៖ «នៅក្នុងសេចក្តីថ្លែងការណ៍របស់ខ្លួន ដែលប្រកាសពីការបញ្ចប់នៃដំណើរការសន្ធានកម្មរបស់ស្ថាប័នទទួលពាក្យបណ្តឹងថ្នាក់ជាតិនៃប្រទេសហូឡង់ ក្រុមហ៊ុនសាជីវកម្ម Oikocredit បានប្រកាសពីជំហរបស់ខ្លួន ក្នុងការបង្កើតក្របខណ្ឌមួយ សម្រាប់យន្តការសន្ធានកម្មឯករាជ្យនៅកម្ពុជា និងមូលនិធិជាសាមគ្គីភាពសម្រាប់អនុគ្រោះលើបំណុល ដែលស្របទៅនឹងបទដ្ឋានអន្តរជាតិ រួមមាន គោលការណ៍ណែនាំរបស់អង្គការសហប្រជាជាតិស្តីពីសិទិ្ធមនុស្ស និងធុរកិច្ច។ យន្តការនេះ គឺជាអ្វីដែលពលរដ្ឋកម្ពុជាត្រូវការចាំបាច់បំផុតនាពេលបច្ចុប្បន្ន។ ក៏ប៉ុន្តែយើងខ្ញុំសោកស្តាយជាខ្លាំង ដែលក្រុមហ៊ុនសាជីវកម្មមួយនេះ មិនបានបញ្ជាក់ពីចំនួនទឹកប្រាក់ជាក់លាក់ ដែលខ្លួននឹងត្រូវដាក់បញ្ចូលក្នុងមូលនិធិខាងលើ ហើយនិងថាតើយន្តការនេះ នឹងត្រូវបានបង្កើតឡើង និងដំណើរការនៅពេលវេលាជាក់លាក់ណាមួយនោះទេ»។
សេចក្តីថ្លែងការណ៍របស់អង្គការសិទ្ធិមនុស្សទាំង៣ បន្តទៀតថា កូនបំណុលទាំងនោះ កំពុងត្រូវការ និងសមនឹងទទួលបាននូវយន្តការដោះស្រាយបណ្តឹងមួយដែលមានប្រសិទិ្ធភាព និងសំណងផ្នែកហិរញ្ញវត្ថុយ៉ាងសមរម្យ ពីអ្នកវិនិយោគអន្តរជាតិនានា ដែលបាន និងកំពុងបន្តទទួលបានប្រាក់ចំណេញយ៉ាងច្រើនលានដុល្លារអាមេរិក នៅខណៈដែលកូនបំណុលជាច្រើន ដែលជាប្រជាពលរដ្ឋនៅកម្ពុជាកំពុងរងទុក្ខវេទនា និងនៅតែបន្តរងគ្រោះពីសកម្មភាពរបស់គ្រឹះស្ថានមីក្រូហិរញ្ញវត្ថុ និងធនាគារនៅកម្ពុជា ដែលបានផ្តល់ប្រាក់កម្ចីបែបកេងប្រវ័ញ្ច ការប្រមូលឥណទានដោយបង្ខិតបង្ខំ ជាលក្ខណៈប្រព័ន្ធ និងស្ទើរតែទូទាំងប្រទេស ។
ប្រភពដដែល បន្តថា គ្រឹះស្ថានមីក្រូហិរញ្ញវត្ថុ និងធនាគារមួយចំនួន ក្នុងចំណោមគ្រឹះស្ថានទាំងនោះ ធ្លាប់ និងកំពុងទទួលបានការវិនិយោគពីក្រុមហ៊ុនសាជីវកម្ម Oikocredit ។ ស្ថានភាពនេះ បានបង្ហាញយ៉ាងច្បាស់ថា ការវិនិយោគរបស់ក្រុមហ៊ុនសាជីវកម្ម Oikocredit ចូលរួមក្នុងការរំលោភបំពានសិទិ្ធមនុស្ស និងបរាជ័យ ក្នុងការអនុលោមតាមគោលការណ៍ណែនាំ សម្រាប់សហគ្រាសពហុជាតិរបស់អង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា អង្គការសង្គមស៊ីវិលទាំងបី នៅតែជំហរបន្តស្វែងរកដំណោះស្រាយជូនជងរងគ្រោះ ពីសំណាក់អ្នកវិនិយោគអន្តរជាតិទាំងអស់ ដែលធ្លាប់ និងកំពុងវិនិយោគក្នុងវិស័យហិរញ្ញវត្ថុនៅកម្ពុជា និងអំពាវនាវដល់អ្នកវិនិយោគអន្តរជាតិទាំងនោះ ត្រូវផ្តល់នូវដំណោះស្រាយផ្នែកហិរញ្ញវត្ថុជាបន្ទាន់ ដល់កូនបំណុលជាច្រើននាក់ ដែលកំពុងរងគ្រោះពីការរំលោភសិទិ្ធមនុស្សយ៉ាងធ្ងន់ធ្ងរ ដោយសារប្រាក់កម្ចីរបស់គ្រឹះស្ថានមីក្រូហិរញ្ញវត្ថុ និងធនាគារនៅកម្ពុជា ។
