ប្រធានរដ្ឋសភា បានព្រមានជាថ្មីទៀត ប្រឆាំងលោក សេង សារី ដោយលោកគំរាមទុកជាមុនថាប្រសិនបើអ្នកវិភាគនយោបាយរូបនេះ ហ៊ានដើរលើសពីបន្ទាត់ក្រហមដែលលោកបានកំណត់ នោះ លោក ហ៊ុន សែន នឹងទម្លាយសារឆ្លើយឆ្លងគ្នារាប់រយសារទៀត ពីផែនការដែលអ្នកវិភាគរូបនេះ ធ្លាប់ទទួលធ្វើកិច្ចការដោយសម្ងាត់ក្នុងពេលកន្លងទៅ។
ការផ្ញើសារដោយប្រយ៉ោលបែបនេះរបស់ លោក ហ៊ុន សែន ដោយលោកអះអាងថា គឺលោកបានស្តាប់ការបកស្រាយរបស់លោក សេង សារី កាលពីយប់ថ្ងៃទី៦ ខែកុម្ភៈ នៅតាមបណ្តាញប្រព័ន្ធផ្សព្វផ្សាយ ពីទីក្រុងវៀងចន្ទ ប្រទេសឡាវ។
តាមរយៈទំព័រហេ្វសប៊ុក នៅថ្ងៃនេះ ប្រធានគណបក្សកាន់អំណាចរូបនេះ ព្រមានដោយចំហរថាលោកនឹងមិនទុកមុខឱ្យ លោក សេង សារី ទៀតទេ ប្រសិនបើអ្នកវិភាគនយោបាយរូបនេះ នៅបន្តព្រហើនដែល លោក ហ៊ុន សែន ចាត់ទុកថា ដើរលើសពីបន្ទាត់ពីក្រហមរបស់លោកតទៅទៀត។
បើតាម លោក ហ៊ុន សែន លោកនៅមានសារសំឡេង ដែលបានមកពីការលួចថត អំឡុងពេលសន្ទនាជាមួយ លោក សេង សារី ជិត ៣០០សារសំឡេងទៀត ដែលនឹងត្រូវទម្លាយចេញ។
ក្នុងន័យនេះ ប្រធានគណបក្សប្រជាជនកម្ពុជារូបនេះ អះអាងថា នៅពេលនេះ ក្រុមការងាររបស់លោកបានត្រៀមបញ្ចេញសារទៅតាមលំដាប់លំដោយរួចរាល់ហើយ ពោលគឺរងចាំការបញ្ជាពីលោកប៉ុណ្ណោះ ហើយលោកជឿជាក់ថា សមាជិកទាំងជាង ៨០ម៉ឺននាក់ នៅក្នុងប្រព័ន្ធតេឡេក្រាមរបស់លោក នឹងទទួលបានសារនេះដូចគ្នា។
ប្រភពបន្តថា៖ «ក្នុងការបង្ហោះសារយប់មិញ ខ្ញុំបាននិយាយថា មិនបញ្ចេញនូវសារឆ្លងឆ្លើយរវាងខ្ញុំនិង សេង សារី ទេដោយយល់ដល់ទំនាក់ទំនងឪពុកនិងកូន។ ប៉ុន្តែខ្ញុំក៏អាចនឹងបង្ហោះសារឆ្លងឆ្លើយទាំង ២៩៥ នៃសារក្នុងករណី សេង សារី ឈានហួសបន្ទាត់ក្រហមដោយចាត់ទុកខ្ញុំជាសត្រូវ។ នៅពេលខ្ញុំបញ្ចេញនូវសារនេះ ទាំងសំឡេង ទាំងសំណេរខ្ញុំ និងបញ្ចេញតាម Channel telegram របស់ខ្ញុំ ដែលសមាជិកជាង៨០ម៉ឺននាក់។ សហការីរបស់ខ្ញុំបានតម្រៀបសារទាំងនេះតាមលំដាប់លំដោយរួចហើយ ខ្ញុំគ្រាន់តែforward ចូលទៅchannel telegram ជាការស្រេច។ ពេលសារចេញទៅគេអាចវាយតម្លៃបានប្រៀបជាមួយការនិយាយរបស់ សេង សារី ជាមួយអាស៊ីសេរីយប់មិញនេះ»។
