កម្ពុជា៖ ការបង្កក​ជំនួយរបស់អាមេរិកប៉ះពាល់គម្រោងខ្លះ​​តែ​មិន​​ប៉ះ​ពាល់​ដល់​ការ​អភិវឌ្ឍ​ប្រទេស​

មន្ត្រី​រដ្ឋាភិបាល បញ្ជាក់​ថា​ ការ​ផ្អាកជំនួយបរទេសរយៈពេល ៩០ថ្ងៃ របស់សហរដ្ឋអាមេរិក តាម​រយៈ​​គម្រោង​​នានានៃទីភ្នាក់ងារ USAID នៅទូទាំងពិភពលោក ក៏បាន​ប៉ះ​ពាល់​​​​​​​គម្រោង​មួយ​ចំនួន​​​ដែល​រដ្ឋាភិបាលសហការ​ជាមួយ USAID​ដែរ ក្នុងនោះវិស័យសម្អាត​​មីន​ មាន​បុគ្គលិក​​​ជាង ១ពាន់​​នាក់ ប្រឈម​នឹង​អត់​ការងារ ខណៈ​សង្គមស៊ីវិល​មួយ​ចំនួន ​​ក៏បារម្ភពីប្រតិបត្តិការ​​ការ​ងារ​របស់​ខ្លួន ដោយ​ពួកគេ​​​អំពាវនាវ​ដល់​​​សហរដ្ឋអាមេរិក ពិចារណាឡើងវិញពីបញ្ហាបង្កក​ជំនួយ​នេះ។

កាលពីថ្ងៃទី២០ ខែមករា ឆ្នាំ២០២៥ ក្រោយពីលោកប្រធានាធិបតី ដូណាល់ ត្រាំ បា​ន​ចូល​កាន់​តំណែង លោកបានចុះហត្ថលេខាលើ​បទបញ្ជាប្រតិបត្តិ​ឱ្យ​ផ្អាកជំនួយ​ទៅក្រៅប្រទេស​ទាំង​អស់ នៃ​កម្មវិធីរបស់​ទីភ្នាក់ងារ​ USAID ក្នុង​រយៈពេល ៩០ថ្ងៃ ដើម្បី​ពិនិត្យ​មើលឡើង​វិញ ពីប្រសិទ្ធភាព និង​ភាព​ស៊ី​សង្វាក់​នៃ​​​គោល​នយោបាយ​ការបរទេស​រដ្ឋការរបស់​លោក។ ការ​ផ្អាក​នេះ ជា​កិច្ច​ខិត​ខំ​ប្រឹង​ប្រែង​មួយ​ ដើម្បី​ធានា​ថា ជំនួយ​​បរទេស​​របស់​អាមេរិក​ឆ្លុះបញ្ចាំងពីតម្លៃរបស់អាមេរិក និង​បម្រើ​ផលប្រយោជន៍ជាតិ។ 

តែយ៉ាងណា ចំណាត់​ការ​របស់រដ្ឋការលោក ត្រាំ បានបង្ក​​ជាក្តី​បារម្ភយ៉ាងខ្លាំង​ពី​​អន្តរ​ជាតិ ក្នុង​នោះ​​ក៏​មាន​សង្គមស៊ីវិល​ដែលទទួលជំនួយ​ដោយ​​ផ្ទាល់​និង​​ប្រយោល​ពីទីភ្នាក់ងារ​ USAID នៅ​​កម្ពុជា​​ផង​​ដែរ​ ដោយសារ​សហរដ្ឋអាមេរិក គឺជាអ្នកផ្តល់ជំនួន​ធំបំផុតនៅក្នុងពិភព​លោក។

