យ៉ាងហោចណាស់ មនុស្ស២នាក់បានស្លាប់ និង៥នាក់ទៀតរងរបួស ក្នុងហេតុការណ៍អគ្គិភ័យឆាបឆេះក្លឹបកម្សាន្តមួយកន្លែង នៅរាជធានីភ្នំពេញ កាលពីថ្ងៃទី៥ ខែកុម្ភៈ បង្កពីការឆ្លងចរន្តអគ្គិសនី។ នេះបើតាមការអះអាងរបស់អគ្គស្នងការដ្ឋាននគរបាលជាតិ។
ប្រភពនោះបាននិយាយ លើគេហទំព័ររបស់ខ្លួនថា ហេតុការណ៍នេះ ផ្តើមចេញពីការឆ្លងចរន្តអគ្គិសនី។
សម្រាប់នគរបាលជាតិ ហេតុការណ៍អគ្គិភ័យឆាបឆេះនេះ កើតឡើងនៅម៉ោង ១០និង៣០នាទីព្រឹក ថ្ងៃទី៥ ខែមករា ឆ្នាំ២០២៥ ស្ថិតចំណុចផ្លូវ៥០ម៉ែត្រ ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ។
អគ្គិភ័យនេះ ក្រៅពីមានមនុស្សស្លាប់ និងរងរបួស អគ្គិភ័យបានឆេះក្លឹបកំសាន្ត១ ម៉ូតូ៥គ្រឿង សម្ភារៈក្នុងក្លឹបអស់ទាំងស្រុង។
ចំណែកវិធានសង្គ្រោះវិញ កម្លាំងសមត្ថកិច្ចជំនាញ បានប្រើប្រាស់រថយន្ត ចំនួន៥៧គ្រឿង ប្រើប្រាស់ទឹកអស់៤០ឡាន បាញ់ឱ្យរលត់ទៅវិញ នៅវេលាម៉ោង១ និង៣០នាទី រសៀលនាថ្ងៃដដែល៕
