ក្រុមអតិថិជនរងគ្រោះ បានចេញមុខទាមទាររកដំណោះស្រាយពីឧកញ៉ា ឡេង ណាវ៉ាត្រា ជាមនុស្សស្និទ្ធនឹងមេដឹកនាំបក្សកាន់អំណាច ដោយសំអាងថា ពួកគេបង់លុយគ្រប់មិនបានផ្ទះប្រមាណ៣ឆ្នាំទៅនេះ តែឧកញ៉ារូបនេះគ្មានផ្ទះឱ្យ តែបែរជាមកធ្វើសកម្មភាព ផ្គាប់ចិត្តមេដឹកនាំគ្រួសារហ៊ុនទៅវិញ។
ការរិះគន់នេះ ចំពេលឧកញ៉ា ឡេង ណាវ៉ាត្រា រៀបចំពិធីជួបជុំប្រចាំឆ្នាំរបស់ក្រុមមួយដែលមានឈ្មោះថា យុវជនបូជាការពារយុត្តិធម៌ ដែលឧកញ៉ាស្និទ្ធនឹងមេដឹកនាំបក្សកាន់អំណាចរូបនេះជាប្រធាន។
ការរៀបចំពិធីនេះ ធ្វើឡើងនៅពីថ្ងៃទី៣ ខែកុម្ភៈ ឆ្នាំ២០២៥ ខណៈអតិថិជនរាប់រយគ្រួសារ បន្តទាមទារយុត្តិធម៌ តាមរយៈចូលបញ្ចេញយោបល់លើបណ្តាញសង្គម។
តាមរយៈវីដេអូជាង៨នាទី លើបណ្តាញសង្គម គេឃើញឧកញ៉ាមានរឿងអាស្រូវឆបោកពលរដ្ឋរូបនេះ ឈរស្រែក អរគុណសន្តិភាព អមដោយតារាចម្រៀងមួយចំនួន ក្នុងផលិតកម្មរបស់គាត់នៅសងខាង និងមានសមាជិកទាំងនោះស្រែកបន្ទរតាមក្រោយ។
បន្ថែមលើនេះ ឧកញ៉ារូបនេះ ជំរុញឱ្យសមាជិករបស់ខ្លួនចូលរួមគោរពច្បាប់ ទាំងលោកកំពុងជាប់រឿងអាស្រូវរំលោភកិច្ចសន្យា មិនសង់ផ្ទះឱ្យអតិថិជន។
លោកថា៖ «អរគុណសម្តេចតេជោដែលស្វែងរកសន្តិភាព អរគុណសម្ដេចបវរធិបតីដែលបន្តការពារសន្តិភាព។ ក្រុមយុវជនរបស់យើង គឺយើងផ្អែកទៅលើការកសាងនូវអំពើល្អខិតខំកសាងបុណ្យកុសលរួមគ្នាជួយជ្រោមជ្រែងគ្នា មិនថាបងប្អូនយើងមានការលំបាកមិនថាបងប្អូនយើងមានបញ្ហាអី យើងចូលរួមជួយគ្នា ប៉ុន្តែកុំធ្វើរឿងដែលខុសច្បាប់»។
ជាងនេះទៀត តាមរយៈរូបភាពជាច្រើនសន្លឹកដែលបង្ហាញពីផ្ទាំងរចនានៅពីក្រោយឧកញ៉ារូបនេះ ដែលត្រូវបានដំឡើងក្នុងពិធីនោះ គេឃើញមានតែរូបគ្រួសារហ៊ុនមានលោក ហ៊ុន សែន លោក ហ៊ុន ម៉ាណែត និងភរិយាអ្នកទាំង២ ដោយមិនបានតាំងព្រះឆាយាល័ក្ខណ៍ព្រះមហាក្សត្រនោះទេ។
ឈរនៅចំពោះមុខមនុស្សរាប់សិបនាក់ ឧកញ៉ា ឡេង ណាវ៉ាត្រា បាននិយាយថា បើគ្មានគ្រួសារហ៊ុននោះក៏គ្មានប្រទេសកម្ពុជាដែរ។
