លោក មុត ចន្ថា នាយកខុទ្ទកាល័យ លោក កឹម សុខា ប្រធានគណបក្សសង្គ្រោះជាតិ ដែលតុលាការរំលាយ បានដាក់ការសង្ស័យដូចគ្នា ទៅនឹងមន្ត្រីបក្សប្រឆាំងផ្សេងទៀត លើគ្រួសារហ៊ុន ជាមេខ្លោងនៅពីក្រោយការបាញ់សម្លាប់ លោក លិម គិមយ៉ា លើទឹកដីថៃ ដោយសំអាងលើការលាក់បំពួនជនសង្ស័យ។
លោក ចន្ថា បានលើកឡើងលើហ្វេសប៊ុករបស់លោក នៅថ្ងៃទី៥ ខែកុម្ភៈនេះថា អ្នកលាក់បំពួនឃាតករ ពេជ្រ គឹមស្រ៊ិន និង លី រតនរស្មី គឺជាមេខ្លោង។ លោករំឭកថា សពលោក លិម គិមយ៉ា ត្រូវបានបញ្ចុះនៅប្រទេសបារាំងរួចរាល់ហើយ ប៉ុន្តែយុត្តិធម៌នៅមិនទាន់កើតមានឡើយ។
លោកបន្តថា ឃាតករជនជាតិថៃ ដែលទទួលបញ្ជាពីក្រុមឃាតករខ្មែរ នៅមិនទាន់ត្រូវបានកាត់ទោស រីឯឃាតករសមគំនិតជនជាតិខ្មែរ ក៏នៅមិនទាន់ត្រូវបានចាប់ខ្លួន ហើយមេខ្លោងបញ្ជានៅពីក្រោយផែនការធ្វើឃាតដ៏ឃោរឃៅនេះ នៅមិនទាន់ត្រូវបានវែកមុខ។
សម្រាប់លោក មុត ចន្ថា កូនប្រុសរបស់ លោក លិម គិមយ៉ា បានបញ្ជាក់ក្នុងពិធីបញ្ចុះសពថា ល្គឹកណាឃាតករសមគំនិតខ្មែរពីរនាក់ គឺ ពេជ្រ គឹមស្រ៊ិន និង លី រតនរស្មី មិនត្រូវបានចាប់ខ្លួនទេ ដូច្នេះយុត្តិធម៌មិនអាចកើតមានឡើយ។
លោកសង្កត់ធ្ងន់ថា សរុបមក នរណាលាក់បំពួន និងការពារឃាតករ ពេជ្រ គឹមស្រ៊ិន និង លី រតនរស្មី អ្នកនោះគឺជាមេខ្លោងនៅពីក្រោយផែនការធ្វើឃាតនេះ។
ការលើកឡើងនេះ ទំនងជាសំដៅទៅដល់មេដឹកនាំគ្រួសារហ៊ុន ដែលកំពុងក្តាប់អំណាចណែនដៃជាង៤០ឆ្នាំទៅនេះ ក្រោមសំឡេងរិះគន់ថា បានប្រើដៃតុលាការ និងរដ្ឋធម្មនុញ្ញ ធ្វើជាឧបករណ៍នយោបាយ បន្សល់ទុកឃាតកម្ម រាប់សិបករណី ដែលជនដៃដល់ មិនត្រូវបាននាំខ្លួនមកផ្តន្ទាទោស សូម្បីមួយករណី។
ក្នុងនោះរាប់ចាប់តាំងពីតារាចម្រៀង ព្រះសង្ឃ រហូតដល់សកម្មជននយោបាយ អ្នកលើកកម្ពស់សិទ្ធិការងារ មានលោក ជា វិជ្ជា ប្រធានអង្គការការពារបរិស្ថានលោក ឈុត វុទ្ធី និងអ្នកស្រាវជ្រាវពីការអភិវឌ្ឍសង្គមលោកបណ្ឌិត កែម ឡី ជាដើម។
បន្ថែមពីនេះ អតីតមេដឹកនាំគណបក្សសង្គ្រោះជាតិ លោក សម រស្ស៊ី ធ្លាប់បង្ហោះសារចោទ លោក ហ៊ុន សែន ជាអ្នកនៅពីក្រោយឃាតកម្ម លោក លិម គិមយ៉ា ផងដែរ។
