មេដឹកនាំបក្សកាន់អំណាច លោក ហ៊ុន សែន ទម្លាយថា ថ្មីៗនេះ មានគេរៀបចំផែនការ ភេវរកម្មដោយប្រើយន្តហោះគ្មានមនុស្សបើក បញ្ជាចូលក្នុងភូមិគ្រឹះលោកក្នុងក្រុងតាខ្មៅ ដើម្បីផ្តាច់ជីវិតរបស់លោក តែការថ្លែងនេះ រងការរិះគន់ថា គ្រាន់តែជាល្បិចកម្ទេចក្រុមជំទាស់ពីទីលាននយោបាយ ដើម្បីសម្រេចមហិច្ចតាក្តោបអំណាចត្រកូលហ៊ុនប៉ុណ្ណោះ។
ការទម្លាយរបស់ លោក ហ៊ុន សែន ធ្វើឡើងក្នុងពិធីសម្ពោធសមិទ្ធផលនានា នៅវត្តព្រះឥន្ទសាមគ្គីធម៌ ក្នុងខេត្តកណ្តាល នៅថ្ងៃទី១១ ខែកុម្ភៈ ឆ្នាំ២០២៥នេះ។
បើតាមលោក ហ៊ុន សែន ផែនការភេវរកម្មនេះ ត្រូវបានលោកដឹងជាមុន តាមរយៈសារសំឡេងសម្ងាត់ ដែលលោកទទួលបាន ហើយលោកប្រាប់ទៅភាគីបរទេស កុំលូកលាន់កិច្ចការផ្ទៃក្នុងកម្ពុជា ដោយថា កម្ពុជាត្រូវគ្រប់គ្រងសន្តិសុខជាតិរបស់ខ្លួនដោយខ្លួនឯង។
លោកថា៖ «ផែនការវាយ ដ្រូន ចូលតាខ្មៅ! អ្នកត្រូវចាំ បាត់ខ្លួនពីតាកែវមួយគឺគាំទ្រផែនការពេញវាយ ដ្រូន ចូលតាខ្មៅ។ សន្ដិសុខជាតិអ្នកកុំចង់ប្រហារជីវិតរបស់ខ្ញុំ ចង់សម្លាប់ខ្ញុំ។ នេះជាអំពើភេរវកម្ម ហើយសុំជនបរទេសទាំងឡាយ ប្រយ័ត្នប្រយែងទៅ លើការគាំទ្រទាំងឡាយនៃសកម្មភាពភេរវកម្ម»។
យ៉ាងណា លោក ហ៊ុន សែន មិនបានបញ្ជាក់អំពីអ្នកពាក់ព័ន្ធក្នុងការរៀបចំដ្រូនដើម្បីវាយប្រហារលោកនោះឡើយ ប៉ុន្តែការបង្ហើបពីផែនការធ្វើភេរវកម្មនេះ ធ្វើឡើងស្របពេលដែលលោក សម រង្សី មេដឹកនាំបក្សប្រឆាំង បានប្រកាសពីការបង្កើតរដ្ឋាភិបាលនិរទេសនៅក្រៅប្រទេស។
ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក អ៊ុំ សំអាន ប្រាប់VODថា លោក ហ៊ុន សែន កំពុងបង្កើតល្បិចវាយកម្ទេចក្រុមសំឡេងជំទាស់ តាមរយៈការបង្កើតច្បាប់ដាក់ក្រុមមនុស្ស ជាភេវរករ ដែលលោក ហ៊ុន សែន ទាមទារឱ្យបង្កើតច្បាប់នេះក្នុងពេលថ្មីៗនេះ។
បើតាម លោក សំអាន គឺលោក ហ៊ុន សែន មានអង្គរក្សរាប់ពាន់នាក់ ដូចនេះគ្មានអ្នកណាហ៊ានទៅប្រើប្រាស់អាវុធវាយប្រហារដល់ជីវិត លោក ហ៊ុន សែន ទេនៅចំពោះមុខនេះ។
ជាងនេះទៀត សម្រាប់ លោក អ៊ុំ សំអាន ក្នុងល្បិចបង្កើតរឿងថាមានគេប្រើដ្រូនចង់សម្លាប់ លោក ហ៊ុន សែន បែបនេះ គឺជាបំណងបង្វែរព្រឹត្តិការណ៍ពីជម្លោះកោះគុតផង និងជាយុទ្ធសាស្រ្តបង្រ្កាបក្រុមអ្នកប្រជាធិបតេយ្យចេញពីសង្វៀននយោបាយផង។
