គណបក្សកម្លាំងជាតិ ថាការចាប់ខ្លួនសមាជិកបក្សរបស់ខ្លួនមួយរូបទៀតនៅក្រុងដូនកែវ ខេត្តតាកែវ ជាការបន្តធ្វើទុក្ខបុកម្នេញផ្នែកនយោបាយ ដោយគណបក្សក្រៅរដ្ឋាភិបាលមួយនេះ អំពាវនាវដល់អាជ្ញាធរមានសមត្ថកិច្ច ដោះលែង លោក ផាន់ សារ៉ាត់ និងសកម្មជននយោបាយទាំងអស់ ឱ្យមានសេរីភាពវិញ ដើម្បីធានាបាននូវបរិយាកាសនយោបាយល្អនៅកម្ពុជា។
សេចក្តីថ្លែងការណ៍របស់គណបក្សកម្លាំងជាតិ ចុះថ្ងៃទី២៩ ខែមករា ឆ្នាំ២០២៥ ឱ្យដឹងថា លោក ផាន់ សារ៉ាត់ អាយុ ៤៧ឆ្នាំ ជាអនុប្រធានគណៈកម្មាធិការប្រតិបត្តិក្រុងដូនកែវ នៃគណបក្សកម្លាំងជាតិ ត្រូវបានជនស្លៀកពាក់ស៊ីវិល ចាប់ខ្លួនកាលពីថ្ងៃម្សិលមិញ នៅចំនុចភូមិធន់មន សង្កាត់បារាយណ៍ ក្រុងដូនកែវ ខេត្តតាកែវ ដោយមិនដឹងមូលហេតុ និងគ្មានការបង្ហាញដីកាចាប់ខ្លួនឡើយ។
គណបក្សនេះ ចាត់ទុកការចាប់ខ្លួនលោក ផាន់ សារ៉ាត់ ដែលជាសកម្មជនបក្សមួយរូបទៀតនេះថាជារូបភាពបំភិតបំភ័យថ្មីមួយទៀត និងជាការបន្តធ្វើទុក្ខបុកម្នេញទៅលើថ្នាក់ដឹកនាំ និងសមាជិក សមាជិកាបក្ស ដោយឥតឈប់ឈរ ដែលធ្វើឱ្យប៉ះពាល់យ៉ាងធ្ងន់ធ្ងរដល់ដំណើរការនៃការអនុវត្តគោលការណ៍លទ្ធិប្រជាធិបតេយ្យសេរីពហុបក្ស នៅកម្ពុជា។
ករណីនេះ គណបក្សកម្លាំងជាតិ បានអំពាវនាវដល់អាជ្ញាធរមានសមត្ថកិច្ច ដោះលែង លោក ផាន់ សារ៉ាត់ និងអ្នកជាប់ឃុំនយោបាយទាំងអស់ ឱ្យមានសេរីភាពឡើងវិញ ដើម្បីធានានូវបរិយាកាសនយោបាយល្អ ដល់គ្រប់គណបក្សនយោបាយ ក្នុងការធ្វើសកម្មភាពនយោបាយ ដោយមិនមានការព្រួយបារម្ភ ស្របតាមរដ្ឋធម្មនុញ្ញ និងច្បាប់ស្តីពីគណបក្សនយោបាយ។
ទីប្រឹក្សាគណបក្សកម្លាំងជាតិ លោក រ៉ុង ឈុន មានប្រសាសន៍បន្ថែមលើសេចក្តីថ្លែងការណ៍ថា លោក ផាន់ សារ៉ាត់ ត្រូវបានជនស៊ីវិលមួយក្រុម ចាប់ខ្លួនកាលពីម៉ោងប្រមាណ ៤រសៀលថ្ងៃម្សិលមិញ ហើយគិតមកដល់ម៉ោង៣រសៀលថ្ងៃពុធនេះ ខាងគណបក្សនៅមិនទាន់ដឹងថា គេចាប់បញ្ជូនរូបគាត់ទៅទីណានៅឡើយ។ លោកបន្តថា លោក ផាន់ សារ៉ាន់ ជាសកម្មជនគណបក្ស ដ៏សកម្មមួយរូបប្រចាំនៅក្រុងដូនកែវ ខេត្តតាកែវ។
លោកបន្តថា៖ «បើយើងពិនិត្យមើលទៅ គាត់[លោក ផាន់ សារ៉ាត់]មិនបានប្រព្រឹត្តអ្វីខុសឆ្គងអីទេ ហើយចឹងយើងឃើញថារូបភាពនៃការចាប់ ជាការគំរាមកំហែង ការបំភិតបំភ័យទៅដល់សកម្មជនផ្សេងៗទៀត ហើយយើងមិនចង់ឃើញរូបភាពការចាប់បន្តទៅទៀតទេ ពីព្រោះធម្មតាសង្គមបើប្រជាធិបតេយ្យ វាត្រូវតែបើកលំហរសិទ្ធិនយោបាយឱ្យបានគ្រប់គ្រាន់ ហើយបើសិនជានៅតែការប្រើប្រាស់ ចាប់បន្តបន្ទាប់ អីចឹងវាឆ្លុះបញ្ចាំងថា សង្គមយើងមិនទាន់បានផ្តល់នូវលំហសេរីភាពនយោបាយហ្នឹងបានពេញលេញ ចឹងដំណើរការបោះឆ្នោតនៅពេលខាងមុខ ក៏មិនអាចកំណត់ថាដំណើរការបោះឆ្នោតហ្នឹង វាត្រឹមត្រូវ យុត្តិធម៌ដែរ»។
លោក រ៉ុង ឈុន ក៏បានអំពាវនាវដល់អាជ្ញាធរពាក់ព័ន្ធ ត្រូវផ្តល់សេរីភាពជូន លោក ផាន់ សារ៉ាត់ ឡើងវិញ ដោយគ្មានលក្ខខណ្ឌ។
