ជនរងគ្រោះទាមទារតុលាការពន្លឿនវិធានរឹបអូសទ្រព្យសម្បត្តិអតីតឧកញ៉ា ឡេង ចាន់ណា មកសងពួកគេដើម្បីដោះស្រាយវិបត្តិបំណុល។
ការជំរុញនេះ ចំពេលមានលិខិតមួយច្បាប់ របស់តុលាការខេត្តសៀមរាប ស្តីពីការលក់អចលនទ្រព្យមួយកន្លែង ដែលមានទីតាំងដូចគ្នានឹងក្រុមហ៊ុនប្រ៊ីលានស៊ីធី តែថាតុលាការហាក់មានការលាក់បាំងជុំវិញវិធាននេះ។
លេខាធិការដ្ឋានរដ្ឋបាលសាលាដំបូងខេត្តសៀមរាប នៅថ្ងៃទី៤ ខែកុម្ភៈ បានបញ្ចេញលិខិតមួយច្បាប់លើទំព័រហ្វេសប៊ុករបស់ខ្លួន ស្តីពី ការលក់ដីមួយកន្លែងទំហំ ៥០៥ម៉ែត្រការ៉េ និងអាគារទំហំ ១០១០ម៉ែត្រការ៉េ នៅភូមិសាលាកំរើក ក្រុងសៀមរាប ខេត្តសៀមរាប។
តាមរយៈលិខិតជូនដំណឹង ចុះថ្ងៃទី២៤ ខែមករា ឆ្នាំ២០២៥ របស់សាលាដំបូងខេត្តសៀមរាបនោះ បញ្ជាក់ថា តុលាការនឹងអនុវត្តការដាក់លក់ក្នុងស្រោមសំបុត្រនូវអចលនវត្ថុនោះ តម្លៃជិត ៤០ម៉ឺនដុល្លារអាមេរិកឡើងទៅ។
ប៉ុន្តែតុលាការមិនបានបញ្ជាក់ថាដី និងអគារនេះ មានជាប់ពាក់ព័ន្ធនឹងរឿងក្តីអតីតឧកញ៉ា ឡេង ចាន់ណា នោះទេ។
ទីតាំងអចលនទ្រព្យដែលតុលាការប្រកាសលក់នោះ ត្រូវបានជនរងគ្រោះដាក់មន្ទិលថា ទ្រព្យរបស់ក្រុមហ៊ុនប្រ៊ីលានស៊ីធី គ្រប់គ្រងដោយអតីតឧកញ៉ា ឡេង ចាន់ណា តែត្រូវតុលាការហាក់ព្យាយាមបិទបាំងព័ត៌មាននេះ។
ជនរងគ្រោះម្នាក់ ប្រាប់VODក្នុងលក្ខខណ្ឌមិនបញ្ចេញឈ្មោះ និងសំឡេងថា បុរីប្រ៊ីលានស៊ីធីគម្រោង៦ នៅភូមិសាលាកំរើក ក្រុងសៀមរាប ខេត្តសៀមរាបនេះ មានផ្ទៃដីសរុបទំហំជាង២ហិកតា តែក្នុងការប្រកាសលក់នេះ ត្រឹមតែ ៥០៥ម៉ែត្រការ៉េប៉ុណ្ណោះ ដែលលោកសង្ស័យថាអាចត្រូវបានគេកាត់លក់ផ្នែកខ្លះនៃដីនេះ។
ចំពេលមានការបញ្ចេញលិខិតលក់ឡៃឡុងបែបនេះ គណនីហ្វេសប៊ុកខ្លះដែលអះអាងថា ជាជនរងគ្រោះបានជំរុញឱ្យតុលាការពន្លឿនរឹបអូសទ្រព្យ អ្នកស្រី ឡេង ចាន់ណា ដើម្បីទទួលបានសំណងដោះស្រាយវិបត្តិបំណុល។
គណនីហ្វេសប៊ុកឈ្មោះ ឈូក ផាត បានចែករំលែកលិខិតនេះ ដោយភ្ជាប់សារក្នុងន័យដើមថា៖ «ពួកខ្ញុំទាំងអស់គ្នាដែលជាជនរងគ្រោះ នៅតែរងចាំមើលដំណោះស្រាយរបស់តុលាការជានិច្ច»។
គណនីហ្វេសប៊ុកឈ្មោះ Hak Naret បញ្ចេញមតិថា៖ «ពួកខ្ញុំម្នាក់ៗទឹកភ្នែករាល់ថ្ងៃជាមួយធនាគារ អស់ដីផ្ទះអស់ហើយលោកអើយ សូម ឱ្យក្ដីរឿងហ្នឹងឆាប់ចប់ផងចុះ ជំពាក់គេតាំងពីតិចរហូតទៅជាច្រើន»។