អនុប្រធានទី១នៃអាជ្ញាធរមីន​ លោក លី ធុជ បានប្រាប់សារព័ត៌មាន​ក្នុងស្រុក​ អំឡុង​ពិធី​ចុះ​ហត្ថ​លេខា​លើ​កិច្ច​ព្រមព្រៀង​អូស្ត្រាលីផ្តល់ជំនួយ​ដល់​កម្ពុជា នៅថ្ងៃទី៣០ ខែមករា​ថា នៅ​កម្ពុជា សហរដ្ឋ​អាមេរិក បាន​ផ្តល់​ជំនួយជាថវិកា​ប្រមាណ ១០​លាន​​ដុល្លារ​ក្នុង​មួយ​ឆ្នាំ លើកា​រ​ងារ​​បោស​សម្អាត​​មីន ទៅ​ដល់​ប្រតិ​បត្តិករបោសអម្អាតមីន ប៉ុន្តែ​​ក្រោយ​​ពី​​​រដ្ឋការ​​​លោកត្រាំ បាន​បង្កក​ជំនួយ​​ដល់​​គម្រោង USAID រយៈពេល៩០ថ្ងៃ បាន​ធ្វើឱ្យ​ប៉ះពាល់​ដល់​ក្រុម​អ្នក​ដោះមីន​ចំនួន ៩៣​ក្រុម ឬ​ស្មើនឹង​បុគ្គលិក​ជាង ១ពាន់​នាក់ ដែល​ត្រូវ​ប្រឈម​នឹង​ការ​អត់​ការ​​ងារ​​ធ្វើ ហើយ​ប៉ះ​ពាល់​ដល់​លទ្ធផល​ដែល​រំពឹង​​ទុក​ក្នុង​​ឆ្នាំ​​២០២៥ ដែលត្រូវផ្អាកការងាររយៈពេល ៣ខែនេះ។

លោកបន្តថា៖ «ចឹង​យើងសង្ឃឹមយ៉ាងមុតម៉ាំថា សហរដ្ឋ​អាមេរិក ដែលតែងតែជួយដល់វិស័យ​បោស​សម្អាត​មីននៅកម្ពុជាយើងជាច្រើន​ទស្សវត្សរ៍​មក​នេះ នឹងបន្តជួយ​ទៅ​ទៀត បន្ទាប់​​ពី​គោល​​​​នយោបាយ​​​ផ្អាក ៩០ថ្ងៃខាង​មុខ​នេះ អីចឹង​យើង​សង្ឃឹមថានឹង​វិល​មក នឹង​បន្ត​នូវ​គម្រោង​ដែល​​យើងបាន​ចាប់​ផ្តើម​ជាមួយគ្នា​ កសាង​ភាពជាដៃគូរ​ដ៏ល្អនេះ»។

លោក លី ធុជ ក៏បានអំពាវនាវ​ដល់ដៃគូរនៃ​បណ្តា​ប្រទេស​​​ផ្សេងៗ ជួយជាបណ្តោះអាសន្ន​ដល់​បុគ្គលិក​​​បោស​​សម្អាត​​មីនដែលជួបបញ្ហាប្រឈម​ ដើម្បី​ជួយ​សម្រួល​​ដល់ជីវភាព​ពួក​គាត់ ក្នុង​​អន្តរ​ការ​​ដែល​​អាមេរិក​​ផ្អាក​ជំនួយ​​រយៈ​ពេល​៣ខែនេះផងដែរ។

អ្នកនាំពាក្យរដ្ឋាភិបាល​កម្ពុជា លោក ប៉ែន បូណា បានប្រាប់សារព័ត៌មានក្នុងស្រុកនៅថ្ងៃទី៣១ ខែ​មករា​នេះ​​ថា ការ​សម្រេច​​​បង្កក​ថវិកា​ជាសិទ្ធិរបស់រដ្ឋាភិបាល​អាមេរិក ហើយ​ការ​សម្រេច​នេះ​ពាក់​ព័ន្ធ​នឹង​គម្រោង​​របស់​ទីភ្នាក់​ងារ USAID នៅទូទាំងពិភព​លោក មិន​មែន​តែ​នៅ​កម្ពុជា​នោះ​ទេ។