យ៉ាងនេះក្តី សម្រាប់លោក សេង សារី ដែលបានបង្ហោះសារតបទៅវិញ ចំនួន២លើកនៅថ្ងៃនេះ ដែលសារចុងក្រោយរបស់លោកបញ្ជាក់ជំហរថា ក្នុងនាមជាដៃគូរសន្ទនា រូបលោកក៏ចង់ឱ្យលោក ហ៊ុន សែន បញ្ចេញសារទាំងអស់នោះ ឱ្យបានឆាប់ដែរ។
លោក សេង សារី ដែលហៅ លោក ហ៊ុន សែន ថាជាឱពុកធម៌ពេញៗមាត់ អះអាងថា ខ្លួនបានដឹងមុនរួចជាស្រេចហើយថានៅថ្ងៃណាមួយ លោក ហ៊ុន សែន នឹងប្រើវិធីនេះ ដើម្បីកម្ទេចលោកចោលតាមរូបភាពដូចនេះ។
ជាងនេះទៀតប្រភពបន្តថា៖ «សូមមេត្តាពុកបង្ហោះសារសន្ទនារវាងពុកហើយនិងខ្ញុំឲ្យបានកាន់តែឆាប់កាន់តែល្អ។ មកដល់ពេលនេះ គ្មានអ្វីដែលត្រូវលាក់កំបាំងទៀតនេះទេ ហើយខ្ញុំក៏គ្មានអ្វីដែលត្រូវខាតបង់លើសពីនេះទៀតដែរ។ ក្រោយពីពុកបង្ហោះហើយ សង្ឃឹមថា សារសន្ទនានេះ នឹងក្លាយជាមេរៀនសម្រាប់មនុស្សជំនាន់ថ្មី ដើម្បីសិក្សារៀនសូត្រអំពីបច្ចេកទេស និងសីលធម៌នៃការសន្ទនា ដែលអាចជាមេរៀនជួយការពារពួកគេ ឲ្យគេចពីការធ្លាក់ចូលអន្ទាក់ចារកម្មបានផងដែរ »។
ជុំវិញរឿងនេះ សម្រាប់លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ យល់ឃើញថា ចំពោះទំនាក់ទំនងរវាងមនុស្សទាំងពីរនាក់នេះ ពិតជាលើសពីអ្វីដែលគេនឹកស្មានទៅទៀត។
ហេតុនេះជោគវាសនាទៅថ្ងៃមុខទៀតយ៉ាងណា របស់លោក សេង សារី នោះគេហាក់នឹងពិបាកប៉ាន់ស្មាន និងទស្សន៍ទាយណាស់។ បញ្ហានេះ វាអាស្រ័យនៅលើការសម្រេចចិត្ត និងឥរិយាបថរបស់សាម៉ីខ្លួន។
ប៉ុន្តែអ្វីដែលបារម្ភសម្រាប់ លោក សេក សុជាតិ នៅពេលនេះគឺសិទ្ធិឯកជនភាព របស់មនុស្សម្នាក់ៗ ត្រូវបានគេបំពាន និងលែងមានសណ្តាប់ធ្នាប់ទៅហើយ។
លោកថា៖ «វាបានឆ្លុះបញ្ចាំងអំពីទិដ្ឋភាពក្នុងសង្គមរបស់យើង គ្មានភាពជាឯកជន ឬយើងអាចនិយាយថា សិទ្ធិឯកជនភាព ហាក់ត្រូវបានបំពារបំពានគ្នាទៅវិញទៅមក ក៏អាចឆ្លុះបញ្ចាំងឱ្យឃើញអំពីការខ្វះសីលធម៌ នៅក្នុងភាពជាថ្នាក់ដឹកនាំហើយនិងអ្នកដែលធ្វើការកិច្ចការសង្គមផងដែរ»។
