Social Issues, ព័ត៌មានជាតិ, សង្គម

ជនជាតិវៀតណាមជាង២០០នាក់ទៀតត្រូវបណ្តេញចេញពីកម្ពុជាពាក់ព័ន្ធបទឧក្រិដ្ឋច្រើនទម្រង់

លោក ប៉ុល សម្បត្តិ
| ១១ កុម្ភៈ ២០២៥
ម៉ោង ២១:១៦

ជនជាតិវៀតណាមជាង ២០០នាក់ទៀត ត្រូវបានបណ្តេញចេញពីកម្ពុជា ពាក់ព័ន្ធនឹងការប្រព្រឹត្តិបទឧក្រិដ្ឋច្រើនទម្រង់ នៅក្រុងប៉ាវិត ដែលជំរុញឱ្យមានការលើកឡើងថា កម្ពុជាចាំបាច់ត្រូវបោសសម្អាតអំពើពុករលួយជាប្រព័ន្ធ ទើបអាចទប់ស្កាត់បាន។

អ្នកឃ្លាំមើលបារម្ភថា បញ្ហានេះ កំពុងរុញច្រានកម្ពុជា ឱ្យក្លាយជាជម្រកឧក្រិដ្ឋជនឆ្លងដែនខុសច្បាប់ បង្កការគំរាមគំហែងដល់ជីវភាពពលរដ្ឋច្រើនលាននាក់ ច្រើនឆ្នាំទៀត បើវិធានការទប់ស្កាត់គ្មានប្រសិទ្ធភាព និងមិនអាចចាប់មេក្លោងនៅពីក្រោយបទឧក្រិដ្ឋនេះបាន។

អគ្គនាយកដ្ឋានអន្តោប្រវេសន៍ និយាយលើគេហទំព័របស់ខ្លួនថា កាលពីថ្ងៃទី៥និង៦ ខែកុម្ភៈនេះពោលគឺត្រឹមរយៈពេលពីរថ្ងៃ ខ្លួនបានធ្វើការស៊ើបអង្កេត និងបណ្តេញជនជាតិវៀតណាមសរុបចំនួន ២១៣នាក់ ចេញពីកម្ពុជា ពាក់ព័ន្ធបទឆបោក បង្ខាំងមនុស្សខុសច្បាប់ និងកំហែងយក បទប្រើប្រាស់ដោយខុសច្បាប់នូវសារធាតុញៀន និងបទហិង្សាដោយចេតនា និងបទល្មើសមួយចំនួនទៀត។

ប្រភពនោះ បញ្ជាក់ថា វិធានបណ្តេញចេញនេះ ធ្វើឡើងតាមប៉ុស្តិ៍នគរបាលច្រកទ្វារព្រំដែនអន្តរជាតិបាវិត និងព្រៃវល្លិ៍ ខេត្តស្វាយរៀង។

តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្ទ ប្រាប់VODនៅថ្ងៃទី១១ ខែកុម្ភៈនេះថា បញ្ហានេះ ដោយសារតែអំពើពុករលួយចាក់ឫសជ្រៅ រុញកម្ពុជាឱ្យក្លាយជាជម្រកក្រុមឧក្រិដ្ឋជនឆ្លងដែន។

លោកសង្កត់ធ្ងន់ថា បទឧក្រិដ្ឋច្រើនទម្រង់នេះ នឹងបន្តគំរាមកំហែងពលរដ្ឋកម្ពុជាច្រើនឆ្នាំទៀត បើកម្ពុជាគ្មានការប្រកួតអំណាច ដោយតម្លាភាព ត្រឹមត្រូវ និងយុត្តិធម៌ តាមគន្លងប្រជាធិបតេយ្យទេនោះ។

លោកថា៖«ប្រទេសកម្ពុជាយើងនឹងទៅជាជម្រករបស់ពួកឧក្រិដ្ឋជន ពួកពុករលួយ បក្ខពួកនិយម ជម្រករបស់ពួកគ្រឿងញៀន ពួកឧក្រិដ្ឋជនទាំងអស់នេះហើយ ដែលនៅអាស៊ីរបស់យើងទាំង១១ប្រទេសនេះ គឺខ្មែរយើងនៅក្រោមបាតតារាង អ៊ីចឹងខ្ញុំសូមឲ្យរដ្ឋាភិបាលគាត់គិតគូរបញ្ហាហ្នឹងមែនទែន»។

អ្នកវិភាគបញ្ហាសង្គម លោកបណ្ឌិត មាស នី និយាយថា ភាពធូរលុង នៃការអនុវត្តច្បាប់អន្តោរប្រវេសន៍ និងអំពើពុករលួយ គឺជាកត្តាជំរុញឱ្យក្រុមឧក្រិដ្ឋជនឆ្លងដែន ហ៊ានប្រព្រឹត្តិបទល្មើសឆបោកនិងចាប់ជំរិត។