លោកថា៖ «ពួកយើងធ្វើបាតុកម្មមិនទទួលស្គាល់លទ្ធផលបោះឆ្នោតឆ្នាំ១៩៩៨ និងទាមទារឲ្យលោក ហ៊ុន សែន ចុះចេញពីតំណែងជានាយករដ្ឋមន្ត្រីហ្នឹង! ពេលហ្នឹង លោក ហ៊ុន សែន ឲ្យគេបោកគ្រាប់បែកចូលក្នុងផ្ទះរបស់គាត់ នៅជិតវិមានឯករាជ្យ។ ប៉ុន្តែ អត់មានត្រូវផងហ្នឹង! គាត់យកលេស ព្រលឹមឡើងគឺបង្ក្រាបបាតុកម្មហ្នឹងតែម្តង បង្កើតព្រឹត្តិការណ៍ដោយខ្លួនឯង កាលឆ្នាំ១៩៩៧ គាត់ឲ្យគេបាញ់បេទៅលើឡានគាត់ ដើម្បីយកលេសបង្ក្រាបទៅលើគណបក្សហ៊្វុនស៊ិនប៉ិច។ ឃើញរដ្ឋប្រហារឆ្នាំ១៩៩៧ ដើម្បីកម្ទេច ហ៊្វុនស៊ិនប៉ិច។ ដូច្នេះខ្ញុំយល់ថាដ្រូនដែលបង្ហោះលើផ្ទះ លោក ហ៊ុន សែន គ្មានអ្នកណាមានសមត្ថភាពបង្ហោះដ្រូនទៅលើផ្ទះរបស់គាត់នោះទេ មានតែគាត់ខ្លួនឯងហ្នឹង ដែលមានសមត្ថភាពអាចបង្ហោះដ្រូនទៅលើផ្ទះរបស់គាត់ ដើម្បីយកលេសថាគេចង់ធ្វើភេវរកម្មទៅលើគាត់ អ៊ីចឹងទៅដើម្បីបង្កើតច្បាប់ដាក់ក្រុមប្រឆាំងជាក្រុមភេរវករចឹងទៅ»។
ជាមួយគ្នានេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ថា ក្នុងពេលបច្ចុបុ្បន្ន លោក ហ៊ុន សែន កាន់អំណាចពេញដៃ ដូចនេះវាមិនអាចទៅរួចទេ រឿងបង្ហោះដ្រូនតាមសម្លាប់លោក ហ៊ុន សែន បែបនេះ។
ក្នុងន័យនេះ លោកចាត់ទុកថា នេះគឺជាយុទ្ធនាការទ្រង់ទ្រាយធំរបស់លោក ហ៊ុន សែន ដើម្បី ប្រាប់អន្តរជាតិថា លោកការពារខ្លួនពីអំពើភេវរកម្ម តែតាមពិតជាល្បិចវាយកម្ទេចក្រុម ដែលរាំងស្ទះដល់ការក្តោបអំណាចបែបគ្រួសារនិយមរបស់លោកទៅវិញទេ។
លោកថា៖ «គាត់ [លោក ហ៊ុន សែន] អ្នករៀបចំផែនការទាំងអស់ខ្លួនឯង ហើយគាត់យកអាព្រឹត្តិការណ៍មួយហ្នឹងទៅទម្លាក់កំហុសឲ្យអ្នកដទៃ។ រួចទៅគាត់ចង់ចោទអ្នកណាក៏ស្រេចតែចិត្ត! មើលពីខាងក្រៅទៅ ដូចគាត់ហ្នឹងជាជនរងគ្រោះអ៊ីចឹង ក៏ប៉ុន្តែមិនមែនទេ គឺក្នុងយុទ្ធនាការក្នុងយុទ្ធសាស្ត្ររបស់គាត់រៀបចំទាំងអស់ ដូច្នេះជម្រាបជូនដោយខ្លីថា វាជាល្បែងថ្ពិនភ្នែករបស់លោក ហ៊ុន សែន ដែលធ្លាប់លេងហូរហែកន្លងមកដដែលៗហ្នឹង! រួចទៅមានបំណងធ្វើបាបអ្នកដទៃ ក្នុងគោលដៅការពារអំណាចក្រុមគ្រួសារនិយមរបស់ខ្លួនឯងប៉ុណ្ណឹងទេ»។
កន្លងទៅ ប្រធានព្រឹទ្ធសភាកម្ពុជា លោក ហ៊ុន សែន បានជំរុញឱ្យបង្កើតច្បាប់ថ្មីមួយ ដោយ ដាក់ក្រុមមនុស្ស ឬអង្គការចាត់តាំងមួយចំនួនទៅជា ក្រុមភេរវករ ក្រោមហេតុផល ដើម្បីទប់ស្កាត់សកម្មភាពបង្កភាពអសន្តិសុខក្នុងសង្គម និងប៉ុនប៉ងផ្តួលរំលំរដ្ឋាភិបាល។
បើតាម លោក ហ៊ុន សែន ក្រុមទាំងនោះលោកសំដៅដល់អ្នកប្រឆាំងនៅក្រៅប្រទេស ដែលលោកចាត់ទុកថាជា «ក្រុមជ្រុលនិយម»។
ប៉ុន្តែ សម្រាប់ក្រុមអ្នកឃ្លាំមើលសង្គម យល់ថា ការបង្កើតច្បាប់ដោយកំណត់ឲ្យក្រុមជំទាស់នៅក្រៅប្រទេសទៅជាក្រុមភេរវកម្មបែបនេះ គឺជាការគំរាមកំហែងធ្ងន់ធ្ងរដល់អ្នកមាននិន្នាការផ្ទុយពីរដ្ឋាភិបាល ហើយថាច្បាប់នេះបម្រើតែផលប្រយោជន៍នយោបាយរបស់គ្រួសារហ៊ុនតែប៉ុណ្ណោះ៕