បើទោះជាបែបណា គេមិនដឹងថាតើមានមូលហេតុនៅពីក្រោយ ដែលត្រូវបង្ខំចិត្តឱ្យលោក ហ៊ុន សែន ត្រូវទម្លាយសារសន្ទនានេះឡើយ។ តាមរយៈការរៀបរាប់របស់អតីតនាយករដ្ឋមន្រ្តីរូបនេះ ឱ្យដឹងថា ទំនាក់ទំនងរវាងលោក និងលោក សេង សារី ប្រមាណ៤ឆ្នាំមកហើយ។
នៅពីក្រោយនៃការទំនាក់ទំនងក្នុងនាមជាឪពុក និងកូនក្រៅខោនេះ លោក ហ៊ុន សែន ផ្តល់លុយឱ្យ លោក សេង សារី ក្នុង១ខែស្មើ១ម៉ឺនដុល្លារអាមេរិក ក្នុងរយៈពេល១២ខែ ជាថ្នូរនឹងទទួលបានផែនការសម្ងាត់ ពីគណបក្សប្រឆាំងនៅទីក្រុងបាងកក ប្រទេសថៃ។ ក្រៅពីនេះទៀត លោក ហ៊ុន សែន ឱ្យដឹងថា លោកក៏បានជួយបង់ផ្តាច់ផ្ទះឱ្យ លោក សេង សារី មួយខ្នងទៀតនៅ ស្រុកខ្មែរដែរ។ បន្ថែមពីលើនេះ ក្នុងនាមជាឪពុកធម៌ លោកអះអាងថា បានជួយជ្រោមជ្រែង និងឧបត្ថម្ភទាំងផ្នែកបច្ចេកទេស និងថវិកាមួយចំនួនទៀត ក្នុងពេលអ្នកវិភាគរូបនេះ មានបំណងចង់បង្កើតបក្សនយោបាយមួយ។
ចំណែក អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី យល់ឃើញថា កត្តាដែលនាំឱ្យលោក ហ៊ុន សែន មានប្រតិកម្មរហូតត្រូវបង្ខំចិត្តទម្លាយសារសំឡេងនេះ ទំនងជាប្រធានគណបក្សកាន់អំណាចរូបនេះ ដឹងថាទិន្នន័យដែលខ្លួនបានពីចារកម្ម ជាទិន្នន័យខ្យល់។
ស្ថិតក្រោមហេតុផលនេះហើយ ដែលនាំឱ្យ លោក ហ៊ុន សែន ត្រូវតែកាត់កេរ្តិ៍កាត់ខ្មាស់ បញ្ចេញសារសម្ងាត់នេះតែម្តង។
លោកថា៖ «ខ្ញុំមើលឃើញសកម្មភាពកន្លងមក របស់គណបក្សប្រឆាំង ដូចអ្វីដែលលោកបណ្ឌិត សេង សារី អំពីកលរបស់នាយករដ្ឋមន្ត្រីអីចឹង។ អីចឹងបានន័យថាវាមិនរស៊ើបសម្រាប់គណបក្សប្រឆាំង និងជាព័ត៌មានដែលស្អុយសម្រាប់គណបក្សកាន់អំណាច ដែលនាយករដ្ឋមន្ត្រីយកប្រើការអត់កើត។ អាត្រង់នេះហើយដែលលោកអតីតនាយករដ្ឋមន្ត្រី មានការខឹងសម្បារ ហើយដឹងថាលោកបណ្ឌិត សេង សារី មានការលាក់បាំងនូវយុទ្ធសាស្ត្ររបស់ក្រុមប្រឆាំងនៅខាងក្រៅ»។