លោកថា៖ «បើសិនជាគ្មានក្រុមគ្រួសារត្រកូលហ៊ុន ប្រហែលជាកម្ពុជាក៏អត់មានដែរ។ ហេតុអីបានយើងជាមនុស្សដែលអគុណធម៌មិនចូលរួម សូម្បីតែនិយាយការពិត យើងសម្ងំយកសុខតែឯងបានរៀនសាលាសម្ដេចតេជោបានទៅរៀននៅបរទេសមកវិញ បែរជាវ៉ៃប្រហារសម្ដេចតេជោ»។
សកម្មភាពរបស់លោក ឡេង ណាវ៉ាត្រា នៅពេលនេះ បានរងការរិះគន់ពីអ្នកប្រើប្រាស់បណ្តាញសង្គមមួយចំនួន ពីឥរិយាបទឆ្គាំឆ្គងចំពោះការមិនដាក់តាំងព្រះឆាយាល័ក្ខណ៍ព្រះមហាក្សត្រ តែហាក់លើកតម្កើនតែក្រុមគ្រួសារលោក ហ៊ុន សែន ទៅវិញ។
រីឯអ្នកខ្លះទៀត ចេញមុខទាមទារឱ្យឧកញ៉ារូបនេះ ទទួលខុសត្រូវចំពោះការជាប់គាំងការសាងសង់ផ្ទះជាច្រើនឆ្នាំ មិនរកដំណោះស្រាយឱ្យជនរងគ្រោះ តែបែរជាមកអះអាងពីការការពារយុត្តិធម៌ទៅវិញ។
គណនីហ្វេសបុកឈ្មោះ Yorng Ayutthaya រិះគន់ក្នុងន័យដើមថា៖ «រំលោភលើកិច្ចសន្យា ទិញ-លក់ដីផ្ទះធ្វើឱ្យអតិថិជនឈឺចាប់ ស្ទើរតែមួយប្រទេស នៅមានមុខនិយាយពាក្យយុត្តិធម៌បានទៀត»។
គណនីហ្វេសប៊ុកឈ្មោះ Koy Sem បានទាមទារថា៖ «សូមជួយចាក់ដី និងសង់ផ្ទះឲ្យបងប្អូនរងគ្រោះទិញដី ផ្ទះនៅគម្រោង៦A ជ្រៃ១០០ ឲ្យទាន់ពេលផង គ្នាបង់លុយគ្រប់៣ឆ្នាំហើយ សូម្បីដីក៏មិនដឹងនៅទីណា»។
ដោយឡែកហ្វេសប៊ុកឈ្មោះ HUN Sakadaបញ្ចេញមតិថា៖ «សុំជួយរកយុត្តិធម៌ឱ្យបងប្អូនដែលបង់ប្រាក់ហើយមិនបានផ្ទះផង»។
ប្រធានអង្គការប្រជាធិបតេយ្យខ្មែរប្រចាំប្រទេសអូស្រ្តាលី លោក ស៊ឹង សែនករុណា យល់ថា សកម្មភាពឧកញ៉ា ឡេង ណាវ៉ាត្រា ជាការគេចវេសមិនទទួលខុសត្រូវ ហើយថាដោយសារឧកញ៉ារូបនេះ ជាមនុស្សស្និទ្ធមេដឹកនាំទើបធ្វើឱ្យច្បាប់មិនអាចកាត់ទោសរួបគេបាន។
