សមាគមការពារសិទ្ធិមនុស្សអាដហុក ជំរុញទៅក្រសួងមហាផ្ទៃ ចាត់វិធានការទៅលើអាជ្ញាធរមូលដ្ឋានរូបណា ដែលអនុវត្តផ្ទុយនឹងច្បាប់ជាតិនិងអន្តរជាតិ ក្រោយសមាគមនេះ រកឃើញថាអាជ្ញាធរមូលដ្ឋានមួយចំនួនក្នុងខេត្តចំនួន២២ បានរឹតត្បិតសិទ្ធិសេរីភាពបញ្ចេញមតិ តាមរយៈការជួបជុំដោយសន្តិវិធីរបស់ប្រជាពលរដ្ឋ។
ការជំរុញនេះធ្វើឡើងតាមរយៈរបាយការណ៍ ស្តីពី ការរឹតត្បិតសេរីភាពបញ្ចេញមតិ-សេរីភាពជួបជុំដោយអាជ្ញាធរមូលដ្ឋានឆ្នាំ២០២៤ ដែលចេញដោយសមាគមការពារសិទ្ធមនុស្សអាដហុក នៅថ្ងៃទី១០ ខែកុម្ភៈ ឆ្នាំ២០២៥នេះ។
ក្នុងរបាយការណ៍នោះ បានលើកឡើងថា ក្នុងសកម្មភាពផ្សព្វផ្សាយ អំពីប្រជាធិបតេយ្យ សិទ្ធិពលរដ្ឋ និងសិទ្ធិនយោបាយ ដែលសមាគមអាដហុក បានរៀបចំឡើងក្នុងឆ្នាំ២០២៤ ដើម្បីលើកកម្ពស់ការយល់ដឹង និងពង្រឹងសិទ្ធិអំណាចសហគមន៍មូលដ្ឋានចំនួន ៣១១វគ្គ ក្នុងខេត្តចំនួន២២ គឺមានជាង ៩០% មានការរឹតត្បិតពីអាជ្ញាធរតាមមូលដ្ឋាន ដោយរំលោភច្បាប់ជាតិ-ច្បាប់អន្តរជាតិ ជាពិសេសអនុវត្តផ្ទុយសេចក្តីជូនដំណឹងរបស់ក្រសួងមហាផ្ទៃ។
សមាគមនេះ បន្តថា សកម្មភាពរបស់អាជ្ញាធរមូលដ្ឋាន ដែលរឹតត្បិតសេរីភាពបញ្ចេញមតិ សេរីភាពជួបជុំនោះ មានដូចជា អាជ្ញាធរមូលដ្ឋានសួររកលិខិតអនុញ្ញាត រារាំងមិនអនុញ្ញាតឱ្យធ្វើការផ្សព្វផ្សាយ មេភូមិតម្រូវឱ្យជូនដំណឹងមុនធ្វើការផ្សព្វផ្សាយ ថតរូប-វីដេអូនិងសុំបញ្ជីវត្តមាន មានវត្តមានឃ្លាំមើលនៅបរិវេណកន្លែងផ្សព្វផ្សាយ ដើរកត់ឈ្មោះពលរដ្ឋតាមផ្ទះក្រោយចូលរួមសកម្មភាពផ្សេងៗ សួរនាំគំរាមកំហែង និងហាមឃាត់ពលរដ្ឋមិនឱ្យចូលរួមការផ្សព្វផ្សាយជាដើម។
ខេត្តចំនួន២២ ដែលសមាគមអាដហុក រកឃើញថាមានអាជ្ញាធរមូលដ្ឋានមួយចំនួន រំលោភសេរីភាពបញ្ចេតមតិតាមរយៈការជួបជុំដោយសន្តិវិធីនោះ មានដូចជា ខេត្តកំពង់ឆ្នាំង ពោធិ៍សាត់ បាត់ដំបង កណ្តាល កំពង់ស្ពឺ ក្រចេះ កំពង់ធំ រតនគិរី ប៉ៃលិន ត្បូងឃ្មុំ ព្រៃវែង ព្រះសីហនុ ព្រះវិហារ បន្ទាយមានជ័យ ឧត្តរមានជ័យ ស្ទឹងត្រែង កំពត កំពង់ចាម មណ្ឌលគិរី កោះកុង សៀមរាប និងស្វាយរៀង។