លោកថា៖ «ចំពោះអង្គការទាំង៣ នៅតែប្រកាន់ជំហរក្នុងការស្វែងរកដំណោះស្រាយ ដោយយុត្តិធម៌សម្រាប់ជនរងគ្រោះ ដែលកើតចេញពីការរំលោភសិទ្ធិមនុស្សនៅក្នុងវិស័យមីក្រូហិរញ្ញវត្ថុ លើការវិនិយោគរបស់ក្រុមហ៊ុន អយកូក្រេឌីតហ្នឹង។ យើងនៅតែបន្តនូវការសន្ទនា និងស្វែងរកដំណោះស្រាយជាក់លាក់ និងតាមនីតិវិធី ជាពិសេសគឺចង់ឱ្យមានការស្រាវជ្រាវ ការស៊ើបអង្កេត ហើយនិងដំណោះស្រាយពេញលេញ ស្វែងរកដំណោះស្រាយ ហើយនិងដំណោះស្រាយពេញលេញ ដោយធានាចំពោះពួកគាត់ និងការអនុគ្រោះបំណុលផ្សេងៗដល់ពួកគាត់ដែលជាជនរងគ្រោះហ្នឹង»។
ស្ថាប័នមីក្រូហិរញ្ញវត្ថុចំនួនបី ដែលទទួលបានប្រាក់ពីក្រុមហ៊ុនអយកូក្រេឌីត រួមមាន ប្រាសាក់ អិលអូអិលស៊ី និងអម្រឹត។ នេះបើតាមនាយកប្រតិបត្តិនៃអង្គការសមធម៌កម្ពុជា លោក អៀង វុទ្ធី ដែលធ្លាប់ប្រាប់សារព័ត៌មាននានាកន្លងមក។
វីអូឌី មិនអាចសុំការបញ្ជាក់ពីខាងក្រុមហ៊ុនអយកូក្រេឌីត និងមីក្រូហិរញ្ញវត្ថុនៅកម្ពុជា ដូចជា ប្រាសាក់ អិលអូអិលស៊ី និងអម្រឹត បានទេ នៅថ្ងៃនេះ ។
តាមរយៈសេចក្ដីប្រកាសព័ត៌មានរបស់ក្រុមហ៊ុន Oikocredit កាលពីថ្ងៃទី២៤ ខែមករា ឆ្នាំ២០២៥ បានបញ្ជាក់ថា ក្រុមហ៊ុនបានបញ្ចប់ដំណើរការសម្រុះសម្រួលជាមួយអង្គការទាំង៣ ដែលគាំទ្រដោយអង្គការ OECD ហើយកិច្ចពិភាក្សានោះ មានគោលបំណងដោះស្រាយបញ្ហាបំណុលលើសលប់ក្នុងវិស័យមីក្រូហិរញ្ញវត្ថុរបស់កម្ពុជា ដែលបានគូសបញ្ជាក់ពីតម្រូវការសម្រាប់ការអនុវត្តការផ្តល់ប្រាក់កម្ចីប្រកបដោយក្រមសីលធម៌។
អង្គការនេះ កំពុងបង្កើតក្របខណ្ឌការសម្រុះសម្រួលថ្មី និងកន្លែងផ្តល់ជំនួយសង្គ្រោះសម្រាប់អ្នកខ្ចី រួមជាមួយនឹងកម្មវិធីផ្តល់អំណាចដល់អតិថិជន ដែលរួមមានចំណេះដឹងផ្នែកហិរញ្ញវត្ថុ និងការប្រឹក្សាបំណុល។ ការប្ដេជ្ញាចិត្តរបស់ Oikocredit ក្នុងការលើកកម្ពស់ជីវិតពលរដ្ឋនៅកម្ពុជានៅតែធ្វើបន្ត។
ជុំវិញករណីនេះ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុកម្ពុជា លោក មាស សុខសេនសាន សុំមិនអធិប្បាយទេ។ កន្លងមក អង្គការសិទ្ធិមនុស្សទាំង៣ បានបញ្ជាក់ថា បើទោះមានភស្តុតាងជាច្រើនក្តី ក៏ក្រុមហ៊ុនអយកូក្រេឌីត នៅតែបង្កើនការវិនិយោគរបស់ខ្លួននៅក្នុងវិស័យមីក្រូហិរញ្ញវត្ថុនៅកម្ពុជា ដោយកើនឡើងពី ៥០លានអឺរ៉ូ នៅឆ្នាំ២០១៧ ទៅដល់ជាង ៦៧លានអឺរ៉ូ គិតត្រឹមខែកញ្ញា ឆ្នាំ២០២២ ដែលការវិនិយោគននោះធ្វើឲ្យប្រទេសកម្ពុជាក្លាយជាប្រទេស ដែលទទួលបានការវិនិយោគធំទី២ របស់ក្រុមហ៊ុនអយកូក្រេឌីត៕