លោក នុត សារុម នាយរងផ្នែកព្រហ្មទណ្ឌនៅក្រុងដូនកែវ មានប្រសាសន៍យ៉ាងខ្លីថា នគរបាលសន្តិសុខផ្ទៃក្នុង បានចុះទៅចាប់ លោក ផាន់ សារ៉ាត់ ដោយផ្ទាល់ និងបានបញ្ជូនទៅសួរនាំភ្លាមៗនៅរាជធានីភ្នំពេញ។ តែយ៉ាងណា លោកមិនដឹងថា ការចាប់ខ្លួននោះ ពាក់ព័ន្ធនឹងករណីអ្វីនោះ ខណៈលោកគ្រាន់តែជាសមត្ថកិច្ចមូលដ្ឋាន ដែលចូលរួមសហការតែប៉ុណ្ណោះ។
វីអូឌី មិនអាចសុំការអត្ថាធិប្បាយជុំវិញករណីនេះ ពីស្នងការនគរបាលខេត្តតាកែវ លោក ម៉ែន លី អ្នកនាំពាក្យស្នងការនគរបាលរាជធានីភ្នំពេញ លោក សំ វិច្ឆិកា និងអ្នកនាំពាក្យរងក្រសួងមហាផ្ទៃ លោក ទូច សុខៈ បានទេ នៅរសៀលថ្ងៃពុធនេះ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា លីកាដូបានទទួលព័ត៌មានពីករណីចាប់ខ្លួន លោក ផាន់ សារ៉ាត់ នេះដែរ និងកំពុងឃ្លាំមើល និងប្រមូលព័ត៌មានជុំវិញការចាប់ខ្លួននេះ ថាតើកើតឡើងដោយសារមូលហេតុអ្វីអោយបានពិតប្រាកដ។
លោកបន្តថា៖ «អីចឹងជារួមទៅយើងឃើញហើយ ការចាប់ខ្លួនទៅលើសកម្មជនគណបក្សនយោបាយណាមួយ វាតែងមានការរិះគន់ពីការចាប់ខ្លួនហ្នឹង ប៉ុន្តែយើងជាអង្គការសង្គមស៊ីវិល យើងទទួលព័ត៌មាននេះ គឺយើងត្រូវធ្វើការស្រាវជ្រាវស្វែងរកព័ត៌មានឱ្យបានជាក់លាក់ ហើយនិងមូលហេតុនៃការចាប់ខ្លួនឱ្យបានជាក់លាក់ជាមុនសិន»។
គិតមកទល់ពេលនេះ រដ្ឋាភិបាលរបស់ លោក ហ៊ុន ម៉ាណែត នៅតែបន្តចាប់ និងឃុំខ្លួនអ្នក នយោបាយ អ្នកការពារសិទ្ធិមនុស្ស សកម្មជនបរិស្ថាន សហជីព និងអ្នកប្រើប្រាស់បណ្ដាញសង្គម កើនឡើងដល់ជាង ១០០នាក់ ដោយចោទប្រកាន់ពីបទល្មើសព្រហ្មទណ្ឌមួយចំនួន ដោយសារតែភាពសកម្មនិយម និងការបញ្ចេញមតិ ដោយអហិង្សា។
បើតាមមន្ត្រីបក្សប្រឆាំង មានអ្នកនយោបាយនៅក្រៅរដ្ឋាភិបាល យ៉ាងហោចណាស់ជិត ៥០ នាក់ ត្រូវបានចាប់ខ្លួនជាបន្តបន្ទាប់ តាំងពីលោកនាយករដ្ឋមន្ត្រី ហ៊ុន ម៉ាណែត ឡើងកាន់ អំណាច។
ដោយឡែក សម្រាប់តែគណបក្សកម្លាំងជាតិមួយ គឺមានក្បាលម៉ាស៊ីនរបស់គណបក្សនេះជាច្រើននាក់ ត្រូវបានចាប់ខ្លួន ក្នុងនោះមាន លោក ស៊ុន ចន្ធី អតីតប្រធានគណបក្ស លោក អ៊ុំ វីរៈរដ្ឋ អគ្គហិរញ្ញិកគណបក្ស(ត្រូវបានដោះលែងវិញក្រោយចុះចូល) លោក ជិន ប៊ុនណ្ណារ័ត្ន អគ្គនាយករដ្ឋបាល លោក មឺ សេងហ៊ ហៅ គា វិសាល អនុប្រធានគណបក្សកម្លាំងជាតិខេត្តកំពង់ចាម និងចុងក្រោយនេះមានការចាប់ខ្លួនលោក ផាន់ សារ៉ាត់ អនុប្រធានគណៈកម្មាធិការប្រតិបត្តិក្រុងដូនកែវ ជាដើម។
សភាសហភាពអឺរ៉ុប កាលពីចុងខែវិច្ឆិកា ឆ្នាំ២០២៤ បានចេញសេចក្ដីសម្រេចដោយជំរុញឱ្យរដ្ឋសមាជិកសហភាពអឺរ៉ុប និងសហគមន៍អន្តរជាតិ ចាត់វិធានការដាក់ទណ្ឌកម្មឱ្យមានប្រសិទ្ធភាពលើក្រុមមនុស្ស ដែលទទួលខុសត្រូវលើការរឹតត្បិតផ្នែកនយោបាយ និងដាក់សម្ពាធលើរដ្ឋាភិបាលកម្ពុជា រហូតទាល់តែអ្នកទោសនយោបាយទាំងអស់ ត្រូវបានដោះលែង៕
