អ្នកតាមដានបញ្ហាសង្គម អំពាវនាវឱ្យសហគមន៍ខ្មែរនៅប្រទេសប្រជាធិបតេយ្យជឿនលឿន សហការគ្នា ទប់ស្កាត់ចារកម្មគំរាមឆ្លងដែនរបស់រដ្ឋាភិបាលគ្រួសារហ៊ុន ដោយផ្តើមចេញពីករណីលោកបណ្ឌិត សេង សារី ដើម្បីជំរុញចរន្តផ្លាស់ប្តូរនៅកម្ពុជា តាមគន្លងប្រជាធិបតេយ្យ។
អ្នកវិភាគបញ្ហាសង្គម លោកបណ្ឌិត សេង សារី ដែលបង្ហាញខ្លួនស្និទ្ធនឹងលោក សម រង្ស៊ី អតីតមេដឹកនាំគណបក្សសង្គ្រោះជាតិ បានសារភាពថ្មីៗនេះថា លោកបានចូលទន្ទាក់ ធ្វើជាចារម្មឱ្យមេដឹកនាំបក្សកាន់អំណាច រយៈពេល៤ឆ្នាំ។
លោកគូសបញ្ជាក់ផងដែរថា ក្នុងនាមជាចារជន លោកបានទទួលលុយពីលោក ហ៊ុន សែន ប្រមាណជា១២ម៉ឺនដុល្លារ ដើម្បីបំពេញបេសកកម្មនេះ។
បញ្ហានេះ អ្នកជំនាញច្បាប់ និងអភិបាលកិច្ចបែបប្រជាធិបតេយ្យ លោក វន់ ចាន់ឡូត និយាយប្រាប់VODនៅថ្ងៃទី១០ ខែកុម្ភៈនេះថា ពលរដ្ឋនិងសហគមន៍ខ្មែរនៅអូស្ដ្រាលី គួរតែប្ដឹងទៅអាជ្ញាធរឱ្យស៊ើបអង្កេតលើបទល្មើស លោក ហ៊ុន សែន និងចារកម្ម កំពុងបោកអ្នកប្រជាធិបតេយ្យនៅក្រៅប្រទេស។
លោកបន្តថា ពលរដ្ឋខ្មែរស្នេហាជាតិ មិនអាចបណ្តោយឱ្យជនផ្តាច់ការនិងចារកម្មពួកគេដើរបំផ្លាញអ្នកប្រជាធិបតេយ្យ ឬឈ្លបតាមដានគោលនយោបាយស្តារប្រជាធិបតេយ្យ និងសិទ្ធិមនុស្សកម្ពុជានោះទេ។
លោកសង្កត់ធ្ងន់ថា ដើម្បីទប់ស្កាត់ចារកម្មរបស់ជនផ្តាច់ការកុំឱ្យដើរបំផ្លាញអ្នកប្រជាធិបតេយ្យនៅក្រៅប្រទេស គឺបងប្អូនខ្មែរស្នេហាជាតិទាំងអស់ ត្រូវរួមសាមគ្គីប្តឹងពួកចារកម្មនោះដើម្បីកុំឱ្យបន្តកើតមាន។
លោកថា៖ «លោកហ៊ុន សែន បានប្រើប្រាស់ថវិកាជាតិ ដើម្បីធ្វើការស្រាវជ្រាវស្វែងរកនូវព័ត៌មានពីដៃគូនយោបាយរបស់ខ្លួន ក្នុងចេតនាដើម្បីកម្ទេចខ្មែរម្ខាងទៀតនេះ គឺជាការទទួលខុសត្រូវចំពោះមុខច្បាប់មួយធំធេងណាស់ ដែលមិនអាចប្រកែកបាន ដូច្នេះអ្វីដែលរដ្ឋាភិបាលអូស្ត្រាលី អាជ្ញាធរអូស្ត្រាលីគួរតែធ្វើល្អ គឺធ្វើការស៊ើបអង្កេតទៅលើករណីនេះ ហើយខ្ញុំជឿថា បើមានការស៊ើបអង្កេតមួយពិតប្រាដក ទៅលើករណីដែលលោក ហ៊ុន សែន ប្រើប្រាស់ថវិកាជាតិ ដើម្បីប្រើមនុស្សមកបម្រើកិច្ចការនយោបាយទុច្ចរិតរបស់ខ្លួន»។