ជុំវិញរឿងនេះ VOD មិនអាចសុំការឆ្លើយតបពីអ្នកនាំពាក្យសាលាដំបូងខេត្តសៀមរាប លោក យិន ស្រ៊ាន បានទេគិតត្រឹមម៉ោងផ្សាយនេះ ដោយហៅទូរសព្ទចូលជាច្រើនដងតែគ្មានអ្នកទទួល។
តំណាងរាស្រ្តគណបក្សសង្រ្គោះជាតិ លោក សួន សូរីដា កត់សម្គាល់ថា ក្រោយមានសម្ពាធតវ៉ាពីជនរងគ្រោះប្រឆាំងអំពើឆបោករបស់អ្នកស្រី ឡេង ចាន់ណា ទើបរដ្ឋាភិបាលចេញមុខចាប់ខ្លួនជនឆបោកដាក់ពន្ធនាគារ តែលោកថាវិធានការផ្តល់សំណងវិញហាក់គ្មានភាពច្បាស់លាស់។
ក្នុងន័យនេះ លោកថា ដើម្បីផ្តល់យុត្តិធម៌ដល់ជនរងគ្រោះ តុលាការត្រូវប្រកាសទ្រព្យសម្បត្តិអតីតឧកញ៉ា ឡេង ចាន់ណា ជាសារធាណៈដែលខ្លួនបានបង្កក ហើយបន្តស៊ើបអង្កេត និងផ្តល់ព័ត៌មានដល់ជនរងគ្រោះឱ្យបានដឹង មិនមែនលាក់បាំងព័ត៌មាននោះទេ។
លោកថា៖ «ជនដែលត្រូវបានជាប់ចោទនៅក្នុងអំពើ ឆបោកហើយនឹងត្រូវបានបង្កកទ្រព្យសម្បត្តិ បុគ្គលនោះមិនអាចលក់ទ្រព្យសម្បត្តិរបស់ខ្លួនបានទេ ហើយបើសិនថាលក់ហ្នឹង គឺតុលាការចេញបញ្ជាឲ្យលក់ដើម្បីជាសំណង អាហ្នឹងដែលខ្ញុំចង់និយាយត្រូវតែបង្ហាញប្រាប់ប្រជាពលរដ្ឋ មុននឹងធ្វើកិច្ចការហ្នឹង អ៊ីចឹងខ្ញុំគិតថាអាការដែលលក់ គឺជាការលួចលក់ដោយស្ងាត់ៗ ដើម្បីប្រម៉ែប្រមូលលុយបន្ថែមទៀត ពីព្រោះជួនកាលអ្នកដែលយកដីនោះទៅលក់ ជួនកាលជាជនទីបីដែលឆ្លៀតឱកាសនៅក្នុងពេលដែលលោកស្រី ឡេង ចាន់ណា កំពុងជាប់ឃុំ អ៊ីចឹងអាចស៊ុមគ្រលំគ្នាជាមួយអាជ្ញាធរមូលដ្ឋាន ឬក៏សមត្ថកិច្ចដែលពាក់ព័ន្ធ គេហៅថាលួចលក់»។
ជុំវិញអំពើឆបោកនេះ លោក ស៊ាន បូរ៉ាត់ មន្រ្តីស្និទ្ធិលោក ហ៊ុន ម៉ាណែត ធ្លាប់បានប្រាប់អតីតឧកញ៉ា ឡេង ចាន់ណា ពីល្បិចបោកលុយពលរដ្ឋយកមករកស៊ីដែលជាផែនការក្នុងគំនិតរបស់លោក ដើម្បីពង្រីកឥទ្ធិពលជំនួញក្នុងក្រុមហ៊ុនឆបោកប្រ៊ីលានស៊ីធី។
លោកថា៖ «តិចទៀតធនាគារប្រ៊ីលានម៉ង អូនឯងចាំមើលបើមិនជឿបង ដំបូងយើងយកលុយគេមករកស៊ី តែដល់ពេលទីបញ្ចប់ទៅ យើងយកលុយយើង ឱ្យគេរកស៊ីវិញ ដាក់ឡានដាក់ផ្ទះម៉ង ហ្នឹងហើយដែលជាចំណុចសំខាន់ ដែលយើងត្រូវធ្វើត្រូវតែមានចក្ខុវិស័យឱ្យវែងឆ្ងាយធនាគារប្រ៊ីលានត្រូវតែយកឱ្យបាន»។
យ៉ាងណាក្តី តុលាការបានបង្គាប់ឱ្យ លោក ស៊ាន បូរ៉ាត់ ចូលឆ្លើយបំភ្លឺក្នុងនាមជាសាក្សីក្នុងរឿងក្តី ឡេង ចាន់ណា កាលពីថ្ងៃទី១៨ ខែធ្នូ ឆ្នាំ២០២៤ តែក្រោយបំភ្លឺរូច ត្រូវបានអនុញ្ញាតឱ្យត្រឡប់ទៅផ្ទះវិញ ទោះមានភស្តតាងបង្ហាញថា លោក ស៊ាន បូរ៉ាត់ មានជាប់ពាក់ព័ន្ធជ្រៅក្នុងអំពើបោកប្រាស់នេះក្តី។
