អតីតមេដឹកនាំគណបក្សសង្គ្រោះជាតិ លោក សម រង្ស៊ី ដែលកំពុងនិរទេសខ្លួន បានផ្ញើសារបែបឌឺដង ទៅកាន់នាយករដ្ឋមន្ត្រីបន្តវេន របស់គណបក្សកាន់អំណាចថា បើចង់ទប់ស្កាត់បទឧក្រិដ្ឋនៅកម្ពុជា ត្រូវក្លាហានចាប់ខ្លួនអ្នកឧកញ៉ា ហ៊ុន តូ និងបើកការស៊ើបអង្កេតលោក ហ៊ុន សែន ។
នេះបើតាមសារដែល លោក សម រង្ស៊ី បង្ហោះលើហ្វេសប៊ុកផ្លូវការរបស់លោក នៅថ្ងៃទី១៧ ខែកុម្ភៈ ឆ្នាំ ២០២៥នេះ។
លោក សម រង្ស៊ី និយាយថាក្នុងន័យដើមថា «បើ ហ៊ុន ម៉ាណែត ក្លាហាន ហើយចង់បង្ហាញភាពជាអ្នកដឹកនាំស្អាតស្អំ គាត់ត្រូវតែហ៊ានចាប់បងប្អូនជីដូនមួយគាត់ “ហ៊ុន តូ” ដែលជាមេក្រុមម៉ាហ្វីយ៉ា មេគ្រឿងញៀននៅកម្ពុជា ហើយបន្ទាប់មក ត្រូវស៊ើបអង្កេតឪពុករបស់គាត់ ចំពោះទំនាក់ទំនង និងការជាប់ពាក់ព័ន្ធទាំងអស់ ដែលឪពុករបស់គាត់មានជាមួយនឹងមេគ្រឿងញៀនដ៏ទៃផ្សេងទៀត»។
ដោយឡែក សម្រាប់តំណាងរាស្រ្តបក្សសង្រ្គោះជាតិ លោក សួន សូរីដា និយាយថា បញ្ហាឧក្រិដ្ឋកម្មគ្រឿងញៀន នៅតែបន្តរីករាលដាលនៅកម្ពុជា ដោយសារកត្តាអំពើពុករលួយ និងបក្សពួកនិយម ។
លោកបន្តថា តួរលេខឧក្រិដ្ឋកម្មគ្រឿងញៀន កម្ពុធរថយចុះទេទៅ្ទយ់តែបន្តកើតនាពេលបច្ចុប្បន្នមិនមានការថយចុះ បែរជាកាន់តែកើនឡើង ទាំងនេះគឺឆ្លុះបញ្ចាំងឱ្យឃើញពីការអសមត្ថភាពដឹកនាំរបស់រដ្ឋាភិបាលក្នុងអាណត្តិថ្មី ដែលដឹកនាំដោយ លោក ហ៊ុន ម៉ាណែត ។
លោកថា៖ «មកពីអំពើពុករលួយ ដោយសារជនដែលមានអំណាចកាង ឬនៅពីក្រោយឧក្រិដ្ឋជនគ្រឿងញៀនទាំងអស់ ដែលអាចជាប់ពាក់ព័ន្ធ ឬក៏រកស៊ីផ្ទាល់ជាមួយតែម្ដង តាមរយៈព័ត៌មានទាំងក្រៅស្រុកទាំងក្នុងស្រុក គឺបានបង្ហាញពីឈ្មោះ លោក ហ៊ុន តូ។ ត្រង់នេះគឺសំខាន់ ប្រសិនបើឈ្មោះនេះ ត្រូវបានគេបង្ហាញតាមរយៈសារព័ត៌មាន រដ្ឋាភិបាលកម្ពុជាគួរតែមានវិធានការ ដើម្បីជាការស៊ើបអង្កេត ជាធម្មតា បើសិនជារដ្ឋាភិបាលនៅស្ងៀមស្ងាត់ ក្រោយពីសារព័ត៌មានជាតិ-អន្តរជាតិ គេចុះផ្សាយអាហ្នឹងមានន័យថារដ្ឋាភិបាល អាចស៊ុមគ្រលុំជាមួយនឹងជនប្រព្រឹត្តទាំងនោះ»។