​ទោះយ៉ាង​ណា លោកថា រដ្ឋាភិបាលកម្ពុជា ក៏មាន​ផលប៉ះ​ពាល់​លើ​គម្រោងមួយចំនួន​ដែល​កម្ពុជា​មាន​កិច្ច​សហប្រតិបត្តិ​ការ​​ជាមួយ USAID ដែរ ដូចជា វិស័យ​កសិកម្ម សុខាភិបាល អប់រំ និង​ផ្នែក​បោស​សម្អាត​មីន​​ជា​ដើម ប៉ុន្តែគម្រោង​ទាំងនោះ​ មិន​បាន​បង្កជា​ឧបសគ្គ​ដល់​ការ​អភិវឌ្ឍ​ទៅ​មុខ​របស់​កម្ពុជា​នោះ​ទេ។

លោកថា៖ «អីចឹងប៉ះកន្លែងណា យើងនឹងព្យាយាម​ដោះស្រាយ​កន្លែងហ្នឹង ប៉ុន្តែសួរថាតើផល​ប៉ះ​ពាល់​ទាំងអស់ហ្នឹង វាបង្ក​ឧបសគ្គរារាំង​ដល់​ដំណើរការ​អភិវឌ្ឍប្រទេស​ទេ ធ្វើ​ឱ្យ​សេដ្ឋកិច្ចកម្ពុជា​គាំង​ទេ រដ្ឋាភិបាលកម្ពុជាគាំងដំណើរទេ? អត់មាន​ទេ វា​ទៅតាមវិស័យ ហើយ​វិស័យ​​មួយ​​ៗ​ហ្នឹង​យើង​ដោះស្រាយទៅតាមអ្វីដែលយើងដោះស្រាយបាន ជាទម្លាប់​កន្លងមក រាជរដ្ឋាភិបាល​យើង​មាន​​ដៃគូរ​អភិវឌ្ឍន៍ហ្នឹងច្រើន មានកិច្ចសហប្រតិបត្តិការ​គ្នា មានប្រភព​ជំនួយផ្សេងៗក៏ច្រើន ចឹង​យើង​អាច​​ផ្លាស់ប្តូរពីមួយទៅមួយ»។ ​

អ្នកនាំពាក្យ​ក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា បាន​ឱ្យដឹងតាម​រយៈ​សំណេរ​​ក្នុង​​តេឡេក្រាម​​ថា ក្រសួង​កសិកម្ម មាន​​កិច្ចសហការមួយចំនួនជាមួយ​មូល​និធិ USAID តែ​កិច្ច​សហការ​​ទាំង​នោះ ធ្វើឡើង​ក្នុង​រូបភាព​ជា​ការ​គាំទ្រ​ដោយ​​​ប្រយោល ដែល​មិន​ប៉ះ​ពាល់​ដល់​ដំណើរ​ការ​​ងារ​​របស់​ក្រសួង​​ឡើយ។ តែយ៉ាងណា កញ្ញា​​ថា ក្រសួងស្វាគមន៍នូវរាល់ជំនួយ ការ​គាំទ្រ និង​កិច្ចសហការប្រកបដោយភាព​ស្មោះត្រង់ ពី​អង្គការ​ដៃគូអភិវឌ្ឍន៍​​នានា​ជានិច្ច ហើយ​ក្រសួង​​នៅ​តែ​​បន្ត​បំពេញ​តួនាទី និង​ភារកិច្ចរបស់ខ្លួន ប្រកប​ដោយ​ការ​ទទួល​ខុស​ត្រូវ​ខ្ពស់ ដើម្បី​ផល​ប្រយោជន៍​ប្រជា​កសិករ និង​​ប្រជា​ពលរដ្ឋ​។

ចំណែក​ អ្នកនាំពាក្យក្រសួងបរិស្ថាន លោក ខ្វៃ អាទិត្យា មានប្រសាសន៍ថា គម្រោង​របស់​ទីភ្នាក់​ងារ USAID របស់​អាមេរិក ក្នុង​វិស័យ​​បរិស្ថាន​នៅក​ម្ពុជា ភាគ​ច្រើន​ផ្តោត​ទៅ​លើ​ការ​​ជួយ​ដល់​សហគមន៍​នៅ​មូល​ដ្ឋាន​។ តែយ៉ាងណា លោក​សុំមិនអត្ថាធិប្បាយពីកម្រិត​នៃ​​ផលប៉ះពាល់ ដោយ​ថា រងចាំ​មើល​ការ​សម្រេចរបស់​សហ​រដ្ឋ​អាមេរិក។ 