បន្ថែមពីនេះ លោក វន់ ចាន់ឡូត បង្ហោះសារលើហ្វេសប៊ុករបស់លោក កាលពីថ្ងៃទី៩ ខែកុម្ភៈនេះ ដោយនិយាយថា ករណីជនចារកម្មនេះ មានតម្រុយបទល្មើសពីរធំៗ បានប្រព្រឹត្តអំពើពុករលួយដោយសារគប់គិតយកលុយជាតិចាយវាយលើសកម្មភាពចារកម្ម បំផ្លាញខ្មែរគ្នាឯង និងរំលោភលើសេចក្ដីទុកចិត្តរបស់UNHCR និងរដ្ឋាភិបាលអូស្ដ្រាលី ដោយទំនងផ្ដល់ព័ត៌មានប្រឌិត failure information។
លោកបន្តថា លោកអ្នកវិភាគបានសារភាពថា ខ្លួននិងប្រធានព្រឹទ្ធសភា បានរៀបចំគម្រោងស្រាវជ្រាវកម្លាំងប្រឆាំងនៅទឹកដីថៃ១ឆ្នាំ ដោយឱ្យមួយខែ ១ម៉ឺនដុល្លារ។ រយៈពេល១ឆ្នាំ គម្រោងស្រាវជ្រាវនេះ ចាប់ផ្ដើមនៅខែមីនា ឆ្នាំ២០២១ និងបញ្ចប់នៅខែមីនា ឆ្នាំ២០២២ នៅពេលរូបគាត់ទៅដល់អូស្ដ្រាលី។
លោក ចាន់ឡូត យល់ថា លោក ហ៊ុន សែន គម្រាមចាប់ខ្លួនគាត់គឺសំដៅលើ លោក សេង សារី នៅខែកក្កដា ហើយគាត់ភៀសខ្លួនទៅថៃ នៅខែកក្កដា បានធ្វើការនេះមុនឧបទ្ទវហេតុកើតឡើង ឬនិយាយបានថា បង្កើតការគម្រាមក្លែងក្លាយដើម្បីទទួលទំនុកចិត្តពីជនរងគ្រោះ និងអ្នកតស៊ូនៅក្រៅប្រទេស និងសហគមន៍អន្ដរជាតិ។
លោកបញ្ជាក់ថា អ្នកណា ឬបុគ្គលណា នៅរក្សា ឬបន្ដចិញ្ចឹមចិត្តធ្វើការងារជាមួយជនល្មើស គឺជាការប្រមាថធ្ងន់ធ្ងរដល់ប្រព័ន្ធយុត្តិធម៌ ដល់ជនរងគ្រោះ និងអ្នកតស៊ូ។
កាលពីថ្ងៃទី៩ ខែកុម្ភៈ លោកបណ្ឌិត សេង សារី បានបង្ហោះវីដេអូឡាយ និយាយអំពីការកំណត់មុខសញ្ញាចារបុរស និងការបំបែកល្បែងចារកម្មរបស់ លោក ហ៊ុន សែន។ ក្នុងវីដេអូនោះ លោកបានចោទប្រកាន់ព្រះតេជគុណ ប៊ុត ប៊ុនតិញ និងលោក ជូន ចន្ទបុត្រថា ជាចារកម្មរបស់លោក ហ៊ុន សែន ផងដែរ។
