ក្រុមអ្នកតស៊ូមតិកម្ពុជា ហៅកាត់ថា (CAT) រកឃើញថា សកម្មភាពចារកម្មប្រព្រឹត្តដោយលោក ហ៊ុន សែន និងបណ្ឌិត សេង សារី ជាអំពើល្មើសច្បាប់ ដែលអាចឈានទៅប្តឹងរំលាយបក្សប្រជាជនកម្ពុជាចេញពីបញ្ជីបក្សនយោបាយ រួមទាំងប្រឈមមុខចំពោះច្បាប់ជាតិ និងអន្តរជាតិ។
នេះបើតាមសេចក្តីវិភាគកម្រាស់៧ទំព័ររបស់ក្រុមអ្នកតស៊ូមតិកម្ពុជា ហៅកាត់ (CAT) ពីទីក្រុងម៉ែលប៊ន ប្រទេសអូស្រ្តាលី ចេញផ្សាយនៅថ្ងៃទី១៧ ខែកុម្ភៈ ឆ្នាំ២០២៥នេះ។
បើតាម CAT លោក ហ៊ុន សែន ធ្វើសកម្មភាពយកការណ៍ឬចារកម្ម ក្នុងនាមគណបក្សប្រជាជន ដោយចិត្តឯង ក្រៅក្របខណ្ឌច្បាប់របស់ប្រទេសកម្ពុជា និងផ្ទុយនឹងច្បាប់របស់ប្រទេសអូស្ត្រាលីទាំងស្រុង។
CAT បញ្ជាក់ថា តួនាទីភារកិច្ចចារកម្ម ឬការយកការណ៍ ស្ថិតក្រោមរាជរដ្ឋាភិបាលដែលជាអង្គការនីតិប្រតិបត្តិទាំងស្រុង ក្នុងនោះមានក្រសួងការពារជាតិ និងក្រសួងមហាផ្ទៃ ជាសេនាធិការ ដែលមិនមានពាក់ព័ន្ធនឹងលោក ហ៊ុន សែន ទេ ។
ក្នុងន័យថា CAT ថា សកម្មភាពចារកម្មនេះ បានក្លាយជាបទល្មើសព្រហ្មទណ្ឌ ប្រព្រឹត្តដោយលោក ហ៊ុន សែន ដែលមានបណ្ឌិត សេង សារី និងគណបក្សប្រជាជនកម្ពុជា ជាសហចារី ។
ដោយឡែក បើគេពិនិត្យមើលច្បាប់ស្តីពីគណបក្សនយោបាយវិញ អំពើចារកម្ម និងអធម្មនុញ្ញដែលប្រព្រឹត្តដោយ លោក ហ៊ុន សែន និងបណ្ឌិត សេង សារី ក្នុងរយៈពេល៤ឆ្នាំនេះ ក្លាយជាភស្តុតាងសម្រាប់តុលាការប្តឹងសុំរំលាយគណបក្សប្រជាជនបាន ប្រសិនបើមានបណ្តឹងតាមនីតិវិធី ដូចគ្នានឹងបណ្តឹងសុំរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧ ដោយតុលាការកំពូល ។
CAT បានដកស្រង់មាត្រា១៦២ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រមកបញ្ជាក់ថា អំពើរបស់លោក ហ៊ុន សែន ក្នុងអំពើចារកម្មតាមរយៈបណ្ឌិត សេង សារី ក្នុងជួរថ្នាក់ដឹកនាំគណបក្សសង្គ្រោះជាតិ គឺជាអំពើរបស់គណបក្សប្រជាជនកម្ពុជា ដែលតាមយាយី បំផ្លិចបំផ្លាញគណបក្សសង្គ្រោះជាតិដោយផ្ទាល់ ។