លោកថា៖ «រឿងឧកញ៉ា ឡេង ណាវ៉ាត្រា យើងឃើញរូបភាពទាំងអស់នេះហ្នឹង សុទ្ធសឹងតែជាការសម្ដែងដើម្បីប្រជាភិថុតិគាំទ្រទៅលើរដ្ឋាភិបាលជាមួយនឹងសិល្បករអីទាំងអស់ហ្នឹង វាសុទ្ធសឹងតែជារឿងដែលអត់ប្រយោជន៍។ ប៉ុន្ដែអ្វីដែលជាប្រយោជន៍សម្រាប់ដល់ប្រជាពលរដ្ឋ គឺការសងសំណងការទទួលខុសត្រូវទៅលើបញ្ហារបស់ប្រជាពលរដ្ឋ គឺអត់មានទេ គឹគ្រាន់តែធ្វើរូបភាពអ៊ីចឹងទៅ ដើម្បីបន្លែបន្លំជាមួយនឹងសភាពការណ៍ដែលពលរដ្ឋរងទុក្ខអ៊ីចឹងទៅ»។
ជុំវិញរឿងនេះ ប្រធានព្រឹទ្ធិសភា លោក ហ៊ុន សែន ធ្លាប់បញ្ជាក់ជាសារធារណៈចង់ឱ្យឧកញ៉ា ឡេង ណាវ៉ាត្រា ឈរឈ្មោះជាបេក្ខភាពពីប្រធានសមាគមសិល្បករខ្មែរ ប៉ុន្តែលោកប្តូរចិត្តវិញ ក្រោយមានប្រតិកម្មពីពលរដ្ឋ ដោយសារឧកញ៉ារូបនេះ មានរឿងអាស្រូវបោកអតិថិជនករណីលក់ផ្ទះ។
នៅពេលនោះ លោក ហ៊ុន សែន បានចេញមុខការពារឧកញ៉ា ឡេង ណាវ៉ាត្រា ថាភាពយឺតយ៉ាវមិនសង់ផ្ទះ ដោយសារតែក្រុមហ៊ុនកប់ដើមទុនទៅលើដីក្នុងចំនួនច្រើន ហើយលោក ហ៊ុន សែន ធានាថា ក្រុមហ៊ុននេះមិនទាន់ក្ស័យធនទេ។
ទីប្រឹក្សាគណបក្សកម្លាំងជាតិ លោក រ៉ុង ឈុន និយាយថា កម្ពុជាជាប្រទេសមានអំពើពុករលួយខ្ពស់ ទាញឱ្យប្រព័ន្ធច្បាប់ទន់ខ្សោយ ធ្វើឱ្យជនឆបោកបន្តពង្រីកឥទ្ធិពលរបស់ខ្លូនក្នុងសង្គម ជំរុញឱ្យពលរដ្ឋបន្តរងគ្រោះ បើមេដឹកនាំគ្មានឆន្ទៈកែលម្អរទេនោះ។
លោកថា៖ «ប្រព័ន្ធច្បាប់នៅកម្ពុជាយើង មានលក្ខណៈទន់ខ្សោយដូច្នេះធ្វើឲ្យជនឆ្លៀតឱកាសហ្នឹង ចេះតែមានឱកាសដើម្បីទៅឆបោកប្រជាពលរដ្ឋស្លូតត្រង់ ហើយរួមទាំងសមត្ថកិច្ចមិនបានអនុវត្តភារកិច្ចរបស់ខ្លួនឲ្យបានខ្ជាប់ខ្ជួន ឱ្យច្បាស់លាស់ អ៊ីចឹងអ្នកដែលរងគ្រោះ គឺប្រជាពលរដ្ឋហ្នឹងឯង បើយើងនិយាយពីប្រព័ន្ធច្បាប់ឃើញថា វានៅទន់ខ្សោយមែនទែន»។
កាលពីថ្ងៃទី១៥ ខែវិច្ឆិកា ឆ្នាំ២០២៣ ក្រុមអតិថិជនក៏ធ្លាប់ប្រាប់វីអូឌីថា ពួកគេ៥០០នាក់ ជាប់វិបត្តិហិរញ្ញវត្ថុធ្ងន់ធ្ងរ និងប្រឈមនឹងបញ្ហាបំណុល ក្រោយខ្ចីលុយពីធនាគារ ដើម្បីទិញបុរី ឡេង ណាវ៉ាត្រា គម្រោងយក្សនៅជាប់ផ្លូវជាតិ៦អា ដោយបង់លុយគ្រប់ច្រើនឆ្នាំ តែមិនទទួលបានផ្ទះ។