លោកបន្តថា បើរដ្ឋាភិបាលមិនពន្លឿនការទប់ស្កាត់ ឬលុបបំបាត់អំពើពុករលួយ បក្សពួកនិយមទេ បញ្ហាទាំងនេះនឹងបន្តចាក់ស្រែស បង្កការគំរាមកំហែងដល់វិស័យទេសចរណ៍ និងអ្នកវិនិយោគទុនជាដើម។

ម្យ៉ាងវិញទៀត លោកថា អំពើឆបោក ការចាប់ជំរិត ឬការបង្ខាំងមនុស្សខុសច្បាប់នេះ ក៏បង្កការភ័យខ្លាចដល់សង្គមជាតិ និងប្រជាពលរដ្ឋផងដែរ បើមិនត្រូវលុបបំបាក់ ឬទប់ស្កាត់ឱ្យមានប្រសិទ្ធភាពទេនោះ។

លោកថា៖ «ប្រទេសណាដែលមានការអនុវត្តច្បាប់នៅធូររលុង ហើយមានអំពើពុករលួយអីនៅក្នុងហ្នឹង គឺប្រទេសហ្នឹងជាកន្លែងដែលពួកឧក្រិដ្ឋជន គេស្រាវជ្រាវរក កន្លែងណាចន្លោះល្អកន្លែងហ្នឹង គឺគេមករកស៊ីហើយ។ អ៊ីចឹងដូច្នេះបើយើងមើលទៅលើហ្នឹងមិនមែនជាទ្រឹស្តីទេ ប៉ុន្ដែវាជាការសង្កេតមួយដែលគេមើលឃើញ បើចឹងវាត្រូវតែប្រទេសកម្ពុជាយើង ត្រូវគិតមើលទៅលើរឿងហ្នឹងទៅ ហើយដោះស្រាយធ្វើម៉េចឱ្យការអនុវត្តច្បាប់មានប្រសិទ្ធភាព»។

ជុំវិញបញ្ហានេះ អ្នកនាំពាក្យអគ្គនាយដ្ឋានអន្តោប្រវេសន៍ លោក សុខ សុមនា ប្រាប់VODថា ករណីនេះ នាយកដ្ឋានពិតជាបានចាប់បញ្ជូនជនជាតិវៀតណាមខុសច្បាប់ ពាក់ព័ន្ធបទល្មើសឆបោកនៅកម្ពុជាមែន។

តែយ៉ាងណា លោកបដិសេធថា ករណីឧក្រិដ្ឋជនឆបោកឆ្លងដែននេះ មិនជំរុញឱ្យកម្ពុជាក្លាយជាជម្រកឧក្រិដ្ឋជននោះទេ ដោយលោកសំអាងថា អាជ្ញាធរពាក់ព័ន្ធបាននឹងកំពុងព្យាយាមបង្រ្កាប និងទប់ស្កាត់ដូចភ្លៀងរលឹម។

លោកថា៖ «ដោយឡែកពួកគាត់គឺឆ្លងដែនខុសច្បាប់ ហើយធ្វើការងារខុសច្បាប់ ដោយមិននៅក្នុងក្រោមច្បាប់ព្រះរាជាណាចក្រកម្ពុជា អ៊ីចឹងទេជារឿយៗយើងចុះទៅបានឃើញ យើងបង្ក្រាបហើយ អ៊ីចឹងទេក្នុងច្បាប់កម្ពុជា ច្បាប់អន្តោប្រវេសន៍ គឺត្រូវបណ្ដេញគាត់ចេញហើយដាក់គាត់ទៅក្នុង Black List មិនឲ្យចូលស្រុកខ្មែរពីរបីទៅប្រាំឆ្នាំ ឬមួយច្រើនជាងហ្នឹង»។

ប្រធានសមាគមការពារសិទ្ធិមនុស្សអាដហុក លោក នី សុខា មានប្រសាសន៍ថា អំពើឆបោក ការចាប់ជំរិត ឬការបង្ខាំងមនុស្សខុសច្បាប់នៅកម្ពុជា មិនមែនជាលើកទី១ទេដែលអាជ្ញាធររកឃើញនិងបញ្ជូន។

លោកបារម្ភថា បើករណីទាំងនេះ នៅតែបន្តកើតមានជាហូរហែរ វានឹងបង្កការគំរាមគំហែងដល់សន្តិសុខជាតិ សុវត្ថិភាពពលរដ្ឋ ភ្ញៀវជាតិនិងអន្តរជាតិ លែងហ៊ានមកលេងឬធ្វើការវិនិយោគផ្សេងៗនៅកម្ពុជា។

លោកថា៖ «យើងដឹងហើយថាការដែលគាត់អាចមកប្រព្រឹត្តនូវបទល្មើសនៅក្នុងទឹកដីយើងបាន អាចបណ្ដាលមកពីរឿងបញ្ហាអំពើពុករលួយ អាចរឿងមកពីបញ្ហាអំពើបក្ខពួកនិយម មានន័យថា ការយកអំណាចក្នុងការការពារគ្នាទៅវិញទៅមកអី អាហ្នឹងវាជារឿងមួយដែលយើងត្រូវការត្រួតពិនិត្យឡើងវិញឲ្យបានត្រឹមត្រូវ ហើយបើពុំនោះទេ ខ្ញុំគិតថា រឿងទាំងអស់នេះ វាជារឿងមួយចៀសមិនផុតពីការជះឥទ្ធិពលមិនល្អមកដល់ប្រទេសយើងទេ»។