នៅក្នុងអង្គហេតុនេះ គណបក្សប្រជាជនកម្ពុជា បានទទួលផលពីអំពើទាំងនោះដោយផ្ទាល់ ក្នុងទម្រង់បំផ្លិចបំផ្លាញគណបក្សសង្គ្រោះជាតិ ដើម្បីបន្តកាន់អំណាចដោយគ្មានការបោះឆ្នោតប្រកួតប្រជែង ជាចេតនា និងអំពើប្រព្រឹត្តបំផ្លាញបុគ្គលដ៏ទៃ ជាបទល្មើសព្រហ្មទណ្ឌ ។
ក្រុមអ្នកតស៊ូមតិកម្ពុជា កំណត់ថា សកម្មភាពចារកម្មប្រព្រឹត្តដោយលោក ហ៊ុន សែន និង បណ្ឌិត សេង សារី ព្រមទាំងគណបក្សប្រជាជនកម្ពុជា គឺជាអំពើល្មើសចែងក្នុងក្រមព្រហ្មទណ្ឌ អំពើអធម្មនុញ្ញ និងផ្ទុយនឹងច្បាប់ស្តីពីគណបក្សនយោបាយ ច្បាប់បោះឆ្នោត នៃព្រះរាជាណាចក្រកម្ពុជា ដែលត្រូវប្រឈមមុខនឹងបណ្ដឹងអាជ្ញា និងនីតិវិធីរំលាយគណបក្សប្រជាជនកម្ពុជា ។
ប្រធានក្រុមតស៊ូមតិកម្ពុជា លោក ហុង លឹម ប្រាប់VOD បន្ថែមនៅថ្ងៃទី១៧ ខែកុម្ភៈនេះថា ការចេញសេចក្តីវិភាគផ្លូវច្បាប់នេះ ដើម្បីលាតត្រដាងពីការជ្រៀតជ្រែកអំណាចរបស់លោក ហ៊ុន សែន ក្នុងស្ថាប័នជាតិ តាមទំនើងចិត្ត បង្កមហន្តរាយដល់ជាតិ។
បើតាមលោក ហុង លឹម សកម្មភាពរបស់ លោក ហ៊ុន សែន នេះគឺជាអំពើចារកម្មឆ្លងដែន ហើយប្រទេសអូស្រ្តាលី ក៏បានដាក់កម្ពុជាក្នុងបញ្ជីខ្មៅក្នុងការតាមដានផងដែរ ដែលធ្វើឱ្យកម្ពុជាកាន់តែស្អុយឈ្មោះលើឆាកអន្តរជាតិ ថែមទៀត។
លោកថា៖ «ប្រទេសខ្មែរ ជាប្រទេសមួយក្នុងចំណោមប្រទេស៤ ក្នុងសកលលោក ដែលរដ្ឋាភិបាលអូស្រា្តលី ដាក់ចារក្នុងបញ្ជីស្បែកខ្មៅគេ ថាគេនឹងតាមមើលរឿងចារកិច្ច ចារកម្ម ហើយនឹងរឿងមកធ្វើវិទ្ធង្សនា បំភិតបំភ័យប្រជាពលរដ្ឋគេហ្នឹង។ យើងខ្ញុំនៅនេះ (អូស្រ្តាលី) ខ្ញុំមានការព្រួយបារម្ភដែរ ក្នុងឋានៈជាជនជាតិអូស្ត្រាលីដើមកំណើតខ្មែរហ្នឹង។ ពួកមនុស្សអស់ទាំងនេះគឺយើងមិនដឹង លោក ហ៊ុន សែន គឺថាមានការច្របូកច្របល់ពាក់ព័ន្ធប៉ុន្មាន ក្នុងការកាប់សម្លាប់គេនៅបរទេសហ្នឹង គឹថា មនុស្សទាំងអស់ហ្នឹង ច្បាស់ជាមានចិត្តហ៊ាន គ្មានខ្លាច កុំនិយាយរឿងខ្មាស់អៀន គឺថា អត់មានព្រឺព្រួចអីទេ ក្នុងការហ៊ានមកកាប់សម្លាប់នៅប្រទេសអូស្ត្រាលីទៀត»។
ជុំវិញរឿងនេះ VOD មិនអាចសុំការឆ្លើយតប ពីអ្នកនាំពាក្យគណបក្សប្រជាជនកម្ពុជា លោក សុខ ឥសាន្ត បានទេនៅថ្ងៃទី១៧ ខែកុម្ភៈ ឆ្នាំ២០២៥នេះ ដោយលោកបានចុចផ្តាច់ទូរសព្ទ។