ជុំវិញបញ្ហានេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន លោកចាត់ទុកថា ករណីនេះជារឿងបុគ្គល លោកសុំមិនអត្ថាធិប្បាយអ្វីបន្ថែមទេ។
លោកថា៖ «ខ្ញុំមិននិយាយប៉ះពាល់ដល់ឯកជនភាពរបស់គេទេ ព្រោះអាហ្នឹងអត់អាចយាយកើតទេ វាប៉ះពាល់សិទ្ធិរបស់គេ រំលោភសិទ្ធិរបស់គេ ហើយយើងមិនអាចនិយាយបានទេ គេរកស៊ីអីអាហ្នឹងជាសិទ្ធិរបស់គេ យើងទៅរំលោភលើសិទ្ធិរបស់គេម៉េចកើត»។
ជុំវិញបញ្ហានេះ អតីតឧកញ៉ា លោក ហេង សិទ្ធី កាលពីថ្ងៃទី៥ ខែមករា ឆ្នាំ២០២៥នេះ បានទម្លាយថា ឧកញ៉ា ហ៊ុន តូ បានប្រើឈ្មោះថ្នាក់ដឹកនាំកម្ពុជា បោកបា្រស់អ្នករកស៊ីបរទេស និងគំរាមមន្រ្តី មិនឱ្យលូកដៃក្នុងអំពើរកស៊ីខុសច្បាប់របស់ខ្លួន រួមមាន ឧក្រិដ្ឋកម្មព្រៃឈើ លក់គ្រឿងញឿន និងការឆបោកតាមអនឡាញ ជាដើម។
ក្នុងសារសំឡេងនោះ លោក ហេង សិទ្ធី ក៏បានរំលេចឈ្មោះ លោក គួច ចំរើន អតីតអភិបាលខេត្តព្រះសីហនុ និងមន្ត្រីពាក់ព័ន្ធមួយចំនួនទៀតថា បានរួមដៃជាមួយឧកញ៉ា ហ៊ុន តូ ប្រព្រឹត្តអំពើឧក្រិដ្ឋកម្មឆបោកនៅកម្ពុជា។
លោកថា៖ «កាលពីមុនគេស្គាល់កម្ពុជា ជាប្រទេសអច្ឆរិយ អង្គរវត្ត ឥឡូវនេះគេស្គាល់កម្ពុជា ដោយសារ ហ៊ុន តូ ដោយសារមន្ត្រីប៉ូលិស ស ថេត ការពារឧក្រិដ្ឋជនអនឡាញ។ កម្ពុជាក្លាយទៅជាកន្លែងបោកប្រាស់ រកស៊ីអនឡាញខុសច្បាប់ »។
យ៉ាងណា លោក ហេង សិទ្ធី ក្រោយទម្លាយរឿងគ្រួសារហ៊ុន ជាប់ពាក់ព័ន្ធយ៉ាងជ្រៅក្នុងបទឧក្រិដ្ឋនៅកម្ពុជានេះ អ្នកនាំពាក្យក្រសួងមហាផ្ទៃ ធ្លាប់អះអាងថា អតីតឧកញ៉ារូបនោះ ត្រូវបានចាប់ខ្លួននៅប្រទេសរុស្ស៊ី ប៉ុន្តែមិនមានសេចក្តីរាយការណ៍ពីការបញ្ជូនមកដល់កម្ពុជាទេ។
ប្រធានអង្គការប្រជាធិបតេយ្យប្រចាំនៅអូស្រ្តាលី លោក ស៊ឹង សែនករុណា បាននិយាយប្រាប់VOD ថា ប្រព័ន្ធដឹកនាំបែបគ្រួសារនិយម មិនអាចទប់ស្កាត់បទឧក្រិដ្ឋបានទេ ដរាបណា គ្រួសារហ៊ុនបន្តក្ដោបអំណាចមិនយកច្បាប់ជាធំនោះ។