នៅក្នុងបញ្ញត្តិ មាត្រា៣០១ នៃក្រមព្រហ្មទណ្ឌ បានកំណត់អំពី បទស្តាប់ ឬថតពាក្យសំដីឯកជន បានកំណត់ថា អំពើលួចស្តាប់ ឬលួចថតសំដីដែលនិយាយជាឯកជន ឬជាការសម្ងាត់ ដោយគ្មានការយល់ព្រមពីបុគ្គលដែលពាក់ព័ន្ធ ឬដៃគូរសន្ទនា គឺជាអំពើល្មើស។
នៅក្នុងបញ្ញត្តិមាត្រានេះ អ្នកដែលបំពាន នឹងត្រូវផ្តន្ទាទោសដាក់ពន្ធនាគារពី ១ខែ ទៅ១ឆ្នាំ និងពិន័យជាប្រាក់ពី ១០ម៉ឺន ទៅ២លានរៀល ហើយការទម្លាយនៃការសារសំឡេងដោយសម្ងាត់ណាមួយដែលចាត់ទុកថាស្របច្បាប់ លើកលែងតែដៃគូរសន្ទនា ឬបុគ្គលដែលពាក់ព័ន្ធនោះ បានដឹងអំពីការស្តាប់ ឬលួចថតសំឡេងហើយមិនជំទាស់ ទើបមិនមែនជាអំពើល្មើស។
ករណីដូចនេះ វាពុំមែនជារឿងថ្មីទេសម្រាប់ លោក ហ៊ុន សែន។ មិនថាអ្នកនយោបាយពីបក្សប្រឆាំង ឬបក្សស្របឡើយ នៅពេលណាដែលលោកប្រើការលែងកើតហើយ លោក ហ៊ុន សែន តែងប្រើវិធីកម្ទេចបែបនេះ។
ក្នុងពេលកន្លងទៅ មានអ្នកនយោបាយពីគណបក្សដែលមានសំឡេងផ្ទុយ មិនតិចនាក់ឡើយ ដែលត្រូវបានលោក ហ៊ុន សែន ទម្លាយសារសំឡេងបែបនេះ។
លោក កឹម សុខា មេដឹកនាំកំពូលរបស់បក្សប្រឆាំង លោក ម៉ៅ មុន្នីវណ្ណ អតីតអ្នកតំណាងរាស្រ្ត និងមនុស្សមួយចំនួនទៀត សុទ្ធតែធ្លាប់រងគ្រោះ ដោយសារលោក ហ៊ុន សែន ដូចគ្នាពីការលួចទំនាក់ទំនងដោយសម្ងាត់នេះ។
តាមពិត នៅក្នុងគោលការណ៍ច្បាប់ ព្រះរាជអាជ្ញា គឺជាអ្នកស្វែងរកយុត្តិធម៌សង្គម ឬជាដើមបណ្តឹងអាជ្ញា ក្នុងពេលមានបទល្មើសបែបនេះកើតឡើង គួរបើកការស៊ើបអង្កេត ហើយកោះហៅអ្នកប្រព្រឹត្តបទល្មើស មកផ្តល់សក្ខីកម្ម និងអនុវត្តទោស។
ដូចក្នុងបញ្ញត្តិ មាត្រា៣០១ និងរដ្ឋធម្មនុញ្ញ បានកំណត់រួចហើយថា ការលួចថតសំឡេងដែលគ្មានការព្រមព្រៀងពីភាគីម្ខាងទៀតបែបនេះ ជាអំពើល្មើស។
ប៉ុន្តែការអនុវត្តជាក់ស្តែងវិញ នៅកម្ពុជាហាក់មិនឆ្លើយតបទៅនឹងនីតិវិធី ព្រមបទប្បញ្ញត្តិដែលមានជាធរមាននោះសោះ។
ផ្ទុយទៅវិញ ជារឿយៗ លោក ហ៊ុន សែន គេសង្កេតឃើញថា តែងអនុវត្តដោយវិធីលួចថតសំឡេងបែបនេះ គ្រប់ដៃគូរសន្ទនាជាមួយលោក ជាដរាប ហើយក្បាលម៉ាស៊ីនដឹកនាំបក្សកាន់អំណាចរូបនេះ តែងរួចផុតពីការអនុវត្តច្បាប់ជានិច្ច៕