បើតាមការ​ចុះផ្សាយរបស់​ខេមបូចា នៅថ្ងៃទី​២៩ ខែមករា បាន​ឱ្យដឹង​ថា ទីភ្នាក់ងារ​សហរដ្ឋ​អាមេរិក​​​សម្រាប់​ការ​អភិវឌ្ឍអន្តរជាតិ ហៅកាត់ថា USAID បាន​ចាត់ចែ​ង​​ថវិកា​ចំនួន ២២,៦​ពាន់​​​លាន​​​ដុល្លារ​ ក្នុងឆ្នាំ២០២៥ នៅទូទាំងពិភពលោក។

សម្រាប់​​នៅកម្ពុជា ក្នុងរយៈពេល​ ៣ទស្សវត្សរ៍មក​នេះ ទីភ្នាក់​ងារ​ USAID បានផ្តល់ជំនួយ​ជាង ៣​ពាន់​លាន​ដុល្លារ​ដល់​វិស័យ​ផ្សេងៗ ដូចជា វិស័យសុខាភិបាល កសិកម្ម បរិស្ថាន អភិបាលកិច្ចល្អ ការ​​អប់រំ សិទ្ធិមនុស្ស​​ និង​វិស័យ​បោស​សម្អាតមីននេះជាដើម។ ​

ក្នុងអំឡុងពេលទស្សនកិច្ចនៅកម្ពុជា កាលពីខែតុលា ឆ្នាំ២០២៤ លោកស្រី សាម៉ាន់ថា ផាវើ នាយិកា​​ទីភ្នាក់​ងារ​ USAID បានប្រកាស​ផ្តល់ជំនួយ​​ជាង ១៧លានដុល្លារ ដើម្បី​កែលម្អការ​​ថែ​ទាំ​សុខ​​ភាព និង ២៩លានដុល្លារសម្រាប់​កម្មវិធី​ Food for progress ដើម្បីពង្រឹងវិស័យកសិកម្ម និង​ស្បៀង​អាហារ ព្រមទាំង​បានផ្តល់ថវិកា​ជាង ៦លាន​ដុល្លារ​សម្រាប់​សង្គមស៊ីវិល ប្រព័ន្ធផ្សព្វផ្សាយ និងគំនិត​ផ្តួចផ្តើម​ការងារផ្សេងៗទៀត រួមជាមួយនឹងប្រាក់ ៣លាន​ដុល្លារ​ទៀត ពីក្រសួងការ​ងារ​សហរដ្ឋអាមេរិក ដើម្បីគាំទ្រ​ដល់កិច្ចសហការ និងផ្តល់ឱ្យកាស​សម្រាប់ជនពិការ។

អ្នកនាំពាក្យ​ទីភ្នាក់ងារ USAID ប្រចាំ​នៅកម្ពុជា​ បានឆ្លើយតបអ៊ីម៉ែល​យ៉ាងខ្លីដល់សារព័ត៌មាន​នៅថ្ងៃទី៣០ ខែមករា​​ថា ​ដើម្បីធ្វើការពិនិត្យឡើងវិញឱ្យបានហ្មត់ចត់ នៅពេលនេះ​រាល់​កម្ម​វិធី និង​ជំនួយទាំងអស់ដែលប្រើប្រាស់មូលនិធិជំនួយ​បរទេសត្រូវបានផ្អាក លើកលែងតែកម្មវិធី និង​ជំនួយ​​ណា ដែ​លទទួលបានការលើកលែង ដែល​អនុម័តដោយក្រសួងការបរទេសប៉ុណ្ណោះ។

ប្រភពដដែល បន្ត​ថា ក្រសួងការបរទេស បានអនុម័តយល់ព្រមផ្តល់ជំនួយមនុស្សធម៌ ហើយ​អ្នក​អនុវត្ត​កម្មវិធី​ជំនួយមនុស្សធម៌ ដែលមានស្រាប់គួរតែបន្ត ឬបន្តធ្វើការងារឡើងវិញ។ 