យ៉ាងណាក្តី បើតាមការវិភាគផ្លូវច្បាប់របស់ CAT បញ្ជាក់ថា លោកបណ្ឌិត សេង សារី បានទទួលសិទ្ធិជាជនភៀសខ្លួនមកប្រទេសអូស្ត្រាលី ដោយបានប្រកាសប្រាប់អាជ្ញាធរ និងរដ្ឋាភិបាលអូស្ត្រាលីថា ខ្លួនជាជនរងគ្រោះដោយរបបគ្រប់គ្រង និងការធ្វើទុក្ខបុកម្នេញរបស់រដ្ឋាភិបាលនៃគណបក្សប្រជាជនកម្ពុជា។
ក្នុងក្របខណ្ឌច្បាប់របស់ប្រទេសអូស្រ្តាលី បណ្ឌិត សេង សារី ត្រូវទទួលខុសត្រូវចំពោះមុខច្បាប់នូវអំពើភូតកុហក បោកប្រាស់របស់ខ្លួនក្នុងការរត់ភៀសខ្លួន និងមានកាតព្វកិច្ចសងប្រាក់ដែលខ្លួនបានទទួល ចាប់តាំងពីពេលគាត់បានមកដល់ទឹកដីប្រទេសអូស្ត្រាលី។
CAT សង្កត់ធ្ងន់ថា តាមការសារភាពរបស់បណ្ឌិត សេង សារី ដែលបញ្ជាក់ថាលោកគឺជាមនុស្សធ្វើការងារចារកម្មឲ្យ លោក ហ៊ុន សែន រយៈពេល ៤ឆ្នាំមកហើយនេះ បញ្ជាក់ច្បាស់ថា បណ្ឌិត សេង សារី មិនមែនជាជនរងគ្រោះពីការធ្វើទុក្ខបុកម្នេញនយោបាយ ប្រព្រឹត្តដោយលោក ហ៊ុន សែន ពិតប្រាកដដូចដែលលោកបានអះអាងទេ។
តែបណ្ឌិត សេង សារី និងលោក ហ៊ុន សែន ជាក្រុមតែមួយដែលមានចេតនា និងផែនការច្បាស់លាស់ ព្រមទាំងបានប្រព្រឹត្តអំពើក្នុងចេតនាបំផ្លាញអ្នកដ៏ទៃ ក្នុងក្រុមដឹកនាំនៃគណបក្សសង្គ្រោះជាតិ និងអ្នកប្រជាធិបតេយ្យ ។
បើតាម CAT ព្យសនកម្មនៃអត្ថិភាពអំពើចារកម្មរបស់លោក ហ៊ុន សែន និងបណ្ឌិត សេង សារី គឺជាបទល្មើសចែងក្នុងច្បាប់នៃប្រទេសអូស្ត្រាលី ដែលមិនមែនត្រឹមតែទាមទារឲ្យបណ្ឌិត សេង សារី សងប្រាក់ដែលបណ្ឌិតបានទទួលពីប្រទេសអូស្ត្រាលីត្រឡប់មកវិញ ហើយទទួលខុសត្រូវចំពោះមុខច្បាប់នៃប្រទេសអូស្ត្រាលី ។
យ៉ាងណា សម្រាប់លោកបណ្ឌិត សេង សារី ដែលបានសារភាពថា ខ្លួនជាចារកម្មឱ្យលោក ហ៊ុន សែន នោះ ប្រាប់VOD ថា លោកបានត្រៀមខ្លួនរួចជាស្រេចក្នុងការតតាំងក្តីតាមផ្លូវច្បាប់រួចហើយ បើពិតជាមានការប្តឹងផ្តល់ណាមួយកើតឡើងមែននោះ។