យ៉ាងណា កន្លងទៅ នាយករដ្ឋមន្ត្រីបន្តវេនពីឳពុក គឺលោក ហ៊ុន ម៉ាណែត ធ្លាប់ច្រានចោលការចោទប្រកាន់នេះ ដោយសំអាងថា ការចាប់បញ្ជូនខ្មាន់កាំភ្លើងឱ្យទៅភាគីថៃ ក្រោយហេតុការណ៍បាញ់សម្លាប់ ជាផ្នែកសហការក្នុងសំណុំរឿងឃាតកម្មនេះ។
ប៉ុន្តែលោកមិនបានបញ្ជាក់ពីមូលហេតុមិនព្រមចាប់បញ្ជូនជនសង្ស័យ ពេជ្រ គឹមស្រ៊ិន និង លី រតនរស្មី ឱ្យទៅភាគីថៃតាមការស្នើសុំនោះទេ ខណៈក្រោយកើតហេតុពួកគេបានឆ្លងដែនចូលទឹកដីកម្ពុជា។
លោក លិម គិមយ៉ា អាយុជាង៧០ឆ្នាំ ត្រូវបានខ្មាន់កាំភ្លើង ជាជនជាតិថៃ បាញ់ពីក្រោយ ចំនួន៣គ្រាប់ បណ្តាលឱ្យស្លាប់ក្នុងថ្លុកឈាម ក្នុងទីក្រុងបាងកក ប្រទេសថៃ កាលពីថ្ងៃទី៧ ខែមករា ឆ្នាំ២០២៥ ខណៈលោក និងភរិយា ជាជនជាតិបារាំង ធ្វើដំណើរតាមរថយន្តក្រុង ចេញពីខេត្តសៀមរាប ឆ្លងកាត់ប្រទេសថៃ ក្នុងដំណើរឆ្ពោះទៅប្រទេសបារាំង ។
ក្រោយឃាតកម្ម ខ្មាន់កាំភ្លើងម្នាក់ ត្រូវចាប់បានលើទឹកដីកម្ពុជា ក្នុងខេត្តបាត់ដំបង បន្ទាប់មកខ្មាន់កាំភ្លើងរូបនោះ ត្រូវបញ្ជូនទៅឃុំខ្លួននៅប្រទេសថៃ។
ក្រោយមក តុលាការព្រហ្មទណ្ឌថៃ បានចេញដីកាបង្គាប់ឱ្យចាប់ខ្លួនឈ្មោះ លី រតនរស្មី ក្នុងសំណុំរឿងឃាតកម្មនេះ ដែលជនសង្ស័យរូបនោះ ជាទីប្រឹក្សា លោក ហ៊ុន សែន ប្រធានព្រឹទ្ធសភាកម្ពុជា។
ដោយឡែក ជនសង្ស័យម្នាក់ទៀត ឈ្មោះ ពេជ្រ គឹមស្រ៊ិន ដែលបង្ហាញមុខនៅកន្លែងកើតហេតុ ត្រូវបានប៉ូលីសអន្តរជាតិអំាងទែប៉ូល ចេញប្រកាសឱ្យតាមចាប់ខ្លួនដូចគ្នាដែរ។
ប៉ុន្តែរយៈពេលជិត ១ខែទៅនេះ ជនសង្ស័យទាំងពីរ ដែលរួមដៃសម្លាប់លោក លិម គិមយ៉ា មិនត្រូវបានចាប់បញ្ជូនឱ្យទៅភាគីថៃ ដើម្បីកាត់ទោសនៅឡើយទេ។
ដោយឡែក សពតំណាងរាស្ត្រគណបក្សសង្គ្រោះជាតិ លោក លិម គិមយ៉ា ដែលខ្មាន់កាំភ្លើងបាញ់សម្លាប់ ត្រូវបានក្រុមគ្រួសារនិងអ្នកគាំទ្រ បញ្ចុះតាមប្រពៃណីនៅទីក្រុងប៉ារីស ប្រទេសបារាំង កាលពីថ្ងៃទី៣ ខែកុម្ភៈ ឆ្នាំ២០២៥។
ក្រុមគ្រួសារសព បានបង្ហាញការឈឺចាប់ និងបង្ហាញជំហរទាមទារយុត្តិធម៌ជូន លោក លិម គិមយ៉ា ដែលត្រូវគេធ្វើឃាតលើទឹកដីថៃ ក្រោយលោកបានរិះគន់គ្រួសារហ៊ុន ជុំវិញការធ្វើឱ្យឆេះរូបព្រះឆាយាលក្ខណ៍ព្រះមហាក្សត្រ នៅយប់ថ្ងៃឆ្លងឆ្នាំសកល ក្នុងពិធីរៀងចំព្រឹត្តិការណ៍សាទរកម្ពុជា កាលពីយប់ថ្ងៃទី៣១ ខែធ្នូ ឆ្នាំ២០២៤៕