អ្នក​គ្រប់គ្រង​កម្មវិធីការងារនៃ​អ​ង្គការ​សង់ត្រាល់ លោក ឃុន ថារ៉ូ មាន​ប្រសាសន៍ថា ជំនួយ​តាម​រយៈ USAID មាន​សារសំខាន់ណាស់ក្នុងការ​ជួយ​ដល់ស្ថានភាព​​សង្គម និង​សេដ្ឋកិច្ច​នៅ​កម្ពុជា ព្រោះ​ជំនួយដែលមានរយៈជាង៣០ឆ្នាំមក​នេះ ជួយ​​ខ្លាំង​ទៅលើ​វិស័យ​សេវាសាធារណៈ ជាពិសេស​ផ្នែក​សុខាភិបាល បរិស្ថាន អប់រំជាដើម និងបានជួយដល់សង្គមស៊ីវិលក្នុង​វិស័យ​សិទ្ធិ​មនុស្ស និង​ការ​ពង្រឹង​ប្រជាធិបតេយ្យ។​ លោកបន្តថា គេនៅពុំទា​ន់ដឹងថាអាមេរិកនឹង​សម្រេច​យ៉ាង​ណា​នៅ​ឡើយ ដោយ​រង​ចាំ​មើល​​បន្ទាប់​ពី​គ្រប់ ៩០ថ្ងៃ។ 

តែយ៉ាងណា លោក​ថា ចង់មិនចង់ការ​ផ្អាក​ជំនួយក្នុងរយៈពេល ៩០ថ្ងៃនេះ បាន​ប៉ះ​ពាល់​ខ្លះ​ដល់​ដំណើរ​ការ​​ប្រតិ​បត្តិកា​រងារ​របស់​សង្គមស៊ីវិល និង​ការអនុវត្តសកម្មភាពការងាររបស់ពួកគេ ខណៈ​រដ្ឋាភិបាល​​​ក៏​មានផលប៉ះពាល់ខ្លះដែរ ក្នុងនោះក៏មាន​ខាងក្រុមប្រតិបត្តិ​ការ​បោស​សម្អាត​មីន​ជា​ដើម​នេះ។

ករណី​នេះ លោក​បានជំរុញដល់រដ្ឋាភិបាល​កម្ពុជា ត្រូវ​ពង្រឹងផ្នែកទំនាក់ទំនង​ការ​ទូត​ជាមួយ​អាមេ​រិក កែលម្អ​ស្ថានភាពសិទ្ធិមនុស្ស ប្រជាធិបតេយ្យ និងចាប់យកឱកាស​ផ្នែកសេដ្ឋកិច្ច ដើម្បី​ផល​ប្រយោជន៍​រួម​សម្រាប់ពលរដ្ឋកម្ពុជា។ 

លោក​ថា៖ «ចឹង​​​ឆន្ទៈផ្នែក​នយោបាយ​នៃ​ការ​​រ​ក្សា​​ទំនាក់ទំនងការ​ទូត ការ​ទូត​ផ្នែក​ពាណិជ្ជកម្ម​នេះ​សំខាន់​ណាស់​សម្រាប់​កម្ពុជា​យើង។​ ដោយឡែកវាត្រូវ​មានតួអង្គទាំងអស់ ត្រូវ​​ចូល​រួម ទាំង​អង្គ​ការ​​សង្គ​ម​ស៊ីវិល ដែលធ្វើការ​រឿង​សិទ្ធិមនុស្ស អភិបាលកិច្ច ទាក់ទងទៅនឹងវិស័យ​ផ្សេង​ៗហ្នឹង គឺ​ដើរតួនាទីសំខាន់​ណាស់ នៅក្នុងការ​លើក​ឡើង​អំពី​បញ្ហា​ដែលយើង​​​កំពុង​ជួបប្រទះហ្នឹង ជាពិសេស​គឺ​ផលប៉ះពាល់​ដែលអាចប្រឈមក្នុង​រយៈពេល​ប៉ុន្មានខែខាងមុន​​នេះ ក៏​ដូច​ជា​ទៅ​ថ្ងៃ​អនាគត​ អីចឹង​​យើង​​ត្រូវ​​ធ្វើយ៉ាងណាបន្ត​រក្សានៅស្ថានភាព ស្ថេរភាពផ្នែក​នយោ​បាយ​មួយ​ដែល​ល្អ រង​ចាំ​ឱកាស​​មួយ»