អ្នកនយោបាយក្រៅរដ្ឋាភិបាល លោក សួន សូរីដា សង្កត់ធ្ងន់ថា បើជនរងគ្រោះនៅស្ងៀម នោះពួកគេនឹងចាញ់ក្តីនេះ ព្រោះរឿងក្តីឆបោកនេះជាប់ពាក់ព័ន្ធនឹងសែស្រឡាយអ្នកមានអំណាច។
លោកថា៖ «ជារឿងក្ដីមួយដែលយើងដឹងហើយថាវាជាអំពើឆបោកមានលក្ខណៈជាប្រព័ន្ធដែលភ្ជាប់ជាមួយនឹងសែស្រឡាយអ្នកមានអំណាច បើបងប្អូនប្រជាពលរដ្ឋដែលជាអ្នករងគ្រោះនៅស្ងៀម គឺគេមិនចាត់ការក្ដីហ្នឹងទេ គេនឹងពន្យារពេលរហូតដល់ម្នាក់ៗដែលជាជនរងគ្រោះអស់ខ្សោះ អស់សង្ឃឹមលែងរវីរវល់។ ខ្ញុំគិតថា ប្រជាពលរដ្ឋដែលជាអ្នករងគ្រោះហ្នឹងគឺត្រូវតែសកម្មឡើង ការទាមទាររកយុត្តិធម៌ដោយខ្លួនយើង ពីព្រោះយើងជាអ្នករងគ្រោះ ហើយបើយើងមិនទាមទារតើយុត្តិធម៌ហ្នឹងវាសុខៗធ្លាក់ពីលើមេឃ មកឲ្យយើងទេ! អត់ទេ វាកើតឡើងពីការទាមទាររបស់យើងដែលជាជនរងគ្រោះ»។
ម្ចាស់ក្រុមហ៊ុនប្រ៊ីលានស៊ីធី គឺអតីតឧកញ៉ា ឡេង ចាន់ណា ត្រូវបានចាប់ខ្លួននៅថ្ងៃទី១៣ ខែមីនា ឆ្នាំ២០២៤ ក្រោយពីជនរងគ្រោះផ្ទុះការតវ៉ាជាបន្តបន្ទាប់ រយៈពេលប្រមាណ១ខែ ដែលមានអ្នកចាញ់បោកប្រមាណ ៧០០០គ្រួសារ គិតទឹកប្រាក់ជាង ៣០០លានដុល្លារអាមេរិក។
ក្រុមហ៊ុននេះ បានបង្កើតល្បិចបោកពលរដ្ឋ ក្រោមរូបភាពប្រមូលលុយវិនិយោគ ដោយសន្យាឱ្យការប្រាក់ ៤ភាគរយក្នុងមួយខែនៃប្រាក់ដើម តែអ្នកវិនិយោគបើកបានតែប៉ុន្មានខែដំបូង ក៏លែងបានបន្តទៀត។
បើតាមតុលាការខេត្តសៀមរាប អ្នកស្រី ឡេង ចាន់ណា ត្រូវជាប់ចោទច្រើនបទល្មើស រួមមាន បទ ឆបោកមានស្ថានទម្ងន់ទោស ជាក្រុមមានការចាត់តាំង បទសម្អាតប្រាក់ និងបទមិនបំពេញកាតព្វកិច្ចចំពោះឧបករណ៍អាចជួញដូរបាន។
ជុំវិញរឿងនេះ លោក គី តិច ប្រធានក្រុមមេធាវីរបស់រដ្ឋាភិបាល ដែលចូលខ្លួនធ្វើជាតំណាងឱ្យជនរងគ្រោះ បានបញ្ជាក់ក្នុងសន្និសីទសារព័ត៌មានកាលពីខែតុលាថា មានជនរងគ្រោះចំនួនជិត ៥ពាន់នាក់ ស្ម័គ្រចិត្តឱ្យក្រុមមេធាវីលោកការពារសំណុំរឿងរបស់ពួកគេ និងបន្តប្រមូលឯកសារពីក្រុមអ្នកចាញ់បោកនៅក្រៅប្រទេសបន្តទៀត។
យន្តការនេះ ធ្វើឡើងតាមការបញ្ជារបស់លោកនាយករដ្ឋមន្ត្រី ហ៊ុន ម៉ាណែត កាលពីខែឧសភា ឆ្នាំ២០២៤ តែចាប់ពីមេធាវីរូបនោះ ជួយការពារក្តីជិតមួយឆ្នាំទៅនេះ ជនរងគ្រោះនៅតែមិនទទួលបានសំណងមកវិញនោះទេ ខណៈពួកគេបានលក់ដីស្រែ ខ្លះចំណាកស្រុក ក្រោមសម្ពាធបំណុល៕
