ប្រជាពលរដ្ឋចំនួន ៥៧គ្រួសារ នៅខេត្តកំពង់ស្ពឺ បានចេញមុខទាមទារមេដឹកនាំរកយុត្តិធម៌ ករណីពួកគេលក់ដីស្រែជាង ៣០ហិកតា ឱ្យក្រុមហ៊ុនចិនមួយ តែមិនបានទូទាត់លុយគ្រប់ចំនួនសរុបជាង ១លានដុល្លារទៀតដែលនៅសេសសល់ ធ្វើឱ្យពួកគេប្រឈមវិបត្តិបំណុល និងគ្មានដីអាស្រ័យផលជាង១ឆ្នាំទៅនេះ។
ពលរដ្ឋនៅភូមិអូក្រាំងអំបិល អ្នកស្រី ផល ចាន់រីម ប្រាប់VODនៅថ្ងៃទី១០ ខែកុម្ភៈនេះថា ដីមានជម្លោះនេះសរុបជាង ៣០ហិកតា ដែលមានពលរដ្ឋចំនួន ៥៧គ្រួសារ ជាម្ចាស់ដី ខណៈ ពលរដ្ឋទាំងនោះខ្លះ ចាប់ផ្តើមលក់ទៅឱ្យក្រុមហ៊ុនចិនឈ្មោះ ជាន យូលៀន ចាប់ពីខែវិច្ឆិកា ឆ្នាំ២០២៣មកម្លេះ។
ក្នុងនោះដីរបស់អ្នកស្រីចំនួន ៧០អា លក់ឱ្យក្រុមហ៊ុនចិននោះ ក្នុងតម្លៃជិត១០ម៉ឺនដុល្លារ តែគាត់ថាទទួលបានលុយតែជាង ៤ម៉ឺនដុល្លារប៉ុណ្ណោះ នៅសល់ប្រមាណ ៥ម៉ឺនដុល្លារទៀតដែលមិនទាន់ទទួលបាន។
ពលរដ្ឋរូបនេះ ស្នើមេដឹកនាំជួយរកយុត្តិធម៌ដើម្បីបានលុយដោះស្រាយវិបត្តិជីវភាព ក្រោយរកការអន្តរាគមន៍ពីថ្នាក់ឃុំ ស្រុក និងខេត្ត តែគ្មានដំណោះស្រាយជាង១ឆ្នាំទៅនេះ។
អ្នកស្រីថា៖ «សូមសម្តេចទាំងបួនទ្វេ មេត្តាជួយដោះស្រាយដល់កូនចៅនៅក្នុងភូមិអូរក្រាំងអំបិល និងឃុំត្រពាំងគងនេះ ធ្វើម៉េចឲ្យបានលុយគ្រប់ចំនួនឲ្យប្រជាពលរដ្ឋមក។ គាត់មានការខ្វះខាតដូចជារូបខ្ញុំក៏ដោយ រូបបងប្អូននៅក្នុងភូមិក៏ដោយអ្នកខ្លះជំពាក់ធនាគារច្រើន ថាលក់ដីទៅបានលុយសងគេខ្លះទៅ បានលុយទៅដោះស្រាយដីពីទីណាតិចតួច ដើម្បីចិញ្ចឹមជីវិត តែទីបំផុតអត់មានបានផលប្រយោជន៍អីទេ»។
ដោយឡែក ពលរដ្ឋម្នាក់ទៀត អ្នកស្រី ភួង ស្រីម៉ៅ ប្រាប់ថា គាត់បានលក់ដីស្រែជិត២០អា ទៅឱ្យក្រុមហ៊ុនចិននោះក្នុងតម្លៃ ៥ម៉ឺនដុល្លារ តែទទួលបានលុយតែជាង ២ម៉ឹនដុល្លារប៉ុណ្ណោះ កាលពីអំឡុងខែមេសា ឆ្នាំ២០២៤។
ពលរដ្ឋរូបនេះ បញ្ជាក់ថា ដីដែលមានជម្លោះនេះស្ថិតនៅភូមិអូក្រាំងអំបិល និងភូមិបាក់ចិញ្ចៀន ក្នុងឃុំត្រពាំងគង ស្រុកសំរោងទង ខេត្តកំពង់ស្ពឺ ហើយក្រុមហ៊ុនចិនមិនបានទូទាត់លុយដែលនៅសល់ជាង ១លាន៦០ម៉ឺនដុល្លារ ទៅឱ្យជិតភូមិជិត៦០គ្រួសារនោះ។
លោកថា ៖ «ជួយប្រជាពលរដ្ឋយើងខ្ញុំផង ព្រោះប្រជាពលរដ្ឋយើងខ្ញុំរាល់ថ្ងៃនេះរងទុក្ខវេទនាជាទីបំផុត។ ឆ្នាំទៅមិញ ក៏អត់បានធ្វើស្រែឥឡូវឆ្នាំនេះ អត់បានធ្វើស្រែទៀត ហើយក្នុងម្នាក់ៗ មានអ្នកដាច់ពេល ហើយក៏មានការឈឺចាប់កាន់តែខ្លាំង ក៏ទារុណទារា។ អ្នករងចាំដែលស្លាប់នោះ ក៏ពីរបីនាក់ទៀតដែរ ដូចថាវាឈឺចាប់។ ម្នាក់ៗ ដែលបានលុយមកខ្លះគ្នាមិនបានចាយផង យកលុយកក់ទៅលោះប្លង់ ទៅលោះប្លង់ហ្នឹង ដើម្បីយកប្លង់មកឲ្យគេ ហើយអាលុយលោះប្លង់ហ្នឹងក៏លោះអស់ទៅ អាប្លង់ក៏ឲ្យទៅគេទៅ ហើយក៏អត់បានលុយមកទល់សព្វថ្ងៃហ្នឹងដែរ»។