លោកថា៖ «គាត់ធ្វើលិខិតអី អាហ្នឹងជាសិទ្ធិសេរីភាពរបស់គាត់ទេ! ដូចយើងបានដឹងហើយថា នៅក្នុងប្រទេសប្រជាធិបតេយ្យ គាត់មានសិទ្ធិក្នុងការបញ្ចេញមតិ ក៏ប៉ុន្តែយើងក៏មានសិទ្ធិក្នុងការការពារ រកអ្នកដែលយល់ដឹងអំពីផ្លូវច្បាប់ ហើយយើងក៏កំពុងសិក្សាមើលថា តើយើងមានកំហុសចំណុចណាៗ ព្រោះអំឡុងពេលដែលខ្ញុំទទួលប្រាក់ពីនាយករដ្ឋមន្រ្តីហ្នឹង លុយហ្នឹង ជាលុយសិក្សាស្រាវជ្រាវ ជាគម្រោងស្រាវជ្រាវ។ ដូចប្អូនដឹងហើយថា ខ្ញុំជាអ្នកសិក្សាស្រាវជ្រាវ មុខរបរយើងចិញ្ចឹមជីវិតដោយសារលុយយើងស្រាវជ្រាវហ្នឹង។ គ្រាន់តែថា សម្រាប់ពលរដ្ឋទូទៅ ឬសម្រាប់អ្នកមួយចំនួនហ្នឹង គាត់គិតថាឲ្យតែលុយបានមកពីលោកនាយករដ្ឋមន្ត្រី សុទ្ធតែជាលុយកក្វក់ គ្រាន់តែថា ខ្ញុំក៏ទទួលយល់ស្របនូវគំនិតហ្នឹងដែរ»។
ក្រមព្រហ្មទណ្ឌ មាត្រា៤៨០ ចែងថា បទកាន់កាប់ការសម្ងាត់នៃការការពារជាតិដោយគ្មានសមត្ថកិច្ច ត្រូវផ្តន្ទាទោសដាក់ពន្ធនាគារពី ២ឆ្នាំ ទៅ ៥ឆ្នាំ និងពិន័យជាប្រាក់ពី ៤លានរៀល ទៅ ១០លានរៀល អំពើរបស់បុគ្គលគ្មានសមត្ថកិច្ចដែលកាន់កាប់ដោយចេតនានូវព័ត៌មាន វិធី វត្ថុ ឯកសារ សលាកបត្រ ឬទិន្នន័យព័ត៌មានវិទ្យា ដែលមានលក្ខណៈជាការសម្ងាត់នៃការការពារជាតិ។
ច្បាប់បោះឆ្នោត មាត្រា៦ ចែងថា គ្រប់គណបក្សនយោបាយមិនត្រូវធ្វើសកម្មភាព ធ្វើឲ្យមានអបគមន៍ ដែលនាំឲ្យអន្តរាយដល់ឯកភាពជាតិ និងបូរណភាពដែនដី ធ្វើវិទ្ធង្សនាប្រឆាំងនឹងរបបប្រជាធិបតេយ្យ សេរី ពហុបក្ស និងរបបរាជានិយមអាស្រ័យរដ្ឋធម្មនុញ្ញ ធ្វើឲ្យប៉ះពាល់ដល់សន្តិសុខនៃរដ្ឋ បង្កើតកងកម្លាំងប្រដាប់អាវុធ និងធ្វើការញុះញង់ដែលអាចនាំឲ្យមានការបែកបាក់ជាតិ។
យ៉ាងណា ក្រុមអ្នកតស៊ូមតិកម្ពុជា មិនមានជំនឿថា រដ្ឋាភិបាលដឹកនាំដោយគណបក្សប្រជាជន គោរពរដ្ឋធម្មនុញ្ញ និងច្បាប់របស់កម្ពុជាដោយសុចរិត ហើយកសាងសំណុំរឿងបញ្ចប់បទល្មើសព្រហ្មទណ្ឌមានស្ថានទម្ងន់ទោសនេះ និងដាក់ឲ្យជនល្មើសទទួលទោសទេ។
ហេតុនេះ ក្រុមអ្នកតស៊ូមតិកម្ពុជា ប្រកាសជំហរថា ខ្លួននឹងតាមដាន និងបន្តតស៊ូមតិយ៉ាងសកម្មក្នុងក្របខណ្ឌច្បាប់ និងរដ្ឋធម្មនុញ្ញរបស់ប្រទេសកម្ពុជា ជាពិសេសបន្តតាមដានការវិវត្តនៃករណីនេះក្នុងទឹកដី និងច្បាប់នៃប្រទេសអូស្ត្រាលីបន្តទៀត៕