ករណីនេះ សមាគម បានផ្តល់អនុសាសន៍ដល់ក្រសួងមហាផ្ទៃ ក្នុងឆ្នាំ២០២៥នេះ គួរចាត់វិធានការ ណែនាំ ផ្សព្វផ្សាយសេចក្តីជូនដំណឹង(សជណ) របស់ខ្លួនដល់អាជ្ញាធរមូលដ្ឋាន និងដាក់ពិន័យរដ្ឋបាលធ្ងន់ធ្ងរ ចំពោះអាជ្ញាធរមូលដ្ឋានរូបណា ដែលអនុវត្តផ្ទុយច្បាប់ជាតិ និងច្បាប់អន្តរជាតិ ជាពិសេស សជណ របស់ខ្លួន ដែលជាការរំលោភធ្ងន់ធ្ងរលើការអនុវត្តសិទ្ធិសេរីភាពបញ្ចេញមតិ តាមរយៈការជួបជុះដោយសន្តិវិធី ក្នុងសហគមន៍មូលដ្ឋាន។
វីអូឌី មិនទាន់អាចសុំការអត្ថាធិប្បាយជុំវិញករណីនេះពីអ្នកនាំពាក្យរងក្រសួងមហាផ្ទៃ លោក ទូច សុខៈ បាននៅឡើយទេនៅថ្ងៃនេះ។
យោងតាមលិខិតរបស់ក្រសួងមហាផ្ទៃ ទៅកាន់គណៈអភិបាលរាជធានី-ខេត្ត ចុះថ្ងៃទី២៧ ខែវិច្ឆិកា ឆ្នាំ២០១៨ បានលើកឡើងថា សមាគម អង្គការមិនមែនរដ្ឋាភិបាល ដែលបានចុះបញ្ជីត្រឹមត្រូវ និងសហគមន៍នៅមូលដ្ឋាននានា មានសិទ្ធិសេរីភាពពេញលេញក្នុងការធ្វើសកម្មភាពរបស់ខ្លួន ដោយពុំចាំបាច់ជូនដំណឹងដល់អាជ្ញាធរមូលដ្ឋាន មុនពេលចាប់ផ្តើមធ្វើសកម្មភាពនោះឡើយ។
ចំណែក រដ្ឋធម្មនុញ្ញនៃព្រះរាជាណាចក្រកម្ពុជាឆ្នាំ១៩៩៣ មាត្រា៤១ ចែងថា ប្រជាពលរដ្ឋខ្មែរ មានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងការបោះពុម្ភផ្សាយ សេរីភាពខាងការជួបជុំ។
សម្រាប់សេចក្តីប្រកាសជាសកល ស្តីពីសិទ្ធិមនុស្ស មាត្រា១៩ ចែងថា មនុស្សគ្រប់រូបមានសិទ្ធិសេរីភាពក្នុងការមានមតិ និងការសម្តែងមតិ។ សិទ្ធិនេះរាប់បញ្ចូលទាំងសេរីភាពក្នុងការប្រកាន់មតិដោយគ្មានការជ្រៀតជ្រែក និងសេរីភាពក្នុងការស្វែងរកការទទួល និងការផ្សព្វផ្សាយព័ត៌មាននិងគំនិតនានាដោយគ្មានព្រំដែន ទោះតាមរយៈមធ្យោបាយសម្តែងមតិណាមួយក៏ដោយ។ ចំណែក មាត្រា២០ មនុស្សគ្រប់រូបមានសិទ្ធិសេរីភាពក្នុងការប្រជុំ ឬការបង្កើតសមាគមដោយសន្តិវិធី៕