នាយកប្រតិបត្តិសមាគមបណ្តាញយុវជនកម្ពុជា(CYN) លោក ហេង គីមហុង មានប្រសាសន៍​​ថា លោក​មា​នកា​រ​សោកស្តាយចំពោះ​ការ​ផ្អាក​ជំនួយ​របស់អាមេរិករយៈ​ពេល ៩០ថ្ងៃនេះ ដែល​នឹង​បន្ថែម​ភាព​តាន​តឹង​សម្រា​​ប់​សង្គមស៊ីវិល និងពលរដ្ឋ​កម្ពុជា​​ ខណៈ​​កាល​ពី​ខែ​កញ្ញា ឆ្នាំ​២០២៤ រដ្ឋាភិបាល​​ស៊ុយ​​អ៊ែត បានផ្អាកជំនួយ និងបានបិទស្ថានទូតរបស់​ខ្លួន​នៅកម្ពុជា ដែល​ធ្វើ​ឱ្យ​អង្គ​ការ​​សង្គម​​ស៊ីវិល​​ជួបបញ្ហាប្រឈមម្តងរួចមកហើយ។

លោកបន្ត​​ថា ជំនួយ​ពីសហរដ្ឋអាមេរិក ក៏ដូចជាម្ចាស់ជំនួយ​ផ្សេងទៀត ពិត​ជា​មាន​សារ​សំខាន់​ណាស់ ក្នុង​ការ​​រួម​ចំណែក​​លើកកម្ពស់ជីវភាពប្រជាពលរដ្ឋ ប្រជាធិបតេយ្យ ការ​អប់រំ សិទ្ធិ​មនុស្ស កិច្ច​ការ​​ពារ​​បរិស្ថាន និង​វិស័យ​ផ្សេងៗ​នៅកម្ពុជា។ 

លោក​ ហេង គីមហុង បញ្ជាក់ថា ការ​ផ្អាកផ្តល់​ជំនួយ​បណ្តោះអាសន្ន​របស់​សហរដ្ឋអាមេរិក ទោះក្នុ​ង​រយៈ​ពេល​វែង ឬក៏ផ្អាកជា​អចិន្ត្រៃយ៍ សុទ្ធ​​​តែ​​មាន​​ផល​ប៉ះ​ពាល់តិច​​ឬច្រើន​ដល់​ស្ថាប័ន​ពាក់​ព័ន្ធ​មួយ​​ចំនួន ទាំងស្ថាប័នរដ្ឋ និងសង្គមស៊ីវិល ទៅលើដំណើរការ និងការ​អភិវឌ្ឍលើវិស័យនានា ទាំង​នៅកម្ពុជា និង​បណ្តាប្រទេស​ផ្សេង​ៗទូទាំងពិភពលោក។  

លោកថា៖ «ក្នុងនាមសង្គមស៊ិវិល​មួយ​រូប ខ្ញុំគិតថា សហរដ្ឋអាមេរិក ក៏​ដូច​ជា​ម្ចាស់​ជំនួយ​ផ្សេង​ទៀត​ គួរតែពិនិត្យ​ពិចារណា​​ក្នុងការ​​គាំទ្រ​​របស់​ខ្លួន ដើម្បីធានានូវរឿង២ ទី១ និរន្តរភាពនៃ​កិច្ច​សហ​ប្រតិបត្តិការអន្តរជាតិរបស់សហរដ្ឋអាមេរិក ក៏ដូចជាម្ចាស់ជំនួយទាំងអស់ហ្នឹង ហើយទី​២ ដើម្បី​ធានាបា​ន​​នូវ​ប្រក្រតីភាពនៃដំណើរការ​ និង​ការ​ចូលរួមលើកកម្ពស់លទ្ធិប្រជាធិបតេយ្យ យុត្តិធម៌​សង្គម សិទ្ធិមនុស្ស និងបរិស្ថាន​ផងដែរ»។