ក្រុមហ៊ុនឧកញ៉ា ឡេង ណាវ៉ាត្រា ធ្លាប់បានទទួលសិទ្ធិអភិវឌ្ឍន៍នៅតំបន់ភ្នំតាម៉ៅ និងបានកាប់បំផ្លាញព្រៃឈើសេសសល់ចុងក្រោយនៅតំបន់នោះ ក្រោយមកប្រជាពលរដ្ឋបានទាមទារឱ្យអតីតនាយករដ្ឋមន្រ្តី លោក ហ៊ុន សែន កាត់ទោសម្ចាស់ក្រុមហ៊ុននោះដាក់ពន្ធនាគារតាមផ្លូវច្បាប់។
ប៉ុន្តែលោក ហ៊ុន សែន ពេលនោះថ្លែងការពារថា បើចង់ចាប់ម្ចាស់ក្រុមហ៊ុននោះពន្ធនាគារ គឺមានតែចាប់រូបលោកដាក់គុកដែរ។
ព្រះមហាក្សត្រកម្ពុជា បានចេញព្រះរាជ្យក្រឹត្យស្តីពីគោរម្យងារឧកញ៉ានៅថ្ងៃទី២៣ ខែតុលា ឆ្នាំ២០២៤នេះ តម្រូវឱ្យលោកអ្នកឧកញ៉ា អ្នកឧកញ៉ា និងឧកញ៉ា ត្រូវគោរពរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តនានារបស់ព្រះរាជាណាចក្រកម្ពុជា ប្រកាន់ខ្ជាប់នូវសីលធម៌ល្អប្រកបមុខរបរស្របច្បាប់ និងចៀសវាងសកម្មភាពណា ដែលធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់គោរមងារឧកញ៉ា។
ប៉ុន្តែបើគេក្រឡេកមើលករណី ឧកញ៉ា ឡេង ណាវ៉ាត្រា ដែលរកស៊ីបំពានកិច្ចសន្យាទិញលក់ផ្ទះច្រើនឆ្នាំទៅនេះ គឺគ្មានចំណាត់ការច្បាប់ទេ តែថែមទាំងទទួលបានការកាត់ឆ្វៀលដីពីរដ្ឋាភិបាលគ្រួសារហ៊ុនថែមទៀត។
ជាក់ស្តែងកាលពីឆ្នាំ២០២១ លោក ហ៊ុន សែន បានកាត់ដីគម្របព្រៃឈើចំនួន ១៧២ហិកតា នៅស្រុកបន្ទាយស្រី ខេត្តសៀមរាប ផ្ដល់ឱ្យលោក ឡេង ណាវ៉ាត្រា ហើយទទួលបានសិទ្ធិកាន់កាប់ភ្នំតាម៉ៅ ដែលឧកញ៉ារូបនេះកាប់បំផ្លាញព្រៃឈើនៅទីនោះស្ទើរគ្មានសល់ ប៉ុន្តែក្រោយមានប្រតិកម្មខ្លាំងពីមហាជន ដីព្រៃនៅតំបន់ភ្នំតាម៉ៅត្រូវបានដកហូតវិញ។
ដោយឡែក រឿងរំលោភកិច្ចសន្យាទិញលក់វិញ គ្មានវិធានការច្បាប់ណាមួយត្រូវបានធ្វើឡើង ដើម្បីផ្តល់យុត្តិធម៌ឱ្យអតិថិជនរងគ្រោះទេ។ ប៉ុន្តែគេសង្កេតឃើញ លោក ហ៊ុន សែន បញ្ចេញសារការពារថា ការយឺតយ៉ាវផ្តល់ផ្ទះ ឱ្យអតិថិជន ដោយសារឧកញ៉ារូបនេះ ជួបវិបត្តិហិរញ្ញវត្ថុ៕
