មជ្ឈមណ្ឌលសកម្មភាពកម្ចាត់មីនកម្ពុជា ឱ្យដឹងថា ខ្លួនបានទទួលព័ត៌មានផ្លូវការពីអង្គការដៃគូ ដោយស្នើសុំឱ្យអង្គភាពនេះធ្វើការរំសាយបុគ្គលិក និងកម្លាំងប្រតិបត្តិការជាង ២០០នាក់ ដែលស្ថិតក្នុងជំនួយរបស់សហរដ្ឋអាមេរិក ចាប់ពីដើមខែមីនាទៅ។
សេចក្តីប្រកាសព័ត៌មានរបស់មជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថា ស៊ីម៉ាក់ ចុះថ្ងៃទី១៣ ខែកុម្ភៈ ឱ្យដឹងថា ការប្រកាសផ្អាកជំនួយភ្លាមៗរបស់រដ្ឋាភិបាលសហរដ្ឋអាមេរិក ចាប់ពីថ្ងៃទី២៥ ខែមករា ឆ្នាំ២០២៥ ដែលមានរយៈពេល ៨៥ថ្ងៃ បានធ្វើឱ្យប៉ះពាល់ដល់កម្លាំងប្រតិបត្តិការមួយចំនួនរបស់អង្គភាពស៊ីម៉ាក់ ដែលគាំទ្រដោយអង្គការដៃគូ ដែលបានទទួលថវិកាជំនួយពីរដ្ឋាភិបាលអាមេរិក។
ស៊ីម៉ាក់ បន្តថា នៅថ្ងៃទី១៣ ខែកុម្ភៈម្សិលមិញនេះ អង្គភាពស៊ីម៉ាក់ បានទទួលព័ត៌មានជាផ្លូវការពីអង្គការដៃគូ ដោយស្នើឱ្យស៊ីម៉ាក់ធ្វើការរំសាយបុគ្គលិក និងកម្លាំងប្រតិបត្តិការបោសសម្អាតមីន ក្នុងគម្រោងជំនួយរបស់សហរដ្ឋអាមេរិក ចាប់ពីថ្ងៃទី១ ខែមីនា ឆ្នាំ២០២៥។
អង្គភាពនេះ បន្តទៀតថា ក្នុងស្ថានភាពចំពោះមុខនេះ អង្គភាពនេះនឹងខិតខំដោះស្រាយគ្រប់លទ្ធភាពនិងមធ្យោបាយ ដើម្បីរក្សាកម្លាំងជំនាញទាំងអស់ដែលត្រូវកាត់រំសាយនេះឱ្យនៅបន្តបំពេញភារកិច្ចក្នុងអង្គភាពធម្មតា។
បើតាមអង្គភាពស៊ីម៉ាក់ កម្លាំងប្រតិបត្តិការរបស់អង្គភាពនេះមានចំនួន ៩២% បន្តប្រតិបត្តិការជាធម្មតា នៅតាមបណ្តាខេត្តនានាដោយរួមទាំងខេត្តដែលត្រូវបានផ្អាកជំនួយនេះផងដែរ ដែលកម្លាំងទាំងនោះគាំទ្រដោយរដ្ឋាភិបាលកម្ពុជា និងប្រទេសផ្តល់ជំនួយដូចជា ជប៉ុន ចិន អាឡឺម៉ង់ JICA និងដៃគូផ្សេងទៀត រួមទាំងវិស័យឯកជន។
ក្រោយពេលប្រធានាធិបតីថ្មីរបស់សហរដ្ឋអាមេរិក លោក ដូណាល់ ត្រាំ បានស្បថឡើងកាន់តំណែងកាលពីថ្ងៃទី២៤ ខែមករា ឆ្នាំ២០២៥ រដ្ឋបាលរបស់លោកបានប្រកាសផ្អាកឬបង្កកការផ្តល់ជំនួយអភិវឌ្ឍន៍របស់ខ្លួនឈ្មោះ ក្រោមគម្រោងទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិហៅកាត់ថា យូសេដ(USAID) រយៈពេលពេល៣ខែ ឬ៩០ថ្ងៃ ដែលធ្វើឱ្យប៉ះពាល់ដល់ប្រទេស និងអង្គការជាដៃគូជាច្រើននៅលើពិភពលោក រួមទាំងកម្ពុជាផងដែរ។
វិស័យអាទិភាពមួយចំនួនដែល USAID ផ្ដោតលើរួមមាន លទ្ធិប្រជាធិបតេយ្យ និងអភិបាលកិច្ច វិស័យសុខភាព អប់រំ ការការពារកុមារ បរិស្ថាន និងសន្តិសុខស្បៀង។
ចំពោះជំនួយផ្នែកលើកកម្ពស់លទ្ធិប្រជាធិបតេយ្យ សិទ្ធិមនុស្ស និងអភិបាលកិច្ច ទីភ្នាក់ងារ USAID បានគាំទ្រអង្គការក្រៅរដ្ឋាភិបាលដែលជាដៃគូសំខាន់ៗចំនួន ១១អង្គការនៅប្រទេសកម្ពុជា។
ស្របពេលគ្នានេះដែរ នៅអំឡុងសប្តាហ៍នេះ លោក សយ សុភាព អ្នកអត្ថាធិប្បាយព័ត៌មានគាំទ្ររដ្ឋាភិបាលគ្រួសារហ៊ុន បាននិយាយបែបចោទប្រកាន់ថា លោក កឹម សុខា បានទទួលលុយពីសហរដ្ឋអាមេរិកតាមរយៈ USAID រាប់លានដុល្លារអាមេរិក ដើម្បីធ្វើបដិវត្តពណ៌ មុននឹងបង្កើតគណបក្សសិទ្ធិមនុស្ស ដើម្បីឈានទៅធ្វើបដិវត្តពណ៌ផ្តួលរំលំរដ្ឋាភិបាល។
ការថ្លែងបែបនេះ បានធ្វើឱ្យអ្នកនយោបាយសិ្នទ្ធនឹងលោក កឹម សុខា បានប្រតិកម្មវាយបកទៅលោក សយ សុភាព វិញដោយចោទជាសំណួរថា ចុះរដ្ឋាភិបាលកម្ពុជា និងការសិក្សារបស់លោក ហ៊ុន ម៉ាណែត នៅអាមេរិកទទួលលុយពី USAID វិញយ៉ាងណាដែរ? តើជាការធ្វើបដិវត្តពណ៌ដែរឬយ៉ាងណា?៕