លោកថា៖ «បទពិសោធន៍មួយដែលខ្ញុំដឹង ជាពិសេសសមាជិកអចិន្ត្រៃយ៍របស់គណបក្សសង្គ្រោះជាតិយើងឃើញហើយ នៅពេលដែលថ្នាក់ដឹកនាំដក លោក ប៊ុត ប៊ុនតិញ ចេញពីការប្រជុំអចិន្ត្រៃយ៍បក្សហ្នឹង គឺព័ត៌មានវាលែងបែកធ្លាយ ព័ត៌មានអ៊ីចឹងវាលែងទៅណា ពួកយើងដឹងហើយថារឿងចោរកម្មនេះមិនមែនតែជំនាន់ខ្ញុំទេ ខ្ញុំជាចារកម្មប្រឡំទេ ជាចោរកម្មដែលជាការទិញទិន្នន័យក្នុងនាមអ្នកស្រាវជ្រាវ»។
ជុំវិញបញ្ហានេះ ស្ថាបនិកវត្តភ្នំសេរីនៃរដ្ឋម៉ាសាឈូសេត សហរដ្ឋអាមេរិក ព្រះតេជគុណ ប៊ុត ប៊ុនតិញ អះអាងថា ព្រះអង្គមិនមែនជាចារកម្មលោក ហ៊ុន សែន ដូចការចោទប្រកាន់របស់លោកបណ្ឌិត សេង សារី នោះទេ។
ព្រះអង្គថា នេះជាល្បិចទុច្ចរិតលោក ហ៊ុន សែន ខ្ចីដៃលោក សេង សារី ដើរចោទប្រកាន់អ្នកប្រជាធិបតេយ្យដើម្បីកម្ចេចពួកគេ ដោយធ្វើឱ្យពលរដ្ឋភ័ន្តច្រឡំថា នរណាជាមិត្ត នរណាជាសត្រូវ ឱ្យពិតប្រាកដ។
ព្រះអង្គសង្កត់ធ្ងន់ថា មួយជីវិតរបស់ព្រះអង្គមិនបម្រើឱ្យជនផ្តាច់ការ ឬធ្វើចារកម្មឱ្យអ្នកបំផ្លាញជាតិមាតុភូមិជាដាច់ខាត ម្យ៉ាងវិញទៀតព្រះអង្គថា ការលក់ឧត្តមគតិបម្រើជនផ្តាច់ការជាទង្វើបំផ្លាញជាតិខ្លួនឯង។
ព្រះអង្គថា៖ «ចំពោះអាត្មា អ្វីដែលអាត្មាស្រឡាញ់ក្នុងជីវិតអាត្មាគឺទឹកដី ស្រឡាញ់ ប្រជាពលរដ្ឋជាតិរបស់អាត្មា មានន័យថាស្រឡាញ់ជាតិ ទី២អាត្មាស្រឡាញ់យុត្តិធម៌ ដោយ ហ៊ុន សែន មិនមែនស្រឡាញ់ជាតិ មិនស្រឡាញ់យុត្តិធម៌ គឺវាផ្ទុយពីអាត្មា បានអាត្មាមិនអាចទៅបម្រើ ហ៊ុន សែន បានទេ»។
យ៉ាងណា ពាក់ព័ន្ធនឹងករណីប្តឹងចារកម្ម លោក ហ៊ុន សែន នៅអូស្រ្តាលីនោះ ព្រះអង្គបញ្ជាក់ថា ជាសិទ្ធិរបស់សហគមន៍ខ្មែរ ឬពលរដ្ឋខ្មែរក្រៅប្រទេស បើគិតថាប៉ះពាល់ ឬបំផ្លាញប្រជាធិបតេយ្យមែន គួរតែធ្វើ។
ប្រធានក្រុមឃ្លាំមើលកម្ពុជា លោក ម៉ែន ណាត និយាយថា មេដឹកនាំផ្តាច់ការ លោក ហ៊ុន សែន បានប្រើចារកម្មរបស់ខ្លួន ដើម្បីកម្ទាច់អ្នកប្រជាធិបតេយ្យ ដូច្នេះត្រូវតែរួមដៃគ្នាទប់ស្កាត់ជាបន្ទាន់។
