អង្គការចលនាមាតាធម្មជាតិ បាននិយាយថា ការដែលសាលាឧទ្ធរណ៍កាត់សេចក្តី ឱ្យសកម្មជនរបស់ខ្លួន៥រូប បន្តជាប់ឃុំក្នុងពន្ធនាគារ«បង្ហាញយ៉ាងពេញទំហឹងពីភាពកំសាករបស់រដ្ឋាភិបាលកម្ពុជា មិនហ៊ានប្រឈមមុខនឹងការពិត នូវអ្វីដែលមាតាធម្មជាតិបានធ្វើកន្លងមក និងរហូតបច្ចុប្បន្ន»។
នេះបើតាមសារដែលអង្គការនេះ បង្ហោះលើគេហទំព័ររបស់ខ្លួន កាលពីថ្ងៃទី១៧ ខែកម្ភៈ ឆ្នាំ២០២៥ ក្រោយសាលាឧទ្ធរណ៍ បានកាត់ក្តី មិនឱ្យសកម្មជន៥រូប បាននៅក្រៅឃុំតាមការស្នើសុំ ខណៈពួកគេត្រូវបានចាប់ឃុំខ្លួន កាលពីថ្ងៃទី២ ខែកក្កដា ឆ្នាំ២០២៤ ពោលគឺជិត៨ខែទៅនេះ។
មាតាធម្មជាតិ បាននិយាយថា សាលាឧទ្ធរណ៍បានសម្រេចបដិសេដសំណើរនៅក្រៅឃុំសម្រាប់សកម្មជនបរិស្ថានទាំង៥រូប។
ប្រភពនោះបន្តថា៖ «វាមិនមែនជារឿងចម្លែកនោះទេ សម្រាប់ការបដិសេធសំណើរនៅក្រៅឃុំរបស់តុលាការអយុត្តិធម៌ស្រុកខ្មែរ ដែលតែងតែយកច្បាប់មកគាបសង្កត់ដល់មនុស្សស្មោះត្រង់ ហើយវាបានបង្ហាញយ៉ាងពេញទំហឹងពីភាពកំសាករបស់រដ្ឋាភិបាលខ្មែរ ដែលមិនហ៊ានប្រឈមមុខនឹងការពិត នូវអ្វីដែលចលនាមាតាធម្មជាតិបានធ្វើកន្លងមករហូតដល់បច្ចុប្បន្ន»។
យុវជនទាំង៥រូប ត្រូវសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគារចន្លោះពី ៦ឆ្នាំ ដល់ ៨ឆ្នាំ ដោយសារតែភាពសកម្មនិយមផ្នែកការពារបរិស្ថាន និងធនធានធម្មជាតិរបស់ពួកគេ ប៉ុន្តែត្រូវបានតុលាការចោទ ពីបទ ប្រមាថព្រះមហាក្សត្រ និងរួមគំនិតក្បត់ ដើម្បីផ្តួលរំលំរដ្ឋាភិបាល។
សកម្មជនបរិស្ថានទាំង៥រូបនោះ រួមមាន កញ្ញា ឡុង គន្ធា លោក លី ចាន់ដារ៉ាវុត កញ្ញា ភួន កែវរស្មី លោក ថុន រដ្ឋា និងលោក យីម លាងហ៊ី នឹងត្រូវត្រឡប់ទៅកាន់ពន្ធនាគារវិញ តាមសេចក្តីសម្រេចរបស់តុលាការ ។
ពួកគេទាំងនោះ បានដាក់សំណើសុំនៅក្រៅឃុំ ខណៈសំណុំរឿងរបស់ពួកគេ កំពុងស្ថិតក្នុងដំណាក់កាលបណ្តឹងឧទ្ធរណ៍។
អង្គការលីកាដូ ធ្លាប់និយាយថា សាលក្រមចោទប្រកាន់នេះ គឺជារឿងដែលគួរឱ្យអាម៉ាស់យ៉ាងខ្លាំង សម្រាប់ប្រជាជាតិកម្ពុជា និងធ្វើឱ្យប្រព័ន្ធយុត្តិធម៌រងភាពអាម៉ាស់។
ក្រោយចាប់ខ្លួនសកម្មជនទាំងនោះ ត្រូវរដ្ឋាភិបាលបញ្ជូនទៅឃុំខ្លួននៅពន្ធនាគារដាច់ដោយឡែកពីគ្នា ដូចជានៅពន្ធនាគារត្រពាំងផ្លុង ខេត្តត្បូងឃ្មុំ និងពន្ធនាគារខេត្តព្រះវិហារ ដែលមានចម្ងាយរាប់រយគីឡូម៉ែត្រ ពីរាជធានីភ្នំពេញជាដើម។
ការណ៍នេះ អង្គការសិទ្ធិមនុស្ស ចាត់ទុកថា ជាការធ្វើទារុណកម្មផ្លូវចិត្ត ព្រោះវាបានបង្កការលំបាកដល់ក្រុមគ្រួសារ និងមេធាវី ក្នុងការស្វែងរកជួបដើម្បីសួរសុខទុក្ខ ក៏ដូចពិគ្រោះយោបល់ផ្លូវច្បាប់ ដើម្បីតតាំងក្តី ស្វែងរកយុត្តិធម៌នៅតុលាការ។
បន្ថែមពីនេះ បើតាមអង្គការលីកាដូ នៅថ្ងៃទី១៧ ខែកុម្ភៈ ដដែលនេះ អនុប្រធានពីររូប នៃសមាគមសម្ព័ន្ធនិសិត្សបញ្ញវន្តខ្មែរ (KSILA) ត្រូវបានសាកសួរ ដោយចៅក្រមស៊ើបសួរ នៅខណៈដែលសាលាដំបូងរាជធានីភ្នំពេញកំពុងពិចារណា ថាតើគួរបន្តឃុំខ្លួនបណ្តោះអាសន្នក្នុងរយៈពេលបន្ថែមលើ កញ្ញា រៀម ស្រីពេជ្ររតនា និងលោក ធី ថន ដែរឬទេ។ អ្នកទាំងពីរត្រូវបានបដិសេធសំណើរនៅក្រៅឃុំ ដោយតុលាការកំពូលកាលពីខែមុន។
សកម្មជនជាយុវជនទាំងពីររូបនេះ ត្រូវបានចាប់ខ្លួនពីបទ រួមគំនិតក្បត់ កាលពីខែសីហា អំឡុងពេលនៃការបង្ក្រាបទ្រង់ទ្រាយធំលើមនុស្សជាង ១០០នាក់ ដែលអ្នកទាំងនោះត្រូវបានគេចោទប្រកាន់ថា បានបញ្ចេញមតិ ឬគ្រោងនឹងប្រមូលផ្តុំគ្នាទាក់ទងនឹងតំបន់ត្រីកោណអភិវឌ្ឍន៍ កម្ពុជា វៀតណាម និងឡាវ (CLV-DTA) ដែលជាកិច្ចព្រមព្រៀងសហប្រតិបត្តិការក្នុងតំបន់ ហើយដែលកម្ពុជាទើបតែសម្រេចដកខ្លួនចេញកាលពីពេលថ្មីៗនេះ៕