ជុំវិញរឿងនេះ VOD បានព្យាយាមទាក់ទងអភិបាលខេត្តកំពង់ស្ពឺ លោក ជាម ច័ន្ទសោភណ្ឌ តែលោកបានចុចផ្តាច់ទូរសព្ទនៅពេលមានការហៅចូលជាច្រើនដងនៅថ្ងៃទី១០ ខែកុម្ភៈ។
យ៉ាងណា ប្រធានសមាគមការពារសិទ្ធិមនុស្សអាដហុក លោក នី សុខា យល់ថា តុលាការគួរតែចេញដីការក្សាការពារកុំឱ្យមានការអភិវឌ្ឍលើដីមានជម្លោះនោះ ដើម្បីរកដំណោះស្រាយឱ្យពលរដ្ឋសិន ហើយថា អាជ្ញាធរពាក់ព័ន្ធក៏គួរចេញមុខអន្តរាគមន៍បន្ទាប់ដើម្បីកុំឱ្យពលរដ្ឋជួបវិបត្តិជីវភាពកាន់តែធ្ងន់ធ្ងរថែមទៀត។
លោកថា៖ «ស្នើឲ្យតុលាការមេត្តាធ្វើយ៉ាងណាចាត់វិធានការឱ្យបានរួសរាន់ និងឲ្យម៉ឺងម៉ាត់បំផុតចំពោះភាគីណាដែលរំលោភបំពានកិច្ចសន្យា ដើម្បីជួយផ្តល់យុត្តិធម៌ទៅដល់ប្រជាពលរដ្ឋផង ក៏អាចជួយសម្រាលបន្ទុករបស់ប្រជាពលរដ្ឋ ដែលបច្ចុប្បន្ន ប្រជាពលរដ្ឋក៏គង់តែខ្វះខាតអំពី បញ្ហាសេដ្ឋកិច្ចផងទាក់ទងទៅនឹងបញ្ហាជីវភាពរស់នៅបញ្ហាបំណុលបញ្ហាអីទាំងអស់ហ្នឹងផង ហើយតុលាការគួរតែមានការចេញដីការក្សាការពារ ដើម្បីធានាបានយ៉ាងណាកុំឲ្យមានការអភិវឌ្ឍនៅលើដីនៅបន្តទៅទៀត»។
ចំណែក ទីប្រឹក្សាគណបក្សកម្លាំងជាតិ លោក រ៉ុង ឈុន ហាក់ស្តីបន្ទោសថា ការមិនអើពើរបស់មន្រ្តីពាក់ព័ន្ធក្នុងការរកដំណោះស្រាយឱ្យពលរដ្ឋក្នុងរឿងនេះ គឹបង្ហាញពីកម្សោយក្នុងការធ្វើការរបស់មន្រ្តីរាជការផង និងអាចជាប់ពាក់ព័ន្ធនឹងអំពើពុករលួយផងដែរ។
លោកថា៖ «រដ្ឋាភិបាលត្រូវពិនិត្យមើល បើមន្រ្តីណាអសកម្ម ហើយមិនបានយកចិត្តទុកដាក់ ជុំវិញបញ្ហាប្រជាពលរដ្ឋ ត្រូវមានវិធានការទៅលើមន្រ្តីទាំងអស់នោះ។ បញ្ហាមួយទៀត វាបង្កមកពីបញ្ហាពុករលួយសង្គមមានបញ្ហាពុករលួយ គឺរាស្រ្តទទួលរងគ្រោះ។ អ៊ីចឹងអ្នកដែលគេមានលុយ ក្រុមហ៊ុនមានលុយអ៊ីចឹងទៅសូកប៉ាន់គេផ្តល់សំណូកចុះឡើងទៅ ដំណោះស្រាយ គឺពលរដ្ឋមិនងាយទទួលបានយុត្តិធម៌ទេ»។
កាលពីថ្ងៃទី៩ ខែកុម្ភៈ ប្រជាពលរដ្ឋជិត ១០០នាក់ បានប្រមូលផ្តុំគ្នាម្តងរួចមកហើយ នៅទីតាំងដីដែលមានជម្លោះនោះ ដោយមានលើកបដា រូបប្រធានព្រឹទ្ធសភា លោក ហ៊ុន សែន និងនាយករដ្ឋមន្រ្តីកម្ពុជា លោក ហ៊ុន ម៉ាណែត ដើម្បីជួយរកយុត្តិធម៌។
អ្នកភូមិប្រាប់ VOD ថា បើនៅតែគ្មានដំណោះស្រាយទេ ក្រុមពលរដ្ឋរងគ្រោះ គ្រោងប្រមូលផ្តុំគ្នានៅមុខសាលាខេត្តកំពង់ស្ពឺជាថ្មីទៀត ដើម្បីទាមទារលុយដែលនៅសល់ជាង ១លាន ៦០ម៉ឹនដុល្លារនោះ ពីក្រុមហ៊ុនចិនឈ្មោះ ជាន យូលៀន មកវិញ៕