សម្រាប់ លោក សួន សូរីដា តំណាងរាស្ត្រគណបកស្សង្គ្រោះជាតិ បាន​លើក​ឡើង​ក្នុង​ហ្វេស​ប៊ុក​របស់​លោក​​ថា ក្នុង​រយៈពេល​ប៉ុន្មានថ្ងៃបន្ទាប់ពីសហរដ្ឋអាមេរិក​ផ្អាកជំនួយបរទេស​នេះ លោក​សង្កេត​ឃើញា មាន​មន្ត្រី​ធំៗ​ក្នុង​ជួរ​រដ្ឋាភិបាល​កម្ពុជា និង​អ្នកនយោបាយប្រឆាំងខ្លះ ហាក់​រីក​​រាយ​សាទរ​ក្នុង​រឿង​នេះ ដោយ​ពួក​គេ​យល់​ឃើញ​ខុសៗ​គ្នា​ថា ជំនួយ​​របស់​​អាមេរិក​​​​ជាជំនួយ​ខ្មៅ ជួយ​អ្នក​ប្រឆាំង ដូច​ជា​សង្គមស៊ីវិល អង្គការក្រៅរដ្ឋាភិបាល សារពត៌មាន​ឯករាជ្យ ជាដើម ហើយ​ថា​ការ​ផ្អាក​ជំនួយ​នេះ គឺ​មាន​ន័យ​ថា កាត់​ផ្តាច់​ហិរញ្ញវត្ថុ​អ្នក​​ប្រឆាំងនៅកម្ពុជា ជា​អ្វី​ដែល​គណបក្ស​ប្រជាជន​កម្ពុជា​ចង់​បាន។

លោកបន្ត​ថា ចំណែក​អ្នក​នយោបាយ​ប្រឆាំង​ខ្លះ យល់ថា នេះ​ជា​វិធាន​ការ​ទណ្ឌ​កម្ម​ថ្មី​នៃ​រដ្ឋកាល​ដូណាល់ ត្រាំ ទៅ​លើរដ្ឋាភិបាល​កម្ពុជា​ក្នុង​ការ​ស្តារ​លទ្ធិប្រជាធិប​តេយ្យ និង​ការ​គោរព​សិទ្ធិ​មនុស្ស​នៅ​កម្ពុជា។

តែយ៉ាងណា សម្រាប់ការយល់ឃើញរបស់លោក​ ការបាត់បង់ជំនួយ​USAID គឺ​ជា​ការ​បាត់​បង់​ផល​ប្រយោជន៍​សម្រាប់​ប្រជាជាតិខ្មែរ​ទាំង​មូល ក៏​ព្រោះ​ជំនួយ​USAID បាន​ជួយ​មួយ​ផ្នែក​ធំ​លើ​ការ​អភិវឌ្ឍ​​ប្រទេស​កម្ពុជា ក្នុង​វិស័យ​ជាច្រើន ដូចជា ហេដ្ឋារចនាសម្ពន្ធ័(ស្ពាន ថ្នល់ សាលា​រៀន មន្ទីរ​ពេទ្យ ប្រពន្ធ័​ធារា​សាស្ត្រ) អប់រំ សុខភាព​សាធារណៈ ធន​ធាន​មនុស្ស និង​មួយ​ផ្នែក​ទៀត​បាន​ជួយ​ដល់​សង្គម​ស៊ីវិល អង្គ​ការ​ក្រៅ​រដ្ឋាភិបាល និង​សារពត៌មាន​ឯករាជ្យ​ ដើម្បី​ប្រជាធិប​តេយ្យ និង​ការ​គោរព​សិទ្ធិ​មនុស្ស​នៅកម្ពុជា​ផង​ដែរ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