លោកថា៖ «តាំងពីជំនាន់ឪពុករបស់លោកនាយករដ្ឋមន្ត្រីមកម្ល៉េះ ក៏មិនបានចាត់វិធានការឲ្យមានភាពម៉ឺងម៉ាត់ ដើម្បីឲ្យមានការទុកចិត្តបានដែរ ពាក់ព័ន្ធទៅនឹងរឿងគ្រឿងញៀន ឆបោកអនឡាញ ជួញដូរមនុស្សអីជាដើម ទាំងអស់នេះយើងឃើញថា នៅតែកើតមាននៅក្នុងសង្គមកម្ពុជា តាំងពីកន្លងមករហូត មកដល់បច្ចុប្បន្ន។ សម្រាប់ខ្ញុំ បើសិនជាឲ្យលោកនាយករដ្ឋមន្ត្រីហ្នឹង ទៅស៊ើបអង្កេតបងជីដូនមួយរបស់ខ្លួន ឬក៏ឪពុករបស់ខ្លួនអីទាំងអស់ ដែលខ្ញុំគិតថា មិនអាចធ្វើទៅរួចទេ»។
ឧកញ៉ា ហ៊ុន តូ ត្រូវបានអន្តរជាតិរកឃើញជាបន្តបន្ទាប់ថា ជាឧក្រិដ្ឋជនលាងលុយកខ្វក់ មេខ្លោងឆបោកតាមអនឡាញ និងឧក្រិដ្ឋជនគ្រឿងញៀន ប៉ុន្តែគ្មានស្ថាប័នជាតិនៅកម្ពុជាបើកការស៊ើបអង្កេតនោះទេ។
ប្រភពពីអន្តរជាតិ ដែលរកឃើញពីបទឧក្រិដ្ឋរបស់ លោក ហ៊ុន តូ រួមមានដូចជា កាសែត DL News នៅទីក្រុងឌូបៃ ក្រុមហ៊ុនវិភាគកាក់ឌីជីថល Elliptic នៅប្រទេសអង់គ្លេស សារព័ត៌មាន The Australian និងទូរទស្សន៍អាល់ចាហ្សីរ៉ា (Al Jezera) ជាដើម។
អង្គការតម្លាភាពអន្តរជាតិ បានចេញរបាយការណ៍ថ្មីមួយ កាលពីថ្ងៃទី១១ ខែកុម្ភៈ ឆ្នាំ២០២៥នេះ រកឃើញថា អំពើពុករលួយនៅក្នុងប្រទេសកម្ពុជា ក្នុងឆ្នាំ២០២៤ មានស្ថានភាពអាក្រក់ជាងឆ្នាំមុន ដែលទាមទារឱ្យកម្ពុជាដោះស្រាយបញ្ហានេះជាប្រព័ន្ធនិងទ្រង់ទ្រាយធំ។
បើតាមរបាយការណ៍នោះ កម្ពុជា មានអំពើពុករលួយខ្ពស់ជាប់គ្នាជិត១ទសវត្សរ៍ បើធៀបនឹងប្រទេស ១៨០ ដែលអង្គការនោះបានសិក្សា។
ប្រទេសដែលមិនអាចរើខ្លួនពីអំពើពុករលួយញាំញីបាន បញ្ហាចម្បងមួយគឺឥទ្ធិពលនយោបាយជ្រៀតជ្រែតប្រព័ន្ធយុត្តិធម៌ ។
អង្កការតម្លាភាពអន្តរជាតិ គូសបញ្ជាក់ថា ជាដំណោះស្រាយ ត្រូវបើកលំហសេរីភាពបញ្ចេញមតិ និងរៀបចំការបោះឆ្នោតឱ្យមានលក្ខណៈសេរី ត្រឹមត្រូវ និងយុត្តិធម៌៕