យ៉ាងណា មន្រ្តីអាដហុករូបនេះ ស្នើឱ្យរដ្ឋាភិបាលនិងអាជ្ញាធរពាក់ព័ន្ធ ត្រូវពង្រឹងប្រសិទ្ធភាពបង្រ្កាប ទប់ស្កាត់ឧក្រិដ្ឋឆ្លងដែនទាំងនេះ ពាក់ព័ន្ធនឹងបទល្មើសឆបោក ចាប់ជំរិត ឬបង្ខាំងមនុស្សខុសច្បាប់ជាដើម។

ល្បែងអនឡាញខុសច្បាប់ រួមទាំងបទឧក្រិដ្ឋចាប់ជំរិត និងបង្ខាំងមនុស្ស ត្រូវបានគេមើលឃើញថា វាបានកើនឡើងយ៉ាងគំហុកនាប៉ុន្មានឆ្នាំចុងក្រោយនេះ ទោះរដ្ឋាភិបាលបានប្រកាសបិទល្បែងអនឡាញនេះច្រើនឆ្នាំទៅនេះក្តី។

អំឡុងខែមេសា ឆ្នាំ២០២៤ កម្ពុជាក៏បានបណ្តេញជនជាតិវៀតណាមជាង ២៣០នាក់ ចេញពីកម្ពុជា ក្នុងបទល្មើសឆបោកអនឡាញ។

មានជនជាតិវៀតណាមចំនួន ២៣១នាក់ ត្រូវបានអាជ្ញាធរខេត្តព្រះសីហនុ បណ្តេញចេញពីកម្ពុជាតាម ច្រកអន្តរជាតិព្រែកចាក ខេត្តកំពត ក្រោយរកឃើញថា ជនជាតិវៀតណាមទាំងនោះ ពួកគេមានជាប់ពាក់ព័ន្ធពីបទល្មើសបទឆបោកតាមអនឡាញ ក្នុង៣ទីតាំងផ្សេងគ្នាក្នុងខេត្តព្រះសីហនុ មានទាំងទីតាំងកាស៊ីណូ។

យ៉ាងណា ការបង្ក្រាបពេលនោះ ឡើងប៉ុន្មានខែ ក្រោយពីនាយករដ្ឋមន្ត្រី លោក ហ៊ុន ម៉ាណែត ថ្លែងកាលពីថ្ងៃទី២៩ ខែកុម្ភៈ ឆ្នាំ២០២៤ លុបបំបាត់ឱ្យអស់ នូវទីតាំងដែលមានបទល្មើសឆបោកតាមប្រព័ន្ធអនឡាញ (Scammed Online) ក្នុងខេត្តព្រះសីហនុ ។

ពាក់ព័ន្ធនឹងអំពើពុករលួយវិញ អង្គការតម្លាភាពអន្តរជាតិ ចេញផ្សាយនៅថ្ងៃទី១១ ខែកុម្ភៈនេះ រកឃើញថា កម្ពុជាជាប់ចំណាត់ថ្នាក់អំពើពុករលួយកាន់តែអាក្រក់ជាងឆ្នាំមុន ដែលទាមទារឱ្យកម្ពុជា ត្រូវដោះស្រាយបញ្ហានេះ ជាប្រព័ន្ធនិងទ្រង់ទ្រាយធំ។ បើតាមចំណាត់ថ្នាក់នេះ ថ្មីៗនេះ កម្ពុជាជាប្រទេសមានអំពើពុករលួយកម្រិតខ្ពស់ជាប់គ្នាជិត១០ឆ្នាំ។

អង្គការតម្លាភាពអន្តរជាតិ បញ្ជាក់ថាប្រទេសដែលមិនអាចរើខ្លួនពីអំពើពុករលួយញាំញីបាន បញ្ហាចម្បងមួយ គឺឥទ្ធិពលនយោបាយជ្រៀតជ្រែកប្រព័ន្ធយុត្តិធម៌ ហើយបង្កការឈឺចាប់ដល់ប្រជាពលរដ្ឋជាម្ចាស់ប្រទេស ក៏ព្រោះតែប្រព័ន្ធយុត្តិធម៌មិនអាចដាក់ទោសកំហុសរដ្ឋាភិបាលបាន។

ជាដំណោះស្រាយ អង្គការតម្លាភាពអន្តរជាតិ បញ្ជាក់ថា ត្រូវបានលំហសេរីភាពបញ្ចេញមតិ និងរៀបចំការបោះឆ្នោតឱ្យមានលក្ខណះសេរី ត្រឹមត្រូវ និងយុត្តិធម៌៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។