លោកបន្តថា ពួកចារកម្មឬជនបង្កប់ លោក ហ៊ុន សែន នឹងបរាជ័យ ប្រសិនបើអ្នកប្រជាធិបតេយ្យចេះតាមដានសង្កេត គឺបណ្តេញពួកគេភ្លាម ដើម្បីកុំឱ្យមានបញ្ហា ឬរាំងស្ទះការស្តារប្រជាធិបតេយ្យ។
លោកថា៖ «ដើម្បីដោះស្រាយទប់ស្កាត់អំពើចោរកម្ម និងបានត្រូវការសហគមន៍ខ្មែរនៅក្នុងប្រទេសនិមួយៗ ត្រូវទប់ ទប់តាមរយៈការរាយការណ៍ទៅស្ថាប័នសមត្ថកិច្ចរបស់ប្រទេសគេទី១។ ទី២បើមានឯកសាររឹងមាំទៅប្ដឹង ហើយបើស្ថានភាពវាធ្ងន់ជាងហ្នឹង យើងអាចនាំគ្នាធ្វើបាតុកម្មទាមទារដាក់សម្ពាធឱ្យរដ្ឋបាលស្រុក នឹងដោះស្រាយជាមួយសាមីជនហ្នឹង ឬក៏អាចបណ្ដេញជនហ្នឹងចេញពីប្រទេស»។
លោកថា ដើម្បីបង្ការទប់ស្កាត់ឧក្រិដ្ឋកម្មឆ្លងដែន និងបទចារកម្ម ពីសំណាក់រដ្ឋាភិបាលទីក្រុងភ្នំពេញ ទៅលើសហគមន៍ខ្មែរនៅក្រៅប្រទេសឱ្យមានប្រសិទ្ធភាព គឺត្រូវរួមដៃគ្នា ធ្វើសេចក្តីរាយការណ៍ជូនរដ្ឋាភិបាលប្រទេសនោះ ពីបទចារកម្ម គំរាមកំហែងឆ្លងដែន បង្កការភ័យខ្លាចនានា ពាក់ព័ន្ធមនុស្សនៅក្នុងសហគមន៍ខ្លួន។
សម្រាប់ លោក ម៉ែន ណាត ករណីនេះ ត្រូវបែងចែកឱ្យដាច់ រវាងមនោសញ្ចេតនា សីលធម៌ និងច្បាប់ ពោលគឺ មិនត្រូវអនុញ្ញាតឱ្យជនទុច្ចរិត ធ្វើអំពីចារកម្ម ដែលខុសធ្ងន់ធ្ងរទៅលើផ្លូវច្បាប់ និងគោលការណ៍នៅប្រទេសប្រជាធិបតេយ្យ ហើយពលរដ្ឋខ្មែររស់នៅប្រទេសលោកសេរី គប្បីយល់ឱ្យច្បាស់រឿងនេះ។
សម្រាប់ លោក ម៉ែន ណាត អំពាវនាវឱ្យសហគមន៍ខ្មែរតាមប្រទេសនីមួយៗ គួរតែចេញតវ៉ា ឬដាក់សម្ពាធ បណ្តេញចេញសាម៉ីជន ជាចារជន (ជនបង្កប់) និងអ្នកចូលដៃជាមួយរដ្ឋាភិបាលភ្នំពេញទាំងនោះ ពីប្រទេសដែលពួកគេកំពុងរស់នៅ។
ជាក់ស្តែងករណី លោក សេង សារី និងអ្នកដទៃទៀត ដែលរំលោភ/បោកប្រាស់កិច្ចសន្យាជនភៀសខ្លួននយោបាយ តាមរយៈអង្គការសហប្រជាជាតិ UNHCR។ អ្នកទាំងនោះ គប្បីទទួលទោស ពីបទក្លែងបន្លំឯកសារ និងបទចារកម្ម គំរាមកំហែង ធ្វើឱ្យពលរដ្ឋខ្មែរនៅក្រៅប្រទេស មានការព្រួយបារម្ភពីសុវត្ថិភាព៕
